Hô-pêng kap Chiàn-cheng
|
和平佮戰爭 |
| Phian-chip-sek |
編輯室 |
|
Kau-chiàn ê gûi-hiám sè-kan lâng lóng chai thang kiaⁿ, só͘-í nā tú-tio̍h lia̍t-kok kháu-khì ê sî, á-sī in-ūi tú-tio̍h saⁿ-cheⁿ koân-lī, chiū in tng-chit ê lâng jia̍t-sim khì gián-kiù, chīn-la̍t lâi chhui- pâi, tek-khak ǹg-bāng hō͘ i hô-pêng kiat-kio̍k, ū-sî chhiáⁿ chhut pa̍t-kok lâi chò kong-chhin, tek-khak m̄-khéng bô chim-chiok lām-sám jiá-tāng kan-ko hām-hāi kok-ka tī gûi-hiám ê só͘-chāi, sòa khan-liân--tio̍h sè-kài ê tāi-kio̍k, che sī tùi kó͘-chá bô m̄-sī án-ne lâi kiâⁿ.
|
交戰ê危險世間人攏知thang驚，所以若抵著列國kháu-khì ê時，抑是因為抵著相爭權利，就in當職ê人熱心去研究，盡力來推排，的確向望hō͘ 伊和平結局。有時請出別國來做公親，的確 m̄ 肯無斟酌，濫糝惹動干戈，陷害國家tī 危險ê所在，續牽連著世界ê大局，che是tùi古早無 m̄ 是án-ne來行。 |
|
Tī sai-pêng Au-lô-pa-chiu hiah ê khah kiông ê kok, sui-jiân in teh saⁿ- cheⁿ chin kú, m̄-kú in ta̍k kok ū-ê saⁿ- kap liân-bêng, ū-ê chò-hóe hia̍p-iok, chiū in ê khùi-la̍t beh chha-put-to, sè- bīn iā beh pêⁿ-tú-pheng, iū-koh hit-hō kun-khì chhèng-io̍h ê lūi, ū hoat-bēng hit khoán lī-hāi; chiū-sī poe-chûn, chúi-lûi-théng hit-hō iā ná kek ná chìn- pō͘: án-ne tāi-ke chai thang khòa-lū, kiaⁿ-liáu chiàn-sū ê hō-toan chit-ē khí, chiū i ê hām-hāi sī chin tōa, só͘-í tāi-ke sio kéng-kài, m̄-káⁿ sûi-piān lām-sám jiá-sū. In-ūi án-ne ū lâng chheng-ho͘ poe-chûn chò hô-pêng ê thiⁿ-sài, sī kóng kau-chiàn ê khì-khū ná cheng-kong, chiū kàu-gia̍h thang at-chè sè-kan lâng ho͘N3-chiàn ê sim, lâi pó-hō͘ in ê pêng- hô--lah.
|
Tī 西爿歐羅巴州hiah-ê 較強ê國，雖然in teh相爭真久，m̄-kú in逐國有ê 相佮聯盟，有ê 做夥協約。就in ê氣力beh差不多，勢面也beh平抵pheng，又koh hit號軍器銃藥ê類，有發明hit款厲害；就是飛船、水雷艇hit號也那革那進步：án-ne大家知thang掛慮，驚了戰事ê禍端1（chi̍t)下起，就伊ê陷害是真大，所以大家相警戒，m̄ 敢隨便濫糝惹事。因為án-ne有人稱呼飛船做和平ê天使，是講交戰ê器具那精光，就夠額thang遏制世間人好戰ê心，來保護in ê平和--lah。 |
|
Chóng-sī chiàn-cheng ê ki-koan, chi̍t ē kha̍p--tio̍h chiū hoat-choh, in-ūi ta̍k kok ū in ê liân-bêng kap hia̍p-iok ê koan-hē, só͘-í kau-chiàn ê hō-hoān sòa ná thoa ná tn̂g, ná ká ná tōa.
|
總--是戰爭ê機關，1下kha̍p--著就發作，因為逐國有in ê聯盟佮協約ê關係，所以交戰ê禍患續那拖那長，那絞那大。 |
|
Taⁿ in-ūi Sek-ní-î lâng ēng chi̍t-lia̍p pho̍k-lia̍t-tân tìm-sí Ò-kok ê hông-thài- chú, ná chhin-chhiūⁿ chiong chi̍t-lia̍p phàu-chí tìm-lo̍h khì tī Au-chiu ê tiong- sim chi̍t-pòaⁿ-iūⁿ, tì-kàu Ò-kok, Ngô͘- kok, Tek-kok, Hoat-kok, Eng-kok, Pe̍k- ní-gī, lóng-chóng thoa-loa--lo̍h-khì tī chiàn-tiûⁿ ê lāi-bīn, chhin-chhiūⁿ hóe sio chháu-po͘, lóng bē óa-kīn--tit. Sīm-chì thoa-lūi--tio̍h tang-pêng A-se-a-chiu, hô-pêng ê kio̍k-bīn, tì-kàu Ji̍t-pún iā kap Tek-kok soan-chiàn. Tû-khí Bí-kok í-gōa, kî-û khah chē thoa-loa--lo̍h-khì tī hit iu-chhiû chhi-chhám ê só͘-chāi. Sè- kan-lâng sī sím-mi̍h chōe-kòa, lâi tú- tio̍h chiah tōa ê kiap-sò͘? Chāi-chá tāi-ke in-khîn ēng pêng-hô lâi saⁿ kéng-kài, he kiám lóng sī chng-chò ê ōe mah, á- sī lâng ê sim-koaⁿ siūⁿ beh jiáu-loān chiah lâi tú-tio̍h chit-hō ê hêng-hoa̍t?
|
今因為Sek-ní-î人用一粒爆裂彈tìm死奧國ê皇太子，若親像將1粒炮籽tìm落去tī 歐洲ê中心一般樣，致到奧國、俄國、德國、法國、英國、Pe̍k-ní-gī,攏總拖賴落去tī戰場ê內面，親像火燒草埔，攏bē倚近--tit。甚至拖累--著東爿亞細亞洲，和平ê局面，致到日本也佮德國宣戰。除去美國以外，其餘較濟拖賴落去tī hit憂愁悽慘ê所在。世間人是甚物罪過，來抵著chiah大ê劫數？在早大家殷勤用平和來相警戒，he 敢攏是妝做ê話--mah？抑是人ê心肝想beh擾亂才來抵著這號ê刑罰？ |
|
Tùi án-ne lâi siūⁿ, sè-kan-lâng ê só͘- chò lóng bô chiàu tō-lí, kan-ta thàn sai- khia ê su-io̍k. Lán tāi-ke tio̍h kín-sīn, bián-tit hoān-tio̍h chit khoán ê chai-hō.
|
對án-ne來想，世間人ê所做攏無照道理，kan-ta趁私企 ê私慾。咱大家著謹慎，免得犯著這款ê災禍。（翻譯） |
|
(Tâi-oân Kàu-hōe-pò tē 356 koàn,1914 nî 11 ge̍h)
|
（台南教會報 第356卷，1914年11月） |
