Talk abo͘t my job
|
Talk abo͘t my job |
| Lîm Gî-chēng |
林宜靜 |
|
Tī pó͘-si̍p-pan khang-khòe mā chha-put-to pòaⁿ-tang--a, góa sī kà gín-á Eng-gí hām kok-tiong Eng-bûn.
|
Tī補習班khang-khòe mā差不多半冬--a, góa是教gín-á英語hām國中英文. |
|
Góa tòa ê pó͘-si̍p-pan ū sì-ê hun-pò͘; góa sī sin-lâng ê koan-hē, só͘-í sì-ê só͘-chāi lóng ài cháu. Ū nn̄g-ê hun-pò͘ tī Hōng-soaⁿ , nn̄g ê tī bêng-chheⁿ hāu-khu, ē-sái chin kán-tan tō hoat-kak tio̍h chit ⁿ̂g-ê só͘-chāi ê bô-kâng.
|
Góa tòa ê補習班有4 ê分部; góa是新人ê關係, 所以4 ê所在lóng ài走. 有2 ê分部tī鳳山, 2 ê tī明星校區, ē-sái真簡單tō發覺tio̍h chit 2 ê所在ê無kâng. |
|
Hōng-soaⁿ hia ê pē-bú tōa-pō͘-hūn sī chò seng-lí--ê, bē chia̍h--ê, chhēng--ê, iōng--ê, góa koh ū chi̍t-ê ha̍k-seng in tau sī khui sîn-tôaⁿ--ê, hōng-sāi Sam-thài-chú. Hōng-soaⁿ ê pē-bú kā gín-á kàu hō͘ pó͘-si̍p-pan , ǹg-bāng gín-á tio̍h tha̍k-chheh, m̄-koh in bô-êng thang koan-sim gín-á ê sêng-chek, siūⁿ kóng gín-á nā tha̍k ē khí--li̍h tō kè-sio̍k tha̍k; bô, mā bô iàu-kín--ê, sī khah siau-kek ê pē-bú. In ê gín-á mā khah bô tiōng tha̍k-chheh, kóng khah ti̍t-chiap--ê, tō-sī khah bô-ài tha̍k-chheh. Tùi gún lâi kóng, gín-á mā khah pháiⁿ kà.
|
鳳山hia ê pē母大部份是做seng-lí--ê, 賣食--ê, 穿--ê, 用--ê, góa koh有1 ê學生in tau是開神壇--ê, hōng-sāi三太子. 鳳山ê pē母kā gín-á交hō͘補習班, ǹg望gín-á tio̍h讀冊, m̄-koh in無êng thang關心gín-á ê成績, 想講gín-á若讀ē起--li̍h tō繼續讀; 無, mā無要緊--ê, 是khah消極ê pē母. In ê gín-á mā khah無重讀冊, 講khah直接--ê, tō是khah無愛讀冊. 對gún來講, gín-á mā khah pháiⁿ教. |
|
Nā tī bêng-chheⁿ hāu-khu hia ê pē-bú tō bô-kâng--lo͘h, hia ê pē-bú chin chē sī office worker (siōng-pan-cho̍k), chin tiōng gín-á ê sêng-chek hām kàu-io̍k, gín-á chū sè-hàn tō sàng pó͘-si̍p-pan , m̄-chiah hia ê pó͘-si̍p-pan chiok chē, mā chin kēng-cheng.
|
若tī明星學區hia ê pē母tō無kâng--lo͘h, hia ê pē母真chē是office worker(上班族), 真重gín-á ê成績hām教育, gín-á自細hàn tō送補習班, m̄-chiah hia ê補習班chiok chē, mā真競爭. |
|
Góa ū chi̍t-ê tī Hōng-soaⁿ teh tha̍k kok-tiong ê ha̍k-seng, in tau kan-taⁿ ma-ma teh thàn-chîⁿ, chhù--ni̍h ê keng-chè chiâⁿ ngā-táu, ha̍k-hùi tiāⁿ bān-kau, m̄-koh i chin jīn-chin, kok-tiong chiah khai-sí chiap-chhiok Eng-bûn, i ê thâu-khak sui-bóng bô cheng-kong, m̄-koh chin khéng tha̍k, chìn-pō͘ chin chē. Chòe-kīn soah ūi-tio̍h chîⁿ ê būn-tê, chhù--ni̍h ê tiān-ōe hông ka-tn̄g, pó͘-si̍p-pan mā bô hoat-tō͘ lâi--a. Góa kám-chhiok chin chhim.
|
Góa有1 ê tī鳳山teh讀國中ê學生, in tau kan-taⁿ媽媽teh thàn-chîⁿ, 厝--ni̍h ê經濟chiâⁿ ngē-táu, 學費tiāⁿ慢交, m̄-koh i真認真, 國中chiah開始接觸英文, i ê頭殼雖bóng無精光, m̄-koh真肯讀, 進步真chē. 最近soah為tio̍h chîⁿ ê問題, 厝--ni̍h ê電話hông ka斷, 補習班mā無法tō͘來--a. Góa感觸真深. |
|
Lâng tī siā-hōe ê kai-kip sī án-chóaⁿ tio̍h-ài chiah bô kong-pêⁿ, lóng pa̍t-lâng teh kā lán hun-lūi? Ka-têng ê in-sò͘, éng-hióng tio̍h gín-á ê kàu-io̍k, sòa--lo̍h-lâi tō-sī sio-liân-sòa bô kong-pêⁿ thāi-gū ê khai-sí.
|
人tī社會ê階級是án-chóaⁿ tio̍h-ài chiah無公平, lóng別人teh kā lán分類? 家庭ê因素, 影響tio̍h gín-á ê教育, 續--落-來tō是sio連續無公平待遇ê開始. |
|
(TGB Thong-sìn tē 65 kî, 2005 nî 2 goe̍h)
|
(TGB通訊第65期，2005年2月) |
