A-lân_04
|
A-lân_04 |
| Tōa-thâu-liân |
王寶漣 |
|
Khai-ha̍k chi̍t tōaⁿ sî-kan--lo̍h-lâi, Bûn-eng kap A-mûi in ke-kiám kám-siū ē tio̍h A-lân ê choán-piàn, m̄-koh m̄-chai piàn tī toh-ūi? In teh tán A-lân khui-chhùi. A-lân mā bat chhì beh kap in thó-lūn tī iâⁿ-tūi tú--tio̍h ê chhiong-ke̍k, m̄-koh lóng sī lí kóng tang, i ìn sai, bē tùi-tâng.
|
開學1段時間--落-來, Bûn-eng kap A-mûi in加減感受ē tio̍h A-lân ê轉變, m̄-koh m̄知變tī toh位? In teh等A-lân開嘴. A-lân mā bat試beh kap in討論tī營隊tú--tio̍h ê衝擊, m̄-koh lóng是lí講東, i應西, bē tùi-tâng. |
|
Pài-saⁿ hā-khò liáu-āu, A-mûi tan-to̍k kā A-lân giú khí piⁿ--á kóng-ōe.
|
拜3下課了後, A-mûi單獨kā A-lân giú去邊--á講話. |
|
『妳怎麼了? 大家都很擔心妳, 有事就說出來啊?』
|
『妳怎麼了? 大家都很擔心妳, 有事就說出來啊?』 |
|
『我知道, 我沒事啦! 只是在想一些問題.』A-lân tī sim-koaⁿ-lāi tùi ka-tī kóng: “Góa mā siūⁿ beh kap lín kóng--a, m̄-koh lín tùi che bô hoán-èng, góa sī beh án-chóaⁿ kóng?”
|
『我知道, 我沒事啦! 只是在想一些問題.』A-lân tī心肝內對ka-tī講:「Góa mā想beh kap lín講--a, m̄-koh lín對che無反應, góa是beh án-chóaⁿ講?」 |
|
Chit àm, A-lân bô lâu tī A-mûi in pâng-keng khùn, kóng sī siuⁿ kú bô tńg ka-tī ê sok-siā khùn, tùi hiah-ê『室友』 kóng bē kòe. A-lân án-ne, soah hō͘ A-mûi in sì ê lâng jú hoân-ló, mā jú giau-gî A-lân sī hoat-seng siáⁿ-mi̍h tāi-chì.
|
Chit暗, A-lân無留tī A-mûi in房間khùn, 講是siuⁿ久無tńg ka-tī ê宿舍khùn, 對hiah-ê『室友』講bē過. A-lân án-ne, soah hō͘ A-mûi in 4 ê人jú煩惱, mā jú giau疑A-lân是發生siáⁿ-mi̍h tāi-chì. |
|
Kòe tńg kang, tō bô khòaⁿ-tio̍h A-lân lâi siōng-khò--a, A-mûi in siūⁿ kóng sī A-lân lâng bô sóng-khoài, cháu khì sok-siā chhōe--i, soah bô khòaⁿ-kìⁿ lâng-iáⁿ, chhiú-ki-á mā khà bē thong, mn̄g i ê『室友』, in kóng cha-hng-mê A-lân bô tńg-khì khùn. A-mûi in hoân-ló kah m̄-chai beh án-chóaⁿ. Saⁿ kang kòe--khì-a, A-lân iáu sī bô chhut-hiān. It-ti̍t kàu kah pài-it e-po͘ ê khò, chiah tī kàu-sek khòaⁿ-tio̍h A-lân.
|
過tńg工, tō無看tio̍h A-lân來上課--a, A-mûi in想講是A-lân人無爽快, 走去宿舍chhōe--i, soah無看見人影, 手機á mā khà bē通, 問i ê『室友』, in講cha-hng暝A-lân無tńg去khùn. A-mûi in煩惱kah m̄知beh án-chóaⁿ. 3工過--去-a, A-lân iáu是無出現. 一直到kah拜1 e-po͘ ê課, chiah tī教室看tio̍h A-lân. |
|
『發生什麼事? 這幾天妳去哪裡了? 四處都找不到妳......』A-mûi siá jī-tiâu-á thoân hō͘ A-lân.
|
『發生什麼事? 這幾天妳去哪裡了? 四處都找不到妳......』A-mûi寫字條á傳hō͘ A-lân. |
|
『心情不好......跑去找朋友......』A-lân koh thoân--tńg-khì.
|
『心情不好......跑去找朋友......』A-lân koh傳--tńg-去. |
|
『要說說嗎?』A-mûi siá liáu, āu-piah koh ū chiap Bûn-eng siá--ê:『有事要跟我們說啊! 別忘了, 我們一直陪在妳身邊喔!』
|
『要說說嗎?』A-mûi寫了, 後piah koh有接Bûn-eng寫--ê:『有事要跟我們說啊! 別忘了, 我們一直陪在妳身邊喔!』 |
|
『謝謝, 現在比較好了.』A-lân kan-taⁿ siá chiah-ê, tō koh thoân hō͘ in--a.
|
『謝謝, 現在比較好了.』A-lân kan-taⁿ寫chiah-ê, tō koh傳hō͘ in--a. |
|
『上禮拜有點名喔! 我們已經替妳請病假了, 記得要去學務處寫單子.』Chit pái ōaⁿ Chhiu-kiok thoân--lâi.
|
『上禮拜有點名喔! 我們已經替妳請病假了, 記得要去學務處寫單子.』Chit pái換Chhiu-kiok傳--來. |
|
『嗯! 謝謝妳們!』
|
『嗯! 謝謝妳們!』 |
|
『以後翹課記得說一聲嘛! 我們差點要打電話去妳家找妳耶!』Bûn-eng koh thoân jī-tiâu-á hō͘ A-lân.
|
『以後翹課記得說一聲嘛! 我們差點要打電話去妳家找妳耶!』Bûn-eng koh傳字條á hō͘ A-lân. |
|
『這個禮拜要交5首現代詩, 記得喔!』Chit tiuⁿ sī Chēng-gî siá--ê.
|
『這個禮拜要交5首現代詩, 記得喔!』Chit張是Chēng-gî寫--ê. |
|
Kui chiat khò in tō án-ne jī-tiâu-á thoân--kòe-lâi, koh thoân--kòe-khì, m̄-koh A-lân mā-sī bô kā in kóng koan-hē ka-tī ê piàn-hòa.
|
Kui節課in tō án-ne字條á傳--過-來, koh傳--過-去, m̄-koh A-lân mā是無kā in講關係ka-tī ê變化. |
|
A-lân siat-sit chit tōaⁿ sî-kan, sī khì chhōe tī Widi iâⁿ-tūi se̍k-sāi ê pêng-iú A-kheng, A-kheng sī Ko-hiông-lâng, chit-má lâng tī chi̍t keng ki-kim-hōe chò choan-chit, chham-ú siā-hōe ūn-tōng gō͘ tang--a, A-lân tō tòa tī A-kheng sòe tī Pak-tâu ê chhù. Chit kúi kang, A-lân thiaⁿ A-kheng kóng chiâⁿ chē iú-koan Tâi-oân ê le̍k-sú, siā-hōe ūn-tōng ê keng-le̍k, goân-chū-bîn ê gī-tê, lú-sèng chú-gī ê koan-tiám; A-kheng koh iōng i ka-tī ê seng-oa̍h keng-giām kóng Tâi-oân-lâng án-chóaⁿ hō͘ Kok-bîn-tóng sé-náu, án-chóaⁿ keng-kòe kè-ta̍t-koan ê chhiong-tu̍t, án-chóaⁿ koh tiông-kiàn, án-chóaⁿ tâu-ji̍p siā-hōe ūn-tōng......chiah-ê lóng sī A-lân thâu chi̍t pái thiaⁿ--tio̍h, tùi i ê chhì-khek put-chí-á tōa, i su-iàu sî-kan lâi siau-hòa.
|
A-lân消失chit段時間, 是去chhōe tī Widi營隊熟sāi ê朋友A-kheng, A-kheng是高雄人, chit-má人tī 1間基金會做專職, 參與社會運動5冬--a, A-lân tō tòa tī A-kheng稅tī北投ê厝. Chit kúi工, A-lân聽A-kheng講chiâⁿ chē有關台灣ê歷史, 社會運動ê經歷, 原住民ê議題, 女性主義ê觀點; A-kheng koh用i ka-tī ê生活經驗講台灣人án-chóaⁿ hō͘國民黨洗腦, án-chóaⁿ經過價值觀ê衝突, án-chóaⁿ koh重建, án-chóaⁿ投入社會運動......chiah-ê lóng是A-lân頭1 pái聽--tio̍h, 對i ê刺激不止á大, i需要時間來消化. |
|
Koh lâi ta̍k lé-pài A-lân kò͘-tēng chham-ka A-kheng pān ê tha̍k-chheh-hōe, ū tang-sî-á Siù-bí hām A-sáu mā ē lâi chham-ka, thàu-kòe tha̍k-chheh-hōe, A-lân se̍k-sāi chiâⁿ chē teh bú bô kāng gī-tê, tī bô kāng ha̍k-hāu tha̍k-chheh iah-sī í-keng teh chia̍h thâu-lō͘ ê pêng-iú, ta̍uh-ta̍uh-á tùi in teh thó-lūn ê tāi-chì ū chho͘-pō͘ ê liáu-kái.
|
Koh來ta̍k禮拜A-lân固定參加A-kheng辦ê讀冊會, 有tang時á Siù-bí hām A-sáu mā ē來參加, 透過讀冊會, A-lân熟sāi chiâⁿ chē teh bú無kāng議題, tī無kāng學校讀冊iah是已經teh食頭路ê朋友, ta̍uh-ta̍uh-á對in teh討論ê tāi-chì有初步ê了解. |
|
Tī ha̍k-hāu lāi-té, A-lân soah kap A-mûi in jú lâi jú bô ōe kóng, mā bô koh chhiūⁿ éng-chūn án-ne, chò-hóe siōng-hā-khò, chò-hóe chia̍h-pn̄g se̍h-ke, chò-hóe khòaⁿ tiān-iáⁿ chhiùⁿ KTV. A-lân khai-sí ià-siān i seng-khu piⁿ ê pêng-iú, i jīn-ûi in kan-taⁿ chai-iáⁿ hiáng-siū, chhit-thô, chiap-siū lâng an-pâi hó--ê, tùi ka-tī ê koân-lī, tùi jio̍k-sè cho̍k-kûn ê gī-tê, tùi bô ha̍p-lí ê tāi-chì, lóng bô teh su-khó, mā bô beh khì liáu-kái, tō chhiūⁿ i chìn-chêng kāng-khoán.
|
Tī學校內底, A-lân soah kap A-mûi in jú來jú無話講, mā無koh像éng-chūn án-ne, chò-hóe上下課, chò-hóe食飯se̍h街, chò-hóe看電影唱KTV. A-lân開始厭siān i身軀邊ê朋友, i認為in kan-taⁿ知iáⁿ享受, chhit-thô, 接受人安排好--ê, 對ka-tī ê權利, 對弱勢族群ê議題, 對無合理ê tāi-chì, lóng無teh思考, mā無beh去了解, tō像i chìn前kāng款. |
|
Chit kang, A-lân tī BBS khòaⁿ-tio̍h A-mûi kià hō͘ i ê phoe.
|
Chit工, A-lân tī BBS看tio̍h A-mûi寄hō͘ i ê phoe. |
|
『過了一個暑假, 妳似乎有些不一樣, 我也說不上來是哪裡不同, 我們知道妳有煩惱, 開學後到現在, 我們一直找機會想和妳談聽妳說, 但是妳卻對我們關起心門, 離我們更遠了......是不是和妳暑假參加的營隊有關? 從大一到現在, 我們不是無話不說的嗎? 我們一起翹課, 一起被當, 上禿頭的課一起拿21分, 一起瘋狂追逐無尾熊學長(還記得我們那時候還說要當他的油加利樹嗎?)......我們一起經歷許多歡笑與悲傷, 還說畢業後也要生活在一起, 但是現在, 妳搬到學校外面住了, 平常也很難碰到妳, 只留下我們曾經瘋狂過的相片, 跟上課時所傳的字條. 人家說“有福同享有難同當”, 現在妳遇到問題, 我也希望我能幫的上忙, 我真的希望能分享妳的煩惱, 陪妳一起度過, 就像那時候妳陪我度過上帝的事, 不管怎樣, 我永遠支持妳, 我們仍然在妳身邊陪伴著妳.』
|
『過了一個暑假, 妳似乎有些不一樣, 我也說不上來是哪裡不同, 我們知道妳有煩惱, 開學後到現在, 我們一直找機會想和妳談聽妳說, 但是妳卻對我們關起心門, 離我們更遠了......是不是和妳暑假參加的營隊有關? 從大一到現在, 我們不是無話不說的嗎? 我們一起翹課, 一起被當, 上禿頭的課一起拿21分, 一起瘋狂追逐無尾熊學長(還記得我們那時候還說要當他的油加利樹嗎?)......我們一起經歷許多歡笑與悲傷, 還說畢業後也要生活在一起, 但是現在, 妳搬到學校外面住了, 平常也很難碰到妳, 只留下我們曾經瘋狂過的相片, 跟上課時所傳的字條. 人家說“有福同享有難同當”, 現在妳遇到問題, 我也希望我能幫的上忙, 我真的希望能分享妳的煩惱, 陪妳一起度過, 就像那時候妳陪我度過上帝的事, 不管怎樣, 我永遠支持妳, 我們仍然在妳身邊陪伴著妳.』 |
|
A-lân khòaⁿ soah, ba̍k-sái choaⁿ-á liàn--lo̍h-lâi, khak-si̍t, i kap A-mûi in chò-hóe keng-kòe chiâⁿ chē tāi-chì, chiah-ê sī i siōng hēng-hok ê kì-tì, m̄-koh, i tú--tio̍h ê chhiong-ke̍k, soah m̄-chai beh án-chóaⁿ chham A-mûi in kóng, kám kóng beh kā in kóng i í-keng bô siong-sìn chit ê sè-kài, bô siong-sìn siā-hōe, bô siong-sìn seng-khu piⁿ ê lâng--a?
|
A-lân看soah, 目屎choaⁿ-á liàn--落-來, 確實, i kap A-mûi in chò-hóe經過chiâⁿ chē tāi-chì, chiah-ê是i siōng幸福ê記tì, m̄-koh, i tú--tio̍h ê衝擊, soah m̄知beh án-chóaⁿ chham A-mûi in講, kám講beh kā in講i已經無相信chit ê世界, 無相信社會, 無相信身軀邊ê人--a? |
|
A-lân kán-tan kā A-mûi hôe-phoe:『謝謝妳們一直陪伴著我, 只是我現在需要的不是精神支持, 只想脫離這裡, 逃離一切.』Siūⁿ bē kàu chit tiuⁿ phoe soah chhiat-tn̄g hām A-mûi in chit-kóa pêng-iú ê kám-chêng.
|
A-lân簡單kā A-mûi回phoe:『謝謝妳們一直陪伴著我, 只是我現在需要的不是精神支持, 只想脫離這裡, 逃離一切.』想bē到chit張phoe soah切斷hām A-mûi in chit kóa朋友ê感情. |
|
Kòe tńg kang, Bûn-eng mā siá phoe hō͘ A-lân.
|
過tńg工, Bûn-eng mā寫phoe hō͘ A-lân. |
|
『我不知道妳到底有什麼問題, 妳不想說也就算了, 幹嘛回信說得那麼絕? 我想我們沒對不起妳, 也沒虧欠妳什麼吧! 既然做朋友做的那麼委曲求全, 那就算──了──吧! 我們之間已經發生“化學變化”了. 別以為參加個營隊或讀書會, 妳就比較清高, 想拯救原住民? 想改變世界? 想替台灣救贖? 別那麼喜歡唱高調, 先檢討妳自己吧! 在我看來, 妳只是從這一邊逃到那一邊, 躲在用知識與高調搭建的高塔裡, 妳沒有進入妳想救贖的社會, 只是一直在逃避.』
|
『我不知道妳到底有什麼問題, 妳不想說也就算了, 幹嘛回信說得那麼絕? 我想我們沒對不起妳, 也沒虧欠妳什麼吧! 既然做朋友做的那麼委曲求全, 那就算──了──吧! 我們之間已經發生“化學變化”了. 別以為參加個營隊或讀書會, 妳就比較清高, 想拯救原住民? 想改變世界? 想替台灣救贖? 別那麼喜歡唱高調, 先檢討妳自己吧! 在我看來, 妳只是從這一邊逃到那一邊, 躲在用知識與高調搭建的高塔裡, 妳沒有進入妳想救贖的社會, 只是一直在逃避.』 |
|
Bûn-eng chit tiuⁿ phoe, ta̍k kù lóng chha̍k ji̍p-khì A-lân ê sim-koaⁿ-té, iáu-sī Bûn-eng khah bín-kám, hoán-èng mā khah kín, chhut-chhiú tō tiám-phòa A-lân ê chōng-hóng kap chhù-kéng.
|
Bûn-eng chit張phoe, ta̍k句lóng chha̍k入去A-lân ê心肝底, iáu是Bûn-eng khah敏感, 反應mā khah緊, 出手tō點破A-lân ê狀況kap處境. |
|
Chit mê, A-lân sit-bîn--a. Joa̍h--lâng chham-ka ê iâⁿ-tūi, Siù-bí kóng ê ōe, A-kheng ê koan-tiám, tha̍k-chheh-hōe teh thó-lūn--ê, kap Bûn-eng ê phoe, chiah-ê it-ti̍t tī A-lân ê thâu-khak lāi teh ká, ū Bûn-eng A-mûi in pôe-phōaⁿ ê seng-oa̍h , kap Siù-bí A-kheng in hō͘ A-lân ê su-sióng khé-bêng, nn̄g pêng ná siang-thâu bé-chhia, kā A-lân giú tùi bô kāng hong-hiòng khì, chhōe bô chi̍t ê balance. Tī A-lân siūⁿ kah tng ak-chak ê sî-chūn, QA khà tiān-ōe lâi.
|
Chit暝, A-lân失眠--a. 熱--人參加ê營隊, Siù-bí講ê話, A-kheng ê觀點, 讀冊會teh討論--ê, kap Bûn-eng ê phoe, chiah-ê一直tī A-lân ê頭殼內teh ká, 有Bûn-eng A-mûi in陪伴ê生活, kap Siù-bí A-kheng in hō͘ A-lân ê思想啟蒙, 2 pêng ná雙頭馬車, kā A-lân giú tùi無kāng方向去, chhōe無1 ê balance. Tī A-lân想kah tng ak-chak ê時chūn, QA khà電話來. |
|
『你怎麼有我的電話?』A-lân chiap-tio̍h QA ê tiān-ōe chiâⁿ ì-gōa.
|
『你怎麼有我的電話?』A-lân接tio̍h QA ê電話chiâⁿ意外. |
|
『我打去宿舍找妳, 妳室友說妳搬出來了, 就給我這支電話了. 妳幹嘛突然搬出來啊?』
|
『我打去宿舍找妳, 妳室友說妳搬出來了, 就給我這支電話了. 妳幹嘛突然搬出來啊?』 |
|
『奇怪了, 我搬出來需要向你報備嗎?』Thiaⁿ-tio̍h ū khó-lêng sī A-mûi in hō͘ QA tiān-ōe, A-lân tùi QA tō bô hó siaⁿ-sàu.
|
『奇怪了, 我搬出來需要向你報備嗎?』聽tio̍h有可能是A-mûi in hō͘ QA電話, A-lân對QA tō無好聲sàu. |
|
『聽說妳最近遇到什麼問題, 是不是? 怎麼了?』Hó sèng-tē ê QA kè-sio̍k mn̄g--lo̍h-khì.
|
『聽說妳最近遇到什麼問題, 是不是? 怎麼了?』好性地ê QA繼續問--落-去. |
|
『我跟Mo͘nlight她們鬧翻了......』A-lân kóng-tio̍h che tō koh khai-sí háu--a, mā chiâⁿ koài-kî sī án-chóaⁿ ka-tī ē kap QA kóng chiah-ê, soah bô hoat-tō͘ kap A-mûi in kóng.
|
『我跟Mo͘nlight她們鬧翻了......』A-lân講tio̍h che tō koh開始háu--a, mā chiâⁿ怪奇是án-chóaⁿ ka-tī ē kap QA講chiah-ê, soah無法tō͘ kap A-mûi in講. |
|
『好啦! 不要哭啦! 我最怕女生哭了, 有什麼事慢慢說嘛!』
|
『好啦! 不要哭啦! 我最怕女生哭了, 有什麼事慢慢說嘛!』 |
|
A-lân chū thâu kàu bóe kā tài-chì kóng hō͘ QA chai, ū QA teh an-tah, A-lân ê chêng-sû mā ta̍uh-ta̍uh-á pêng-chēng--lo̍h-lâi.
|
A-lân自頭到尾kā tài-chì講hō͘ QA知, 有QA teh安tah, A-lân ê情緒mā ta̍uh-ta̍uh-á平靜--落來. |
|
『你也會覺得我像Lemon說的那樣嗎?』A-lân mn̄g QA. Lemon sī Bûn-eng tī BBS ê ID, Bûn-eng hit tiuⁿ phoe, it-ti̍t hō͘ A-lân chin care.
|
『你也會覺得我像Lemon說的那樣嗎?』A-lân問QA. Lemon是Bûn-eng tī BBS ê ID, Bûn-eng hit張phoe, 一直hō͘ A-lân真care. |
|
『嗯! 有一點......』QA kóng kah tám-tám--a, kiaⁿ A-lân thiaⁿ--tio̍h ē siūⁿ-khì.
|
『嗯! 有一點......』QA講kah tám-tám--a, 驚A-lân聽--tio̍h ē siūⁿ-khì. |
|
『喂! 哪裡像了?』
|
『喂! 哪裡像了?』 |
|
『說實話, 我覺得妳是無病呻吟, 沒事找事做. 做個快樂的大學生不是好好的, 幹嘛去想那些有的沒的, 還跟妳那些好朋友撕破臉.』
|
『說實話, 我覺得妳是無病呻吟, 沒事找事做. 做個快樂的大學生不是好好的, 幹嘛去想那些有的沒的, 還跟妳那些好朋友撕破臉.』 |
|
『你想一輩子被蒙在鼓裡當快樂的豬, 我可不想! 更何況這些問題確實存在, 只是沒人告訴我們, 學校沒教我們, 讓我們以為一切都正常合理, 可是只要去思考, 去看看我們身邊的人, 很容易就能發現問題所在, 我不想再踏在別人的頭上往上爬, 也不想再急於擺脫我成長的背景追求遙無可及的夢, 大家不是都在說“青春不要留白”嗎? 我只是找到自己的方向而已, 為什麼你們都要和我唱反調?』
|
『你想一輩子被蒙在鼓裡當快樂的豬, 我可不想! 更何況這些問題確實存在, 只是沒人告訴我們, 學校沒教我們, 讓我們以為一切都正常合理, 可是只要去思考, 去看看我們身邊的人, 很容易就能發現問題所在, 我不想再踏在別人的頭上往上爬, 也不想再急於擺脫我成長的背景追求遙無可及的夢, 大家不是都在說“青春不要留白”嗎? 我只是找到自己的方向而已, 為什麼你們都要和我唱反調?』 |
|
『妳有和Mo͘nlight她們說過了嗎?』
|
『妳有和Mo͘nlight她們說過了嗎?』 |
|
『有試著和她們說啊! 不是雞同鴨講, 就是沒對焦.』
|
『有試著和她們說啊! 不是雞同鴨講, 就是沒對焦.』 |
|
『但是妳是真的想和她們談嗎? 有坦開心胸嗎? 還是和她們聊之前, 其實妳自己已經認定她們一定聽不下去或者是聽不懂? 我想妳們之間如果真的有好好聊過的話, 不至於會搞到這樣吧!』
|
『但是妳是真的想和她們談嗎? 有坦開心胸嗎? 還是和她們聊之前, 其實妳自己已經認定她們一定聽不下去或者是聽不懂? 我想妳們之間如果真的有好好聊過的話, 不至於會搞到這樣吧!』 |
|
QA kóng kah A-lân bô ōe thang ìn.
|
QA講kah A-lân無話thang應. |
|
It-ti̍t tán bô A-lân koh chhut-siaⁿ, QA ōaⁿ ōe-tê kóng:『要不要出去吃宵夜? 我去載妳.』
|
一直等無A-lân koh出聲, QA換話題講:『要不要出去吃宵夜? 我去載妳.』 |
|
『不要! 我說過不跟網友見面的.』
|
『不要! 我說過不跟網友見面的.』 |
|
『妳也真奇怪, 可以跟一個網友說那麼多, 卻沒辦法跟自己的好朋友談? Lemon說的對, 妳只是一直再逃避.』
|
『妳也真奇怪, 可以跟一個網友說那麼多, 卻沒辦法跟自己的好朋友談? Lemon說的對, 妳只是一直再逃避.』 |
|
Kòa tiān-ōe liáu-āu, A-lân ê khi-mó͘-chi̍h jú bái, Bûn-eng A-mûi in ê tāi-chì tō hoân-ló bē soah--a, chit-má koh ke chi̍t ê QA lâi loān.
|
掛電話了後, A-lân ê khi-mó͘-chi̍h jú bái, Bûn-eng A-mûi in ê tāi-chì tō煩惱bē soah--a, chit-má koh ke 1 ê QA來亂. |
|
(TGB Thong-sìn tē 66 kî, 2005 nî 3 goe̍h)
|
TGB通訊第66期，2005年3月) |
