Kin-á-ji̍t
|
今仔日 |
| Lô Khiân-ek |
羅虔憶 |
|
Kin-á-ji̍t sī lí só͘ ū, ia̍h sī lí só͘ chòe, pí-phēng lí bô pòaⁿ hāng, lí bô chòe sím- mi̍h, chiū chhin-chhiūⁿ lóng bô kin-á-ji̍t. Kin-á-ji̍t chiū-sī hoaⁿ-hí, chiū-sī kang, chiū-sī seng-oa̍h.
|
今仔日是你所有，亦是你所做，比並你無半項，你無做甚物，就親像攏無今仔日；今仔日就是歡喜，就是工，就是生活。 |
|
Chā-hng m̄ bián khòaⁿ chòe būn-tôe, in-ūi í-keng kè khì. Bîn-á-chài iā m̄ bián lia̍h chòe būn-tôe, in-ūi iáu-bē kàu. Kin-á-ji̍t siōng iàu-kín ê ji̍t, kin-á-ji̍t ū ki-hōe. In-ūi án-ni tio̍h tì-ì lâi thàn, bô lūn sím-mi̍h ki-hōe. Kin-á-ji̍t lâi chhiò, kin-á-ji̍t tio̍h ū hó-táⁿ, kin-á-ji̍t tio̍h ū hoaⁿ-hí, kin-á-ji̍t chiū-sī lí ê ji̍t. Tī kin-á-ji̍t sè-kan ta̍k hāng chiām- chiām teh ōaⁿ, kin-á-ji̍t lí thang koh oa̍t-thâu, koh hoán-hóe. Kin-á-ji̍t lí thang ēng chā-hng só͘ o̍h-ê, kin-á-ji̍t thang tit-tio̍h oa̍h-miā ê seng-hoa̍t.
|
昨昏m̄ 免看做問題，因為已經過去；明仔再也m̄ 免掠做問題，因為iáu-bē到。今仔日上要緊的日，今仔日有機會，因án-ni著致意來趁，無論甚物機會。今仔日來笑，今仔日著有好膽，今仔日著有歡喜，今仔日就是你的日。Tī今仔日世間逐項漸漸teh 換，今仔日你thang koh越頭，koh反悔；今仔日你thang用昨昏所學的，今仔日thang得著活命的生活。 |
|
Tē-it iàu-kín, kin-á-ji̍t m̄ bián kiaⁿ, koh lóng m̄-bián khòa-lū, hō͘ bô iàu-kín ê sū lóng bô-lô iûⁿ-iûⁿ-khì. Kin-á-ji̍t tio̍h chòe kang, tio̍h pang-chān, tio̍h thiàⁿ-thàng; in-ūi kin-á-ji̍t bōe ōe koh lâi.
|
第一要緊，今仔日m̄ 免驚，koh攏m̄ 免掛慮，hō͘無要緊的事攏bô-lô溶溶去；今仔日著做工，著幫贊，著疼痛，因為今仔日bōe 會koh來。 |
|
(Tâi-oân Kàu-hōe-pò tē 438 koàn,1921 nî 9 ge̍h)
|
(台灣教會報第438卷，1921年9月) |
