Kiâⁿ-iû ê Gín-á
|
行遊ê囡仔 |
| Lô Khiân-ek |
羅虔憶 |
|
Kó͘-chá ê sî ū chi̍t ê sòe-hàn gín-ná khì tī chhiū-nâ-lāi beh thit-thô. I phah-sǹg i ko͘-toaⁿ chi̍t-ê tī-teh nā-tiāⁿ, long bô khòaⁿ-kìⁿ i ê pē ê ba̍k-chiu chim-chiok teh khòaⁿ i, m̄-kú i ê pē ū khòaⁿ i. Gín-ná hoaⁿ-hí tī chháu-po͘ cháu-lâi cháu-khì, thit-thô, bán hoe; iā tī tōa châng chhiū-kha kiâⁿ-iû. Koh in-ūi ke̍k hoaⁿ-hí, só͘-í i chin tōa siaⁿ the hoah. Ta̍k hāng khòaⁿ liáu lóng sī sin,in-ūi i iáu-bē bat khòaⁿ-kìⁿ, só͘-í i lóng bô kiaⁿ.
|
古早ê 時有一個細漢囡仔去tī 樹林內beh thit-thô ，伊扑算伊孤單一個tī--teh nā-tiāⁿ，攏無看見伊ê 父ê 目珠斟酌teh 看伊，m̄-kú伊ê 父有看伊。 囡仔歡喜tī 草埔走來走去，thit-thô、挽花，也tī 大欉樹腳行遊， koh 因為極歡喜，所以伊真大聲teh 喝，逐項看了攏是新，因為伊iáu未bat看見，所以伊攏無驚。 |
|
Teh khòaⁿ hoe ê sî, tùi hoe-lāi ū chi̍t bé to̍k chôa hut-jiân sô-chhut-lâi. Gín-ná khòaⁿ i ê phê chin súi, sòa chhun-chhiú beh lia̍h i. Hit-chūn lāu-pē tùi āu-bīn kiò kóng, Gûi-hiám, gûi-hiám. Gín-ná khí-lâi, chôa chiū sô cháu. Chóng-sī gín-ná bô khòaⁿ-kìⁿ i ê pē, sòa bōe kì-tit i ê siaⁿ. Tiap-á-kú sin-piⁿ ū chi̍t chiah ia̍h-á chin súi la̍i̍hioh5 tī gín-ná ê hoe, chiah pe khì. Gín-ná teh chhē ê sî, ia̍h-á ná pe ná koâiⁿ chiām-chiām khòaⁿ ti̍t-ti̍t bô--khì. Hit-chūn lāu-pē chhun-chhiú chiū kí hit chiah ia̍h-á só͘ pe khì ê hong-bīn, chiū-sī tī hûn-kan, m̄-kú gín-ná bô khòaⁿ-kìⁿ i ê lāu-pē ê chhiú.
|
Teh看花ê 時，對花內有一尾毒蛇忽然趖--出來，囡仔看伊ê 皮真súi ，煞伸手beh 掠伊，hit陣老父對後面叫講：「危險！危險！」囡仔起來，蛇就趖走，總是囡仔無看見伊ê 父，煞bē 記得伊ê 聲。Tia̍p仔久身邊有一隻蝶仔真súi 來歇tī 囡仔ê 花，才飛去，囡仔teh chhōe ê 時，蝶仔那飛那懸漸漸看直直無--去。Hit陣老父伸手就指hit隻蝶仔所飛去ê 方面，就是tī 雲間，m̄-kú囡仔無看見伊ê 老父ê 手。 |
|
Tī hia ū chi̍t ê chúi-khut-á, hit ê chúi lóng bô tín-tāng, tiām-tiām koh chin chhim. Gín-ná kūi tī khut-piⁿ teh chhiò,khòaⁿ i ê bīn tī chúi-tóe, phah-sǹg chin sim-sek, sòa àⁿ-lo̍h óa tī chúi teh khòaⁿ,lāu-pē chiū koh kóng, Gûi-hiám. Gín-ná oa̍t-thâu bô khòaⁿ-kìⁿ lāu-pē ê bīn, phah-sǹg káⁿ sī hong ê siaⁿ. Āu-lâi hong lâi ê sî, chúi teh tín-tāng, gín-ná chiong i ê kha chhun-lo̍h-khì chhì-khòaⁿ léng á sio, chiū chai chúi chin léng. Hit-chūn ū siaⁿ koh khah tōa siaⁿ kiò kóng, Gûi-hiám, gûi-hiám. M̄-kú gín-ná choân sim teh phah chúi phin-phin phông-phông só͘-í bô thiaⁿ-kìⁿ.
|
Tī hia有一個水窟仔，hit個水攏無振動，恬恬 koh 真深，囡仔跪tī 窟邊teh 笑，看伊ê 面tī 水底，扑算真心適，續àⁿ落倚tī 水teh 看，老父就 koh 講：「危險！」囡仔越頭無看見老父ê 面，扑算敢是風ê 聲，後來風來ê 時，水teh 振動，囡仔將伊ê 腳伸落去試看冷抑燒，就知水真冷，hit陣有聲 koh 較大聲叫講：「危險！危險！」M̄-kú囡仔全心teh 扑水，phin-phinphông-phông,所以無聽見。 |
|
Āu-lâi khòaⁿ-kìⁿ tī khut-té ū mi̍h chin súi kng-kng-kng, gín-ná chin-ài tit-tio̍h, só͘-í ū àn lo̍h be hbong i, soah poa̍h-lo̍h tī chhim-chúi, khó-sioh khut put-chí chhim, gin-ná tîm lo̍h-khì, chiū tōa-siaⁿ kiò: “Kiù góa! Kiù góa!”
|
後來看見tī 窟底有物真súi 光--光光，囡仔真愛得--著，所以有àn落beh 摸伊，煞跋落tī 深水，可惜窟不止深，囡仔沈落去，就大聲叫：「救我！救我！」 |
|
In lāu-pē tī hia sûi-sî chhun i tn̂g-tn̂g ê chhiú khiú i khí-lâi tī an-ún ê só͘-chāi. Gín-ná in-ūi kôaⁿ koh kiaⁿ, sin-khu ngia̍uh-ngia̍uh-chhoah, hit chūn lāu-pē ēng i ê chhiú tah i ê sim kóng: “Góa siông-siông chiàu-kò͘ lí, lí lóng m̄-chai; góa ū chhut kì-hō hō͘ lí, m̄-kú lí lóng bô khòaⁿ-kìⁿ; góa ū kā lí kóng, m̄-kú lí lóng bô thiaⁿ-kìⁿ; lí nā put-sî siù-liām góa, chiū chai góa kap lí saⁿ-kap tī-teh.”
|
In 老父tī hia隨時伸伊長長ê 手khiú 伊起來tī 安穩ê 所在。囡仔因為寒 koh 驚，身軀ngia̍uh-ngia̍uh chhoah ，hit陣老父用伊ê手搭伊ê 心講：「我常常照顧你，你攏m̄ 知；我有出記號hō͘你，m̄-kú你攏無看見；我有kā 你講，m̄-kú你攏無聽見；你若不時數念我，就知我佮你相佮tī--teh 。」 |
|
Hit-chūn gín-ná thiaⁿ lāu-pē ê ōe,chhun chhiú lâi lám i ê seng-khu, hō͘ iê lāu-pē phō. Chiū kóng, Pē ah, chhiáⁿ kap góa éng-éng saⁿ-kap tī-teh, góa ê ba̍k-chiu put-sî him-bō͘ thang khòaⁿ lí ê kì-hō, ia̍h góa ê hī-khang put-sî him-bō͘ thang thiaⁿ lí ê siaⁿ.
|
Hit陣囡仔聽老父ê 話，伸手來攬伊ê 身軀，hō͘伊ê 老父抱，就講：「父啊，請佮我永永相佮tī--teh,我ê 目珠不時欣慕thang 看你ê 記號，亦我ê 耳孔不時欣慕thang 聽你ê 聲。」 |
|
(Tâi-lâm-kàu-hōe-pò tē 438 koàn, 1921 nî 9 goe̍h)
|
(台南教會報第438卷，1921年9月) |
