Kà Pe̍h-ōe-jī ê Hong-hoat
|
教白話字ê方法 |
| Lîm An |
林安 |
|
Kīn-lâi góa ū ki-hōe thang kà Pe̍h- ōe-jī, só͘-í ū tām-po̍h keng-giām, koh ū khòaⁿ-tio̍h kàu-hōe khah chē iáu chiàu kū-khoán, khah ûi-lân ê hoat-tō͘, teh kà Chú-ji̍t-o̍h ê ha̍k-seng. Chím-móa ài chiong góa pún-sin só͘ siūⁿ-chhut ê hong- hoat lâi kì kúi-kù.
|
近來我有機會thang教白話字，所以有淡薄經驗，koh有看著教會較濟iáu照舊款，較為難ê法度，teh教主日學ê學生。Chím仔 ài將我本身所想出ê方法來記幾句。 |
|
Chhiáⁿ tāi-ke siūⁿ Chú-ji̍t-o̍h ê bo̍k- tek sī sím-mi̍h? Kiám m̄-sī beh kà tō- lí, ín-chhōa ha̍k-seng lâi bat Chú Iâ-so͘ chò in ê Kiù-chú? M̄-kú tī Tâi-oân ko͘-put-chiong tio̍h koh ke kà chi̍t hāng, chiū-sī tio̍h kà ha̍k-seng ē-hiáu tha̍k Pe̍h-ōe-jī ê Sèng-keng; in-ūi chin-chē gín-ná lóng bô lō͘ thang lēng-gōa o̍h. Tùi án-ni, bē-hiáu tha̍k Sèng-keng ê ha̍k-seng tio̍h sǹg sī Ū-pī Kho, ia̍h só͘ beh kà in chiū-sī Tō-lí í-ki̍p Pe̍h-ōe-jī. Chêng-nî ê Khò-pún í-keng bat thè lán hun só͘ beh kà ê sî-kan, chiū-sī phì-jū lâi kóng, nā-sī khui-hōe pì-hōe í-gōa iáu ū 45 hun kú, kà tō-lí (chiū-sī kóng kò͘-sū tio̍h 10 hun á-sī 15 hun); só͘-í beh kà Pe̍h-ōe-jī ê sî-kan chiū-sī 35 hun á- sī 30 hun kú. Taⁿ chi̍t lé-pài kà chi̍t pái nā-tiāⁿ, só͘-í tī hit ê 30 gōa hun kú ê sî lán iàu-kín tio̍h ēng tē-it hó ê hoat-tō͘, thang hō͘ ha̍k-seng gâu chìn-pō͘, m̄-bián hō͘ in nî-kòe-nî iáu teh tha̍k Jī-bó. Khiok peh-hòe í-hā ê ha̍k-seng tio̍h chiàu Iù-tī Kho oa̍h-tāng ê hoat-tō͘ lâi kà. Lūn-kàu Iù-tī Kho āu-pái beh siá, chit-chūn só͘ kì--ê sī ha̍p tī káu-hòe í- siōng ê ha̍k-seng (Tâi-oân hòe).
|
請逐家想主日學ê目的是甚物？敢m̄ 是beh教道理，引chhōa學生來bat主耶穌做in ê救主？M̄-kú tī 台灣姑不chiong著koh加教一項，就是著教學生會曉讀白話字ê聖經；因為真濟囡仔攏無路thang另外學。Tùi án-ni，bē 曉讀聖經ê學生就算是預備科，亦所beh教--in就是道理以及白話字。前年ê課本已經bat替咱分所beh教ê時間，就是譬喻來講，若是開會閉會以外iáu有45分久，教道理 ( 就是講故事著10分抑是15分) ；所以beh教白話字ê 時間就是35分抑是30分久。今一禮拜教一擺nā-tiāⁿ，所以tī hit個30外分久ê 時咱要緊著用第一好ê法度，thang hō͘ 學生gâu 進步，m̄ 免hō͘ in年過年iáu teh讀字母。卻8歲以下ê學生著照幼稚科活動ê法度來教。論到幼稚科後擺beh寫，這陣所記--ê是合tī 9歲以上ê學生 ( 台灣歲 ) 。 |
|
Ta̍k keng ha̍k-hāu só͘ kà ê kàu-kho lóng ū tiāⁿ-tio̍h ê kàu-kho-su, chóng-sī chiàu góa khòaⁿ lán teh ēng khah chhìn- chhái ê hoat-tō͘ lâi kà Pe̍h-ōe-jī, tì-kàu hō͘ ha̍k-seng lóe-chì, bô sím-mi̍h hèng- thâu ài tha̍k, sòa tiāⁿ-tiāⁿ tī-hia teh liām "b, ch, chh." Kīn-lâi góa só͘ ēng ê kàu- kho ū hun 4 chām: Jī-bó, Pe̍h-ōe-jī Tho̍k-pún, sòa tiah Sèng-si saⁿ-cha̍p siú si, í-ki̍p Iok-hān Hok-im-toān, Sù-tô͘ Hēng-toān. Nā í-keng tha̍k chit kúi- hāng, thang kóng sī Pe̍h-ōe-jī chut gia̍p, ē kham-tit ji̍p Sèng-keng Kho.
|
逐間學校所教ê教科攏有定著ê教科書，總--是照我看咱teh用較chhìn-chhái ê法度來教白話字，致到hō͘ 學生餒志，無甚物興頭愛讀，續定定tī hia teh唸「b，ch，chh。」近來我所用ê教科有分4站：字母，白話字讀本，續摘聖詩30首詩，以及《約翰福音傳》，《使徒行傳》。若已經讀這幾項，thang講是白話字出業，會堪得入聖經科。 |
|
Lūn-kàu Jī-bó kap Tho̍k-pún tio̍h tha̍k kàu cha̍p-hun se̍k, chò hó ê tē-ki, āu-lâi só͘ tha̍k ê Si í-ki̍p Sèng-chheh ē khah-khoài tha̍k. Sèng-si m̄-bián tùi thâu-chi̍t-siú lâi kà; nā-sī tiah khah tī chheh ê tiong-ng khah bē phòa. Góa bat khòaⁿ ha̍k-seng si-chheh ê thâu nn̄g saⁿ ia̍h lóng phòa-nōa! Koh nā-sī khah sè-hàn--ê, hō͘ in tha̍k gín-ná si, sī khah ha̍p. Koh iàu-kín m̄-thang chún nn̄g saⁿ ê ha̍k-seng pī-pān siāng chi̍t siú, in- ūi khah bē hiáu tha̍k--ê, sī kan-ta tòe khah gâu tha̍k--ê só͘ liām ê ōe, pún-sin lóng bô chhut-la̍t jīn-jī. Phì-jū lâi kóng, hō͘ chi̍t ê ha̍k-seng tùi 20 siú tha̍k-khí, kàu 50 siú ûi-chí; koh chi̍t ê tùi 40 siú kàu 70 siú; ûn-ûn. Lūn tha̍k Sèng- keng mā sī chiàu chit ê lí-khì. Nā tùi Má-thài tha̍k-khí, bô lōa-kú hit pún Sèng-chheh ê thâu-chêng khah pháiⁿ- khòaⁿ, koh chi̍t hāng Má-thài pí Iok- hān khah oh-tit tha̍k. Iok-hān Hok-im- toān tiāⁿ-tiāⁿ ē tha̍k-tio̍h sio-siāng ê ōe; chhin-chhiūⁿ Tō, piáⁿ, kng, iûⁿ, bo̍k-chiá, chheⁿ-mê, ûn-ûn. Chit pún tha̍k-liáu, tio̍h tha̍k khah chhim--ê khah sin ê ōe, só͘-í m̄-bián tha̍k koh chit ê Hok-im- toān, chiap-sòa lâi tha̍k Sù-tô͘ Hēng- toān khah ha̍h-ēng. Nā ū kàu-oân ài hō͘ ha̍k-seng lēng-gōa tha̍k Chin-tō Būn-tap, á-sī sím-mi̍h gín-ná chheh, lóng hó; chóng-sī chiàu góa só͘ keng- giām ê lâi kì kúi-kù hō͘ lia̍t-ūi chò chham-khó, ǹg-bāng ē thang ín-chhōa ha̍k-seng tha̍k khah chìn-pō͘.
|
論到字母佮讀本著讀到十分熟，做好ê地基，後來所讀ê詩以及聖冊會較快讀。聖詩 m̄ 免tùi頭一首來教；若是摘較tī冊ê中央較bē破。我bat看學生詩冊ê頭兩、3頁攏破爛！Koh若是較細漢--ê,hō͘ in讀囡仔詩，是較合。Koh要緊 m̄-thang准兩三個學生備辦像一首，因為較bē曉讀--ê,是kan-ta tòe較gâu讀--ê所唸ê話，本身攏無出力認字。譬喻來講，hō͘ 一個學生tùi 20首讀起，到50首為止；koh一個tùi 40首到70首；勻勻。論讀聖經mā是照這個理氣。若tùi馬太讀起，無偌久hit本聖冊ê頭前較歹看，koh一項馬太比約翰較oh得讀。約翰福音傳tiāⁿ-tiāⁿ會讀著相像ê話；親像Tō,piáⁿ，kng，iûⁿ，bo̍k-chiá,chheⁿ-mê云云。這本讀了，著讀較深--ê較新ê話，所以 m̄ 免讀koh這個福音傳，接續來讀使徒行傳較合用。若有教員愛hō͘ 學生另外讀真道問答，抑是甚物囡仔冊，攏好；總--是照我所經驗ê來記幾句hō͘ 列位做參考，向望會thang引 chhōa 學生讀較進步。 |
|
Tī chit chām beh chiap-sòa téng-goe̍h só͘ kì--ê; chím-á beh kóng-khí kà Jī-bó ê hoat-tō͘.
|
Tī 這暫beh接續頂月所記--ê;chím仔beh講起教字母ê法度。 |
|
Kàu-oân eng-kai tio̍h chi̍t ki iân-pit chò i ê phōaⁿ! I só͘ tio̍h chò kì-hō ê, chiū-sī ha̍k-seng só͘ tha̍k kàu hia ê só͘-chāi; nā-sī sím-mi̍h chōa ê jī iáu-bōe cha̍p-hūn se̍k,m̄-thang chò kì-hō. Thàn chit ê hoat-tō͘ ū nn̄g hāng ê lī-ek. Ha̍k- seng chai i tio̍h tùi tó-ūi koh pī-pān, ia̍h kàu-oân nā beh koh-chài siū i ê Jī-bó, á-sī Tho̍k-pún, Si-chheh, Sèng-keng, kan-ta tio̍h khòaⁿ i lō͘-bóe pái ê kì-hō chiū tùi hit chōa lâi thiaⁿ i tha̍k. Tē-jī hāng ê hó: chit ê hoat-tō͘ sī kek ha̍k- seng ài kèng-cheng ê sim; sian-siⁿ nā hān i tio̍h tha̍k lōa-chē, kiaⁿ-liáu khah bô ài chhut-la̍t. Lūn kàu-oân iáu ū chi̍t hāng: khah-siông góa khòaⁿ kàu-oân teh kà Pe̍h-ōe-jī ê sî, in pún-sin teh sûn ha̍k-seng, bô kiò ha̍k-seng kīn-óa in. Taⁿ lán tio̍h thé-thiap gín-ná sèng; gín- ná chin ài ūn-tōng, m̄-thang kiò i tiām- tiām chē siuⁿ-kú, in-ūi ē siān, sòa pìⁿ- chò bô tì-ì ê ha̍k-seng. Khah hó, kàu- oân tio̍h chē; nā ē thang siat-hoat chē tī tùi-bīn sī siāng-hó, ia̍h kiò ha̍k-seng chi̍t-ê chi̍t-ê lâi khiā tī i ê sin-piⁿ hō͘ i siū. Án-ni, gín-ná ē khah oa̍h-tāng, kàu-oân khah bē siān, koh-khah ū ki- hōe thang khòaⁿ ha̍k-seng lóng ū teh chhut-la̍t á bô. Ū kúi-nā keng ê Chú- ji̍t-o̍h tio̍h ēng pài-tn̂g-thiaⁿ ê the-í lâi kà; án-ni-seⁿ khah hùi-khì, in-ūi kàu- oân bē-tit-thang chē tī ha̍k-seng ê tùi- bīn. Nā-sī án-ni, chhiáⁿ kàu-oân hō͘ ha̍k- seng chē chi̍t chōa, ia̍h i tú-tú chē tī tē-jī chōa, tī in ê āu-bīn, iû-goân koán khah ē-tio̍h, ia̍h kiò in chi̍t-ê chi̍t-ê lâi khiā tī i ê sin-piⁿ. Nā ha̍k-seng chi̍t-tè í-liâu chē bē-lo̍h, nn̄g saⁿ ê thang kap kàu-oân chē tī hit ê tē jī chōa. Lūn kàu-oân kóng kò͘-sū ê sî, i iàu-kín tio̍h khiā, ēng oa̍h-tāng ê khoán lâi hêng-iông hit ê kò͘-sū.
|
教員應該著一枝鉛筆做伊ê 伴！伊所著做記號--ê,就是學生所讀到hia ê所在；若是甚物chōa ê字iáu-bōe十分熟，m̄-thang做記號。趁這個法度有兩項ê利益。學生知伊著tùi佗位koh備辦，亦教員若beh koh再授伊ê 字母，抑是讀本、詩冊、聖經，kan-ta著看伊路尾擺ê記號就tùi hit chōa來聽伊讀。第2項ê好：這個法度是激學生愛競爭ê心；先生若限伊著讀偌濟，驚了較無愛出力。論教員iáu有一項：較常我看教員teh教白話字ê時，in本身teh巡學生，無叫學生近倚in。今咱著體貼囡仔性；囡仔真愛運動，m̄-thang叫伊恬恬坐傷久，因為會siān,續變做無致意ê學生。較好，教員著坐；若會thang設法坐tī tùi面是上好，亦叫學生一個一個來企tī 伊ê 身邊hō͘ 伊授。Án-ni，囡仔會較活動，教員較bē siān,koh較有機會thang看學生攏有teh出力抑無。有幾若間ê主日學著用拜堂廳ê the 椅來教；án-ni生較費氣，因為教員 bē得thang坐tī 學生ê 對面。若是án-ni，請教員hō͘ 學生坐一chōa,亦伊抵抵坐tī第二chōa,tī in ê後面，猶原管較會著，亦叫in一個一個來企tī 伊ê 身邊。若學生一塊椅條坐bē落，兩、3個thang佮教員坐tī hit個第二chōa。論教員講故事ê 時，伊要緊著企，用活動ê款來形容hit個故事。 |
|
Lūn kà jī-bó ê hong-hoat, chiàu góa bat khòaⁿ, khah-chē lâng iáu sī tòe kū- khoán lâi kà; án-ne-seⁿ chám-jiân khah ûi-lân, koh sī khah bô chiàu kàu-siū- hoat ê lí. Hiān-sî Jī-bó ê tē-jī bīn sī chò tē-it bīn ê tùi-bīn, nā-sī hian-khui liâm-piⁿ ē tùi thâu chi̍t-bīn lâi jīn tē-jī bīn ê jī. Chhiáⁿ kàu-oân m̄-thang tāi- seng chò chi̍t-ē kà tē-it bīn, b ch chh, a ah aⁿ, e, i, o, u, hiah ê chōa. Khah hó, kà b ch chh hit chōa liáu, chiū liâm-piⁿ jīn tē-jī bīn ê it chām, m, p, ch, b. Kà b ch chh ê sî, ha̍k-seng tio̍h ēng ka-tī ê chéng-thâu-á lâi kí, chóng-sī kàu-oân m̄- thang hō͘ i ēng chéng-thâu-á lâi khàm- jī. I nā ē-hiáu tha̍k b ch chh lo̍h--lâi, kiò i tha̍k khí--khì; ch th t, ûn-ûn. Nā- sī siūⁿ-bē-chhut, iàu-kín m̄-thang ti̍t- chiap liām hō͘ i tòe, án-ne oh chìn-pō͘, in-ūi i kan-ta beh tòe lí ê siaⁿ lâi bóng- liām. Tio̍h kiò i pún-sin tùi b ch chh tha̍k--lo̍h-lâi, kàu i só͘ bē kì-tit ê jī; án- ne-seⁿ ka-tī chhōe-tio̍h, khah ē kì-tit. B ch chh ê chōa tha̍k lo̍h--lâi, tha̍k khí-- khì, lóng se̍k, tio̍h ēng iân-pit chò kì-hō, ia̍h kiò i tha̍k tùi-bīn ê tē-it chām. Chit chām ū nn̄g chōa, ta̍k chōa tio̍h tha̍k kòe khì tha̍k kòe-lâi. Nā bē kì-tit sím- mi̍h jī, ha̍k-seng pún-sin tio̍h chhōe tī thâu-bīn ê it chōa, tùi b ch chh tha̍k-- lo̍h-lâi kàu chhōe--tio̍h. Á-sī kàu-oân thang pò i khòaⁿ, kiám-chhái ha̍k-seng liâm-piⁿ ē jīn-tit.
|
論教字母ê方法，照我bat看，較濟人iáu是tòe舊款來教；án-ni生嶄然較為難，koh是較無照教授法ê理。現時字母ê第2面是做第一面et5ui面，若是掀開liâm-piⁿ 會tùi頭一面來認第2面ê字。請教員 m̄-thang第先做一下教第一面，b ch chh，a ah aⁿ, e, i, o, u,hiah ê chōa。較好，教b ch chh hit chōa了，就liâm-piⁿ認第2面ê 一站，m, p, ch, b。教b ch chh ê 時，學生著用家己ê指頭仔來記，總--是教員 m̄-thang hō͘ 伊用指頭仔來蓋字。伊若會曉讀b ch chh 落--來，叫伊讀起--去；ch th t，勻勻。若是想bē出，要緊 m̄-thang直接唸hō͘ 伊tòe,án-ne 難進步，因為伊kan-ta beh tòe 你ê聲罔唸。著叫伊本身tùi b ch chh讀--落--來，教伊所bē記得ê字；án-ne-siⁿ 家己chhōe--著，較會記得。B ch chh ê chōa讀--落--來，讀起--去，攏熟，著用鉛筆做記號，亦叫伊讀tùi面ê第一站。這站有兩chōa,逐chōa著讀--過去讀--過--來。若未記得甚物字，學生本身著chhōe tī頭面ê一chōa,tùi b ch chh 讀--落--來教chhōe--著。抑是教員thang 報伊看，kiám-chhái學生liâm-piⁿ 會認字。 |
|
Kî-û ê Jī-bó lóng tio̍h chiàu chit ê lí- khì lâi kà. Tē-jī chōa, a ah aⁿ, kà-liáu, chiū jīn tē-jī chām ê jī, ap, au, at; tē- saⁿ chōa, e eh eⁿ, kà-liáu, tio̍h jīn tē-saⁿ chām, eng, eh, eⁿ; ûn-ûn. Ta̍k chōa iû- goân tha̍k lo̍h-lâi tha̍k khí-khì; á-sī tha̍k kòe-khì tha̍k kòe-lâi. Tha̍k se̍k ê ūi, ta̍k pái tio̍h chò kì-hō.
|
其餘ê字母攏著照這個理氣來教。第二chōa,a, ah, aⁿ，教了，就認第二站ê字，ap, au,at ; 第三chōa,e, eh, eⁿ 教了，著認第三站，eng, eh, eⁿ ; 勻勻。逐chōa猶原讀落來讀起去；抑是讀過去讀-來。讀熟ê位，逐擺著做記號。 |
|
Teh kà im ê chām, hō͘ ha̍k-seng ēng chéng-thâu-á lâi liām 1,2,3,4,5,6,7,8. Āu-lâi liām a á à ah â á ā a̍h. Ū-sî góa bat siá 2,3,5,7,8 tī Jī-bó ê téng- bīn, pang-chān ha̍k-seng kì-tit im. Mái, bān, pò, hit chōa tek-khak m̄-thang kan-ta liām; ta̍k kù-ōe tio̍h jīn-jī, ho͘- im, chhin-chhiūⁿ, "m ai, mai; nn̄g im, mái mái;" "b an, ban; chhit im, ban bán bàn bat bân bán bān." Chiah ê chōa ia̍h thang tha̍k kòe-lâi.
|
Teh教音ê站，hō͘ 學生用指頭仔來唸1, 2, 3, 4, 5, 6, 7, 8。後--來唸a á à ah â á ā a̍h。有時我bat寫2, 3, 5, 7, 8 tī 字母ê頂面，幫贊學生記得音。Mái,bān,pò,hit chōa 的確 m̄-thang kan-ta唸；逐句話著認字，呼音，親像「m ai，mai ; 兩音，mái mái」「b an; ban；七音banbán bàn bat bân bán bān。」chiah-ê chōa亦thang讀過來。 |
|
Ū-sî kàu-oân tú-tio̍h ha̍k-seng ē-hiáu jīn-jī, chóng-sī lóng bē-hiáu tàu-im! Chhin-chhiūⁿ teh tha̍k tē-jī chām ê sî, i ài kóng, "b a, la," á-sī "b an, han" Chit hō ha̍k-seng lán tio̍h kiò i seng liām jī-bóe, chiah khah ē-hiáu tàu-im. Chhin- chhiūⁿ, "a, b a, ba;" "an, b an, bān;" "ak, b ak, bak."
|
有時教員抵著學生會曉認字，總--是攏bē 曉鬥音！親像teh讀第2站ê 時，伊ài 講：「b a, la」抑是「b an, han」這號學生咱著叫伊先唸字母，才較會曉鬥音。親像「a，b a，ba」「an，b an，bān」「ak，b ak，bak。」 |
|
Jī-bó tha̍k-liáu, ha̍k-seng tio̍h tha̍k Pe̍h-ōe-jī Tho̍k-pún lâi chiap-sòa. Chit pún put-chí ha̍h-ēng, koh nā-sī chù- bûn 50 pún, kè-chîⁿ kan-ta peh-kak gîn. Tī chit pún ū Chú ê Kî-tó-bûn, Cha̍p- tiâu-kài, í-ki̍p pa̍t-hāng. Ha̍k-seng teh tha̍k Tho̍k-pún ê sî, iáu tio̍h tùi Jī-bó lâi jīn-jī; nā-sī jī ài bē kì-tit, khah hó koh chi̍t pái un-si̍p Jī-bó ê thâu-chi̍t bīn. Koh chhiáⁿ lia̍t-ūi kàu-oân iû- goân ēng tú-á só͘ pâi-lia̍t ê hoat-tō͘ lâi kà Tho̍k-pún. Iàu-kín tio̍h hō͘ ha̍k- seng ka-tī jīn-jī, ho͘-im; koh Tho̍k-pún tē-jī bīn ê chōa tio̍h tha̍k lo̍h--lâi, tha̍k khí--khì. Kán-kán lâi kóng kàu-siū-hoat chi̍t hāng iàu-kín ê lí, chiū-sī tio̍h hō͘ ha̍k-seng ka-tī chhut-la̍t.
|
字母讀了，學生著讀《白話字讀本》來接續。這本不止合用，koh若是注文50本，價錢kan-ta 8角銀。Tī 這本有主ê祈禱文，10條誡，以及別項。學生teh讀讀本ê 時，iáu著tùi字母來認字；若是字ài bē記得，較好koh一擺溫習字母ê頭一面。Koh請列位教員猶原用抵仔所排列ê法度來教讀本。要緊著hō͘ 學生家己認字，呼音；koh讀本第2面ê chōa著讀--落--來，讀起--去。簡簡來講教授法一項要緊ê理，就是著hō͘ 學生家己出力。 |
|
Jī-bó, tho̍k-pún, lóng tha̍k se̍k laiú-āu, ha̍k-seng beh tha̍k Sèng-keng chiám-jiân khah khoài. Hō͘ i tha̍k saⁿ-cha̍p siú, chiū hó; chhut chāi kàu-oân thiah tó chi̍t-chām; saⁿ-cha̍p kàu la̍k-cha̍p siú; iā-sī chhit-cha̍p kàu chi̍t-pah; chi̍t-pah saⁿ-cha̍p kàu chi̍t-pah la̍k-cha̍p; ûn-ûn. Saⁿ-kap chē ê ha̍k-seng m̄-thang tha̍k siong-siāng ê si. Koh chhiáⁿ kàu-oân iû-goân kan-ta tī tha̍k se̍k ê ūi chòe kì-hō. Si saⁿ-cha̍p siú liáu, hō͘ i tha̍k Iok-hān Hok-im-toān, kap Sù-tô͘ hēng-toān. Khéng chi̍t, nn̄g pún chòe kàu-kho-su ê lí-khì, tī téng-ge̍h góa í-keng kóng-liáu. Nā sī ha̍k-seng chin gâu chìn-pō͘, teh siū i ê si iah-sī Sèng-keng ê sî, kàu-oân tio̍h tùi i só͘ pī-pān ê, lâi thiah hō͘ i tha̍k lán thiaⁿ, chiū hó; kiaⁿ-liáu nā lóng thiaⁿ, siū pa̍t-ê ha̍k-seng bē-hiáu. Ū-sî góa nā khòaⁿ bó͘ ha̍k-seng put-chí gâu chìn-pō͘, góa bat chún i làng chi̍t, nn̄g chiuⁿ, án-ni-siⁿ hō͘ i koh-khah kín tùi ī-pī-kho chhut-gia̍p, ji̍p Sèng-keng-kho; chóng-sī khah han-bān ê, bē kham-tit làng chiuⁿ.
|
字母、讀本，攏讀熟了後，學生beh讀聖詩嶄然較快。Hō͘ 伊讀30首，就好；出在教員摘佗一站；30到60首；抑是70到100；130到160；勻勻。相佮坐ê學生m̄-thang讀相像ê詩。Koh請教員猶原kan-ta tī讀熟ê位做記號。詩30首讀了，hō͘ 伊讀《約翰福音傳》，佮《使徒行傳》。揀一兩本做教科書ê理氣，tī 頂月我已經講了。若是學生真gâu進步，teh授伊ê 詩抑是聖經ê 時，教員著tùi伊所備辦--ê,來摘hō͘ 伊讀hō͘咱聽，就好；驚了若攏聽，授別個學生bē 曉。有時我若看某學生不止gâu 進步，我bat准伊làng一兩章，án-ni生hō͘ 伊koh較緊tùi預備科出業，入聖經科；總--是較頇顢--ê,bē堪得làng章。 |
|
Tōa ǹg-bāng tùi só͘ kì kúi-kù hō͘ lia̍t- ūi kàu-oân thang tit-tio̍h tām-po̍h-á ê kàu-siū-hoat, lâi saⁿ pang-chān tī lín só͘ chò iàu-kín ê kang-tiâⁿ. Góa kap lín put-chí tông-chêng. Goān lín tāi-ke tit-tio̍h Siōng-tè ê tōa si-un.
|
大向望tùi 所記幾句hō͘ 列位教員thang得著淡薄仔ê教授法，來相幫贊tī lín所做要緊ê工程。我佮lín不止同情。願lín逐家得著上帝ê大施恩。 |
|
(Tâi-oân Kàu-hōe-pò tē 483,485 koàn,1925 nî 6 geh,8 ge̍h)
|
(台灣教會報第483、485卷，1925年6月、8月) |
