Ha̍p-sî ê Siaⁿ
|
合時ê聲 |
| Boán-seng |
晚生 |
|
Ū chi̍t ji̍t Chhùi, Ba̍k-chiu, Phīⁿ, Hī-á, Chhiú, Kha tāi-ke teh chham-siông. Chhùi chiū kóng, Lán tāi-ke tùi chhut-sì kàu taⁿ, ta̍k ji̍t lóng sī hō͘ Pak-tó͘ the chhe-ēng. I nā iau ê sî lán tāi-ke chiū kan-khó͘ : kiò Hī-á tio̍h thiaⁿ khòaⁿ ū sím-mi̍h hó mi̍h teh bē; kiò Ba̍k-chiu tio̍h khòaⁿ ū sím-mi̍h hó mi̍h thang bé, kiò phīⁿ tio̍h phīⁿ hó bī; kiò Kha tio̍h kiâⁿ khì bé; kiò Chhiú tio̍h khì the̍h. Thiⁿ-kng kàu àm bô chi̍t sî thang hioh-khùn, lóng sī chò i ê tāi-chì, i put-sî lóng tiàm tī lāi-bīn, lóng bô chhòng sím-mi̍h hòe. Lán chi̍t ji̍t kàu àm kan-kan khó͘-khó͘. Che iā sī bô iàu-kín, nā-sī i bô chi̍t siaⁿ chi̍t kù kā lán kiò ló͘-la̍t. Lán tāi-ke hō͘ i khòaⁿ bô ba̍k-tē, si̍t-chāi lán chin gōng. Taⁿ lán tāi-ke tio̍h hōe-chê, hioh-khùn kúi-ji̍t, bô hō͘ i chhe-ēng, khòaⁿ i cháiⁿ-iūⁿ ?
|
有一日嘴，目珠，鼻，耳仔，手，腳大家teh 參詳。嘴就講：「咱大家對出世到今，逐日攏是hō͘腹肚teh 差用，伊若枵 ê時咱大家就艱苦，叫耳仔著聽看有甚物好物teh 賣；叫目珠著聽看有甚物好物thang買；叫鼻著鼻好味；叫腳著行去買；叫手著去提。天光到暗無一時thang歇睏，攏是做伊ê事誌，伊不時攏tiàm ti日tiàm tī內面，攏無創甚物hòe。咱一日到暗艱艱苦苦，這也是無要緊，若無伊一聲一句kā咱叫勞力力，咱大家hō͘伊看無目地，實在咱真憨。今咱大家著會齊，歇睏幾日，無hō͘伊差用，看伊怎樣？」 |
|
Hit sî Ba̍k-chiu, Phīⁿ, Hī-á, Kha,Chhiú kóng, Chhùi-hiaⁿ lí kóng án-ni si̍t-chāi chin ū chêng-lí, goán ta̍k ji̍t thè i tio̍h-bôa-kàu beh sí, lí ta̍k ji̍t tio̍h thè i pō͘-mi̍h iā sī kan-khó͘.” Kó-jiân tāi-ke hioh-khùn kúi-nā-ji̍t, hit-sî pak-tó͘ bô mi̍h thang chia̍h kàu-pá, ba̍k-chiu sòa bē ōe khòaⁿ, hī-khang sòa bē thiaⁿ-kìⁿ, chhùi iā ta, chhiú iā sng, kha iā nńg, tāi-ke chiū hoán-hóe kóng: “Si̍t-chāi pak-tó͘ sī teh tì-ìn lán, lán bô thòe pak-tó͘ tio̍h-bôa si̍t-chāi chin m̄-tio̍h, tùi taⁿ í-āu lán tāi-ke tio̍h chīn-sim chīn-le̍k hō͘ pak-tó͘ bô iau, lán tāi-ke chiū ōe ū sìⁿ-miā.”
|
Hit時目珠，鼻，耳仔，腳，手講：「嘴兄，汝講án-ni實在真有情理，阮逐日替伊著磨到beh 死，你逐日著替伊哺物也是艱苦。」果然大家歇睏幾若日，迄時腹肚無物thang食到飽，目珠續bē會看，耳孔續bē會聽見，嘴也焦，手也酸，腳也軟，大家就反悔講：「實在腹肚是teh 致蔭咱，咱無替腹肚著磨實在m̄著，對今以後咱大家著盡心盡力hō͘腹肚無枵 ，咱大家就會有性命。」 |
|
Sū, lông, kong, siong chit sì ê hiaⁿ-tī-á, hiān-sî Sū ê miā-ūn chò tē-it pháiⁿ. Goân-pún lâng kiò sian-siⁿ, kin-ná-ji̍t ji̍t-si̍t lân-tō͘ chin peh-peⁿ. Kó͘-chá ê Sèng-jîn kóng, Bû kun-chú bo̍k-tī iá-jîn, bû iá-jîn bo̍k-ióng kun-chú. Chiū-sī kóng, Bô kun-chú ê lâng chiū peh-sìⁿ bô thâu-chàng, bô choh chhân ê lâng chiū kun-chú bô lâng,bô thang ióng-chhī.
|
士、農、工、商這4個兄弟仔，現時士ê命運做第一歹，原本人叫先生，今仔日日食難度真peh-peⁿ 。古早ê聖人講：「無君子莫治野人，無野人莫養君子。」就是講，無君子ê人，就百姓無頭總，無作田ê人就君子無人，無thang養飼。 |
|
Hiān-sî koaⁿ-ke, kàu-io̍k ke, chong-kàu ke chò tē-it khùn-lān--ê, nā-sī chèng-hú hit hong-bīn khiok siông-siông teh ka-seng kip-hōng, chòe tē-it khùn-lān chiá chiū-sī chong-kàu ke.
|
現時官家，教育家，宗教家做第一困難--ê,若是政府hit方面卻常常teh 加陞給俸，最第一困難者就是宗教家。 |
|
Kū-nî lán ê thoân-tō sian-siⁿ m̄-chaisî kúi-ê khì ? Kin-nî m̄ chai beh koh sî kúi-ê ? Nā khah chē lâng sî-chit lán ê Kàu-hōe chiong-lâi àn-chóaⁿ ? Chhiáⁿ lia̍t-ūi hiaⁿ-ché siūⁿ khòaⁿ teh. Sū sil7an ê tōa-hiaⁿ, lán lông, kong, siong,chit saⁿ ê hiaⁿ-tī-á nā m̄ lâi pang-chō͘, kiaⁿ-liáu bô kú Sū ē choa̍t-hō͘. Ka iōng tióng-chú, kok iōng tāi-sîn. Mn̂g nā phòa, káu ē nǹg ji̍p-lâi.
|
舊年咱ê傳道先生m̄知辭幾個去？今年m̄知beh koh辭幾個？若較濟人辭職咱ê教會將來按怎？請列位兄姊想看teh 。士是咱ê大兄，咱農、工、商這3個兄弟仔若m̄來幫助，驚了無久士會絕後。家用長子，國用大臣。門若破，狗會nǹg入來。 |
|
(Tâi-lâm-kàu-hōe-pò tē 418 koàn, 1920 nî 1 goe̍h)
|
(台南教會報第418卷，1920年1月) |
