Chhut-sí-sòaⁿ_09
|
出死線_09 |
|---|---|
| Tēⁿ Khe-phoàn | 鄭溪泮 |
|
Chit-tiuⁿ phoe kià khì liáu, Choân-hiàn Sian-siⁿ kā Sian-siⁿ-niû kóng, Lí khòaⁿ, sui-jiân kā i khì-choa̍t, iáu-kú hôe chit-ê phoe bē pháiⁿ-thiaⁿ, lí-khì chin ti̍t. Kóng-liáu chiū chiong phoe chhah-tī phoe-tē.
|
這張批寄去了，全賢先生kā先生娘講：「你看，雖然kā伊去絕，iáu-kú回這個批bē歹聽，理氣真直。」講了就將批chhah-tī批袋。 |
|
Keh chá-khí, Hūi-chú sàu-tè, khòaⁿ-kiⁿ Chin-seng ê miâ tī phoe-lông-āu, chiū poah-kang khui-khòaⁿ. Tùi-thâu khòaⁿ kàu-bóe. Khòaⁿ kàu hit-kù
|
隔早起，惠子掃地，看見真聲ê名tī批囊後，就撥工開看。Tùi 頭看到尾。看到hit句 |
|
“Beh cháiⁿ-iūⁿ sé kiàn-siàu tī chèng-lâng ê tiong-kan,” hut-jiân ba̍k-sái ti̍h--lo̍h-lâi, siūⁿ kóng, ū-iáⁿ to-tio̍h, góa sit-chhò lah.
|
「Beh怎樣洗見笑tī眾人ê中間？」忽然目屎滴--落--來，想講：「有影都著，我失錯--lah。」 |
|
Khah tōa-òaⁿ. Jîn-hô sian-siⁿ kàu-ūi, ōe-thiⁿ-soat-tē; nā-sī Hūi-chú bô in-ūi hó-thiaⁿ ê ōe lâi tùi-tiōng, kan-ta siūⁿ hit-kù “Beh cháiⁿ-iūⁿ sé kiàn-siàu tī chèng-lâng ê tiong-kan,” sím-koaⁿ chhin-chhiūⁿ hóe-to̍h. Lō͘-hóe kā i kóng, Góa sī ka-tī ê lâng, chīn-chêng kā lí kóng, taⁿ lí kin-mê khì siūⁿ khòaⁿ, bin-ná chá-khí tio̍h kā góa hôe-ho̍k.
|
Khah大晏，仁和先生到位，話天說地；但是惠子無因為好聽ê話來對重，kan-ta想hit句「Beh怎樣洗見笑tī眾人ê中間？」，心肝親像火著。路尾kā伊講：「我是家己ê人，盡情kā你講，今你kin暝去想看，明仔早起著kā我回覆。」 |
|
Keh chá-khí chiū kiò, Hūi-chú ah, taⁿ li siūⁿ-liáu cháiⁿ-iūⁿ? Hūi-chú kóng, Tāi-chì chhut-tùi Siōng-tè, taⁿ góa m̄-káⁿ ûi-ke̍h. Sian-siⁿ chin hoaⁿ-hí, chiū tńg-lâi, chia̍t-pò ka-im, tùi án-ni chiū koh chhiàng tē 3 pái, jiân-āu tiāⁿ-tio̍h.
|
隔早起就叫，惠子--ah，今你想了怎樣？惠子講：「事誌出tùi 上帝，今我m̄敢違逆。」先生真歡喜，就轉--來，捷報佳音，tùi án-ni就koh chhiàng第3擺，然後定著。 |
|
* * *
|
* * * |
|
Keh-nî chiaⁿ-goe̍h, koat-tēng beh hō͘ Hūi-chú lâi ji̍p Hū-lú Sèng-chheh ha̍k-īⁿ, lāu-bó kià-phoe kiò Chin-seng lâi chhia-thâu ngiâ-chi̍h, i beh tùi Pat-sian-chng chhōa i lâi. Chin-seng chhēng-liáu sé-luh ê chè-ho̍k, tì-tó chi̍t-téng thian-sek ê chè-bō, chiū khì-kàu chhut-ji̍p-kháu hōng-gêng. Í-keng lo̍h-chhia, Chì-khîn chiū kiò, Chin-seng ah, lí lâi. Chin-seng kóng, Sī. Chiū kiò 2-tiuⁿ jîn-le̍k-chhia, hō͘ in chē-khì. Chin-seng kìⁿ-tio̍h Hui-chú sim-koaⁿ chin hoaⁿ-hí; Hūi-chú-ah iā chin boán-chiok. Hit-ê Chêng-kéng oán-jiân ba̍t-hûn ê tiong-kan, chhut-hiân kng-bêng ê goe̍h. Chin-seng kap Hūi-chú, sui-jiân bōe-bat kong-ōe, iā m̄-bat kià-phoe, iáu-kú in tùi kî-tó lâi saⁿ-kau-pôe, chit-hō sū, nā m̄-sī Siōng-chú, sáⁿ-lâng beh sìn i ah!
|
隔年正月，決定beh hō͘惠子來入婦女聖冊學院，老母寄批叫真聲來車頭迎接，伊beh tùi八仙庄chhōa伊來。真聲穿了sé-luh（silk）ê制服，戴tó一頂天色ê制帽，就去到出入口奉迎 。已經落車，至勤就叫：「真聲--ah，你來。」真聲講：「是。」就叫2張人力車，hō͘ in坐--去。真聲見著惠子心肝真歡喜；惠子仔也真滿足。Hit個情景宛然密雲ê中間，出現光明ê月。真聲 kap 惠子，雖然未bat講話，也m̄-bat寄批，iáu-kú in tùi祈禱來相交陪，這號事，若m̄是上主，啥人beh信--伊--ah！ |
|
Móe-pái sio-gū, ū-kám tio̍h chin chhù-bī, sim-koaⁿ ū hián-chhut chheng-chúi ê thiàⁿ. Pó-lô hêng-iông kóng, Ki-tok thiàⁿ kàu-hōe, chhin-chhiūⁿ tiōng-hu thiàⁿ hu-jîn-lâng, si̍t-chāi chin tio̍h. Thoân-sim-su̍t ê ò-biāu, phah-sǹg sī án-ni; bô, m̄-sī, in sī kiōng-bêng ê ài-sim lah!
|
每擺相遇，有感著真趣味，心肝有顯出清水ê疼。保羅形容講「基督疼教會，親像丈夫疼婦人人」，實在真著。傳心術ê奧妙，扑算是án-ni;無，m̄是，in是共鳴ê愛心--lah！ |
|
Chi̍t-pái Chin-seng khì chhōe Ko͘-niû, Ko͘-niû kóng, Hūi-chú chin hó, Chin ha̍h. Tú-á tī-chia chò chhâi-hông, góa kiò i lâi. Chin-seng kóng, M̄-bián, góa lâi m̄-sī ūi-tio̍h án-ni. In ê loân-ài put-chāi tī bah, sī chāi tī sim.
|
一擺真聲去chhōe姑娘，姑娘講：「惠子真好，真合。抵仔tī chia做裁縫，我叫伊來。」真聲講：「M̄免，我來m̄是為著án-ni。」In ê戀愛不在tī肉，是在tī心。 |
|
* * *
|
* * * |
|
1917 nî 3-goe̍h, Chin-seng chut-gia̍p, siū-phài khì chò thoân-tō, tòa tī Sù-î-chng, chiū lāu-bó chá-nî ê chì-khì chiâⁿ lah.
|
1917年3月，真聲卒業，受派去做傳道，tòa tī四維庄，就老母早年ê志氣成--lah。 |
|
Kiat-hun ê kî-ji̍t í-keng kàu, sì-goe̍h 4-jit ē-po͘ 6-tiàm, Chin-seng kap Hūi-chú chiū tī Sam-siâⁿ-chng kiâⁿ-liâu Kiat-hun-sek. Choân-hiàn sian-siⁿ, ū ūi-tio̍h in pâi tōa iàn-sia̍h. Hit-tah iú-miâ ê 8-im, iā lâi tàu-nāu-jia̍t, tiⁿ-taⁿ-kiò. Che-sī Chin-seng tē-it hoaⁿ-hí ê ji̍t, ná-chún I-sat chhōa Lī-pek-ka ji̍p lāu-bó ê tiùⁿ-pâng lâi hoaⁿ-hí. Chin-seng chhōa Hūi-chú, chiâⁿ-chòe hu-hū, ji̍p-tī Sèng-ài ê seng-oa̍h. Keh 3-ji̍t chiū khì tiàm kàu-hōe. Iû-goân tùi thun-lún lâi siat-chiàⁿ oân-móa ê ka-têng. Chin-seng chin thiàⁿ Hūi-chú, Hūi-chú iā chin gâu pang-chān Chin-seng. In, taⁿ ji̍t-ji̍t sī sèng-ài ê lâng lah!
|
結婚ê期日已經到，4月4日下晡6點，真聲 kap 惠子就tī三城庄行了結婚式。全賢先生，有為著in排大筵席。Hit搭有名ê八音，也來鬥鬧熱，tiⁿ-taⁿ-叫。這是真聲第1歡喜ê日，若準以撒chhōa利百加入老母ê數房來歡喜。真聲娶惠子，成做夫婦，入tī聖愛ê生活。隔三日就去tiàm教會。猶原tùi 吞忍來siat-chiâⁿ完滿ê家庭。真聲真疼惠子，惠子也真gâu幫贊真聲。In，今日日是聖愛ê人--lah！ |
|
27 Lí chiah siūⁿ khòaⁿ-māi!
|
27你chiah想看覓！ |
|
Chin-seng kap Hūi-chú, tiàm-tī Sù-î-chng ê kàu-hōe 2 nî-kú, hit só͘-chāi sui-sī chháu-tē, kàu-hōe sè-sè, chhù-the̍h hi-bî, jîn-kháu bi̍h-si̍h; iáu-kú chhiū-nâ bō͘-sēng, hiang-kó hó-kéng. Khe-piⁿ hî-tî chin sim-sek, ē-po͘-sî, ji̍t beh lo̍h-soaⁿ, nā ū-êng Chin-seng kap Hūi-chú khì-hia kiâⁿ-iû, Chin-seng chiū kho͘-chheⁿ-ioh. Chi̍t-ê kho͘, tùi hî-tî-á ê lêng-kak-té, ti̍t-ti̍t thiàu-tùi chiā-hn̂g khí-lâi. Chin-seng ti̍t-ti̍t kho͘, Hui-chú ti̍t-ti̍t lia̍h, chin chhù-bī. Tńg-lâi ê sî, chhù-piⁿ kóng, Lín 2-ê chin hó.
|
真聲 kap 惠子，tiàm-tī四維庄ê教會2年久，hit所在雖是草地，教會細細，厝宅稀微，人口bi̍h-si̍h;iáu-kú樹林茂盛，香果好景。溪邊魚池真心適，下晡時，日beh落山，若有閒真聲 kap 惠子去hia行遊，真聲就kho͘青ioh。一下kho͘，tùi 魚池仔ê菱角底，直直跳tùi蔗園起--來。真聲直直kho͘，惠子直直掠，真趣味。轉來ê時，厝邊講：「Lín 2個真好。」 |
|
Chin-seng goe̍h-kng-mê chiū chhōa tńg chi̍t-ê lâng khi pò͘-tō, ū-sî iā chham Hūi-chú khì thàm hōe-iú. Chit-ūi ê hōe-iú chin sim-sek: Thái-ko--ê iā-ū; bô ke-kah--ê iā-ū; hó-gia̍h--ê iā-ū; sàn-hiong--ê iā-ū. Tāi-ke chhin-chhiūⁿ chi̍t-thé, chin hó kau-pôe.
|
真聲月光暝就chhōa當職ê人去佈道，有時也參惠子去探會友。這位ê會友真心適：Thái-ko--ê也有；曲痀--ê也有，íⁿ-o͘N3--ê也有，青瞑--ê也有，無ke-kah--ê也有；好額--ê也有；散hiong--ê也有。逐家親像一體，真好交陪。 |
|
Chin-seng tī-hia ū kúi-nā hāng siū kám-kek ê tāi-chì.
|
真聲tī-hia有幾若項受感激ê事誌。 |
|
Thâu-chi̍t-hāng:
|
頭1項 |
|
Lī Sù-î-chng ji̍p-tang, kòe 10 gōa iân-khe ê soaⁿ-lāi, kiò-chò Kó͘-chhoan-chng. Ū chi̍t-ê Ki-no͘h-khoh sàng. I kū-té sī a-phiàn, kiáu, chiú, chhī cha-bó͘ ê lâng. It-tàn hoán-hóe, pìⁿ-chò têng-thâu-siⁿ: a-phiàn ké-lī-li; kiáu-jí sio-lio-khì; ta̍k lé-pài kiâⁿ phò͘-gōa lō͘ lāi lé-pài; siông-siông ì kàu-ūi ê sî, pa̍t-lâng iáu-bōe chia̍h chá-khí. Si̍t-chāi jia̍t-sim ê lâng bô hiâm hn̄g.
|
離四維庄入東，過10外沿溪ê山內，叫做古川庄。有1個Ki-no͘h-khoh sàng(紀野子）。伊舊底是鴉片、局、酒、飼查某ê人。一旦反悔，變做重頭生：鴉片改離離；局子燒lio--去；逐禮拜行phò͘-外路來禮拜；常常伊到位ê時，別人iáu-bōe食早起。實在熱心ê人無嫌遠。 |
|
Tē-2-hāng:
|
第2項 |
|
Jū-seng hiaⁿ, chit-lâng tī Sù-î-chng chin khoeh-kiáⁿ. Sui-jiân sí chi̍t-ê hāu-siⁿ, koh sí chi̍t-ê cha-bó͘-kiáⁿ, i iā bô piàn-ōaⁿ i ê chhiò-iông, iû-goân jia̍t-sim ho̍k-sāi Chú. I siông-siông kóng, Siōng-tè ê chí-ì, lâng m̄-thang ûi-ke̍h. Si̍t-chāi sī An-lo̍k-ke.
|
裕生兄，這人tī四維庄真缺子。雖然死1個後生，koh死1個查某子，伊也無變換伊ê笑容，猶原熱心服事主。伊常常講：「上帝ê旨意，人m̄-thang 違逆。實在是安樂家。 |
|
Tē-3-hāng:
|
第3項 |
|
Jîn-chiok-peh, chit-ê lâng kap Chin-seng chò chhù-piⁿ, i chin lò, thâu-mn̂g chhùi-chhiu pe̍h, koh chin sàn-hiong. I sī pē-lāu-kiáⁿ-iù. Sui-sī sàn-hiong, iáu-kú ta̍k lé-pài hiàn-chîⁿ tī sài-chîⁿ-siuⁿ. Kàu nî-bóe kiat-siàu, pí pù-lâng ū khah chē. Sàn-hiong-lâng sió-khóa chîⁿ ta̍uh-ta̍uh hiàn, iâⁿ-kòe pù-lâng kú-kú hiàn 1-pái. Chi̍t-ti̍h chi̍t-ti̍h ê chúi, chiāⁿ-chò hái hiah-tōa, chi̍t-lia̍p chi̍t-lia̍p n̂g-soa, kiat-chò tē kap soaⁿ. Góa goān Siōng-tè ke-thiⁿ hok-khì hō͘ chit-ê lāu-lâng.
|
仁足伯，這個人kap真聲做厝邊，伊真lò,頭毛嘴鬚白，koh真散hiong。伊是父老子幼。雖是散hiong，iáu-kú逐禮拜獻錢tī賽錢箱。到年尾結數，比富人有較濟。散hiong人小可錢ta̍uh-ta̍uh獻，贏過富人久久獻一擺。一滴一滴ê水，成做海hiah大，一粒一粒黃沙，結做地 kap 山。我願上帝加添福氣hō͘這個老人。 |
|
Tē-4-hāng:
|
第4項 |
|
Chia-ê chí-mōe chin jia̍t-sim gâu thiàⁿ-thàng, kî-tiong ū Kó͘-ḿ, kap i ê cha-bó͘-kiáⁿ Pe̍h-chúi-só, sī chin thé-thiap Chin-seng. Ná-chún chāi-chá Boa̍t-tāi-lia̍p ê Má-lī-a kap pa̍t-ê chí-mōe, gâu pang-chān Iâ-so͘ ê khiàm-khoeh.
|
Chia ê姊妹真熱心gâu疼痛，其中有顧姆， kap 伊ê查某子白水嫂，是真體貼真聲。若準在早抹大粒ê瑪利亞 kap 別個姊妹，gâu幫贊耶穌ê欠缺。 |
|
* * *
|
* * * |
|
Chi̍t-ji̍t ū-lâng kā Chin-seng kóng, Pe̍h-chúi hiaⁿ hoan 7-kài, taⁿ beh àn-chóaⁿ? Chin-seng kóng, Kiám ū-iáⁿ? Ìn kóng, Chin-chiàⁿ. Chin khó-sioh, chîⁿ chi̍t-ē ū, bô lâng káⁿ kóng--i. Chin-seng kóng, Iâ-so͘ káⁿ. Ìn kóng, Tio̍h--noh, tû-khì Iâ-so͘, í-gōa sáⁿ-lâng káⁿ? Chin-seng kóng, Iâ-so͘ nā kah góa khì, góa tek-khak káⁿ-khì. Ìn kóng, Lí tio̍h sè-jī, kiaⁿ-liáu hông-hóe-thâu, siat-sú hoat siū-khì, lí chiū hùi-khì. Chin-seng kóng, Kiám án-ni! Hit-lâng tńg-khì liáu, Chin-seng tī pâng-lāi teh siūⁿ, i sī tng-chit, koh sī chin thiàⁿ góa ê lâng, góa kin-ná-ji̍t tek-khak tio̍h khó͘-khǹg i, chiah ū thiàⁿ--i; i nā beh thiaⁿ, hó; nā m̄-thiaⁿ, góa bô kòe-sit. M̄-chai beh cháiⁿ-iūⁿ kóng, góa kiám-ū hit-hō táⁿ, chiū kî-tó Siōng-tè. Kî-tó soah chiū hó-táⁿ khì, ná-chún kiâⁿ sé-lé Iok-hān teh kàn-chèng Hi-lu̍t. Lō͘-ni̍h tú-tio̍h chi̍t-lâng, mn̄g kóng, Sian-siⁿ beh chhòng sím-mi̍h? Hit-lâng sī lāu-lâng. Chin-seng chiū kā i kóng só͘ beh khì ê in-toaⁿ. I kóng, Bo̍h-tit, i sī ū sè-le̍k ê lâng, khó͘-khǹg liáu hō͘ i m̄ hoaⁿ-hí. Chin-seng kóng, Hiaⁿ-tī ah, góa ū chi̍t-ê ku-koài-phiah put-lūn sī chhin-lâng hó-pông-iú, nā ū m̄-tio̍h: beh kiò góa tèⁿ m̄-chai, lâi jīn i chò tio̍h, gòa bô-boeh; iū-koh góa nā siûⁿ-liáu koat-toàn, bô sûi-piān ké-ōaⁿ. Só͘-í góa tek-khak beh khì, iā beh chiàu liông-sim lâi kóng.
|
一日有人kā真聲講：「白水兄犯七誡，今beh àn-chóaⁿ？」真聲講：「敢有影？」應講：「真正。真可惜，錢一--下有，無人敢講--伊。」真聲講：「耶穌敢。」應講：「著--noh，除去耶穌，以外啥人敢？」真聲講：「耶穌若 kap 我去，我的確敢去。」應講：「你著細膩，驚了烽火頭，設使發受氣，你就費氣。」真聲講：「敢án-ni?」Hit人轉去了，真聲tī房內teh想：伊是當職，koh是真疼--我ê人，我今仔日的確著苦勸--伊，才有疼--伊；伊若beh聽，好；若m̄聽，我無過失。M̄知beh怎樣講？我敢有hit號膽，就祈禱上帝。祈禱煞就好膽--去，若準行洗禮約翰teh干證希律。路--ni̍h抵著一人，問講：「先生beh創甚物？」Hit人是老人。真聲就kā伊講所beh去ê因端。伊講：「莫得，伊是有勢力ê人，苦勸了hō͘伊m̄歡喜。」真聲講：「兄弟--ah，我有1個古怪癖，不論是親人好朋友，若有m̄著：beh叫我tèⁿ m̄知，來認伊做著，我無boeh;koh我若想了決斷，無隨便改換。所以我的確beh去，也beh照良心來講。」 |
|
Kóng soah chiū khì,
|
講煞就去。 |
|
Chin-seng chit-tia̍p sī siàu-liân, iáu-kú ū ûi-giâm ê khoán, Chiū chhiáⁿ Pe̍h-chúi hiaⁿ, lâi pài-tn̄g, kā i kóng, Pe̍h-chúi hiaⁿ, lí pêng-sò͘ chin thiàⁿ góa, kin-ná-ji̍t ū kúi-kù ōe, èng-kai tio̍h kā lí kóng, chiah-sī thiàⁿ-tio̍h lí. Góa thiaⁿ lí hoān-tio̍h 7-kài, chit-ê sū, í-keng hián-chhut, bô-thang piān-pok. Kiám-chhái ē-môa-tit lâng; nā-sī bē môa-tit Siōng-tè. Ti Siōng-tè ê bīn-chêng, Ki-tok ê sin-piⁿ, ū ha̍p-gî á-bô? Lán sī Ki-tok-tô͘, hòng-kiam lán sī tng kàu-hōe ê chit, chò hōe-iú ê bô͘-iūⁿ, án-ni, lí chiah ka-tī siūⁿ khòaⁿ-mâi leh!
|
真聲這tia̍p是少年，iáu-kú有威嚴ê款，就請白水兄來拜堂，kā伊講：「白水兄，你平素真疼--我，今仔日有幾句話，應該著kā你講才是疼著你。我聽你犯著7誡，這個事，已經顯出，無-thang辯駁。Kiám-chhái會瞞tit人；但是bē瞞tit上帝。Tī上帝ê面前，基督ê身邊，有合宜抑無？咱是基督徒，況兼咱是當教會ê職，做會友ê模樣，án-ni，你chiah家己想看覓--leh！」 |
|
Chin-seng kóng chiah-ê ōe ê sî, Pe̍h-chúi hiaⁿ ba̍k-sái ná lo̍h-hō͘, ìn kóng, Hah!... ...Góa chi̍t-sî siū-bê, ná-chún bê-lō͘ ê iûⁿ, kin-ná-ji̍t, lí bián-lē chiah-ê ōe, góa chhin-chhiūⁿ khùn-chhéⁿ, góa taⁿ chhim-chhim chai góa ê m̄-tio̍h. Chin-seng kóng, Kám-siā Siōng-tè, góa kóng chiah-ê m̄-sī góa káⁿ lâi kóng, sī Siōng-tè chhe góa lâi; taⁿ lí ū hoán-hóe ê sim, góa chin hoaⁿ-hí, chiū Siōng-tè iā-sī án-ni. Kóng soah, chiū kap i saⁿ-kap kî-tó. Liáu-āu Pe̍h-chúi hiaⁿ iû-goân chin jia̍t-sim, chin thiàⁿ Chin-seng. Si̍t-chāi sī tùi kî-tó lâi khah iâⁿ.
|
真聲講chiah-ê話ê時，白水兄目屎那落雨，應講：「Hah！......一時受迷，若準迷路ê羊，今仔日，你勉勵chiah-ê話，我親像睏醒，我今深深知我ê m̄著。」真聲講：「感謝上帝，我講chiah-ê m̄是我敢來講。是上帝差我來；今你有反悔ê心，我真歡喜，就上帝也是án-ni。」講煞，就 kap 伊相 kap 祈禱。了後白水兄猶原真熱心，真疼真聲。實在是tùi 祈禱來較贏。 |
|
28 Thè giâ si̍p-jī-kè
|
28替舉十字架 |
|
Chi̍t-ji̍t a-hiaⁿ Chheng-liû, tī Sam-siâⁿ-chng tòa io̍h-tiàm, hut-jiân tò-tńg-lâi, lō͘ tùi Sù-î-chng keng-kòe, beh tńg-khì Chēng-chúi-piⁿ, chiū oa̍t-ji̍p-lâi chhōe Chin-seng.
|
一日阿兄清流，tī三城庄tòa藥店，忽然倒轉--來，路tùi 四維庄經過，beh轉去靜水邊，就越入來chhōe真聲。 |
|
Chin-seng mn̄g kóng, Hiaⁿ-ko, lí cháiⁿ-iūⁿ tò-tńg-lâi? Ìn kóng, Tī Sam-siâⁿ chiah-kú kám-mō͘ chin-chē, tak7-ji̍t ū sí-lâng, khòaⁿ-tio̍h ē chheⁿ-chhìn, thàn chîⁿ iú-sò͘, sìⁿ-miā tio̍h kò͘.
|
真聲問講：「兄哥，你怎樣倒轉--來？」應講：「Tī三城chiah久感冒真濟，逐日有死人，看著會青-chhìn,趁錢有數，生命著顧。」 |
|
Keh-mê chiū tńg-khì Chēng-chúi-piⁿ, āu-lâi khì Lâm-á-kheⁿ hō͘-lâng chhiàⁿ tòa-tiàm.
|
隔暝就轉去靜水邊，後來去楠仔坑hō͘人倩tòa店。 |
|
Kòe 2 lé-pài, ū-lâng pò kóng, Lín hiaⁿ-ko phòa-pīⁿ chin siong-tiōng, hoan-hù lí tńg-khì. Chin-seng thàu-mê tńg-khì, sûi-sî khì cháu-chông i-seng, kā i mn̄g-io̍h. I sī hì-iām, siang-pêng lóng tēng. Hit-tia̍p hiaⁿ-só í-keng siⁿ 2-ê hāu-siⁿ 2-ê cha-bó͘-kiáⁿ. Tōa cha-bó͘-kiáⁿ sí-khì, tē 2 hāu-seⁿ pun āu-thâu. Hit-sî koh siⁿ chi̍t-ê cha-bó͘ gin-ná 3-ji̍t teh thiu-the̍h, hē-tī nî-chîⁿ-kháu teh puh-chhi. Chin-seng hit goe̍h-ji̍t ê sin-kim 13 kho͘, ūi-tio̍h hiaⁿ, khì liáu-liáu. Khòaⁿ-kiⁿ bô khah hó, chiū phah tiān-pò khì Pat-sian-chng, kiò lāu-bó tńg-lâi.
|
過2禮拜，有人報講：「Lín兄哥破病真傷重，番咐你轉--去。」真聲透暝轉--去，隨時去走chông醫生，kā伊問藥。伊是肺炎，雙爿攏tēng。Hit-tia̍p兄嫂已經生2個後生2個查某子。大查某子死去，第2後生分後頭。Hit時koh生1個查某囡仔3日teh thiu-the̍h,下tī簾簷口teh puh-chhi。真聲hit月日ê薪金13箍，為著兄，去了了。看見無較好，就扑電報去八仙庄，叫老母轉--來。 |
|
Chì-khîn tńg-lâi, tú-tú hoa̍h ji̍p-mn̂g, hit-sî Chheng-liû jia̍t-kông, tùi lāi-bīn tian chhut-lâi, khòaⁿ-kiⁿ Chì-khîn tńg-lâi, chiū kiò chi̍t-siaⁿ, Ḿ-ah lí tńg-lâi hàⁿ? Kóng-liáu chiū koh ji̍p-khì, bô-koh chhut-lâi.
|
至勤轉--來，tú-tú hoa̍h入門，hit時清流熱狂，tùi 內面顛--出來，看見至勤轉--來，就叫一聲：「姆--ah，你轉--來--hàⁿ？」講了就koh--入去，無koh--出來。 |
|
Hit-sî in tiūⁿ-ḿ iā lâi, teh kóng i ê cha-bó͘-kiáⁿ tòe Chheng-liû ê kan-khó͘: Chheng-liû tī lāi-té í-keng bē kóng-ōe, thiaⁿ i án-ni kóng, chiū bián-kióng, kóng,
|
Hit時in丈姆也來，teh講伊ê查某子tòe清流ê艱苦。清流tī內底已經bē講話，聽伊an-ni講，就勉強，講： |
|
Kan-khó͘, ......kan-khó͘......., Kan-khó͘ mā tio̍h chiàu-khò͘ lâng ê bó͘-kiáⁿ. Kóng soah bē koh kóng, chiū kia̍h-chhiú khùi-tǹg. Á! Sí-sîn kah teh jiok, khah siám to-sī sí. |
艱苦，.......艱苦.......， 艱苦mā著照顧人ê某子。 講煞bē koh講，就舉手氣斷。 Á！死神kah teh jiok，較閃都是死。 |
|
* * *
|
* * * |
|
Í-keng sí-lo̍h, bô pòaⁿ îⁿ, chá-nî chi̍t-kóa gia̍p-sán, hō͘ i bē-bē-khì, taⁿ sí-lo̍h, tian-tò tio̍h hō͘ Chì-khîn chioh-chîⁿ lâi siu-bâi. Sí-lâng iáu-tī thiaⁿ-piⁿ, hit-mê (Chheⁿ-ḿ tùi chheⁿ-ḿ) in tiuⁿ-ḿ tùi Chì-khîn kóng, Chheⁿ-ḿ ah, lí to iā hán-tit tò-lâi; góa siūⁿ lán Mǹg-ā (Hiaⁿ-só ê miâ) tòe Chheng-liû kan-khó͘ kàu-taⁿ chin m̄-ta̍t. Taⁿ i, chò i sí-sí-khì, pàng in bó-á-kiáⁿ beh àn-chóaⁿ?
|
已經死--落，無半圓，早年一寡業產，hō͘伊賣賣--去；今死--落，顛倒著hō͘至勤借錢來收埋。死人iáu tī廳邊，hit暝（親姆對親姆）in丈姆對 至勤講：「親姆--ah，你都也罕tit倒--來；我想咱門仔（兄嫂ê名）tòe清流艱苦到今真m̄值。今伊做伊死死--去，放in母仔子beh àn-chóaⁿ？」 |
|
Chì-khîn kóng, Kah kóng kan-khó͘--ê, heh sī bô góa ê chi̍t-sut-á no͘h! Góa hiàng-sî, Tāi-chhoan sí lo̍h, ta-koaⁿ sí, ta-ke sí, bô lâng thang óa-khò; hô-hòng i chit-tia̍p nā jīn-chin khek-khó͘, to iā ū góa kap in sió-chek ē tàu png-pó͘ leh.
|
至勤講：「Kah講艱苦--ê,heh是無我ê一屑仔--no͘h！我hiàng時，大川死落，大官死、大家死，無人thang倚靠；何況伊這tia̍p若認真刻苦，都也有我 kap in小叔會鬥幫補--leh。」 |
|
Kóng, Góa teh-siūⁿ tī Hô-ji̍t-chng ū chi̍t-ê lâng teh khui ní-pâng, bat lâi goán hia bē pò͘, chit-móa koh sí bó͘, sī hó-kòe ê lâng, góa siūⁿ Mn̂g-ā lâi chò--i, m̄-chai hó m̄?
|
講：「我teh想tī和日庄有1個人teh開染房，bat來阮hia賣布，chit-má koh死某，是好過ê人，我想門仔來做--伊，m̄知好--m̄?」 |
|
Chì-khîn kóng, Ē-hng góa bô siūⁿ chit-ê tāi-chì, lín nā ū teh siūⁿ, só͘ ài chò-ê thang khì chò. Goán ta-koaⁿ ū chi̍t-kù ōe kóng,
|
至勤講：「下昏我無想這個事誌，lín若有teh想，所愛做--ê thang去做。阮大官有一句話講： |
|
“Miā, nā kah seⁿ tòa kut, Tōa-to siah bē luh” |
『命，若kah生大骨， 大刀削bē luh』 |
|
* * *
|
* * * |
|
Bái-chòng bêng-pe̍k, hiaⁿ-só kap Gín-ná chhōa-chhōa khì in āu-thâu-chhù.
|
埋葬明白，兄嫂 kap 囡仔chhōa-chhōa去in後頭厝。 |
|
Keh bô-kú, kó-jiân iang-lâng khì teh chò. Tāi-chì beh sêng, chiū chhe-lâng lâi mn̄g Chin-seng kóng, Taⁿ, lín Só-ah nā koh phah-sǹg, lí ū sím-mi̍h ì-kiàn? Chin-seng ìn kóng, Góa bô ì-kiàn. I nā bô kè, tiàm teh chiú hit 2-ê gin-ná, góa kap goán lāu-bó, móe-goe̍h ē png-pó͘--i; nā beh khì ke--leh, sun-á sī góa-ê, góa chông-sī thè i siat-hoat, thiàⁿ chò ka-tī ê kiáⁿ, kî-û bô pa̍t-kù ōe. Hit-ê lâng ìn kóng, Án-ni hó.
|
隔無久，果然央人去teh做。事誌beh成，就差人來問真聲講：「今，lín嫂--ah若koh扑算，你有甚物意見？」真聲應講：「我無意見。伊若無嫁，tiàm teh守hit 2個囡仔，我 kap 阮老母，每月會幫補--伊；若beh去嫁--leh，孫仔是我ê,我總是替伊設法，疼做家己ê子，其餘無別句話。」Hit個人應講：「Án-ni好。」 |
|
* * *
|
* * * |
|
Tùi án-ni chiū khì tiāⁿ-tio̍h, kó-jiân kōaⁿ tiāⁿ, kim-khoân, kim-hoe lóng-chóng ū, si̍t-chāi chin hó, iâⁿ-kòe chá-nî. Kàu-ūi, tiōng-hu ê só-sî kau i koán, chin êng-kng, koh iā chhiàⁿ-lâng sé-saⁿ chú-pn̄g, si̍t-chāi siòng liáu chin tio̍h.
|
Tùi án-ni就去定著，果然kōaⁿ定。金環、金花攏總有，實在真好，贏過早年。到位，丈夫ê鎖匙交伊講：「真榮光，koh也倩人洗衫煮飯，實在相了真著。」 |
|
M̄-kū bô-hok tī chit sè-kan, kè bô kúi-ji̍t, liâm-piⁿ khí-pēⁿ, siūⁿ beh iàm-sè, lō͘-bóe chiū chū-chīn, o̍h Iû-tāi ê sí. Á! Khó-lîn! Lâu chi̍t-ê cha-po͘, 1-ê cha-bó͘, Chin-seng kap Hūi-chú chiū thè i giâ si̍p-jī-kè, ná-chún Kó͘-lī-nāi-lâng Se-bûn, thè giâ Ki-tok ê si̍p-jī-kè chi̍t-iūⁿ. Á! Jîn-seng chhin-chhiūⁿ bîn-bāng, si̍t-chāi ū-iáⁿ.
|
M̄-kú無福tī這世間，嫁無幾日，liâm-piⁿ起病，想beh厭世，路尾就自盡，學猶大ê死。Á!可憐！留1個查埔、1個查某，真聲 kap 惠子就替伊舉十字架，若準古利奈人西門，替舉基督ê十字架一樣。Á!人生親像眠夢，實在有影。 |
|
29 O͘-ho͘ ai-chài!
|
29嗚呼哀哉！ |
|
Tī Sù-î-chng keng-kòe 2-nî kú, Hut-jiân Sat-kai Bo̍k-su lâi, beh kó͘-bú Chin-seng chhut-lâi chò bo̍k-su. Chin-seng kóng, Góa khiok sī ài; chóng-sī nî-hòe siàu-liân, iū-koh chió keng-giām, beh chiáⁿ-iūⁿ chò bo̍k-su? Sat-kai sian-siⁿ kóng, Pó-lô kā Thê-mô͘-thài kóng, “Bo̍h-tit ūi-tio̍h lí-ê siàu-liân hō͘-lâng khòaⁿ-khin”; Siōng-tè kap lâng nā hoaⁿ-hí ēng--lí, kiám ū oh-tit chò ê tāi-chì mah? Tām-lūn chin kú, Chin-seng siūⁿ-liáu chiū kóng, Bo̍k-su ê chek-jīm sī tōa, góa beh mn̄g Siōng-tè khòaⁿ-māi. Nā-sī, Sî-kàu, put-lūn tó-ūi, góa hoaⁿ-hí khì. Chit-tia̍p thang ēng chi̍t-kù ōe hō͘ lí chò phōaⁿ-chhiú ---“Chiū-sī chiong-lâi chīn-góa só͘-ē, góa hoaⁿ-hí pang-chān lí” Ōe kóng soah, Sat-kai sian-siⁿ chiū tńg-khì.
|
Tī四維庄經過2年久，忽然撒該牧師來，beh鼓舞真聲出來做牧師。真聲講：「我卻是愛；總是年歲少年，koh少經驗，beh 怎樣做牧師？」撒該先生講：「保羅kā提摩太講：『莫得為著你ê少年hō͘人看輕』；上帝 kap 人若歡喜用--你，敢有難tit做ê事誌--mah?」談論真久，真聲想了就講：「牧師ê責任是大，我beh問上帝看覓。若是，時--到，不論佗位，我歡喜去。」「這tia̍p thang用一句話hō͘你做伴手：『就是將來盡我所會，我歡喜幫贊--你』」話講煞，撒該先生就轉--去。 |
|
Keh kúi-ji̍t ū chi̍t-ê láu-liān ê bo̍k-su lâi mn̄g Chin-seng kóng, Thiaⁿ kóng Sat-kai sian-siⁿ teh kó͘-bú lí chhut-lâi chò bo̍k-su, taⁿ àn-chóaⁿ? Chin-seng kóng, Góa iáu-bōe láu-liān, cháiⁿ-iūⁿ chò bo̍k-su? Kóng, Chin-seng sian-siⁿ, góa kā lí kóng,
|
隔幾日有1個老練ê牧師來問真聲講：「聽講撒該先生teh鼓舞你出來做牧師，今 àn-chóaⁿ？」真聲講：「我iáu-bōe老練，怎樣做牧師？」講：「真聲先生，我kā你講： |
|
“Láu-liān sī sǹg nî-kō” Sī nā chò khah kú, chiū hō i chò láu-liān; m̄-sī láu-liān liáu chiah khì chò. Chin-seng thiaⁿ-liáu sim-koaⁿ tín-tāng, kóng, Tō-siā lí ê kà-sī.
|
「老練是算年kō,是若做較久，就號伊做『老練』；m̄是老練了chiah去做。」真聲聽了心肝振動，講：「多謝你ê教示。」 |
|
Keh kúi-ji̍t Sat-kai sian-siⁿ koh lâi, mn̄g kóng, Taⁿ mn̄g-liáu àn-choaⁿ? Chin-seng kóng, Taⁿ góa ê sim piān lah. Sat-kai sian-siⁿ kóng, Nā án-ni tī-hia ū kúi-nā só͘-chāi, lí phah-sǹg ài khì tó-chi̍t-ūi, chhut-chāi lí kéng, góa lâi khì kó͘-bú. Chin-seng kóng, Góa m̄-ài kéng, nā ū kang thang chò, ta̍k-ūi lóng hó; Siōng-tè nā chhe góa khì, góa m̄-káⁿ the-sî, Kóng, Nā-sī án-ni, tī Soa-tó kàu-hōe, in í-keng sī ū gī-lūn beh chhiáⁿ bo̍k-su, góa khòaⁿ, hia sī chin ha̍p lí tòa. Chin-seng kóng, Ha̍p Chú ê chí-ì góa hoaⁿ-hí; m̄-kú iáu-bōe keng-kòe kong-soán, m̄-chai in ài chhiáⁿ chī-chūi. Sat-kai Sian-siⁿ kóng, Chāi-chá Siōng-tè bēng-lēng Sat-bó-ní kā Sò-lô boah-iû, li̍p i chò ông, hit-sî iáu-bōe kā peh-sìⁿ kóng. Kàu boah-iû liáu, chiah siat-hoat hō͘ peh-sìⁿ thiu-chhiam, iû-goân sī thiu-tio̍h i. Taⁿ góa lâi kìⁿ lí, lí ê sim-chì í-keng tiāⁿ-tio̍h, Siōng-tè iā í-keng lōe-tēng kéng-soán ê sî, góa siùⁿ bô giâu-gî, ún-tàng chiàu án-ni.
|
隔幾日撒該先生koh來，問講：「今問了àn-chóaⁿ？」真聲講：「今我ê心便--lah。」撒該先生講：「若án-ni tī-hia有幾若所在，你扑算愛去佗一位，出在你揀，我來去鼓舞。」真聲講：「我m̄愛揀，若有工thang做，逐位攏好；上帝若差我去，我m̄敢推辭。」講：「若是án-ni，tī沙島教會，in已經是有議論beh請牧師，我看，hia是真合你tòa。」真聲講：「合主ê旨意我歡喜；m̄-kú iáu-bōe經過公選，m̄知in愛請是誰。」撒該先生講：「在早上帝命令撒母耳kā掃羅抹油，立伊做王，hit時iáu-bōe kā百姓講。到抹油了，chiah設法hō͘百姓抽籤，猶原是抽著伊。今我來見--你，你ê心志已經定著，上帝也已經內定揀選ê時，我想無蟯疑，穩當照án-ni。」 |
|
Chin-seng kóng, Bān-sū chhut-chāi Thiⁿ-Pē ê chí-ì chiū-sī, góa taⁿ tio̍h pī-pān khó-chhì.
|
真聲講：「萬事出在天父ê旨意就是，我今著備辦考試。」 |
|
Sim-chì í-keng tiaⁿ-tio̍h, Hūi-chú iā chàn-sêng, koh chi̍t-goe̍h-ji̍t, khó-kî beh kàu, Chin-seng chiū chhut-la̍t pī-pān, 3-kî chheh chò 1-kî khó.
|
心志已經定著，惠子也贊成，koh一月日，考期beh到，真聲就出力備辦，3期冊做1期考。 |
|
Kàu-su chhì-giām bêng-pe̍k, Soa-tó kàu-hōe iā sûi-sî hiàn-pín, sūn-sòa iā tàu-phiò kong-soán, boán-tiùⁿ it-tì beh chhiáⁿ Chin-seng chò in ê bo̍k-su, keh 3-lé-pài chiū khì chiū-jīm. Chiū-jīm-sek chin lāu-jia̍t, gī-tiúⁿ Tiong-sim Bo̍k-su, sàng i 1-pún kim-kîⁿ ê Sèng-keng, lāi-té siá chi̍t-chat kim-kù, lâi bián-lē i. Kim-kù sī kóng,
|
教師試驗明白，沙島教會也隨時獻稟，順續也投票公選，滿場一致beh請真聲做in ê牧師，隔3禮拜就去就任。就任式真鬧熱，議長忠心牧師，送伊一本金kîⁿ ê聖經，內底寫一節金句，來勉勵--伊。金句是講： |
|
“Tio̍h kín-sīn, lâi chīn lí tī Chú só͘ siū ê chit-hūn”. Ko-lô-se 4:17.
|
「著謹慎，來盡你tī主所受ê職份」。歌羅西4：17。 |
|
Hit-sî It-iông tī Tang-kiaⁿ liû-ha̍k, thiaⁿ-kìⁿ chit-ê siau-sit, chiū kià chi̍t-tiuⁿ phoe lâi kiong-hí, iā kià 1-pún chheh chò kì-liām; To-má Bo̍k-su tī Siōng-hái iā kià 1-phō kì-liām chheh lâi sàng--i. Chin-seng hoaⁿ-hí, kā in kám-siā.
|
Hit時一陽tī東京留學，聽見這個消息，就寄1張批來恭喜，也寄1本冊做紀念；多馬牧師tī上海也寄1部紀念冊來送--伊。真聲歡喜，kā in感謝。 |
|
Siūⁿ-tio̍h chá-nî tī āu-piah-lâu, Chú-kò͘ hiaⁿ ê chiok-ho̍k, ngó͘-jiân kin-ná-ji̍t tit-tio̍h chiâⁿ. Si̍t-chāi tio̍h kám-siā Siōng-tè.
|
想著早年tī後壁樓，主顧兄ê祝福，偶然今仔日得著成。實在著感謝上帝。 |
|
* * *
|
* * * |
|
Keh 1, 2 goe̍h-ji̍t, chiap-tio̍h It-iông ê phoe, kóng i chiah-kú tī Tang-kiaⁿ, siông-siông phòa-piⁿ, put-sî lâu phiⁿ-hoeh, hiah-ê teh pang-chān i só͘-hùi ê lâng, beh lâi ê sî, móe-goe̍h í-keng niá-liáu. Kàu-hia tio̍h bé chheh, iā tio̍h pī-pān cha̍p-mi̍h; nā-sī lông-tiong jû-sián, iû-koh sin-khu phòa-pēⁿ. Á! Pèng-sò͘ Sîn-sì 8l siú.
|
隔1、2月日，接著一陽ê批，講伊chiah久tī東京，常常破病，不時流鼻血，hiah-ê teh幫贊伊所費ê人，beh來ê時，每月已經領了。到hia著買冊，也著備辦雜物；但是郎中jû-sián,iû-koh身軀破病。Á！Pêng-sò͘神詩8l首。 |
|
Chì-hó pêng-iú chiū-sī Iâ-so͘, Tam-tng chōe-kòa kap hoân-ló. |
至好朋友就是耶穌， 擔當罪過 kap 煩惱。 |
|
Pún-jiân chit-siú chin bô se̍k-sāi, taⁿ tī-chia chin ài gîm; gîm liáu ài koh gîm.
|
本然這首真無熟悉，今tī chia真愛吟；吟了愛koh吟。 |
|
Chin-seng khòaⁿ-tio̍h chit-ê chīn-chêng ê phoe, chai It-iông sī sè-jī ê lâng, chit-tia̍p tī-hia ún-tàng tōa kan-khó͘, chiah ū siá chiah-ê ōe. Chiū phián chîⁿ-tē-á, chhōe beh kià tām-po̍h hō͘ i, nā-sī khang-khang, chiū khì niá chit-goe̍h-ji̍t ê sin-kim kià-khì, sòa siá kúi-kù an-ùi i. It-iông chiap-tio̍h ê sî, chai-iáⁿ Chin-seng chiah ê chîⁿ, sī kan-khó͘-lâng teh pang-chān kan-khó͘-lâng, chiū tī hn̄g-hn̄g lâu ba̍k-sái kám-siā lâi sêng-siū.
|
真聲看著這個盡情ê批，知一陽是細膩ê人，這tia̍p tī-hia穩當大艱苦，chiah有寫chiah-ê話。就phián錢袋仔，chhōe beh寄淡薄hō͘--伊，但是空空，就去領這月日ê薪金寄--去，sóa寫幾句安慰--伊。一陽接著ê時，知影真聲chiah-ê錢，是艱苦人teh幫贊艱苦人，就tī遠遠流目屎感謝來承受。 |
|
Kàu hioh-joa̍h ê sî, put-tek-í tio̍h tńg-lâi tiau-ióng, i ê chhù tī Chúi-chôaⁿ-chng. Chin-seng chai i tńg-lâi, chiū khì chhōe--i. Khòaⁿ i ê bīn chheⁿ-sún-sún, chiū chham-siông tio̍h ióng chiah-thang koh khì.
|
到歇熱ê時，不得已著轉來調養，伊ê厝tī水泉庄。真聲知伊轉--來，就去chhōe--伊。看伊ê面青-sún-sún,就參詳著勇chiah-thang koh去。 |
|
Chin-seng chiū khiâ chū-choán-chhia tńg-lâi. Chúi-chôaⁿ-chng sī tī soaⁿ-téng, só͘-í lo̍h-kiā chám-jiân kín. Í-keng kàu Pe̍h-hô-kiô: chit-ê kiô kúi-nā tn̄g hn̄g, 2, 3 tn̄g chhim. Tò-pêng 4-ê lâng pāi-lia̍t lâi kiāⁿ tú-tú bā-bā, chiàⁿ-pêng ū kheng-piān-chhia ê thi̍h-lō͘, kiô-kha ū soa ū chio̍h iā ū chúi.
|
真聲就騎自轉車轉--來。水泉庄是tī山頂，所以落崎嶄然緊。已經到白河橋。這個橋幾若丈遠，2、3丈深。倒爿4個人排列來行tú-tú bā-bā,正爿有輕便車ê鐵路，橋腳有沙、有石、也有水。 |
|
Chin-seng khiâ-chhia kàu kiô-thâu, kiô-thâu sī tī téng-bīn; kiô, sī tī ē-té, sī lo̍h chi̍t-ê tōa-kiā chiah-kàu hit-ê kiô. Chin-seng khòaⁿ-kìⁿ kiô-tiong-ng ū 4-ê lâng lia̍h-pâi teh kiâⁿ, āu-piah tòe chi̍t-chia̍h káu. In-ūi saⁿ-lī chin hn̄g, chiū ná tân cheng-á, pàng-kiā ti̍t-ti̍t lo̍h-khì, àn-sǹg in ē siám, khòaⁿ hit 4-ê lâng lóng m̄-khéng sio-siám, iā bô oa̍t-thâu, siūⁿ in káⁿ sī thèng-hāu khah óa-kīn ê sî chiah-beh siám. Só͘-í Chin-seng iû-goân hē kha-tòng, sù-sù-kiò ti̍t-ti̍t lo̍h-khì.
|
真聲騎車到橋頭，橋頭是tī頂面；橋，是tī下底，是落1個大崎chiah到hit個橋。真聲看見橋中央有4個人掠排teh行，後壁tòe 1隻狗。因為相離真遠，就那tân鐘仔，放崎直直落--去，按算in會閃，看hit 4個攏m̄肯相閃，也無越頭，想in敢是聽候較倚近ê時chiah-beh閃。所以真聲猶原下腳擋，sù-sù-叫直直落--去。 |
|
Ai...chài!
|
哀.....哉！ |
|
Bô-liāu in kó-jiân bô-beh siám. Chhám-lah Lîm-kip beh tòng sī bē tiām, iû-goân liù-liù-khì. Ō...hò! soah lòng-tio̍h hit-chiah káu. Chū-choán-chhia hut-jiân thiàu-tùi chiaⁿ-pêng kiô-té beh lo̍h-khì. Chin-seng chai,
|
無料in果然無beh閃。慘--lah臨急beh擋是bē恬，猶原liù-liù-去。Ō...hò!煞lòng著hit隻狗。自轉車忽然跳tùi正爿橋底beh落--去。真聲知， |
|
Sí ê sî kàu lah!
|
死ê時到--lah！ |
|
Chóng-sī tī 3-biáu kú ê tiong-kan, beh piàⁿ-miā khòaⁿ ē thiàu-chhut sí-sòaⁿ á-bē. Chiū hiat-ka̍k chhia, siòng cheng-cheng, 1-kha tùi thi̍h-kiô lāi, 1-kha tùi thi̍h-kiô gōa, hiông-hiông lòng-lo̍h--khì, tùi thi̍h-ki lám-teh, ǹg-bāng m̄-bián lìn-lo̍h khe-té, khòaⁿ ū tit-kiù ê ǹg-bāng.
|
總是tī 3秒久ê中間，beh拚命看會跳出死線抑bē。就hiat-ka̍k車，相精精，1腳tùi 鐵橋內，1腳tùi 鐵橋外，雄雄lòng落--去，tùi 鐵枝攬--teh，向望m̄免lìn落溪底，看有得救ê向望。 |
|
A̍i̍h—chi̍t...ē! phiâng! Chi̍t...ē, chiū siàng-tó tī-hia. Chin-chiàⁿ bô liàn-lo̍h--khì, put-kò heng-khám kap thâu-khak siàng-tio̍h thi̍h-ki, chin siong-tiong. Thiaⁿ-kìⁿ hiah-ê kheh-lâng kóng,
|
A̍i̍h8--一下！Phiâng!一下，就siàng倒tī-hia。真正無liàn落--去，不過胸坎 kap 頭殼siàng著鐵枝，真傷重。聽見hiah-ê客人講： |
|
Ài-châi!........Chin-seng chiū hūn-tó tī kiô-téng, sîn-hûn m̄-chai tùi-tó-khì, hit 4-ê kheh-lâng iā bô óa-lâi khòaⁿ i ê sí-oa̍h.
|
「Ài-châi!……」真聲就昏倒tī橋頂，神魂m̄知tùi 佗去？Hit 4個客人也無倚來看伊ê死活。 |
|
Thèng ū--hiah-kú, í-keng cheng-sîn, nā-sī bô-la̍t thang ngiauh--khí-lâi, khòaⁿ i ê chu-choán-chhia iáu hē-tī kiô-téng. Hit-sî kheng-piān-chhia hù-hù-kiò tī khàm-téng teh lo̍h-lâi, Chin-seng teh siūⁿ, tú-á siak bô-sí, chit-móa ē chò kheng-piān chhia-tóng ah. O͘-ho-ai-chài! Góa ê sèⁿ-miā hiu--ì!
|
停有hiah-久，已經精神，但是無力 thang ngiauh--起來，看伊ê自轉車iáu下tī橋頂。Hit時輕便車hù-hù-叫tī崁頂teh落--來，真聲teh想：抵仔摔無死，chit-móa會做輕便車擋仔。嗚呼哀哉！我ê生命休--矣！ |
|
Kai-chài hit-ê sái-chhia ê lâng. Chhin-chhiūⁿ Sat-má-lī-a-lâng ê chû-sim, hn̄g-hn̄g khòaⁿ-kìⁿ; chek-sî tòng in ê chhia, ûn-ûn-á sak-óa, khòaⁿ i tio̍h-siong bē tín-tāng, chiū chhut lîn-bín ê sim, hû-i khí-lâi, chiong só͘-sak ê chhia hō͘ i chē, hit-tiuⁿ chū-choán-chhia, siàng chi̍t-ē khiau-lê-lê, pìⁿ-chò gû-taⁿ-oan. Sái-chhia lâng chài i kàu chhia-thâu, Chin-seng bián-kióng ûn-á chhiáng, kā in kiò ló͘-la̍t, chiū chē hóe-chhia ǹg-lâm tńg-lâi.
|
佳哉 hit個駛車ê人。親像撒馬利亞人ê慈心，遠遠看--見；即時擋in ê車，勻勻仔sak倚，看伊著傷bē振動，就出憐憫ê心，扶伊起--來，將所sak ê車hō͘伊坐，hit張自轉車，siàng一下khiau-lê-lê,變做牛擔彎。駛車人載伊到車頭，真聲勉強勻仔chhiáng,kā in叫勞力，就坐火車向南轉--來。 |
