Puigcerda Noevo_08
|
Puigcerda Noevo_08 |
| Voyu Taokara Lâu |
Voyu Taokara劉 |
|
Peh
|
八 |
|
Chū-chiông téng-kái hōe khui-soah liáu-āu, Puigcerda Noevo khai-sí ū-lâng mi̍h-kiāⁿ khoán-khoán--leh , seng lī-khui chit-ê po͘-thâu, sǹg-sǹg--leh, chha-put-to ū saⁿ-hun chi-it ê lâng soán-tek chiām-sî lâi lī-khui.
|
自從頂kái會開soah了後，Puigcerda Noevo開始有人mi̍h-kiāⁿ khoán-khoán--leh ，先離開chit-ê埠頭，算算--leh，差不多有三分之一ê人選擇暫時來離開。 |
|
Chóng--sī Milagros bô tòe leh cháu, i koat-tēng beh lâu--lo̍h-lâi, lí-lō͘ chin kán-tan, in tōa-hiaⁿ taⁿ lâng m̄-chai tī tó-ūi, ài-jîn-á A-tek hō͘ i iang-thok lo̍h-soaⁿ, oan-nā iáu-bē tò-tńg--來, i koat-tēng tán A-tek tńg--lâi liáu-āu, chiah khòaⁿ beh án-chóaⁿ phah-sǹg.
|
總是Milagros無tòe leh走，i決定beh留--落來，理路真簡單，in大兄taⁿ人m̄知tī tó位，愛人á A德hō͘ i央託落山，oan-nā iáu bē tò-tńg--來，i決定等A德tńg--來了後，chiah看beh án-chóaⁿ phah算。 |
|
Chit kúi-kang-á, ū chāi-tē--ê hoat-hiān ū-lâng tī hū-kīn bi̍h-bi̍h-chhi̍h-chhi̍h, koh tùi-bīn ê soaⁿ-thâu hó chhin-chhiūⁿ ū-lâng ēng tiàu-kiàⁿ teh kā Puigcerda Noevo thau-siam thau-khòaⁿ, in-ūi chit-ê po͘-thâu ê chûn-chāi pún-té tō bô siáⁿ lâng chai-iáⁿ, só͘-í chiah-ê tāi-chì si̍t-chāi bē-ēng-tit kóng sūn-lí sūn-lō͘, tāi-ke kan-taⁿ chhùi--n̍i̍h bô kóng, kî-si̍t lóng kiaⁿ-sim lún-miā, giâu-gî ū sím-mi̍h kè-mô͘ teh chìn-hêng.
|
Chit幾kang-á，有在地--ê發現有人tī附近bi̍h-bi̍h-chhi̍h-chhi̍h，koh對面ê山頭好親像有人用吊鏡teh kā Puigcerda Noevo偷siam偷看，因為chit-ê埠頭ê存在本底tō無siáⁿ人知iáⁿ，所以chiah-ê tāi-chì實在bē-ēng-tit講順理順路，tāi-ke kan-taⁿ chhùi--n̍i̍h無講，其實lóng驚心lún命，giâu疑有sím-mi̍h計謀teh進行。 |
|
Chit-kang in iū-koh lâi teh khui-hōe, thó-lūn kio̍k-sè, chhun saⁿ-hun chi-jī ê lâng, hō͘ it-ti̍t lóng chiâⁿ-chò chhoan-bîn chū-hōe só͘-chāi ê kàu-tn̂g, ūi khàng chin chē chhut--lâi.
|
Chit-kang in iū-koh來teh開會，討論局勢，chhun三分之二ê人，hō͘一直lóng chiâⁿ-chò村民聚會所在ê教堂，位khàng chin chē--出來。 |
|
“Lán sī m̄-sī tio̍h chhoân chi̍t-kóa ke-si-thâu lâi hông sin-kí, bān-put-jī nā ū sím-mi̍h tāi-chì, mā tio̍h chûn āu-pō͘, khang-kûn sò͘-chhiú chóng--sī khah su-bīn.” Chi̍t-ê pòaⁿ-ló-lāu ê cha-po͘-lâng lā ōe-thâu.
|
「Lán是m̄是tio̍h chhoân chi̍t-kóa ke-si頭來防身己，萬不二nā有sím-mi̍h tāi-chì，mā tio̍h存後步，空拳素手總--是khah輸面。」1 ê半ló-lāu ê cha-po͘-lâng lā話頭。 |
|
“Án-ne chò sī m̄-tio̍h--ê, lán bô èng-kai tòe chit sè-kan ê lâng teh ‘ba̍k-chiu pôe ba̍k-chiu, chhùi-khí pôe chhùi-khí’, chit sè-kan tō-sī in-ūi ū chit-hō ngē-tú-ngē ê siūⁿ-hoat, chiah ē piàn kah chiah-n̍i̍h loān, put-koán-sî lóng ū-lâng teh lâu-hoeh, put-koán-sî lóng teh thâi lâng,” chi̍t-ê cha-bó͘-lâng chhut-siaⁿ tú-chhùi, “chín bo̍k-su mā tī chia, lín kám bē kì-tit ‘bo̍k-tit kap pháiⁿ tí-tek’ ê tō-lí? ‘tùi-tek lín--ê tio̍h thiàⁿ--in; khún-tio̍k lín--ê tio̍h thè in kî-tó’, taⁿ Siōng-tè hō͘ I ê ji̍t khí-alî chhiō pháiⁿ-lâng kap hó-lâng; ia̍h ēng hō͘ ak gī kap put-gī ê lâng, lán m̄-thang kap chit-ê sè-kài teh sio-khòaⁿ sio-iūⁿ.”
|
「Án-ne chò是m̄-tio̍h--ê，lán無應該tòe chit世間ê人teh “目chiu賠目chiu，chhùi-khí賠chhùi-khí”，chit世間tō是因為有chit號硬tú硬ê想法，chiah ē變kah chiah-n̍i̍h亂，不管時lóng有人teh流血，不管時lóng teh thâi人，」1 ê cha-bó-lâng出聲tú-chhùi，「chìn牧師mā tī chia，lín kám bē記tit「莫得kap pháiⁿ tí-tek」ê道理？「對敵lín--ê tio̍h thiàⁿ--in；khún-tio̍k lín--ê tio̍h替in祈禱」，taⁿ上帝hō͘ I ê日起來照pháiⁿ人kap好人；ia̍h用雨ak義kap不義ê人，lán m̄-thang kap chit-ê世界teh sio看sio-iūⁿ。」 |
|
“Ōe bē-sái án-ne kóng, nā Í-sek-lia̍t hō͘ tùi-tek kong-kek, lóng bô tú-chhiú, taⁿ Í-sek-lia̍t chá tō bia̍t-bô--khì ah, hòng-kiam Sèng-keng lāi-té koh kóng, ín-chhōa Í-sek-lia̍t phah-pāi tùi-tek ê sū-su kap thâu-lâng, sī Siōng-tè heng-khí--ê, lán kam chiâⁿ-si̍t beh tiām-tiām chē tī chia thèng koah thèng-hâ?” Chi̍t-ê siàu-liân cha-po͘ gín-á án-ne ìn.
|
「話bē-sái án-ne講，nā以色列hō對敵攻擊，lóng無tú手，taⁿ以色列早tō滅無--去ah，hòng兼聖經內底koh講，引chhōa以色列phah敗對敵ê士師kap頭人，是上帝興起--ê，lán kam chiâⁿ-si̍t beh tiām-tiām坐tī chia thèng割thèng-hâ？」1 ê少年cha-po͘ gín-á án-ne應。 |
|
“Lín ē siuⁿ-kòe kāu chhau-hoân--bô, taⁿ sím-mi̍h sî-tāi--ah, nah ē ū sím-mi̍h tōa tāi-chì--lah, lán nā-sī chin-chiàⁿ chhau-kun liān-bú, m̄-chiah ē hō͘ lâng kóng sī lán chhit-chhoaⁿ peh-chhì, beh khí-khang khí-phāng, sî-kàu lâng nā chin-chiàⁿ beh kā lán lia̍h-khang, lán tō chhian-chhùi lân-hun--ah.” Lēng-gōa chi̍t-ê kòa ba̍k-kàiⁿ, khòaⁿ--khí-lâi lâng chin su-bûn ê cha-po͘ án-ne kóng.
|
「Lín ē siuⁿ過kāu操煩--無，taⁿ sím-mi̍h時代--ah，nah ē有sím-mi̍h大tāi-chì--lah，lán nā是chin-chiàⁿ操軍練武，m̄-chiah ē hō͘人講是lán七chhoaⁿ八刺，beh起khang起縫，時到人nā chin-chiàⁿ beh kā lán lia̍h-khang，lán tō千chhùi難hun--ah。」另外1 ê掛目鏡、看--起來人chin斯文ê cha-po͘ án-ne講。 |
|
“Bô lō͘-ēng--lah,” Chòe-āu sī chi̍t-ê a-pô khui-chhùi, “Lán sī ū châi-tiāu pī-pān kah sím-mi̍h khám-chām? Siáⁿ-lâng ū hoat-tō͘ tòa-niá lán phah-iâⁿ kui-ê Espana ê kun-tūi? Thang gia̍h-chhiú hō͘ lán tāi-ke khòaⁿ-māi leh.”
|
「無lō͘用--lah，」最後是1 ê a婆開chhùi，「lán是有才調備辦kah sím-mi̍h khám-chām？Siáⁿ-lâng有法tō͘帶領lán phah贏kui-ê Espana ê軍隊？Thang gia̍h手hō͘ lán大家看-māi leh。」 |
|
Kàu-tn̂g lāi-té tiām-chut-chut, kan-taⁿ thiaⁿ-tio̍h hong koàn tùi mn̂g-phāng ji̍p--lâi, chi̍t-chūn chi̍t-chūn “siû siû siû” ê siaⁿ.
|
教堂內底tiām-chut-chut，kan-taⁿ聽tio̍h風灌tùi門phāng--入來，1 chūn 1 chūn 「siû siû siû」ê聲。 |
|
A-tek ji̍p-khì kàu lâu-thui-keng liáu-āu, m̄-káⁿ sió hioh, sûi hē sèⁿ-miā chi̍t-gám chi̍t-gám peh--khí-li̍h, siàu-liân--ê kha-kiāⁿ chhiú-kiāⁿ, chi̍t-sî-á tō lâi-kàu cha̍p-jī lâu, iáu bē-chêng chhun-chhiú khì khui-mn̂g, cha̍p-jī lâu lâu-thui-keng ê mn̂g soah khui tò chhut--lâi, chi̍t-ê khòaⁿ, sī nn̄g-ê chhēng o͘-saⁿ ê cha-po͘-lâng, A-tek tōa tio̍h-kiaⁿ, chit nn̄g-ê lâng, kap hit-kang tī Joan ê pān-kong-sek khòaⁿ--tio̍h hit nn̄g-ê lòng tùi āu-piah-mn̂g chhut--khì ê lâng ê āu-piah-hêng chin sêng, m̄-koh chit nn̄g-ê chhēng o͘-saⁿ--ê khòaⁿ-tio̍h A-tek chhēng pe̍h-sek ê tn̂g-saⁿ, sûi kóng chi̍t-siaⁿ sit-lé kiu tò--tńg-khì, A-tek āu--lâi siūⁿ-tio̍h chit-kiāⁿ tāi-chì ê sî, ioh in khó-lêng tō-sī beh lâi thâi Ngô͘ Kok-sêng, m̄-koh in-ūi tú-tio̍h A-tek, lia̍h chò i sī i-seng, choaⁿ-á lîm-sî thiu-thè, chún-pī khah kóa chiah lâi.
|
A德入去到樓梯間了後，m̄敢sió hioh，sûi hē性命1 gám 1 gám peh--起li̍h，少年--ê kha-kiāⁿ手kiāⁿ，chi̍t時á tō來到12樓，iáu bē-chêng chhun手去開門，12樓樓梯間ê門soah開tò--出來，chi̍t-ê看，是2 ê穿烏saⁿ ê cha-po͘-lâng，A德大tio̍h驚，chit 2 ê人，kap hit-kang tī Joan ê辦公室看tio̍h hit 2 ê lòng tùi後壁門出去ê人ê後壁形chin sêng，m̄-koh chit 2 ê穿烏saⁿ--ê看tio̍h A德穿白色ê長saⁿ，sûi講1聲失禮kiu tò--tńg去，A德後--來想tio̍h chit件tāi-chì ê時，ioh in可能tō是beh來thâi吳國成，m̄-koh因為tú-tio̍h A德，lia̍h chò i是醫生，choaⁿ-á臨時抽退，準備khah--kóa chiah來。 |
|
A-tek sim-chêng khah tiāⁿ--lo̍h-lâi liáu-āu, siūⁿ-siūⁿ--leh, oan-nā m̄-káⁿ sûi ji̍p--khì, tng teh tiû-tû, oa̍t-thâu soah khòaⁿ-tio̍h tò-chhiú-pêng ū chi̍t-ê mn̂g, mn̂g-pán téng-thâu ê pâi-á siá “1200”, “1200, iáu-siū, chit-keng nah ē tī chia, m̄-tō hó ka-chài khì tng-tio̍h hit nn̄g-chiah chheⁿ-kông-káu, bô chit-siaⁿ ji̍p-khì lāi-té tiāⁿ-tio̍h chhōe bô--ê.” A-tek hit-chūn iáu m̄-chai-iáⁿ, i nā khah bān--chi̍t-hun-cheng, hit nn̄g-ê chhēng o͘-saⁿ--ê taⁿ tō í-keng kòe-chhiú--ah.
|
A德心情khah tiāⁿ--落來了後，想想--leh，oân-nā m̄敢sûi入去，tng teh tiû-tû，oa̍t頭soah看tio̍h tò手pêng有1 ê門，門板頂頭ê牌á寫「1200」，「1200，iáu壽，chit間nah ē tī chia，m̄-tō好ka-chài去tng tio̍h hit 2 chiah chheⁿ狂狗，無chit聲入去內底tiāⁿ-tio̍h chhōe無--e。」A德hit-chūn iáu m̄-chai-iáⁿ，i nā khah慢--1分鐘，hit 2 ê穿烏saⁿ--ê taⁿ tō已經過手--ah。 |
|
A-tek chông kòe kā mn̂g phah--khui, khòaⁿ-tio̍h chi̍t-ê lāu-lāu-lāu, peh-cha̍p gōa hòe ê tang-hong-lâng tó tī bîn-chhn̂g téng, i óa--kòe, kóng chi̍t-siaⁿ: “Ngô͘ phok-sū, góa sī lâi kā lí kiù--ê.” Lāu-lâng ba̍k-chiu thí bô siáⁿ ē kim, kán-ná beh kóng siáⁿ, m̄-koh bô khùi-la̍t kóng chhut-chhùi, A-tek kā i phō--khí-lâi, āiⁿ--leh phoe-miā cháu tùi lāu-kha lo̍h--khì.
|
A德chông過kā門phah--開，看tio̍h 1 ê老老老，80外歲ê東方人tó tī眠床頂，i óa--過，講1聲：「吳博士，góa是來kā lí救--ê。」老人目chiu thí無siáⁿ ē金，kán-ná beh講siáⁿ，m̄-koh無氣力講出chhùi，A德kā i phō--起來， āiⁿ--leh phoe命走tùi樓kha--落去。 |
|
Cháu-lâi kah lâu-kha, A-tek tōa-khùi chhoán bē-lī, tī piⁿ--á sak chi̍t-chiah lûn-í, hō͘ Ngô͘ phok-sū chē--leh, kā sak-chhut pēⁿ-īⁿ, cha̍h chi̍t-tâi kè-têng--ê, chhiáⁿ i ti̍t-chiap sái-khì hóe-chhia-thâu, i àn-sǹg beh chē hóe-chhia ǹg tang-pêng khí-li̍h soaⁿ-khu, chē kah bóe-chām chiah poaⁿ-chhia, siūⁿ pān-hoat tńg-khì Puigcerda Noevo.
|
走來kah樓kha，A德大氣喘bē-lī，tī邊á sak 1 chiah輪椅，hō͘吳博士坐--leh，kā sak出病院，chā 1台計程--ê，chhiáⁿ i直接sái去火車頭，i àn算beh坐火車ǹg東pêng起li̍h山區，坐kah尾站chiah poaⁿ車，想辦法tńg去Puigcerda Noevo。 |
|
(Tâi-bûn Bóng-pò tē 100~102 kî, 2005 nî 1~3 goe̍h)
|
(台文罔報第100~102期，2005年1~3月) |
