Éng-oán ê eng-hoe
|
永遠ê櫻花 |
| Tân Î-kun |
陳怡君 |
|
Kin-á-ji̍t khòaⁿ-liáu Kong-sī ê “Bū-siā Sū-kiāⁿ” siōng bóe-á 1 chi̍p, sim-lāi kám-kak chiok kám-tōng--ê, mā ū chi̍t-kóa siūⁿ-hoat.
|
今á日看了公視ê《霧社事件》siōng尾á 1集, 心內感覺chiok感動--ê, mā有1-kóa想法. |
|
Kok-bîn-tóng thóng-tī kàu-taⁿ í-keng beh 60 nî--a, soan-pò͘ kài-giâm mā beh 20 nî--a, m̄-kuh chit-má, 2004, chiah ū tiān-sī-tâi teh chò lán Tâi-oân-lâng ka-tī ê le̍k-sú kò͘-sū. Sui-jiân chiah òaⁿ chiah chhut--lâi, m̄-kuh lán èng-kai ài kā khéng-tēng kap chi-chhî, kám m̄-sī?
|
國民黨統治到taⁿ已經beh 60年--a, 宣佈解嚴mā beh 20年--a, m̄-kuh chit-má, 2004, chiah有電視台teh做lán台灣人ka-tī ê歷史故事. 雖然chiah ōaⁿ chiah出--來, m̄-kuh lán應該ài kā肯定kap支持, kám m̄是? |
|
M̄-kuh sū-si̍t siōng chit-chhut hì-kio̍k ùi 2/9 khai-sí ián-chhut liáu-āu, tō sî-siông khòaⁿ--tio̍h thiaⁿ-tio̍h chin chē lâng teh phoe-phêng kóng ián-chhut ê ián-oân chin chē sī Hō-ló-lâng, m̄-sī goân-chū-bîn, tō sǹg sī goân-chū-bîn, ián-chhut ê sî-chūn kóng ê ōe, nah ē lóng sī Hôa-gí khah chē. Gí-giân tī chit-chhut hì-kio̍k lāi sī tiōng-iàu ê kak-sek, mā-sī siōng chē lâng phoe-phêng ê khoat-tiám. Tō-sī in-ūi in bē-hiáu kóng goân-chū-bîn-gí, chiah hō͘ lâng phoe-phêng kah hiah chhiⁿ-chhám. Koh ū lâng phoe-phêng in chhēng ê saⁿ-á-khò͘, seng-oa̍h hong-sek kap thoân-thóng hong-sio̍k lóng m̄-sī chiàⁿ-káng Sedeq ê mi̍h-kiāⁿ. Góa siūⁿ beh mn̄g 1 kú: nā án-ne, chiàⁿ-káng ê mi̍h-kiāⁿ sī siáⁿ-mi̍h?
|
M̄-kuh事實上chit齣戲劇ùi 2/9開始演出了後, tō時常看--tio̍h, 聽tio̍h真chē人teh批評講演出ê演員真chē是Hō-ló人, m̄是原住民, tō算是原住民, 演出ê時chūn講ê話, nah ē lóng是華語khah chē. 語言tī chit齣戲劇內是重要ê角色, mā是siōng chē人批評ê缺點. Tō是因為in bē-hiáu講原住民語, chiah hō͘人批評kah hiah淒慘. Koh有人批評in穿ê衫á褲, 生活方式kap傳統風俗lóng m̄是正港Sedeq ê mi̍h-kiāⁿ. Góa想beh問1句: 若án-ne, 正港ê mi̍h-kiāⁿ是siáⁿ-mi̍h? |
|
Chiah-ê phoe-phêng sī chiàⁿ-bīn--ê, sī èng-kai--ê, ài hō͘ tō-ián kap pian-kio̍k in chai-iáⁿ ū bô hó, su-iàu kái-chìn ê só͘-chāi. M̄-kuh tī phoe- phêng tiong, lán kám m̄-sī mā ài kā in phah pho̍k-á, o-ló--chi̍t-ē. O-ló in ū chit-ê sim lâi phah Tâi-oân-lâng ê le̍k-sú, o-ló in ū kak-chhéⁿ, ū Tâi-oân ì-sek, chiah ē-tàng poaⁿ chhut chit-chhut hì-kio̍k, hō͘ m̄-chai Bū-siā Sū-kiāⁿ ê siàu-liân-lâng lâi liáu-kái Mona Rudao kap Gô͘ Hōng sī bô-kāng lâng. Mā ē-sái hō͘ ta̍k-ê khòaⁿ-tio̍h chiàⁿ-káng Tâi-oân-lâng ê ióng-khì kap tùi-khòng gōa-lâi thóng-tī-chiá ê koat-sim. Chit-ê Ji̍t-pún sî-tāi hong-tōng Ji̍t-pún kap sè-kài ê sū-kiāⁿ, sui-jiân bô sêng-kong, m̄-kuh hō͘ lâng khim-phòe. Goân-chū-bîn in chit-chióng hoán-ap-pek ê cheng-sîn, tùi só͘-ū ê Tâi-oân-lâng lâi kóng, èng-kai ē ū chin tōa ê chhiong-kek.
|
Chiah-ê批判是正面--ê, 是應該--ê, ài hō͘導演kap編劇in知iáⁿ有無好, 需要改進ê所在. M̄-kuh tī批評中, lán kám m̄是mā ài kā in phah pho̍k-á, o-ló--1-ē. O-ló in有chit-ê心來phah台灣人ê歷史, o-ló in有覺醒, 有台灣意識, chiah ē-tàng poaⁿ出chit齣戲劇, hō͘ m̄知霧社事件ê少年人來了解Mona Rudao kap吳鳳是無kāng人. Mā ē-sái hō͘ ta̍k-ê看tio̍h正港台灣人ê勇氣kap對抗外來統治者ê決心. Chit-ê日本時代轟動日本kap世界ê事件, 雖然無成功, m̄-kuh hō͘人欽佩. 原住民in chit種反壓迫ê精神, 對所有ê台灣人來講, 應該ê有真大ê衝擊. |
|
Bū-siā Sū-kiāⁿ chit-chhut hì-kio̍k kiat-sok--a. Góa siong-sìn ū phoe-phêng tō ū chìn-pō͘, í-āu nā koh ū lâng beh poaⁿ chit-chióng hì-kio̍k, tio̍h-ài hó-hó-á chù-ì chiah-ê būn-tê. M̄-kuh goân-chū-bîn gí-giân ê būn-tê, góa siūⁿ, beh tu̍t-phòa sī siōng khùn-lân--ê.
|
霧社事件chit齣戲劇結束--a. Góa相信有批評tō有進步, 以後若koh有人beh poaⁿ chit種戲劇, tio̍h-ài好好á注意chiah-ê問題. M̄-kuh原住民語言ê問題, góa想, beh突破是siōng困難--ê. |
|
(TGB Thong-sìn tē 55 kî, 2004 nî 4 goe̍h)
|
(TGB通訊第55期，2004年4月) |
