Kî-koài ê Sin-bûn
|
奇怪ê新聞 |
| Lîm Chheng-kiat |
林清潔 |
|
Tī kū-nî góa khòaⁿ-kìⁿ chi̍t phiⁿ ê sin-bûn teh kóng tī Chi-ná bó͘ só͘-chāi ū chi̍t ê sin ōaⁿ-lâi ê kéng-chhat-tiúⁿ, iōaⁿ-lâi bô kúi-ji̍t chiū ū chhut nn̄g-khoán ê bēng-lēng hō͘ lâng put-chí gông-ngia̍h. Chi̍t-khoán chiū-sī bēng-lēng cha-bó͘ gín-ná tio̍h pa̍k-kha. Chu-kun thiaⁿ liáu put-chí kî-koài, in-ūi hiān-sî ta̍k-ūi lóng sī teh bián-lē hū-jîn-lâng tio̍h liû-kha, cháiⁿ-iūⁿ hit ê kéng-chhat-tiúⁿ hoán-tùi leh ? Chin hó chhiò, kî-si̍t i m̄ sī bēng-lēng it-poaⁿ ê hū-jîn-lâng tio̍h pa̍k-kha. Só͘ bēng-lēng--ê chiū-sī hiah ê chòe chhiong-ki--ê lóng tio̍h pa̍k-kha, ehN-koài, án-ni ū sím-mi̍h kóe-seh ? Ū lah, ū saⁿ hāng chin thong. Thâu chi̍t hāng sī beh hō͘ jîn-ke ê hū-jîn kap chhiong-ki ū hun-piat. Koh chi̍t hāng sī beh hō͘ chòe chhiong-ki ê lâng ka-kī kiàn-siàu. In-ūi ū pa̍k-kha ê kì-jīn, sī chhin-chhiūⁿ kòa pâi chi̍t iūⁿ.
|
Tī 舊年我看見一篇ê 新聞teh 講tī 支那某所在有一個新換來ê 警察長，伊換來無幾日就有出兩款ê 命令hō͘人不止gông-ngia̍h;一款就是命令查某囡仔著縛腳。諸君聽了不止奇怪，因為現時逐位攏是teh 勉勵婦人人著liû腳，怎樣hit個警察長反對--咧？真好笑，其實伊m̄ 是命令一般ê 婦人人著縛腳，所命令ê 就是hiah-ê 做娼妓--ê 攏著縛腳，ehN-koài,án-ni有甚物解說？有--啦，有3項真通。頭一項是beh hō͘人家ê 婦人佮娼妓有分別， koh 一項是beh hō͘做娼妓ê 人家己見笑，因為有縛腳ê 記認，是親像掛牌一樣。 |
|
Tùi án-ni ǹg-bāng chòe chhiong-ki ê lâng ē khah chió. Lō͘-bé chit hāng koh-khah thong, chiū sī beh hō͘ hiah ê m̄-goān liû-kha ê lâng hō͘ i bōe koh iân-chhiân-tit. In-ūi i nā iáu-kú teh pa̍k-kha chiū put-lūn sím-mi̍h lâng ōe sái-tit chiū-kūn i chhin-chhiūⁿ chhiong-ki. Chiàu án-ni lâi kā i khòaⁿ, he si̍t-chāi sī thian-jiân- chiok hōe chek-ke̍k ê hó hong-hoat lah.
|
對án-ni向望做娼妓ê 人會較少，路尾這項 koh 較通，就是beh hō͘ hiah-ê m̄ 願liû 腳ê 人hō͘伊bē koh 延chhiân 得，因為伊若iáu-kú teh 縛腳就不論甚物人會使得就近伊親像娼妓。照án-ni來kā 伊看，he實在是天然足會積極ê 好方法--啦。 |
|
Tē-jī hāng ê bēng-lēng chiū-sī hoan-hù lâng tio̍h thì ba̍k-bâi, ai-ò ! ai-ò !Án-ni beh thái ōe kiâⁿ-tit; thâu-chang thì-liáu to teh m̄ koàn-sì lah, taⁿ liân ba̍k-bâi iā kiò lâng tio̍h thì ? Pêng-ioah2, chhiáⁿ lí bián hoân-ló, kî-si̍t i m̄ sī hoan-hù it-poaⁿ ê jîn-bîn tio̍h thì, chiū-sī kan-ta bēng-lēng chòe hê-siūⁿ ê lâng tio̍h thì ba̍k-bâi nā-tiāⁿ. Ho͘N3, he ū sím-mi̍h ì-sù ah ?
|
第2項ê 命令就是吩咐人著剃目眉，ai-ò!ai-ò!Án-ni beh thái 會行--tit；頭鬃剃了to teh bē 慣勢--啦，今連目眉也叫人著剃？朋友啊，請你免煩惱，其實伊m̄ 是吩咐一般ê 人民著剃，就是kan-ta命令做和尚ê 人著剃目眉nā-tiān;ho͘N3 ，he有甚物意思啊？ |
|
Chhiáⁿ lí chí-kàu leh. Khí-kám, góa khiok iā bô sím-mi̍h chin chai, chóng-sī tāi-khài iû-goân ū saⁿ-hāng ê i-sù.
|
請你指教--咧。豈敢，我卻也無甚物真知，總是大概猶原有3項ê 意思。 |
|
1.Sī beh hō͘ hê-siūⁿ kap pêng-siông ū kì-jīn thang hun-piat. Khah chá Tiong-ko lâng lóng ū thâu-chang, nā bô thâu-chang ê chiū-sī hê-siūⁿ, taⁿ ta̍k lâng í-keng lóng pîⁿ-pîⁿ lóng bô thâu-chang; só͘-í chiah bēng-lēng hê-siūⁿ tio̍h thì ba̍k-bâi, án-ni chiah ū hun-piat.
|
1.是beh hō͘和尚佮平常有記認thang 分別，較早中國人攏有頭鬃，若無頭鬃ê 就是和尚，今逐人攏已經平平攏無頭鬃；所以才命令和尚著剃目眉，án-ni才有分別。 |
|
2. Sī beh hō͘ hiah ê chòe hê-siūⁿ ê lâng thang ka-kī siông-sè siūⁿ-khòaⁿ. Nā-sī li̍p-chì chiong-sin beh chòe hê-siūⁿ, chiū tio̍h thì bâi, nā bô chiū kok lâng tio̍h tò-khì in chhù chòe sū-gia̍p; án-ni iā sī ǹg-bāng chòe hê-siūⁿ ê lâng ōe khah chió.
|
2.是beh hō͘ hiah-ê 做和尚ê 人thang 家己詳細想看，若是立志終身beh 做和尚，就著剃眉，若無就各人著倒去in 厝做事業，án-ni也是向望做和尚ê 人會較少。 |
|
3. Sī beh hō͘ hê-siūⁿ kah m̄-káⁿ thau chòe pháiⁿ-sū. In-ūi i nā hō͘ lâng lia̍h-tio̍h chiū-sī pîn-kù thang chai i sī hê-siūⁿ, āu-lâi chiàu i kàu-hoat kā i pān chōe, chiàu án-ni khòaⁿ to iā-sī chi̍t hāng put-chí ū chhù-bī ê hoat-lēng.
|
3.是beh hō͘和尚較 m̄ 敢偷做歹事，因為伊若hō͘人掠著就是憑據通知伊是和尚，後來照伊教法kā 伊辦罪。照án-ni看都也是一項不止有趣味ê 法令。 |
|
Taⁿ chhiáⁿ lia̍t-ūi ê sin-sū siok-lú khòaⁿ lín beh kéng tó chi̍t hāng ê chit-gia̍p khì chòe chiū-sī lah.
|
今請列位ê 紳士淑女看lín beh 揀佗一項ê 職業去做就是--啦。 |
|
(Tâi-lâm-kàu-hōe-pò tē 426 koàn, 1920 nî 9 goe̍h)
|
(台南教會報第426卷，1920年9月) |
