Tân Khé-chheng ê Sió-toān
|
陳啟清ê 小傳 |
| Lâu Chùn-sîn |
劉俊臣 |
|
Tân khé-chheng tī 1861 nî chhut sì tī Jī-pat-chúi ke. Sian-siⁿ sè-hàn pē-bó chiū kòe-sin, ke-lāi sàn-hiong. Bōe thiaⁿ tō-lí teh bē tê. Chha-put-to 31 hòe tī Jī-pat-chúi thiaⁿ-kìⁿ Iáng-hiaⁿ kóng tō-lí. Sim-koaⁿ teh siūⁿ chit ê tō-lí chin hó, nā hō͘ góa ū thàn tām-po̍h chîⁿ góa chiū beh lâi khì lé-pài-tn̂g thiaⁿ tō-lí pài Siōng-tè. Ū chi̍t pái chò seng-lí thàn nn̄g kho͘ gîn, chiū kó-jiân lâi lé-pài. Iû-goân chò bē tê ê seng-lí. Ū chi̍t pái tùi Pak-káng bé se̍k-hun ji̍p Po͘-lí-siā bē, tiàm-lāi ê hóe-kì ke the̍h nn̄g pau hō͘ i, kàu tò-lâi kheh-tiàm sǹg liáu ū ke, chiū liâm-piⁿ koh the̍h khì hêng i. Che sī Sian-siⁿ sìn Chú ê tiong-ti̍t, tit-tio̍h kiù ê pîn-kù.
|
陳啟清tī 1861年出世tī Jī-pat-chúi街。先生細漢父母就過身，家內散hiong。未聽道理teh賣茶。差不多31歲 tī Jī-pat-chúi聽見Iáng 兄講道理。心肝teh想這個道理真好，若hō͘我有趁淡薄錢，我就beh來去禮拜堂聽道理拜上帝。有1擺做生理趁兩箍銀，就果然來禮拜。猶原做賣茶ê生理。有1擺對北港買熟薰入埔里社賣，店內ê伙計加提兩包hō͘伊，到倒來客店算了有加，就liâm-mi koh提去還--伊。這是先生信主ê忠直得著救ê憑據。 |
|
Bêng-tī 26 nî Tiō Sî-hôe Sian-siⁿ ōaⁿ khì Lūn-á-chng chò thoân-tō sian-siⁿ kap i put-chí chhin-bi̍t. Nā khì pa̍t-ūi chò seng-lí, tò-lâi chiū khì chhōe i chē, chhéng-kàu tō-lí. An-hioh-ji̍t chá-chá chiū kàu pài-tn̂g tha̍k Sèng-keng o̍h tō-lí. Tùi án-ni Tiō Sian-siⁿ khòaⁿ i sī jia̍t-sim ê hōe-iú, chiū kí-chiàn i khì Tâi-lâm I-koán chò thoân Hok-im ê kang. Kó-jiân chīn pún-hūn, hō͘ I-seng kap ha̍k-seng í-ki̍p pēⁿ-lâng tāi-ke put-chí chun-kèng i.
|
明治26年，趙 Sî-hôe先生換去崙仔庄做傳道先生，kap伊不止親密。若去別位做生理倒--來就去chhōe伊坐，請教道理。安歇日早早就到拜堂讀聖經、學道理。對án-ni趙--先生看伊是熱心ê會友，就舉荐伊去台南醫館做傳福音ê 工。果然盡本份，hō͘醫生kap學生以及病人逐家不止尊敬--伊。 |
|
M̄-nā tī I-koán kóng tō-lí nā-tiāⁿ, iā siông-siông tī siâⁿ lāi sì-kè sûn hōe-iú ê ke; in-ūi án-ni Tâi-lâm ê tióng-chip ná chai Sian-siⁿ ê jia̍t-sim khó-chhú, chiū chhiáⁿ i chò pún-tông ê Soan-tō su. Khó-kiàn siâⁿ-lāi bô lūn hōe-lāi hōe-gōa chē-chē lâng bat i. Iā chē-chē lâng tùi i ê chhùi thiaⁿ-kìⁿ kiù-sè ê chin-lí lâi hoán-hóe sìn Chú.
|
M̄-nā tī 醫館講道理nā-tiāⁿ，也常常tī 城內四界巡會友ê家；因為án-ni台南ê長執那知先生ê熱心可取，就請伊做本堂ê宣道師。可見城內無論會內會外濟濟人bat伊。也濟濟人對伊ê嘴聽見救世ê真理來反悔信主。 |
|
Sian-siⁿ sè-hàn bô tha̍k chheh, ná chīn pún-hun chò kang, chiū ná chai i bē khám-tit, chiū kap tng-chit ê lâng chham-siông tio̍h chi̍t po͘ hō͘ i khì Sîn-ha̍k tha̍k-chheh, chi̍t po͘ chhōe hōe-iú. Āu-lâi Kàu-sū-hōe sêng-jīn i chò Thoân-tō-su, kap pa̍t lâng pêⁿ-téng; chiū phài i khì tiàm Siau-lâng, Gû-taⁿ-oan, Ba̍k-sa, Hoan-oah chiah ê kàu-hōe. Kó-jiân chīn-tiong chò i ê kang, hōe-iú tùi i tit-tio̍h lī-ek.
|
先生細漢無讀冊，那盡本份做工，就那知伊bē堪tit，就kap當職人參詳著1晡hō͘伊去神學讀冊，1晡chhōe會友。後--來教士會承認伊做傳道師，kap別人平等，就派伊去tiàm蕭?1、牛擔灣、木柵、Hoan-oah chiah-ê教會。果然盡忠做伊ê工，會友對伊得著利益。 |
|
Tōa ǹg-bāng i kú-kú chò chit ê kang, bô phah-sǹg i tī pún-nî chiaⁿ-goe̍h kan hoān-tio̍h pēⁿ-chèng, chiū lâi Tâi-lâm N̂g Jîn-êng Sian-siⁿ ê tiàm chia̍h io̍h goe̍h-gōa ji̍t, ū chiām-chiām khah hó, iā ē khì sì-kè chhōe pêng-iú. Āu-lâi chiap-tio̍h phoe kóng i ê sian-siⁿ-niû phòa-pīⁿ siong-tiōng, chiū liâm-piⁿ tò-khì Hoan-oah. Liân-liân saⁿ mî lâi chiàu-kò͘ i, ūi-tio̍h án-ni bô bîn kū-pēⁿ koh khí. Koh lâi N̂g Sian-siⁿ ê tiàm nn̄g ji̍t, chiū tī pún nî 2:22 mê an-jiân kòe-sin. I ê Sian-siⁿ-niû í-ki̍p 2 ê hāu-siⁿ, 3 ê cha-bó͘-kiáⁿ iáu sè-hàn, kiû Siōng-tè an-ùi in ê sim, hō͘ in bô hoân-ló kòe-thâu. Iā ǹg-bāng khòaⁿ Pò ê hōe-iú ē o̍h Sian-siⁿ ê jia̍t-sim ho̍k-sāi Chú, sī sim só͘ goān.
|
大ǹg 望伊久久做這個工，無扑算伊tī本年正月間患著病症，就來台南黃仁榮先生ê店食藥月外日，有漸漸較好，也會去四界chhōe朋友。後--來接著批講伊ê先生娘破病傷重，就liâm-mi倒去Hoan-oah。連連三暝來照顧--伊，為著án-ni無眠舊病koh起。Koh來黃--先生ê店兩日，就tī本年2月22暝安然過身。伊ê先生娘以及2個後生、3個查某子猶細漢，求上帝安慰in ê心，hō͘ in無煩惱過頭。也向望看報ê會友，會學先生ê熱心服事主，是心所願。 |
