Phín-hēng ê Ûi-thoân
|
品行ê遺傳 |
| H S K |
H. S. K. |
|
Tī Chú-āu 1730 nî, ū tùi Hô-lân î-ki tī Liú-io̍k ê tōa chia̍h-chiú kp poa̍h-kiáu-- ê, kiò-chò Má-kek-su ê kiáⁿ-sun,kàu kin-á-ji̍t 190 nî kú, thoân 9 tāi lâng. Chóng-sī tùi i ê kiáⁿ-sin só͘ chhut-ê sím-mi̍h khoán ? Chiū-sī chò khit-chia̍h kap hû-lōng-chiá lâi sí-ê 300 lâng. Chò thâi-lâng hoān siū sí-hêng--ê 7 lâng. Chò kiông-tō, chà-khi, thau-the̍h lâi siū hêng-hoat--ê 63 lâng. In-ūi lim-chiú lâi tì-kàu seⁿ-kiáⁿ phòa-siùⁿ kap iáu-siū sí ê chéng-lūi--ê ū 400 lâng. Ji̍p chû-siān pēⁿ-īⁿ--ê 310 lâng. Chò chhiong-ki--ê 50 lâng. Phó͘-thong seng-oa̍h--ê 20 lâng; chóng-sī hit tiong-kan iā ū 10 lâng tùi khì kaⁿ-ga̍k chhēng âng-saⁿ-á só͘ ha̍k-si̍p ê kang-gē lâi tit-tio̍h ô͘-khó͘ ê lah !
|
Tī 主後1730年，有對荷蘭移居tī 紐約ê 大食酒佮poa̍h-kiáu--ê ，叫做Má-kek-su ê 子孫，到今仔日190年久，傳九代人。總是對伊ê 子孫所出ê 甚物款？就是做乞食佮浮浪者來死ê 300人，做thâi 人犯受死刑--ê 7人，做強盜、詐欺、偷提 來受刑罰--ê 63人，因為lim 酒來致到生子破相佮夭壽死ê 種類--ê 400人。入慈善病院--ê 310個人，做娼妓ê 50人，普通生活--ê 20人，總是hit 中間也有10人對去監獄穿紅衫仔所學習ê 工藝來得著糊口ê --啦！ |
|
Koh ū chi̍t ê lâng, chiū-sī Chú-āu 1703 nî tùi Eng-kok poaⁿ khì tòa tī Liú-io̍k ê Iok-ná-tan. Ka-têng ke̍k siān-liông; sêng-si̍t ê Ki-tok-tô͘, sìn-gióng ke̍k chhim; bô chia̍h-chiú, chhut-la̍t choh-sit; koh ū hó kàu-io̍k ê hó miâ-siaⁿ lâng.
|
Koh 有一個人，就是主後1703年對英國搬去tòa tī紐約ê 約拿丹，家庭極善良，誠實ê 基督徒，信仰極深；無食酒，出力作穡； koh 有好教育ê 好名聲人。 |
|
Tùi i ê kiáⁿ-sun só͘ chhut--ê sím-mi̍h khoán ? Kin-á-ji̍t chiū-sī tē 8 tāi lâng.Tùi i ê kiáⁿ-sun lâi chò tāi-ha̍k chóng-tiúⁿ--ê 13 lâng. Tāi-ha̍k kàu-siū--ê 103 lâng. Tāi-ha̍k kap Su-hoān ha̍k-hāu chhòng-li̍p-chiá 14 lâng. I-seng 60 lâng. Bo̍k-su 100 lâng. Chò peng--ê 75 lâng. Bûn-ha̍k-chiá 80 lâng. Hù tāi-thóng-léng 1 lâng. Choân-koân ê tāi-su 1 lâng. Chò siōng hā gī-īⁿ gī-oân--ê 20 lâng. Tùi Iâ-ló͘ Tāi-ha̍k chut-gia̍p--ê 120 lâng. Chhòng-siat Sin-bûn cha̍p-chì kap chú-pit--ê ū 18 lâng. Kiáⁿ-sun ê heng-ōng hoat-ta̍t, chin-chiàⁿ thang kóng sī kong chiân jū hō͘ lah !
|
對伊ê 子孫所出ê --甚物款？今仔日就是第8代人，對伊ê 子孫來做大學總長--ê 13人，大學教授--ê 103人，大學佮師範學校創立者10人，醫生60人，牧師100人，做兵ê 75人，文學者80人，副大統領一人，全權ê 大使一人，做上下議院議員--ê 20人，對耶魯大學卒業--ê 120人，創設新聞雜誌佮主筆--ê 有18人，子孫ê 興旺發達，真正thang講是光前裕後--啦！ |
|
Chiàu án-ni khòaⁿ, pē kong ê hó-pháiⁿ, koan-hē tī kiáⁿ-sun sī chin tōa ! Sui-jiân bat hó lâng chhàu-tú-khám chhut tio̍h pháiⁿ kiáⁿ-sun, iáu-kú chiàu lí-khì, “Hó kóe-chí sī hó-chhiū só͘ kiat”. Chiàu su-si̍t iā “Hó lâng sī tùi ka-têng chhut” Chhut. 20 : 6.(H.S.K.)
|
照án-ni看，父公ê 好歹關係tī 子孫是真大！雖然bat好人chhàu抵khám出著歹子孫，iáu-kú照理氣，「好果子是好樹所結」，照事實也「好人是對家庭出」（出20：6）（H. S. K.） |
|
(Tâi-lâm-kàu-hōe-pò tē 413 koàn, 1919 nî 8 goe̍h)
|
(台南教會報第413卷，1919年8月) |
