Siuⁿ Chē
|
Siuⁿ Chē |
| Gô͘ Gî-lîn |
吳宜璘 |
|
Góa m̄-sī hit-chióng ē-sái chi̍t-pái bé chiok chē chhiùⁿ-phìⁿ koh thiaⁿ kah chiok sóng ê lâng, mi̍h-kiāⁿ nā chek siuⁿ chē ē hō͘ góa ū ap-le̍k, góa chin kiaⁿ mi̍h-kiāⁿ chek kui-tui, mā bē kah-ì chu-sìn it-ti̍t lúi-chek, he hō͘ góa ê hū-tam khah tōa-kòe khoài-lo̍k. Góa it-ti̍t tī chit-khoán mâu-tún lāi-té.
|
Góa m̄是hit種ē-sái 1 pái買chiok chē唱片koh聽kah chiok爽ê人, mi̍h-kiāⁿ若積siuⁿ chē ē hō͘ góa有壓力, góa真驚mi̍h-kiāⁿ積kui堆, mā bē kah意資訊一直累積, he hō͘ góa ê負擔khah大過快樂. Góa一直tī chit款矛盾內底. |
|
Góa m̄-sī chhiau-kip tiān-náu hit-lūi ê lâng, mā m̄-sī go͘gle, liân sió-hêng ê tô͘-su-koán to m̄-sī; sui-bóng góa chin siūⁿ beh liáu-kái chit-ê sè-kài, m̄-koh góa m̄-sī chit-ê sè-kài mā m̄-sī ú-tiū, kiám-chhái tùi tī i piⁿ--á se̍h leh kiâⁿ ū chhù-bī, m̄-koh iáu bô hoat-tō͘ khiā tī gōa-kháu chhiūⁿ tī gōa-thài-khong khòaⁿ kāng-khoán.
|
Góa m̄是超級電腦hit類ê人, mā m̄是go͘gle, 連小型ê圖書館to m̄是; 雖bóng góa真想beh了解chit ê世界, m̄-koh góa m̄是chit ê世界mā m̄是宇宙, kiám-chhái對tī i邊--á se̍h leh行有趣味, m̄-koh iáu無法tō͘ khiā tī外口像tī外太空看kāng款. |
|
Tùi góa lâi kóng, khòaⁿ-kòe koh-khah chē chheh, chin-chiàⁿ ū ìn-sióng--ê iáu-sī hit kúi-pún. Kî-thaⁿ ê chheh bô kiâⁿ khah thâu-chêng, kan-taⁿ sī teh chèng-bêng bó͘-chióng khài-liām ê chûn-chāi, pī ìn-chèng iah-sī bô ko͘-toaⁿ, tō ná-chhiūⁿ ū lâng tông-chêng Murakami Haruki hông thó-ià ê goân-in, sī i kóng ê hit-kóa chin-lí chá tō tī chiok chē kó͘-chheh lāi-té chhut-hiān--kòe-a. Ū chiok chē su-sióng chá tō hông kóng--kòe. Siáⁿ-mi̍h su-sióng sī chhau pa̍t-lâng ê, siáⁿ-mi̍h sī ka-tī ê, tiong-ng ê bô-kâng iáu-sī khòaⁿ ē chhut--lâi.
|
對góa來講, 看過koh khah chē冊, 真正有印象--ê iáu是hit kúi本. 其他ê冊無行khah頭前, kan-taⁿ是teh證明某種概念ê存在, 被印證iah是無孤單, tō ná像有人同情村上春樹hông討厭ê原因, 是i講ê hit-kóa真理早tō tī chiok chē古冊內底出現--過-a. 有chiok chē思想早tō hông講--過. Siáⁿ-mi̍h思想是抄別人ê, siáⁿ-mi̍h是ka-tī ê, 中ng ê無kâng iáu是看ē出--來. |
|
Chò āu-pōe ū-iáⁿ khah kan-khó͘, tō chhin-chhiūⁿ it-ti̍t teh cháu-chhōe kin ê Rock & Roll, tī cháu-chhōe ê kòe-têng, oan-nā thiaⁿ ē chhut ū bô-kâng ê só͘-chāi, ū ê hoān-sè ē hō͘ lâng kái-piàn tùi pún-té kah-ì ê mi̍h-kiāⁿ ê khòaⁿ-hoat.
|
做後輩有iáⁿ khah艱苦, tō親像聽一直teh走chhōe根ê Rock & Roll, tī走chhōe ê過程oan-na聽ē出有無kâng ê所在, 有ê hoān-sè ē hō͘人改變對本底kah意ê mi̍h-kiāⁿ ê看法. |
|
Chiâⁿ chē mi̍h-kiāⁿ, lóng sī chi̍t-chióng『先入為主』ê chōng-thāi. Tī tē-kiû téng-koân, lán í-keng sī『量產生物』ê āu-pòaⁿ-tōaⁿ, ū thài chē mi̍h-kiāⁿ lâng lóng chhoân piān-piān, lán bián hoat-hiān『繞日說』, bián hoat-hiān la̍t-ha̍k, bián iàu-ì tiān án-chóaⁿ來, bián kiaⁿ e-hng àm-mi-mo͘, bián hoân-ló bô chheh thang khòaⁿ, bián o̍h ga̍k-lí tō ū móa-sì-kè ê im-ga̍k, bián o̍h liap-iáⁿ bí-ha̍k tō ū sianpai choan-ka siūⁿ mā siūⁿ bē kàu ê sian-chìn ki-khì, lán chiūⁿ-bāng ū lia̍h bē liáu ê chu-liāu, thiaⁿ bē liáu ê koa......, it-chhè ê it-chhè, lóng siuⁿ kòe-thâu chē, chē kah móa-sì-kè.
|
Chiâⁿ chē mi̍h-kiāⁿ, lóng是1種『先入為主』ê狀態. Tī地球頂koân, lán已經是『量產生物』ê後半段, 有太chē mi̍h-kiāⁿ人lóng chhoân便便, lán免發現『繞日說』, 免發現力學, 免要意電án-chóaⁿ來, 免驚e-hng暗mi-mo͘, 免煩惱無冊thang看, 免學樂理tō有滿sì-kè ê音樂, 免學liap影美學tō有sianpai專家想mā想bē到ê先進機器, lán chiūⁿ網有lia̍h bē了ê資料, 聽bē了ê歌......, 一切ê一切, lóng siuⁿ過頭chē, chē kah滿sì-kè. |
|
Án-ne lâi, lán soah m̄-chai beh o̍h siáⁿ, sit-khì hong-hiòng, chhan-chhiūⁿ bô-liâu ê chèng-kheh chi̍t-kang kàu-àm kan-taⁿ teh lā-sái niâ.
|
Án-ne來, lán soah m̄知beh學siáⁿ, 失去方向, chhan像無聊ê政客1工到暗kan-taⁿ teh lā屎niâ. |
|
Só͘-ū ê mi̍h-kiāⁿ, i ê lâi-goân kap le̍k-sú lóng chiah-nī-á tin-kùi, m̄-koh kàu kah kin-á-ji̍t, chiah-ê soah pìⁿ-chò chiah-nī bô kè-ta̍t. Siong-phín-hòa ê it-chhè, hō͘人kan-taⁿ chhun beh iah boài nn̄g-chióng piáu-ta̍t hong-sek, tī chit lō khoân-kéng--ni̍h, lâng, kám-kak ka-tī jú lâi jú m̄-chiâⁿ lâng, chu-sìn kip-siu kòe-thâu chē, tōa-náu chia̍h kah pá-tu-tu, pí ūi-tn̂g khah oh siau-hòa, lán ē kiaⁿ, 所以ē-hiáu lī-iōng kiaⁿ-hiâⁿ ê lâng tō ē iâⁿ.
|
所有ê mi̍h-kiāⁿ, i ê來源kap歷史lóng chiah-nī-á珍貴, m̄-koh到kah今á日, chiah-ê soah pìⁿ做chiah-nī無價值. 商品化ê一切, hō͘人kan-taⁿ chhun beh iah boài 2種表達方式, tī chit lō環境--ni̍h, 人, 感覺ka-tī jú來jú m̄-chiâⁿ人, 資訊吸收過頭chē, 大腦食kah飽tu-tu, 比胃腸khah oh消化, lán ē驚, 所以ē-hiáu利用驚惶ê人tō ē贏. |
|
Siūⁿ-khí tiān-iáⁿ “Bowleng For Columbine” (『科倫拜校園事件』) lāi-té, hóng-būn Marilyn Manson, i kóng chi̍t-tōaⁿ hō͘ góa ìn-sióng chiok chhim ê ōe: “Chit-má ê siong-gia̍p nā beh sêng-kong, tio̍h-ài it-ti̍t chè-chō kiaⁿ-hiâⁿ. Lán bé kiám-pûi-io̍h-á sī kiaⁿ siuⁿ pûi bô-lâng beh ài, lán bé sé-bīn--ê sī kiaⁿ seⁿ thiau-á-chí bô-lâng ē ài, in-ūi ē kiaⁿ......só͘-í......」
|
想起電影Bowleng For Columbine(『科倫拜校園事件』)內底, 訪問Marilyn Manson, i講1段hō͘ góa印象chiok深ê話:「Chit-má ê商業若beh成功, tio̍h-ài一直製造驚惶. Lán買減肥藥á是驚siuⁿ肥無人beh愛, lán買洗面--ê是驚生thiau-á-chí無人ē愛, 因為ē驚......所以......」 |
|
Siuⁿ chē mi̍h-kiāⁿ kā lán sak ǹg thâu-chêng khì, hō͘ lán bē-hù su-khó, góa sêng-jīn, tī to͘-chhī seng-oa̍h, beh ū thang su-khó ê khoân-kéng, pí beh suh-tio̍h chheng-khì ê khong-khì koh-khah oh.
|
Siuⁿ chē mi̍h-kiāⁿ kā lán sak ǹg頭前去, hō͘ lán bē-hù思考, góa承認, tī都市生活, beh有thang思考ê環境, 比beh suh tio̍h chheng-khì ê空氣koh khah oh. |
|
(TGB Thong-sìn tē 80 kî, 2006 nî 5 goe̍h)
|
(TGB通訊第80期，2006年5月) |
