Sió-toān
|
小傳 |
| Phian-chip-sek |
編輯室 |
|
Chit pang pak-pō͘ ū nn̄g ūi Thoân-tō sian-siⁿ hō͘ Siōng-chú tiàu in tńg-khì, chiū-sī Lîm Chheng-koaⁿ, kap Tân Hi-liân. Taⁿ beh chiong in ê sió-toān tāi-lio̍k lâi siá tī ē-tóe.
|
這pang北部有2位傳道先生hō͘上主召in轉--去，就是林Chheng koaⁿ kap陳Hi-liân。今beh將in ê小傳大略來tī下底。 |
|
Lîm Chheng-koaⁿ.
|
林Chheng-koaⁿ |
|
Lîm Chheng-koaⁿ sī Choân-chiu siâⁿ-gōa ê lâng, jī-cha̍p nî chêng chiah lâi Tâi-oân, tiàm tī Báng-kah Pò͘-po͘-koe chòe seng-lí, liáu-āu ū lâi Báng-kah pài-tn̂g thiaⁿ tō-lí, chiū hoán-hóe kóe-pìⁿ lâi sìn Chú. Kè bô jōa-kú chiū poaⁿ-khì Pang-kiô, tī-hia iû-goân chiàu-kū jia̍t-sim ho̍k-sāi Siōng-tè, siông-siông khì Pang-kiô pài-tn̂g lé-pài. I put-chí him-bō͘ ài chòe Chú ê kang, tī Bêng-tī 37 nî 9 ge̍h ū ji̍p Tām-chúi Sin-ha̍k-hāu tha̍k-chheh, kàu Bêng-tī 52 nî chiū chut-gia̍p. Ū siū-phài khì tiàm kúi-nā ūi ê pài-tn̂g chòe Thoân-tō-su, chiū-sī Sàu-hut, Lô-tong, Téng-siang-khoe. Kàu kū-nî 12 ge̍h ū tùi Thoân-tō-kio̍k pín-chhéng ài tńg-khì Choân-chiu thàm i ê lāu-bú kap i ê chhin-chhek. Thoân-tō-kio̍k ún-chún, chiū kap i ê bó͘ saⁿ-kap chòe-tīn tńg-khì. Kàu kin-nî 3 ge̍h koh -chài lâi Tâi-oân, iû-goân chiàu-kū tī Téng-siang-khoe chòe Chú ê kang. Nā-sī lō͘-tiong ū jiám-tio̍h pīⁿ, tò--lâi chiū ná kú ná siong-tiōng; āu-lâi ji̍p tī Má-kai I-īⁿ. Khó-sioh chia̍h io̍h bô èng-hāu, chiū kòe-óng tī īⁿ-lāi, hióng-siū 39 hè. Gōa-kok Bo̍k-su, pún-tōe Bo̍k-su, Thoân-tō-su kúi-nā ê, kap Sîn-ha̍k-hāu ê ha̍k-seng í-ki̍p hōe-iú ū lâi sàng-chòng.
|
林Chheng-koaⁿ是泉州城外ê人，20年前才來台灣，tiàm tī艋舺布埔街做生理，了後有來艋舺拜堂聽道理，就反悔改變來信主。過無偌久就搬去枋橋，tī hia猶原照舊熱心服事上帝，常常去板橋拜堂禮。伊不止欣慕ài做主ê工，tī明治37年9月有入淡水神校讀冊，到明治42年就卒業。有受派去tiàm幾若位ê拜堂做傳道師，就是Sàu-hut、羅東、頂雙溪。到舊年12月有對傳道局稟請ài轉去泉州探伊ê 老母kap伊ê親戚。傳道局允准，就kap伊ê某相kap做陣轉--去。到今年3月koh再來台灣，猶原照舊tī頂雙溪做ê工。若是路中有染著病，倒--來就那久那傷重；後來入tī馬偕醫館。可惜食藥無應效，就過往tī院內，享受39歲。外國牧師本地牧師傳道師幾若個，kap神學校ê學生以及會友有來送葬。 |
|
Tân Hi-liân.
|
陳Hi-liân |
|
Tân Hi-liân sī Sin-tek-thiaⁿ Tiong-káng-koe ê lâng. Pún sī teh kà o̍h chòe sian-siⁿ. Bêng-tī 15 nî ū sìn Chú, āu-lâi ū kà kàu-hōe ê gī-o̍h. I ia̍h put-chí him-bō͘ ài chòe Chú ê kang, só͘-í tī Bêng-tī 21 nî ū ji̍p Tām-chúi Sîn-ha̍k-hāu tha̍k-chheh, kàu Bêng-tī 24 nî chiū chut-gia̍p. Ū siū-phài khì tiàm nn̄g ūi ê kàu-hōe, chiū-sī Āu-lâng kap Thô͘-gû, tùi kū-nî khí ia̍h ke kiam Tiong-káng. I chòe Chú ê kang kàu kin-nî tú-tú 25 nî ê kú. Tī kū-nî ū hō͘ kàu-hōe kéng i chòe tiúⁿ-ló. Kin-nî 4 ge̍h ū lâi hù Tāi-hōe, chòe sì Tông-hōe ê Tāi-gī Tiúⁿ-ló. Put-hēng tī Tāi-hōe liáu tńg-khì ū tī koaⁿ-gâm ê pīⁿ, táⁿ tia̍p chin kú lóng bô èng-hāu. Āu-lâi ū ji̍p Má-kai I-īⁿ i-tī, ia̍h sī bô chhái-kang. Kàu 7 ge̍h 23 ji̍t chiū kè-óng, hióng-siū 54 hè. Jī-cha̍p-sì ji̍t tī Gû-po͘-chng Káng-gī-só͘ ū chòng-sek. Gô͘ Bo̍k-su chú-lí, Keh Bo̍k-su tha̍k Sèng-keng; Tân Chheng-gī, Siau An-ki jī-ūi bo̍k-su ū kóng i ê lâi-le̍k, in-ūi in sī chòe i ê tông-chhong.
|
陳Hi-liân是新竹廳中港街ê 人。本是teh教學做先生。明治15年有信主，後--來有教教會ê義學，伊亦不止欣慕ài做主ê工，所以tī 明治21年有入淡水神學校讀冊，到明治24年就卒業。有受派去tiàm 兩位ê教會，就是後龍kap Thô͘-gû,對舊年起亦加添中港。伊做ê工到今年tú-tú25年ê久。Tī舊年有hō͘ 教會揀伊做長老。今年4月有來赴大會做4中會ê代議長老，。不幸tī大會了轉去有致肝癌ê 病，打tia̍p真久攏無應效。後--來有入馬偕醫院醫治，亦是無采工。到7月23日就過往，享壽54歲，24日tī牛埔庄講議所有葬式。吳牧師主理，郭牧師讀聖經，陳清議、蕭安居二位牧師有講伊ê來歷，因為in是做伊ê同窗。 |
|
Chhiáⁿ tāi-ke thòe chit nn̄g ūi Thoân-tō-su ê ke-koàn kî-tó, hō͘ in ōe siū an-ùi, ǹg bāng āu-lâi saⁿ-kìⁿ tī thiⁿ-n̍i̍h.
|
請大家替這 2位傳道師祈禱，hō͘ in 會受慰，向望後--來相見tī天--n̍i̍h。 |
|
(Tâi-oân Kàu-hōe-pò tē 366 koàn,1915 nî 9 ge̍h)
|
(台灣教會報第366卷，1915年9月) |
