Bûn Ko͘-niû ê Phoe
|
文姑娘ê 批 |
| Bûn Ko͘-niû |
文姑娘 |
|
Ēng phoe kià hō͘ lia̍t-ūi ê chèng hiaⁿ-tī chí-mōe siu-chai. Góa lī-khui Tâi-oân ê sî, chiū lóng bô phah-sǹg góa bē-tit thang koh kòe-khì kap lín tāi-ke sio-kìⁿ. Thiaⁿ-tio̍h Eng-kok ê Kong-hōe só͘ gī-tiāⁿ--ê, góa ê sim tòng-bē-tiâu, chin m̄-kam; in-ūi óa sì-cha̍p nî kú, góa tòa tī lín ê tiong-kan, kap lín saⁿ chhut-ji̍p lâi chòe Chú ê kang. sòa khòaⁿ tī Tâi-oân tùi tang, sai, lâm, pak ê Sèng-hōe ná khui-khoah, iā ū ná chē lâng kui-ho̍k lâi sìn Iâ-so͘.
|
用批寄hō͘ 列位ê 眾兄弟姊妹收知。我離開台灣ê 時，就攏無扑算我bē得thang koh 過去佮lín 逐家相見。聽著英國ê 公會所議定--ê,我ê 心擋bē-tiâu,真m̄ 甘；因為倚40年久，我tòa tī lín ê 中間，佮lín 相出入來做主ê 工，續看tī 台灣tùi 東、西、南、北ê 聖會那開闊，亦有那濟人歸服來信耶穌。 |
|
Taⁿ tùi tī só͘ le̍k-kòe ê sū, góa ê sim koh khah te̍k-pia̍t ê ì-sù kap lín saⁿ kiat-liân, iā m̄-káⁿ bē-kì-tit lín siông-sî ê hó khoán-thāi, chhin-bi̍t ê thiàⁿ-thàng, che si̍t-chāi kàu éng-oán chòe kì-liām.
|
今tùi tī 所歷過ê 事，我ê 心koh 較特別ê 意思佮lín 相結連，亦m̄ 敢bē 記得 lín 常時ê 好款待，親密ê 疼痛，che 實在到永遠做紀念。 |
|
Só͘ thiàⁿ ê hó pêng-iú, góa tú-tio̍h chit-hō ê chó͘-gāi, m̄-káⁿ hiâm, chiū chai sī Siōng-tè ê hó chí-ì, iā ē chòe lán ê iú-ek. Chiàu Sèng-keng só͘ kì-chài kóng, " Kìⁿ-nā kéng-kài ê sū, tī tng-sî chiàu-khòaⁿ m̄-sī hoaⁿ-hí, sī iu-būn, nā-sī *āu--lâi, chiū tī hiah ê tùi kéng-kài lâi liān-ta̍t ê lâng, kiat pêng-an ê kóe-chí " ( Hi-pek-lâi 12:11 ).
|
所疼ê 好朋友，我抵著這號ê 阻礙，m̄ 敢嫌，就知是上帝ê 好旨意，也會做咱ê 有益。照聖經所記載講：「見若炯戒ê 事，tī 當時照看m̄ 是歡喜，是憂悶，若是後--來，就tī hiah ê tùi 炯戒來練達ê 人，結平安ê 果子」（希伯來12：11）。 |
|
Sui-jiân tī chit sè-kan bē-ē koh sio-kìⁿ, iáu-kú m̄-thang hoân-ló kàu siuⁿ kòe-thâu. Lán nā chòe Iâ-so͘ tiong-sìn ê lô͘-po̍k, chiū ún-tàng tī Thian-tông ē koh saⁿ-kìⁿ, sòa hióng-siū éng-oán ê hok-khì tī Chú ê bīn-chêng.
|
雖然tī 這世間bē 會koh 相見，iáu-kú m̄-thang 煩惱到傷過頭。咱若做耶穌忠信ê 奴僕，就穩當tī 天堂會koh 相見，續享受永遠ê 福氣tī 主ê 面前。 |
|
Chiàu-khòaⁿ, chit sè-kài ê lō͘-bóe sī ná chhin-kīn. Tī Khé-sī-lio̍k 6:4 ū chi̍t kù kóng, "Tùi tē-chiūⁿ chhiúⁿ-toa̍t hô-pêng, hō͘ lâng saⁿ-thâi." Hiān-kim chit chat ê Sèng-chheh kó-jiân ū èng-giām. Iū-koh tī Lō͘-ka 21:10 ū kì-chài kóng, "Peh-sìⁿ beh khí-lâi kong-kek peh-sìⁿ, kok iā beh khí-lâi kong-kek kok. Tē beh tōa tín-tāng, iā chē-chē só͘-chāi ū ki-hng un-e̍k." "Lâng tùi kiaⁿ-hiâⁿ í-ki̍p thèng-hāu só͘ beh kàu tī thiⁿ-ē ê sū chiū hūn-khì; in-ūi thiⁿ-siōng beh tín-tāng," "Bān-mi̍h kì-jiân beh án-ni siau-bia̍t, chiū lín-tī sèng kap kèng-khiân tio̍h chòe sím-mi̍h hō ê lâng, lâi ǹg-bāng, sòa chhui-pek Siōng-tè ê ji̍t kàu" (2 Pí-tek 3:11 ). "Só͘-í só͘ thiàⁿ ê hiaⁿ-tī chí-mōe ah, lín kì-jiân ǹg-bāng chiah-ê, tio̍h in-khín hō͘ lín bô lâ-sâm bô hâ-chhû, an-jiân kìⁿ-tio̍h I" ( 2 Pí-tek 3:14 ). "Tio̍h kín-sīn kéng-séng lâi kî-tó, in-ūi lín m̄-chai hit ê kî sī tī sím-mi̍h sî. "
|
照看，這世界ê 路尾是那親近。Tī 啟示錄6：4有1句講；「tùi 地上搶奪和平，hō͘ 人相thâi 。」現今這節ê 聖冊果然有應驗。又koh tī 路加21：10有記載講：「百姓beh 起來攻擊百姓，國也beh起來攻擊國。地beh 大振動，也濟濟所在有飢荒瘟疫。」「人tùi 驚惶以及聽候所beh 到tī 天下ê 事就暈去；因為天上beh 振動。」「萬物既然beh án-ni 消滅，就lín tī 聖佮敬虔著做甚物號ê 人，來向望，續催逼上帝ê 日到」（2彼得3：11）。「所以所疼ê 兄弟姊妹--ah，lín 既然向望chiah-ê,著殷勤hō͘ lín 無lâ-sâm 無瑕疵，安然見著伊」（2彼得3：14）。「著謹慎炯醒來祈禱，因為lín m̄ 知hit 個期是tī 甚物時。」 |
|
Góa chin tì-ì kā lín tāi-ke chhéng-an. Goān lín bān-hok. "Iā goān lín tiàm tī Ki-tok ê lâng lóng tit pêng-an. "
|
我真致意kā lín 逐家請安。願lín 萬福。「也願lín tiàm tī 基督ê 人攏得平安。」 |
|
Tī Eng-kok, Bûn--sī An siá.
|
Tī英國，文--氏安寫。 |
|
(Tâi-oân Kàu-hōe-pò tē 491 koàn,1926 nî 2 ge̍h)
|
(台灣教會報第491卷，1926年2月) |
