Tân Hûn-thêng Sió-toān
|
陳雲程小傳 |
| Phian-chip-sek |
編輯室 |
|
Tân Hûn-thêng Thoân-tō sī Tâng-oaⁿ sio̍k, Kim-tun hiuⁿ ê lâng, chhut-sì tī A.D.1852. I saⁿ hè ê sî pē-bú ū î-ku lâi Tâi-oân, khiā-khí tī Gō͘-khó͘-khiⁿ chng tióng-seng. I 21 hè ê sî ū khì chòe Kai Bo̍k-su ê ha̍k-seng, Āu-lâi i chiū chòe thoân-tō, tòa tī kúi-nā só͘-chāi ê pài-tn̂g. Án-ni chòe kang ū 26 nî kú, í-āu ū hioh-khùn 2 nî gōa, kàu Hôa bo̍k-su kàu Tâi-oân ê sî, I ū lâi kà-sī I-ê thó͘-im, iā ū pang-chān I-koán kap Lú-o̍h-tn̂g ê kang, koh siông-siông thoân tō-lí. Tùi hit-sî I ê sin-thé chia̍p-chia̍p ū tú-tio̍h phòaⁿ-pīⁿ, chiū bōe-ōe koh tam-tng khah chōe ê kang-tiâⁿ. Āu-lâi I ū siū-phài khì thoân tō-lí tī Sū-lîm-koe ê lé-pài-tn̂g. I ū tú-tio̍h sim-chong-pīⁿ chiū hut-jiân hūn-khì put-chí kú chiah chai lâng. Tùi án-ni sin-thé chiū koh-khah soe-lám, put-tek-put tio̍h hioh kang, lâi chēng-ióng sin-thé. Hit-nî I tú-tú sī 60 hè, ū chòe kang tī kàu-hōe lāi 37nî ê kú. Tùi án-ni I chiū chhōa I-ê ke-āu kè hái khì Hok-chiu, kap I-ê tōa kiáⁿ khiā-khí, tī hia 4 ge̍h ji̍t kú, I-ê pīⁿ ná tāng bô khí chhn̂g. Ū Bí-pō͘-hōe ê Bo̍k-su, Tiúⁿ-ló chia̍p-chia̍p lâi thàm I , sòa thòe I kî-tó; koh siông-siông ū chū-chi̍p I ê kàu-hōe lâi ke-lāi lé-pài. Í-āu chiâⁿ cha̍p ji̍t ê tiong-kan lâng ū khah sóng-khoài, chiū siūⁿ beh tò lâi Tâi-oân, bô phah-sǹg sòa koh hō͘ I kám-tio̍h chin siong-tiong, chiū tī A.D.1914,3 ge̍h 27 hō an-jiân siān-chiong. I ū hióng-siū 62 hè. Ū bâi-chòng tī Bân-ip Lâm-koan gōa Sî-seng-lí, Gô-thâu-hōng, niá kàu-hōa ê hûn-tē.
|
陳雲程傳道是同安屬，金敦鄉ê人，出世tī A.D. 1852。伊3歲ê時父母有移居來台灣，企起tī Gō͘ -khó͘ -khiⁿ庄長成，伊21歲ê時有去做偕牧師ê學生，後來伊就做傳道，tòa tī幾若所在ê拜堂，án-ni做工有26年久，以後有歇兩年外，到華牧師到台灣ê時，伊有來教示伊ê土音，對hit-tia̍p有接續教宋醫生ê土音，也有幫贊醫館佮女學堂ê工，koh常常傳道理，對hit時伊ê身體捷捷有抵著破病，就bōe會koh擔當較濟e工程，後來伊有受派去傳道理tī士林街ê禮拜堂。伊有抵著心臟病就忽然暈去不止久才知人，對án-ni身體就koh較衰lám,不得不著歇工，來靜養身體，hit年伊抵抵是60歲，有做工tī教會內37年ê久，對án-ni伊就 chhōa伊ê家後過海去福州，佮伊ê大子企起，tī hia四月日久，伊ê病愈重無起床。有Bí-pō͘-hōe ê牧師、長老捷捷來探--伊，續替伊祈禱，koh常常有聚集伊ê教會來家內禮拜，以後誠十日ê中間人有較爽快，就想beh倒來台灣，無扑算煞hō͘伊感著真傷重，就tī A.D.1914，3月27號安然善終。伊有享壽62歲，有埋葬tī閩邑南關外辭生里，鵝頭鳳嶺教會ê墳地。 |
