Chhiáⁿ khòaⁿ tōa Chhám-sū
|
請看大慘事 |
| Lô͘ Pek-him |
盧百欣 |
|
Phí-jîn siū phài lâi tòa Chhân-tiong,óa beh saⁿ nî kú; chiàu só͘ keng-kòe,tē-hng ê hoat-ta̍t chin-kín. Chia sī kin-chio ê chhut-sán-tē, tì-kàu thàn-tiohch8iⁿ ê lâng chin chē. Tng teh hoat-ta̍t,hoaⁿ-hí ê sî, hut-jiân tú-tio̍h tōa chai-eh.Tī jī-goe̍h 20 ji̍t ngó͘-chêng óa nn̄g tiám cheng, tùi siāng lāu-jia̍t ê ke-tiong hoat-hóe. Hit-sî tú lâng teh siàng tāng-bîn,tì-kàu hoah lóng bô kiù-peng. Tng lâng kàu ê sî, hóe tōa-iām, pak-hong tōa thàu; tì-kàu tiōng-iàu ê tiàm-thâu lóng sio--khì, lóng-chóng sio-liáu gō͘-cha̍p-gō͘ hō͘. Che chēng ū Chhân-tiong bōe-bat ū ê tōa chai-eh; si̍t-chāi chin tōa khó-lîn-tāi. Ū-ê kan-ta ba̍k-kho͘âng, ū-ê hoân-ló kàu gōng-gōng. Hiān-sî bô chhù khiā, bô mi̍h chia̍h, tì-kàu tio̍h khì pa̍t lâng tau hioh-khiā. Án-ni siū sio--ê kè-keh lóng-chóng iok ū jī-cha̍p gōa bān. Kai-chài lâng lóng bô siū-hāi. Ah ! chit téng-hō ê chhám-kéng, khòaⁿ-liáu chin kan-khó͘. Siū sio hit chá-khí, bô thiaⁿ tō-lí ê lâng, chin-chē chú pn̄g, môe, chhut lâi hō͘ lî-chai--ê chí-ki; koh hiān-sî iā chin-chē lâng teh kià-hù chîⁿ kap bí, lâi teh kiù-chō͘.
|
鄙人受派來tòa田中，倚 beh 三年久，照所經過，地方ê 發達真緊，chia是芎蕉ê 出產地，致到趁著錢ê 人真濟。當teh發達，歡喜ê 時，忽然抵著大災厄，tī 2月20日午前倚兩點鐘，對上鬧熱ê 街中發火，hit時抵人teh上重眠，致到喝攏無救兵。當人到ê 時，火大焰，北風大透，致到重要ê 店頭攏燒--去，攏總燒了50外戶，這從有田中未bat有ê 大災厄，實在真大可憐代；有個kan-ta目箍紅，有個煩惱到憨憨，現時無厝企，無物食，致到著去別人兜歇企，án-ni受燒--ê 價格攏總約有20外萬，佳哉人攏無受害，啊！這等號ê 慘境，看了真艱苦，受燒hit早起，無聽道理ê 人，真濟煮飯，糜，出來hō͘罹災-- 止饑， koh 現時也真濟人teh 寄附錢佮米，來teh 救助。 |
|
Chhân-tiong Kàu-hōe ê sìn-chiá khah chē lóng tòa tī ke-chhī-n̍i̍h, chóng-sī kai-chài kan-ta chi̍t hō͘ siū liân-lūi tī Chhân-tiong. I sī Chhân-tiong Kàu-hōe thâu chi̍t-ê sìn-chiá, hiān-sî chiú-kóaⁿ,iā sī kàu-hōe tiong lú-kài ê tōa jia̍t-sim-chiá, tōa bô͘-hoān-chiá; lé-pài-ji̍t tû tōa phòa-pīⁿ í-gōa lóng m̄-bat hioh. Ka-têng lûn-liû ê lé-pài, sui-bóng tú-tio̍h hong, hō͘, kôaⁿ-léng, koáiⁿ-á kia̍h-teh iā chhut-se̍k. Tī kū-le̍k ê sin-chiaⁿ koh khisáⁿ keng-pòaⁿ chng-thia̍p ê hiā-chhù, hiān-sî iáu-bōe sím-mi̍h oân-kang. Khí chhù ê chîⁿ, khah chē sī kā lâng chioh-ê. Chit-pang lóng siū-sio, iok liáu chheng-gōa kho͘, kin-á-ji̍t siū lūi kà án-ni, lán kiám-thang pàng i teh kan-khó͘ ?
|
田中教會ê 信者較濟攏tòa tī 街市--n̍i̍h,總是佳哉 kan-ta一戶受連累tī 田中，伊是田中教會頭一個信者，現時守寡，也是教會中女界ê 大熱心者，大模範者，禮拜日除大破病以外攏m̄-bat歇，家庭輪流ê 禮拜，雖罔抵著風雨、寒冷，枴仔舉teh 也出席。Tī 舊曆ê 新正 koh 起3間半磚疊ê 瓦厝，現時iáu未甚物完工，起厝ê 錢，較濟是kā 人借--ê ，這pang 攏受燒，約了千外箍，今仔日受累到án-ni，咱敢thang 放伊teh 艱苦？ |
|
Ah ! hiān-sî bô thang chia̍h, bô thang tòa, koh sī chiú-kóaⁿ, chêng tiàm-kháu sòe lâng, siu tiàm-sòe teh kòe-ji̍t; kin-á-ji̍t lóng chò chit-ē-khì, chhú-khì ê seng-oa̍h beh cháiⁿ-iūⁿ leh ? Goán khòaⁿ-liáu chin khó-lîn, só͘-í ài kiû lia̍t-ūi tong sio̍k Chú ê hiaⁿ-ché, kín kia̍h koân-chhiú,lâi tàu kiù-chō͘, ǹg-bāng tùi lán ê saⁿ-thiàⁿ, ē-thang tōa êng-kng Kàu-hōe kap Siōng-tè, in-ūi tùi chit-ê chai-lān, Chhân-tiong chèng lâng kiû thiⁿ ê simlóng hoat-hiān, tāi-ke kóng sī thiⁿ-ì; iāu thiaⁿ lâng teh kóng, in pài Siōng-tèe to iā ē sio--khì. Án-ni kiám m̄-sī teh hián-bêng in m̄ bat Siōng-tè sī in ê Thiⁿ-pē mah ? só͘-í tōa ǹg-bāng lia̍t-ūi ê thiàⁿ-thàng lâi thiàⁿ kàu tī goán ê kàu-hōe tiong ê siū-lán-chiá. Bāng khòaⁿ Pò ehiâⁿ-ché saⁿ-thè kî-tó, thang tùi khó͘-lanl7ai siu chin-chē hó kóe-chí. Nā ū hó sim-ê, chhiáⁿ kià tùi Chhân-tiong Jîn-hô Siong-hōe, Tân Sin-châi siu.
|
啊！現時無thang 食，無thang tòa ， koh 是守寡，前店口稅人，收店稅teh 過日，今仔日攏做一下去，此去ê 生活beh 怎樣--咧？阮看了真可憐，所以愛求列位同屬主ê 兄姊，緊舉懸手，來鬥救助，向望對咱ê 相疼，會通大榮光教會佮上帝，因為對這個災難，田中眾人求天ê 心攏發現，逐家講是天意，也有聽人teh 講，in 拜上帝ê to 也會燒--去，án-ni敢m̄ 是teh 顯明in m̄-bat 上帝是in ê 天父--mah？所以大向望列位ê 疼痛來疼到tī 阮ê 教會中ê 受難者，望看報ê 兄姊相替祈禱，thang 對苦難來收真濟好果子，若有好心--ê ，請寄對田中仁和商會，陳新財收。 |
|
(Tâi-oân Kàu-hōe-pò, Tē 480 koàn, 1925 nî 3 ge̍h)
|
(台灣教會報第480卷，1925年3月) |
