Beh khì ke̍k-lo̍k sè-kài ê ka-pan-chhia_03
|
Beh去極樂世界ê加班車_03 |
| Voyu Taokara Lâu |
Voyu Taokara劉 |
|
Saⁿ
|
三 |
|
Sim-î-ā chū-chiông thiaⁿ Tân tōa-sian kóng-soah, tō chiâⁿ téng-chin teh chún-pī beh khì ó͘ thi̍h-ki-lō͘, saⁿ-ê hiaⁿ-tī sim-lāi kún-lèng, m̄-chai beh jû-hô sī hó, chiah ē thàn pài-ji̍t a-bú chhut-mn̂g khì bé mi̍h-kiāⁿ, sūn-sòa khì Siā-thâu khòaⁿ î-pô ê sî-kan chē leh chham-siông, taⁿ kì-jiân tōa-ko chò-chú beh àm-chēng kā a-bú tàu-saⁿ-kāng--ah, chin chē tāi-chì tio̍h-ài chhoân-pān phah-sǹg, in àn-sǹg tán Sim-î-ā chi̍t-ê tńg--lâi, tō beh kóng hō͘ chheng-chhó, kóaⁿ-kín khí-chhiú.
|
心姨ā自從聽陳大仙講soah，tō chiâⁿ頂真teh準備beh去挖鐵技路，3 ê兄弟心內滾lèng，m̄知beh如何是好，chiah ē趁拜日a母出門去買mi̍h件，順sòa去社頭看姨婆ê時間坐leh參詳，taⁿ既然大哥做主beh暗靜kā a母tàu-saⁿ-kāng--ah，chin chē tāi-chì tio̍h ài chhoân辦phah算，in按算等心姨ā chi̍t-ê--tńg來，tō beh講hō͘清楚，趕緊起手。 |
|
“A-bú, gún ē kā lí tàu-kha-chhiú, hō͘ a-pah thang an-hioh, lí m̄-bián hoân-ló.” A-tek chhōa-thâu kā Sim-î kóng.
|
「a母，gún ē kā lí tàu-kha手，hō͘ a-pah thang安hioh，lí m̄免煩ló。」A德chhōa頭kā心姨講。 |
|
“Chóng--sī beh ó͘ chi̍t-tè thi̍h-ki-lō͘ khí--lâi m̄-sī sió-khóa tāi-chì, lán m̄-nā ài kóaⁿ ē-hù sî, koh ài kò͘-tio̍h hóe-chhia teh kiâⁿ, bē-sái khì éng-hióng tio̍h an-choân, taⁿ chhun bô sì-kang, lán ài khah kóaⁿ-kín--leh chiah ē-sái.” A-bêng chiap leh kóng--loeh.
|
「總--是beh挖1 tè鐵枝路--起來m̄是sió-khóa tāi-chì，lán m̄-nā ài趕ē赴時，koh ài顧tio̍h火車teh行，bē-sái去影響tio̍h安全，taⁿ chhun無四工，lán ài khah趕緊--leh chiah ē-sái。」阿明接leh講loeh。 |
|
“Mah, gún saⁿ-ê lâng ē pun-lō͘ khì tiau-cha hóe-chhia ê sî-kan, chún-pī sî-kan, chún-pī bān-la̍t kap kî-thaⁿ ê ke-si, àm-tǹg chia̍h-pá tō sûi lâi-khì pān.” A-hong kóng.
|
「媽，gún 3 ê人ē pun路去調查火車ê時間，準備萬力kap其他ê ke-si，暗tǹg chia̍h飽tō sûi來去辦。」A風講。 |
|
Saⁿ-ê hiaⁿ-tī-á ūi-tio̍h beh hō͘ lāu-bú hòng-sim, koat-tēng beh ha̍p-chê kā chit-kiāⁿ gōng tāi-chì pān hō͘ hó-sè, kóng--khí-lâi beh ó͘ thi̍h-ki-lō͘ m̄-sī chi̍t-kiāⁿ kán-tan ê khang-khòe, iû-kî sī kha-chhiú ài mé, sî-kan mā ài chún-chat, bē-sái hāi hóe-chhia lâi pāi-bé--khì, koh lâi ji̍t--sî bē bián-tit ū-lâng ē lâi-lâi khì-khì, beh chhòng sím-mi̍hkang-têng, mā tio̍h thàn saⁿ-keⁿ pòaⁿ-mê, só͘-í in hit kúi-àm ū-iáⁿ chin bô-êng, teh gián-kiù thi̍h-ki-lō͘ ê kiat-kò, beh án-chóaⁿ lâi thiah, hō͘ phò-hoāi siōng chió, beh án-chóaⁿ hoe-ho̍k, thang hō͘ hóe-chhia āu-kòe chiàu-pháng.
|
3 ê兄弟á為tio̍h beh hō͘老母放心，決定beh和齊kā chit件gōng tāi-chì辦hō͘好勢，講--起來beh挖鐵枝路m̄是1件簡單ê khang-khòe，尤其是kha手 ài mé，時間mā ài撙節，bē-sái害火車來敗馬--去，koh來日--時bē免得有人ē來來去去，beh chhòng sím-mi̍h工程mā tio̍h趁三更半暝，所以in hit幾暗有iáⁿ chin無閒，teh研究鐵枝路ê結構，beh án-chóaⁿ來拆，hō͘破壞siōng少，beh án-chóaⁿ恢復，thang hō͘火車後過照pháng。 |
|
Pài-jī hit-àm, in kā it-chhè lóng chhòng hó-sè--ah, pau-khoah tiau-cha chhia-pang ê sî-kan, àn-sǹg sím-mi̍h sî-chūn khai-sí thiah khai-sí ó͘, ē-hù pòaⁿ-mê cha̍p-jī tiám ê tùi-kî, koh sím-mi̍h sî-chūn tio̍h kín- chiàu-goân, chiah bē khì éng-hióng tio̍h koh-lâi ê chhia-pang.
|
拜二hit暗，in kā一切lóng chhòng好勢--ah，包括調查車班ê時間，按算sím-mi̍h時chūn開始拆開始挖，ē赴半暝12點ê對期，koh sím-mi̍h時chūn tio̍h緊照原，chiah bē去影響tio̍h koh來ê車班。 |
|
Chóng--sī chian-piàn bān-hòa, m̄ ta̍t-tit chō-hòa, pài-saⁿ tiong-tàu, A-hong kông-kông-chông-chông tùi chhia-thâu cháu tò tńg--lâi, bīn-sek pe̍h-sí-sat, kiōng-beh bē-hù chhoán.
|
總--是千變萬化，m̄值得造化，拜三中tàu，A風kông-kông-chông-chông tùi車頭走tò tńg來，面色白sí-sat，kiōng-beh bē赴喘。 |
|
“Hong--ê, án-chóaⁿ?” A-tek khòaⁿ i tńg--lâi, teh chio i chò-hóe chia̍h-tàu, hit-sî Sim-î--ê í-keng chia̍h-pá chhut-mn̂g, kóng beh khì biō--n̍i̍h pài-pài, kiû phô͘-sat hō͘ eng-àm it-chhè sūn-sī.
|
「風--ê，án-chóaⁿ？」A德看i tńg--來，teh chio i chò夥chia̍h tàu，hit時心姨--ê已經chia̍h飽出門，講beh去廟n̍i̍h拜拜，求菩薩hō͘ eng暗一切順sī。 |
|
Hong--ê chái-khí cha̍p-tiám-gōa tō chhut-mn̂g khì chhia-thâu, khak-tēng kóng eng-àm ê chhia-pang sī m̄-sī ū kái-î, ka-chāi Hong--ê ū chi̍t-ê kok-hāu tông-chhong tī thi̍h-lo͘-kio̍k chia̍h thâu-lō͘, phài tńg-lâi tī chit-ê chhia-thâu, chhia-pang ê chêng-hóng mn̄g i siōng chheng-chhó.
|
風--ê早起10點外tō出門去車頭，確定講eng暗ê車班是m̄是有改移，ka chāi風--ê有1 ê國校同窗tī鐵路局chia̍h頭路，派tńg來tī chit-ê車頭，車班ê情況問i siōng清楚。 |
|
“Tōa-hiaⁿ, hāi--ā-lah, A-hông kóng eng-àm ē ū ka-pan-chhia, kàu-chām ê sî-kan chha-put-to cha̍p-it tiám sì-chap hun, góa ū sǹg--kòe, nā chhia thêng gō͘ hun kàu cha̍p hun khí-kiâⁿ, kah pêng-kau-tō hia tō chha-put-to tō beh óa cha̍p-jī tiám--ā, sî-kan chiah-n̍i̍h pek, lán tiāⁿ-tio̍h bē-hù--ê lah!” A-hong sió hioh-chhoán, ōe soah kóng-tio̍h bô-lám bô-ne.
|
「大兄，害ā--lah，A弘講eng暗ē有加班車，到站ê時間差不多11點40分，góa有算--過，nā車停5分到10分起行，kah平交道hia tō差不多tō beh óa 12點--ā，時間chiah-n̍i̍h逼，lán定著bē赴--ê lah！」A風sió歇喘，話soah講tio̍h無lám無ne。 |
|
A-tek kap A-bêng pn̄g bē kò͘-tit thang chia̍h, tī gia̍h--leh，chhùi khui-khui, ōe lóng kóng bē chhut--lâi.
|
A德kap A明飯bē顧得thang chia̍h，tī gia̍h--leh，chhùi開開，話lóng講bē--出來。 |
|
Beh cha̍p-gōa bió āu, A-bêng kā tī khǹg--leh, thâu bô khiàn, ba̍k-chiu siòng toh-téng kóng: “Chit-siaⁿ hó--ah, che nā hō͘ a-bú chai, chiah khòaⁿ beh án-chóaⁿ siu-soaⁿ.”
|
Beh十外秒後，A明kā tī khǹg--leh，頭無khiàn，目chiu相桌頂講：「Chit siaⁿ好--ah，che nā hō͘ a母知，chiah看beh án-chóaⁿ收山。」 |
|
A-tek tùi í-á téng peh--khí-lâi, kiâⁿ-khì kah piah-piⁿ, bīn ǹg piah, “Chhian-sǹg bān-sǹg, m̄ ta̍t-tit thiⁿ chi̍t-oe.” I thò͘ chi̍t-kháu khùi kóng, “m̄-koán án-chóaⁿ, lán lóng bē-ēng-tit hō͘ a-bú sit-bāng.”
|
A德tùi椅á頂peh--起來，行去kah壁邊，面ǹg壁，「千算萬算，m̄值得天1劃。」I吐1口khùi講，「m̄管án-chóaⁿ，lán lóng bē-ēng得hō͘ a母失望。」 |
|
(Tâi-bûn Bóng-pò tē 97 kî, 2004 nî 10 goe̍h)
|
(台文罔報第97期，2004年10月) |
