Iâu-giân thang kiaⁿ
|
謠言thang 驚 |
| Phian-chip-sek |
編輯室 |
|
Chá-chêng tī Bí-chiu lâm-pêng bó͘- siâⁿ, hia put-chí iâu-giân sēng-hêng , jîn- sim chin kiaⁿ-hiâⁿ, sio-thoân kóng ū chi̍t-ê kúi tī siâⁿ-lāi sì-kè chia̍h gín-á . Mn̄g kúi tùi tah-lo̍h lâi, chiū kóng m̄- chai ; mn̄g kúi sī cha-po͘ á-sī cha-bó͘ , iā kóng m̄ chai . Nā sī sio thoân i chia̍h chin chē gín-á , chiū ta̍k-lâng kóng , ta̍k lâng sìn , tì-kàu lâm-hū ló-iù kiaⁿ-hiâⁿ kàu-ke̍k .
|
早前tī 美洲南爿某城，hia不只謠言盛行，人心真驚惶，相傳講有一個鬼tī 城內四界食囡仔。問鬼tùi tah落來，就講 m̄知；問鬼是查甫抑是查某，也講 m̄ 知。若是相傳伊食真濟囡仔，就逐人講，逐 人信，致到男婦老幼驚惶到極。 |
|
Hit-tia̍p ū chi̍t-ê gōa-kok lâng kiâⁿ- iû tī in ke-chhī , tùi chi̍t-ê gín-á thó hóe chia̍h-hun , gín-á khòaⁿ-kìⁿ , chiū chhiok-tio̍h i sim-lāi ê kiaⁿ-hiâⁿ , chiū piàⁿ miā cháu , kiaⁿ-liáu hō͘ thoa khì chia̍h , cháu kàu poa̍h-tó siak-tio̍h thâu-khak . Ke- chhī ê lâng hut-jiân khòaⁿ-tio̍h gōa-ūi lâng, koh khòaⁿ-kìⁿ gín-á phīⁿ-thâu phòa, lia̍h i chò chia̍h gín-á kúi, tú-á chia̍h chi̍t-chhùi, só͘-í phīⁿ-thâu ū khang. Tùi án-ni chiū tōa-siaⁿ âu-kiò, chèng-lâng chū-chi̍p lia̍h hit-ê gōa-ūi lâng cheng- phah;sûn-cha khióng-kiaⁿ siong-hāi sìⁿ- miā, chiong i ah-sàng kàu koaⁿ-hú, chèng-lâng iā lóng khì, ta̍k-ê chí i sī chia̍h gín-á ê kúi.
|
Hit tia̍p有一個外國人行遊tī in街市，對一個囡仔討火食煙，囡仔看見，就捉著伊心內ê驚惶，就拼命走，驚了hō͘ 拖去食，走到跋倒siak著頭殼。街市ê人忽然看著外位人，koh看見囡仔鼻頭破，掠伊做食囡仔鬼，tú仔食一嘴，所以鼻頭有空。Tùi án-ni就大聲喉叫，眾人聚集掠hit ê外位人掙打；巡查恐驚傷害性命，將伊押送到官府，眾人也攏去，逐個指伊是食囡仔 ê鬼。 |
|
In chi̍t lâng kóng, I chia̍h 110 ê lah ! Koh chi̍t lâng kóng, Kiám nā 110 ê, chha-put-to 200 khah ke . Iū koh chi̍t-lâng kóng, Put-chí 200 ê, góa si̍t-chāi thiaⁿ-kìⁿ i chia̍h 250 ê lah . Ū ê kóng, I lia̍h-tio̍h gín-á lóng sī chhiⁿ chia̍h; ū ê kóng, Góa bōe-bat thiaⁿ-kìⁿ i chhiⁿ chia̍h , lóng sī kòe sio se̍k chiàⁿ chia̍h; ū ê kóng, lóng m̄-sī án-ni, i lóng chhiat kui-tè lâi chia̍h, iā liû tn̂g-tō͘ chia̍h. Chèng-lâng jiáu-loān hun-hun, só͘ kóng m̄ nā chi̍t iūⁿ.
|
In一人講：「伊食110個--lah!」Koh一人講：「Kiám nā 110個，差不多200 較加」又koh一人講：「不只200個，我實在看見伊食250個--lah」有ê講：「 伊掠著囡仔攏是生食」有ê講：「我bōe bat聽見伊生食，攏是過燒熟正食」 有ê講：「攏 m̄ 是án-ni，伊攏切歸塊來食，也liû腸肚食。」眾人擾亂紛紛，所講 m̄-nā一樣。 |
|
Hit-sî koaⁿ-hú chai in sī iâu-giân, kiaⁿ-liáu peh-sìⁿ kong-ji̍p gê-mn̂g-lāi; chiū kā hit lâng ōaⁿ pa̍t-iūⁿ saⁿ-á-khò͘, hō͘ i tùi pa̍t tiâu-lō͘ tô-cháu .
|
Hit時官府知in是謠言， 驚了百姓攻入衙門內； 就kā hit人換別樣衫仔褲，hō͘ 伊tùi別條路逃走。 |
|
Hāiⁿ--ah! chit-hō sū chin-chiàⁿ kî-koài. Chiông-tiong koh khah kî-koài, chiū-sī chèng-lâng só͘ kóng--ê chhin-chhiūⁿ lóng si̍t-sū; cha-khó kàu chim, siâⁿ-lāi lóng bô ū chit kháu-chàu sit-lo̍h gín-á!
|
Hāiⁿ--ah!這號事真正奇怪。從中koh 較奇怪， 就是眾人所講--ê 親像攏實事；查考到今，城內攏無有一口灶失落囡仔！ |
|
(Tâi-oân Hú-siâⁿ Kàu-hōe-pò tē 212 koàn, 1902 nî 11 ge̍h)
|
(台灣府城教會報第212卷，1902年11月) |
