Thâng Tòng Hóe-chhia
|
蟲擋火車 |
| Phian-chip-sek |
編輯室 |
|
Tī Eng-kok ū chi̍t chá-khí hóe-chhia ê lâng-kheh tah kàu móa-móa,beh khì Lûn-tun.Chhia tú-hó chhut-la̍t teh cháu ê sî,hut-jiân-kan ki-koan-chhiú khòaⁿ-kìⁿ chêng-bīn lō͘-piⁿ ê sìn-hō ū pò m̄ thang kòe-khì . In-ūi án-ne hóe-chhia liâm-piⁿ choān hō͘ thêng . Koh bô lōa-kú āu-piah lâi ê hóe-chhia iā tù-leh,ná chek ná chē, lóng tòng-teh m̄-káⁿ kòe-khì, tah-kheh lóng chin kiaⁿ-hiâⁿ, m̄ chai beh cháiⁿ-iūⁿ .
|
Tī 英國有一早起火車ê人客搭到滿滿，beh 去倫敦。車抵好出力teh走ê時，忽然間機關手看見前面路邊ê信號有報m̄ 通--過去。因為án-ne火車liâm-piⁿ choān hō͘ 停。Koh無偌久，後壁來ê火車也tù--leh ，那積那濟，攏擋--teh m̄ 敢過去，搭客攏真驚惶，m̄ 知beh怎樣。 |
|
Khí-thâu thi̍h-lō͘ ê chit-oân lóng m̄ chai àn-chóaⁿ sìn hō ē pò án-ne , kàu chhe lâng siông-sè tiāu-cha ,chiàⁿ chai sī chi̍t khoán ê thâng kiâⁿ m̄-tio̍h lō͘ ê iân-kò͘ .
|
起頭鐵路ê職員攏m̄ 知án-chóaⁿ信號會報án-ne ，到差人詳細調查，chiàⁿ知 是一款ê蟲行m̄ 著路ê緣故。 |
|
Chāi Eng-kok ū chi̍t chéng ê thâng chhin-chhiūⁿ káu-hiā ê khoán,pêng-sò͘ chin ùi kng,só͘-í mê--sî chiah chhut-lâi thó-chia̍h,ji̍t-sî chiū bi̍h tī thô͘-khang-lāi, lâi siám-pī ji̍t ê kng . Hit chiah chó͘-tòng hóe-chhia ê thâng , kui mê chhut lâi chhōe chia̍h , thiⁿ-kng beh tò-khì, kiâⁿ m̄-tio̍h lō͘, sô tùi hit ki sìn-hō ê lāi-bīn,seng-khu hō͘ tiān ê ki-khì teh tio̍h , hit ê tiān chiong án-ne ín kòe-khì,sòa hián-chhut hit ê pò m̄-thang kòe--khì ê hō, tì-kàu hiah ê hóe-chhia lóng m̄-káⁿ kòe--khì . Hit-sî thiaⁿ-kìⁿ ê lâng bô-m̄ chin hó-chhiò .
|
在英國有一種ê蟲親像káu-hiā ê款，平素真畏光，所以暝--時才出來討食，日--時就匿 tī 塗空內，來閃避日ê光。Hit 隻阻擋火車ê蟲，歸暝出來chhōe食，天光beh倒--去，行m̄ 著路，趖tùi hit 枝信號ê內面，身軀hō͘ 電ê機器teh著，hit 個電將án-ne 引過去，續顯出hit 個報m̄-thang過--去ê號，致到hiah-ê火車攏m̄ 敢過--去。Hit時聽見ê人無m̄真好笑。 |
|
Án-ne lán kàu-hōe ê hōe-iú só͘ kiâⁿ kiám m̄-sī tio̍h chin sè-jī mah? Nā ū kiâⁿ sió-khóa ê m̄-tioh2,iā ē chó͘-tòng kàu-hōe ê chìn-pō͘,chhin-chhiūⁿ chit hō sè bóe thâng ,ē chó͘-tòng hiah-n̍i̍h tōa ê hóe-chhia hō͘ i m̄-káⁿ chìn-chêng .
|
Án-ne 咱教會ê會友所行敢m̄ 是著真細膩--mah？若有行小可ê m̄著，也會阻擋教會ê進步，親像這號細尾蟲，會阻擋hiah n̍i̍h 大ê火車hō͘ 伊m̄ 敢進前。 |
|
(hoan-e̍k)
|
(翻譯) |
|
0356 kî, 1914 nî 11 goe̍h
|
0356期，1914年11月 |
