Puigcerda Noevo_05
|
Puigcerda Noevo_05 |
| Voyu Taokara Lâu |
Voyu Taokara劉 |
|
Gō͘
|
五 |
|
Chit-tang kôaⁿ--lâng lâi tio̍h ū khah kín, thiⁿ-sî chiah cha̍p-it goe̍h, ke-lō͘?--n̍i̍h í-keng ū-lâng khai-sí kā tōa-bóng chhēng--cxhhut-lâi ah, m̄-koh thiⁿ-khì léng hoān léng, ū chi̍t-kóa oa̍h-tāng pān kah tng jia̍t-phut-phut, jî-chhiáⁿ chhin-chhiūⁿ kńg-lê-á-hong sàu-kòe siā-hōe ê múi chi̍t-ê chân-bīn.
|
Chit冬kôaⁿ--人來tio̍h有khah kín，天時chiah十一月，街路?--n̍i̍h已經有人開始kā大蟒穿--出來ah，m̄-koh天氣冷hoān冷，有1 kóa活動是辦kah tng熱phut-phut，而且親像kńg-lê-á風掃過社會ê múi-chi̍t-ê層面。 |
|
Joan kap chi̍t-tīn i-seng teh chhui-sak ê “Ka-ⁿ̂g i-tī ūn-tōng” tit-tio̍h chi̍t-kóa siā-hōe cho͘-chit kap ki-kò ê chi-chhî, mûi-thé mā tōa-tōa kā pò-tō, ū lú lâi lú chē ê lâng kiò-ìn, tī bô kāng-khoán ê choanm-gia̍p jîn-sū lāi-té, mā khai-sí ū-lâng tòe leh khí-chō tāi-iok sio-kâng ê cho͘-chit, pí-lūn kóng “Láu-si̍t seng-lí-lâng hia̍p-hōe” , “Chèng-koàn hoat-heng kap kau-ek sêng-si̍t ūn-tōng”, “Láu-si̍t kong-bū-oân ki-kim-hōe” téng-téng, ná-chhiūⁿ sī chìn-chêng chá tō ū iok-sok, chi̍t-ê chi̍t-ê sio-cheⁿ teh khí-kó͘.
|
Joan kap 1陣醫生teh chhui-sak ê「Ka-ⁿ̂g醫治運動」得tio̍h 1 kóa社會組織kap機構ê支持，媒體mā大大kā報導，有lú來lú chē ê人叫應，tī無kāng款ê專業人士內底，mā開始有人tòe leh起造大約相kâng ê組織，比論講「老實生理人協會」、「證券發行kap交易誠實運動」、「老實公務員基金會」等等，ná像是進前早tō有約束，1 ê 1 ê sio-cheⁿ teh起鼓。 |
|
Kî-tiong “Láu-si̍t kun-jîn ūn-tōng” kap “Láu-si̍t chêng-pò ūn-tōng” nn̄g-ê cho͘-chit iû-kî oa̍h-hiáⁿ, in kong-khai chi-chhî kun-jîn Hugo Ferro kap chêng-pò jîn-oân Gabino Lara ê àn-kiāⁿ, sì-kòe soan-thoân kóng in sī liông-sim-hoān, bô èng-kai siū-tio̍h phòaⁿ-koat lâi chia̍h-chōe.
|
其中「老實軍人運動」kap「老實情報運動」2 ê組織尤其活hiáⁿ，in公開支持軍人Hugo Ferro kap情報人員Gabino Lara ê案件，sì-kòe宣傳講in是良心犯，無應該受tio̍h判決來chia̍h罪。 |
|
＊ ＊ ＊ ＊
|
＊ ＊ ＊ ＊ |
|
Pài-it kàu pài-sì, móa-thiⁿ ê o͘-hûn kāu-kāu-kāu bē-su chhàu-phú ê mî-chioh-phōe, ji̍t-thâu í-keng bi̍h kúi-ā kang bô tham--chhut-lâi ah, hō͘ sam-put-gō͘-sî tō lo̍h--chi̍t-chūn, hō͘-chām chi̍t-chūn chi̍t-chūn, hō͘ lâng ut kah kiōng-beh tio̍h lāi-chèng.
|
拜一到拜四，滿天ê烏雲厚厚厚bē輸chhàu-phú ê棉chioh被，日頭已經bi̍h幾ā kang無tham--出來ah，雨三不五時tō落--chi̍t陣，雨chām一陣一陣，hō͘人鬱kah kiōng-beh tio̍h內症。 |
|
Pài-gō͘ chái-khí peh-tiám gōa, ji̍t-chhiu tē-it-kái nǹg-kòe hûn-phāng, cha̍p-it tiám thóng ê sî gia̍h-thâu kan-taⁿ khòaⁿ-tio̍h kui tōa-phìⁿ khóng-sek ê thiⁿ, o͘-hûn í-keng bi̍h kah bô-khòaⁿ iáⁿ-jiah, àⁿ-thâu khòaⁿ-tio̍h beh chiâⁿ cha̍p chiah ê o͘-thâu-á-chhia tī pe̍h-sek ê mn̂g-thiāu thâu-chêng pâi-chò kui-pâi, pîn-thâu sái ji̍p-khì chóng-lí koaⁿ-the̍h.
|
拜五早起8點外，日鬚第1 kái nǹg過雲phāng，11點thóng ê時gia̍h頭kan-taⁿ看tio̍h kui大片khóng色ê天，烏雲已經bi kah無看影跡，àⁿ頭看tio̍h beh chiâⁿ 10 chiah ê烏頭á車tī白色ê門thiāu頭前排chò kui排，pîn頭駛入去總理官宅。 |
|
Koaⁿ-the̍h ê chhiûⁿ-ûi kap kiàn-tio̍k lóng ēng kui-phìⁿ o͘-tò͘-âng ê hûi-á lâi chng-thāⁿ, kan-taⁿ chhù kap chhiûⁿ-ûi ê téng-iân, ē-iân kap mn̂g-thang ê sì-chiu-ûi te̍k-pia̍t chò hō͘ khah thóng--chhut-lâi, sī chio̍h-hui pe̍h-phú ê sek-chúi, chhiⁿ-lèng-lèng ê chháu-po͘ téng-bīn ū kúi-tah-á koh ū chang-àm iáu-bē ta ê lō͘-chúi, tī ji̍t-thâu ē-kha put-sî si̍h--chi̍t-ê si̍h--chi̍t-ê.
|
官宅ê牆圍kap建築lóng用kui片烏tò͘紅ê hûi-á來chng-thāⁿ，kan-taⁿ chhù kap牆圍ê頂緣、ē緣kap門窗ê四周圍特別chò hō͘ khah thóng--出來，是石灰白phú ê色水，青lèng-lèng ê草埔頂面有幾tah-á koh有chang暗iáu-bē ta ê露水，tī日頭ē-kha不時si̍h--chi̍t-ê si̍h--chi̍t-ê。 |
|
Chóng--sī chiah-ê chhēng kah o͘-mah-mah ê koaⁿ-oân, ta̍k-ê lóng bīn-iu bīn-kat, lo̍h-chhia liáu-āu tō kóaⁿ-kín-kín kiâⁿ ji̍p-khì koaⁿ-the̍h lāi-té.
|
總是chiah-ê穿kah黑mah-mah ê官員，ta̍k-ê lóng面憂面結，落車了後tō趕緊緊行入去官宅內底。 |
|
Hōe-gī-sek lāi-té ê toh-á sī tn̂g-ko-îⁿ--ê, ka-pi-sek ê toh-téng kng kah ē chiō tit lâng-iáⁿ, gō͘-cha̍p gōa hòe ê chóng-lí chit-kái hoán-hêng, tē-it-ê chē tī hōe-gī-sek lāi-té teh tán, ka-pi-sek ê thâu-mn̂g khiû kah chin súi, loa̍h kah chiâⁿ chê-chéng, i ba̍k-thâu kat-kat, sió-khóa sit-cheng-eng, khòaⁿ ē chhut-lâi chang-mê ūi-tio̍h sím-mi̍h tāi-chì teh hoân-ló, khùn-laiú bô kóng kài-hó.
|
會議室內底ê桌á是長ko圓--ê，咖啡色ê桌頂光kah ē照得人影，50外歲ê總理chit-kái反形，第1 ê坐tī會議室內底teh等，咖啡色ê頭mn̂g khiû kah chin súi，loa̍h kah chiâⁿ齊整，i目頭結結，sió-khóa失精英，看ē出來chang-mî為tio̍h sím-mi̍h tāi-chì teh煩ló，睏了無講kài好。 |
|
Cha̍p-it tiám-pòaⁿ chìn-chêng, só͘-ū ê koaⁿ-oân lóng í-keng chē hó-sè, chún-pī beh khui-hōe.
|
11點半chìn-chêng，所有ê官員lóng已經坐好勢，準備beh開會。 |
|
“Lín cha-hng ē-po͘ sàng-lâi hō͘ góa ê pò-kò góa í-keng tha̍k--kòe-ah, ki-pún siōng, góa chin siū-khì, chit-ê tāi-chì sī án-chóaⁿ chit-má chiah hō͘ góa chai-iáⁿ?” Chóng-lí chi̍t khui-chhùi tō án-ne mn̄g.
|
「Lín cha-hng ē-po͘送來hō͘ góa ê報告góa已經讀--過ah，基本上，góa chin siū氣，chit-ê tāi-chì是án-chóaⁿ chit-má chiah hō͘ góa知iáⁿ？」總理chi̍t開chhùi tō án-ne問。 |
|
“Chóng-lí, kî-si̍t che gún mā-sī chòe-kīn chiah chai-iáⁿ--ê, in-ūi í-keng sī saⁿ-cha̍p gōa tang chêng ê kè-ōe--ah, tû-liáu chêng-pò-kio̍k lāi-té chin chió-sò͘ ê koaⁿ-oân kap tóng-àn chu-liāu í-gōa, ē-sái kóng kin-té tō bô siáⁿ lâng liáu-kái kui-kiāⁿ tāi-chì ê thâu-lâi bóe-khiò.” Chē tī chóng-lí keh-piah ê lōe-chèng tāi-sîn án-ne kā ìn.I sī chi̍t-ê tiong-liân-lâng, thâu-hia̍h liù-liù, thâu-chang lóng ēng iû loa̍h tùi āu-piah, ku̍t kah ē poa̍h-tó hô͘-sîn, koh kòa chi̍t-ki tōa-tōa-ki ê kim-kheng ba̍k-kiàⁿ, ū chi̍t-ê tōa-pak-tó͘-tháng.
|
「總理，其實che gún mā是最近chiah知iáⁿ--ê，因為已經是三十外冬前ê計劃--ah，除了情報局內底chin少數ê官員kap檔案資料以外，ē-sái講根底tō無siáⁿ人了解kui件tāi-chì ê頭來尾去。」坐tī總理隔壁ê內政大臣án-ne kā應。I是1 ê中年人，頭hia̍h liù-liù，頭chang lóng用油loa̍h tùi後piah、滑kah ē poa̍h倒hô͘-sîn，koh 掛1 ki大大支ê金kheng目鏡，有1 ê大pak-tó͘-tháng。 |
|
“Chóng-lí, che sī Franco chiong-kun tī i thóng-tī ê bóe-kî só͘-chò ê kè-ōe, āu--lâi in-ūi chèng-koân sio pái-thè, sè-bīn thài loān, chit-ê tī chhim-soaⁿ nâ-lāi ê pì-bi̍t kè-ōe choaⁿ-á bô kau-pôaⁿ--tio̍h, nā m̄-sī gún phài-lâng chhim-ji̍p khì liáu-kái, koh kā kó͘-chá ê tóng-àn péng chhut-lâi khòaⁿ, kióng-kiaⁿ éng-oán tō sa bô thâu-cháng.” kok-hông tāi-sîn chiap-lo̍h-khì kóng, i jîn seⁿ-chò ko-chhiâng tōa-hàn, o͘-sek ê thâu-chang ka kah té-té, phòa-pin-se, lâu peh-jī-chhiu.
|
「總理，che是Franco將軍tī i統治ê尾期所chò ê計劃，後--來因為政權相pái-thè，sè面thài亂，chit-ê tī深山林內ê?密計劃choaⁿ-á無交盤tio̍h，nā m̄是gún派人深入去了解，koh kā古早ê檔案péng出來看，恐驚永遠tō sa無頭cháng。」國防大臣接lo̍h去講，i人生chò高強大漢，烏色ê頭chang ka kah短短、破鬢梳，留八字chhiu。 |
|
Lōe-chèng tāi-sîn koh kóng: “Saⁿ kò-goe̍h chêng, gún hoat-hiān sio-liân-sòa ê oa̍h-tāng it-ti̍t teh chìn-hêng, lāi-té ū “Ka-ⁿ̂g i-tī ūn-tōng”, “Láu-si̍t seng-lí-lâng hia̍p-hōe”, “Chèng-koàn hoat-hêng kap kau-e̍k sêng-si̍t ūn-tōng”, “Láu-si̍t kong-bū-oân ki-kim-hōe”, “Láu-si̍t kun-jîn ūn-tōng” kap “Láu-si̍t chêng-pò ūn-tōng” téng-téng, gún hoat-hiān chiah-ê ūn-tōng pēng m̄-sī hō͘-siong bô tī-tāi, in ê kha-chiah-āu kî-si̍t sī ū kāng chi̍t-tīn lâng teh ōe âng-á-ba̍k--ê, in ê lâng í-keng chìn-ji̍p thé-chè, pau-khoah mûi-thé, chèng-hú ki-koan, ha̍k-su̍t ki-kò kap kang-siong thoân-thé lāi-té, ū bē-chió lâng í-keng chē tī thâu-lâng ê ūi, éng-hióng-la̍t chám-jiân-á tōa.”
|
內政大臣koh講：「三個月前，gún發現相連sòa ê活動一直teh進行，內底有『Ka-ⁿ̂g醫治運動』、『老實生理人協會』、『證券發行kap交易誠實運動』、『老實公務員基金會』、『老實軍人運動』kap『老實情報運動』等等，gún發現chiah-ê運動並m̄是互相無tī-tāi，in ê kha-chiah後其實是有kāng 1陣人teh畫âng-á目--ê，in ê人已經進入體制，包括媒體、政府機關、學術機構kap工商團體內底，有bē少人已經坐tī頭人ê位，影響力chám-jiân-á大。」 |
|
“Lín tī pò-kò lāi-té kóng in chiah-ê lâng ē tùi chéng-kò kok-ka kap siā-hōe sán-seng chin put-lī ê éng-hióng, hi-bāng chèng-hú ē-tàng chhái-chhù kiông-chè ê chhiú-lō͘ kā chám-chháu tû-kin, nā góa khòaⁿ--khí-lâi, in chit-tīn lâng kan-taⁿ sī ū chiâⁿ kiông-lia̍t ê tō-tek-kám niā-tiāⁿ, tùi Espana ū sím-mi̍h bô hó--leh? Kám kóng kok-ka siā-hōe ê kong-bîn tō-tek ì-sek gia̍h-thâu m̄-sī chi̍t-kiāⁿ hó tāi-chì?” Chóng-lí koh siūⁿ beh kóng--lo̍h-khì, m̄-koh lîm-sî lîm-iāu chhōe bô sì-thīn ê pí-jū, lâi pí-lūn pò-kò lāi-té hit-khoán chai-lān-sèng ê hiō-kó.
|
「Lín tī報告內底講in chiah-ê人ē tùi整個國家kap社會產生chin不利ê影響，希望政府ē-tàng採取強制ê手路kā斬草除根，nā góa看--起來，in chit陣人kan-taⁿ是有chiâⁿ強烈ê道德感niā-tiāⁿ，tùi Espana有sím-mi̍h無好--leh？Kám講國家社會ê公民道德意識gia̍h頭m̄是1件好tāi-chì？」總理koh想beh講--lo̍h去，m̄-koh臨時臨iāu chhōe無sì-thīn ê比喻，來比論報告內底hit款災難性ê後果。 |
|
Ū kúi-cha̍p bió-cheng hōe-gī-sek lāi-té tāi-ke soah lóng tiām-tiām, bóe--ā kok-hông tāi-sîn chiah khui-chhùi kóng:”Chóng-lí, kok-hông kap chêng-pò ê khang-khòe pún-chiâⁿ tō ài kāu sim-su, taⁿ beh hoah láu-si̍t, bē-sái phah-phiàn-pō͘, bē-sái kan-kan kúi-kúi, kui-khì gia̍h pe̍h-kî-á ǹg tek-jîn tâu-hâng khah kín...” Kok-hông tāi-sîn ōe kóng bē-chêng chi̍t-pòaⁿ, chē tī i sio-tùi-thâu, pún-té it-ti̍t tiām-chi̍h-chi̍h ê siong-gia̍p tāi-sîn tō kā phah-tn̄g kó͘-piáⁿ, “chóng-lí, kòe-khì chi̍t kò-goe̍h, lán-kok kó͘-chhī ê sêng-kau-liōng í-keng lak kah chhun gō͘-hun chi it--ah, lán-kok ê kó͘-chhī sui-bóng kóng phoe-bô͘ m̄-sī sè-kài siōng tōa--ê, siōng-bô mā iáu-sī Au-chiu chiàm-niá khàm ê peh-tōa kó͘-chhī chi it, taⁿ kòe-khì chi̍t kò-goe̍h, liân Tang-au hiah-ê sin-heng kó͘-chhī mā pí lán khah-iâⁿ, chèng-koàn chhī-tiûⁿ tī in hiah-ê thâu-lâng lā-thâu chò hit-hō “chèng-koàn hoat-hêng kap kau-e̍k sêng-si̍t ūn-tōng” liáu-āu, kó͘-chhui tâu-ki ki-kò kap tâu-chu-jîn, kan-taⁿ chò tn̂g-kî, kè-ta̍t-sèng ê tâu-chu, koh kā chi̍t-kóa liû-tōng-sèng khah koân ê gōa-chu kū-choa̍t, in chiáng-ak kong-hōe, tùi chèng-koàn-siong sán-seng chin tōa ê pé-pa̍k, góa ū kap chi̍t-kóa lâng chi̍h-chiap--kòe, in kóng tō chún-kóng ū-lâng bô chàn-sêng in ê khòaⁿ-hoat, m̄-koh in-ūi kong-hōe kap tiōng-iàu cho͘-chit ê tōa-ūi lóng cháng tī hit-tīn lâng ê chhiú-thâu, só͘-í mā bô-hoat kā péng-chhia...”
|
有幾十秒鐘會議室內底大家soah lóng tiām-tiām，尾ā國防大臣chiah開chhùi講：「總理，國防kap情報ê khang-khòe本chiâⁿ tō ài厚心思，taⁿ beh hoah老實，bē-sái phah騙步、bē-sái奸奸鬼鬼，kui-khì gia̍h白旗á ǹg敵人投降khah kín……」國防大臣話講bē-chêng一半，坐tī i相對頭、本底一直tiām-chi̍h-chi̍h ê商業大臣tō kā phah斷古柄，「總理，過去1個月，lán國股市ê成交量已經落kah chhun五分之一--ah，lán國ê股市雖bóng講phoe模m̄是世界siōng大--ê，siōng無mā iáu是歐洲佔頭khàm ê八大股市之一，taⁿ過去1個月，連東歐hiah-ê新興股市mā比lán khah贏，證券市場tī in hiah-ê頭人lā頭做hit號『證券發行kap交易誠實運動』了後，鼓吹投資機構kap投資人，kan-taⁿ chò長期、價值性ê投資，koh kā 1 kóa流動性khah koân ê外資拒絕，in掌握公會，tùi證券商產生chin大ê pé-pa̍k，góa有kap 1 kóa人chi̍h-chiap--過，in講tō chún講有人無贊成in ê看法，m̄-koh因為公會kap重要組織ê大位lóng cháng tī hit陣人 ê手頭，所以mā無法kā péng車……」 |
|
Lōe-chèng tāi-sîn cha̍h ōe-thâu kóng: “Nā án-ne lo̍h--khì, pān-phoe lán-kok kin-nî ê chèng-koàn só͘-tit-soeh ē kiám-siu beh gō͘-pah-ek Au-goân...” Siong-gia̍p tāi-sîn bīn-iu bīn-kat, i ê thâu-hia̍h chin khoah, ē-hâi chiam-chiam, saⁿ-kak-hêng ê bīn seⁿ-sêng bah-sek tō khah o͘, in-ūi lâng teh hoân-ló, khòaⁿ--khí-lâi bē-su chhoe-se̍k ê bah-chàng, “m̄-nā án-ne, ‘Láu-si̍t seng-lí-lâng hia̍p-hōe’ ê lâng tī choân-kok 546 ê siong-hōe lāi-té, í-keng soán-tio̍h 414 ê thâu-lâng ê ūi, tāi-ke lóng phài-phoe in ê lâng ē tī cha̍p-jī--goe̍h ê choân-kok siong-hōe kái-soán, kā choân-kok siong-hōe lí-sū-tiúⁿ ê ūi the̍h--lo̍h-lâi.” Siong-gia̍p tāi-sîn tùi khò͘-tē-á jîm chhiú-kin-á chhut--lâi, kā chhut-iû ê thâu-hia̍h sió chhit--chi̍t-ê chiah koh kóng--loeh, “Kàu sî-chūn, lán-kok kióng-kiaⁿ sûi tō thè tńg-khì táu-ōaⁿ ê goân-sú siā-hōe, tùi keng-chè kap siong-gia̍p ê siōng-hāi, si̍t-chāi bô hoat-tō͘ àn-sǹg.”
|
內政大臣cha̍h話頭講：「Nā án-ne落去，pān-phoe lán國今年ê證券所得稅ē減收beh 5百億歐元……」商業大臣面憂面結，i ê頭hia̍h chin闊，ē-hâi尖尖，三角形ê面seⁿ-sêng肉色tō khah烏，因為人teh煩ló，看--起來bē輸chhoe熟ê肉粽，「m̄-nā án-ne，『老實生理人協會』ê人tī全國546 ê商會內底，已經選tio̍h 414 ê頭人ê位，大家lóng phài-phoe in ê人ē tī 12月ê全國商會改選，kā全國商會理事長ê位the̍h--落來。」商業大臣tùi褲袋á jîm手巾á--出來，kā出油ê頭hia̍h sió chhit--chi̍t-ê chiah koh講loeh，「到時chūn，lán國恐驚sûi tō退tńg去táu換ê原始社會，tùi經濟kap商業ē傷害，實在無法tō͘按算。」 |
|
Chóng-lí kā chhiú-kut khòe tī toh-á-téng, chhiú-tê so--chi̍t-ê so--chi̍t-ê kóng: “Góa bô hoat-tō͘ lí-kái, taⁿ iau-kiû chò-lâng ài láu-si̍t, ài chiàⁿ, che kám m̄-sī chū sió-ha̍k khò-pún tō án-ne teh kà--ê, kú-tn̂g í-lâi, chong-kàu kap siā-hōe thoân-thé mā lóng teh chhui-sak, sī án-chóaⁿ ti̍t-tú-ti̍t ê tāi-chì ē jiá-chhut chiah-n̍i̍h tōa ê sū-toan.”
|
總理kā手骨khòe tī桌á頂，手tê so--chi̍t-ê so--chi̍t-ê講：「Góa無法tō͘理解，taⁿ要求chò人ài老實、ài chiàⁿ，che kám m̄是自小學課本tō án-ne teh kà--ê，久長以來，宗教kap社會團體mā lóng teh chhui-sak，是án-chóaⁿ直tú直ê tāi-chì ē惹出chiah-n̍i̍h大ê事端。」 |
|
Tú-chiah khek-piáⁿ khì hông phah-chi̍h8 ê kok-hông tāi-sîn sûi chiap-loeh kóng: “Jīn-hô ê tāi-chì lóng bē-ēng-tit sái ke̍k-pō͘, ‘iâm nā sit-bī, beh ēng sím-mi̍h hō͘ i kiâm?’ Chóng--sī iâm nā siuⁿ-chē, mā sī ē sí-kiâm, in chiah-ê chò seng-lí--ê, kā ka-tī ê lī-ek lóng tàn-hìⁿ-sak, ū--ê sī hòng-khì kòe-khì goân-té ū kúi-ā pōe ê lī-sûn, ēng î-chhî ki-pún ê sêng-pún kap seng-oa̍h só͘-hùi lâi chò seng-lí, ū--ê koh-khah hàm, kóng bô beh ēng-chîⁿ, kan-taⁿ beh ēng táu-ōaⁿ, kok-lâng lia̍h-tn̂g pó͘-té, hō͘-siong pang-chān tō hó...” Kok-hông tāi-sîn kóng kah chia sió tùn-teⁿ--chi̍t-ê, “In lóng bô siūⁿ-tio̍h kóng hiān-chhú-sî ê chit-ê keng-chè thé-hē, tō-sī ēng su-jîn lī-ek chò té-tì--ê, sio̍k-gí teh kóng: ‘Lâng bô su-sim chhī bē oa̍h’, chi̍t-ê bô-ài lī-ek, bô tùi-tiōng kim-chîⁿ ê siā-hōe, m̄-nā sī siong-gia̍p thé-hē kap kim-iông thé-hē ē li̍h8-iông sàn-kah, chin-chē ki-su̍t hong-bīn ê chìn-pō͘ mā ē tòe leh tòng-tiām, kóng--khí-lâi, ‘láu-si̍t’ kap ‘tō-tek’ hoah--khí-lâi sī chin ha̍h-thiaⁿ, nā hō͘ in sái ke̍k-pō͘ kiâⁿ loeh kàu-tè, tian-tó sī thiⁿ-tē-bóe ê chai-è.”
|
Tú-chiah曲柄去hông phah-chi̍h8 ê國防大臣sûi接loeh講：「任何ê tāi-chì lóng bē-ēng-tit sái極步，『鹽nā失味，beh用sím-mi̍h hō͘ i kiâm？』總是鹽nā siuⁿ-chē，mā sī ē死kiâm，in chiah-ê chò生理--ê，kā ka-tī ê利益lóng tàn-hìⁿ-sak，有--ê是放棄過去原底有幾ā倍ê利sûn，用維持基本ê成本kap生活所費來chò生理，有--ê koh khah hàm，講無beh用錢，kan-taⁿ beh用táu-ōaⁿ，各人lia̍h長補短，互相幫chān tō好……」國防大臣講kah chia sió tùn-teⁿ--chi̍t-ê，「in lóng無想tio̍h講現此時ê chit-ê經濟體系，tō是用私人利益chò té-tì--ê，俗話teh講：『人無私心chhī bē活』，1 ê無ài利益、無對重金錢ê社會，m̄-nā是商業體系kap金融體系ē li̍h8戎sàn甲，chin-chē技術方面ê進步mā ē tòe leh tòng-tiām，講--起來，『老實』kap『道德』hoah--起來是chin合聽，nā hō͘ in sái極步行loeh到tè，顛倒是天地尾ê災eh。」 |
|
(Tâi-bûn Bóng-pò tē 100~102 kî, 2005 nî 1~3 goe̍h)
|
(台文罔報第100~102期，2005年1~3月) |
