Chhiⁿ-mî-o̍h
|
青瞑學 |
| Phian-chip-sek |
編輯室 |
|
Tī chit kīn-ji̍t ū chiap-tio̍h Ji̍t-pún ê Múi-ji̍t sin-bûn cha̍p-pò ; kî-tiong ū kóng-khí Im-ga̍k-hōe ê sū-chêng , taⁿ ài chiong khah iàu-kín-ê tāi-ì tiah-khí lâi pò hō͘ tāi-ke chai. Lán Tâi-lâm-hú kúi- nî chêng Kam Bo̍k-su siat chi̍t keng Hùn-kó͘-tông beh kà chhiⁿ-mî-lâng o̍h tha̍k chheh , ia̍h ū kiò kúi-nā ê chhiⁿ-mî gín-ná lâi tha̍k . Chiàu Kam Bo̍k-su ê ì-sù ài chhe kúi-ê khì Ji̍t-pún ê chhiⁿ- mî-o̍h thang tha̍k khah chhim , ǹg-bāng āu-lâi khah tōa lō͘-ēng ; m̄-kú bô kàu- gia̍h só͘-hùi. Ū siá-phoe mn̄g Tâi-pak teh koán o̍h ê koaⁿ khòaⁿ cháiⁿ-iūⁿ . Chit ê koán o̍h ê koaⁿ bô lōa-kú tò-khì Ji̍t- pún ū kóng-khí chit-chân sū ; ū chi̍t-ê chhiⁿ-mî ê ga̍k-su thiaⁿ-kìⁿ tōa-tōa thé- thiap chit-ê tāi-chì , chiū kí-gī tio̍h tiàu Im-ga̍k-hōe chū-chi̍p lâi chok-ga̍k hō͘ lâng thiaⁿ , só͘ thàn ê chîⁿ lóng pang-chān Tâi-lâm chhiⁿ-mî gín-ná. Só͘-í Tâi-oân koán-o̍h ê koaⁿ kap kúi-nā ūi ê sian-siⁿ iā ū se-kok ê sian-siⁿ chi̍t ūi in lóng tōa chhut-la̍t siat-hoat hō͘ chit ê Im-ga̍k-hōe chū-chi̍p . Chit ê Im-ga̍k-hōe chiū-sī Ji̍t-pún ū lâng tiâu-tî khì ha̍k-si̍p im-ga̍k kàu chin cheng-kong lâi siat-chiâⁿ chit-ê hōe ; hoān-nā ū sím-mi̍h hó-sū ài chàn- sêng , in chiū chū-chi̍p chok-ga̍k hō͘ lâng thiaⁿ, só͘ thàn ê chîⁿ chiū thang chò-chiâⁿ hó-sū . Lâng nā beh khì thiaⁿ ga̍k in tio̍h chhut chîⁿ bé chi̍t-tiuⁿ toaⁿ chiah ū ūi thang khì thiaⁿ. Chit pang chū-chi̍p chok-ga̍k ū chē-chē peh-sìⁿ khì bé toaⁿ , iā ū Hông-kiong-lāi ê ông-chhin khì bé siōng-téng ūi ê toaⁿ 100 tiuⁿ . Tùi án-ni chit kòe ê Im-ga̍k-hōe só͘ thàn ê chîⁿ ū gō͘-pah gōa kho͘, lóng kià khì Tang-kiaⁿ chhiⁿ-mî-o̍h, beh chò Kam Bo̍k-su tùi Tâi-lâm chhe-khì ê chhiⁿ-mî gín-ná ê só͘-hùi. Hiah-ê chú-sū kap chàn-sêng ê lâng, khòaⁿ-tio̍h Hông-kiong-lāi ê ông-chhin iā bé hiah chē tiuⁿ toaⁿ, in tōa hoaⁿ-hí kàu-ke̍k, in-ūi Hông-tè siông-siông ài khui in-sù lâi chàn-sêng hó-sū .
|
Tī 這近日有接著日本 ê每日新聞雜報；其中有講起音樂會 ê 事情，今 ài將較要緊ê 大意摘起來報hō͘ 逐家知。咱台南府幾年前甘牧師設一間訓瞽堂 beh 教青瞑人學讀冊，亦有叫幾若個青瞑囡仔來讀。照甘牧師 ê意思ài差幾個去日本 ê 青瞑學thang讀較深，向望後來較大路用；m̄-kú 無夠額所費。有寫批問台北teh 管學 ê 官看怎樣。這個管學ê 官無偌久倒去日本有講起這層事；有一個青瞑 ê 樂師聽見大大體貼這個事誌，就舉議著召音樂會聚集來作樂hō͘人聽，所趁 ê 錢攏幫贊台南青瞑囡仔。所以台灣管學ê 官佮幾若位 ê 先生，也有西國ê 先生一位，in 攏大出力設法 hō͘ 這個音樂會聚集。這個音樂會，就是日本有人刁持去學習音樂到真精光來設成這個會；凡若有甚物好事ài 贊成，in 就聚集作樂 hō͘ 人聽，所趁 ê 錢就thang做成好事。人若 beh 去聽樂 in 著出錢買一張單才有位thang去聽。這pang聚集作樂有濟濟百姓去買單，也有皇宮內ê 王親去買上等位ê單100 張。Tùi án-ni這kòe ê 音樂會所趁 ê 錢有500外箍，攏寄去東京青瞑學，beh做甘牧師tùi台南差去 ê 青瞑囡仔 ê 所費。Hiah-ê主事佮贊成ê人，看著皇宮內ê 王親也買hiah濟張單，in 大歡喜到極，因為皇帝常常愛開恩賜來贊成好事。 |
|
Tng hit ji̍t Tâi-oân koán o̍h ê koaⁿ sìⁿ I-te̍k miâ Siu-jī iā sòa khí-lâi kóng , “ Kam Bo̍k-su sī chêng lán Ji̍t-pún lâng tùi tē-lí-chheh bat Tâi-oân ê miâ, i chiū lâi tiàm chit ê hái-sū , chhut-la̍t in-khîn kà-sī chit hái-sū ê lâng ; jī-cha̍p gō͘ nî kú tiàm chia ná-chhin-chhiūⁿ chi̍t-ji̍t kú , taⁿ i-ê nî-hòe chē sī ló-sêng ê lāu-tōa-lâng. ” Tī 6 goe̍h 20 ji̍t Kam Bo̍k-su só͘ chhe ê chhiⁿ-mî gín-ná í-keng lo̍h-chûn khì Ji̍t-pún; chiū-sī sio̍k Hú-siâⁿ ji̍p-kàu ê Tân Chhun, Chhòa Khe, Koeh Chú-in. Lán ū-sî tio̍h siàu-liām in, kiû Siōng-tè hō͘ in chìn-pō͘, pa̍t-ji̍t chò Chú ê tōa lō͘- ēng .
|
當hit日台灣管學 ê 官姓伊澤名修二也續起來講：「甘牧師是前咱日本人tùi 地理冊 bat 台灣 ê 名，伊就來tiàm chia ê 海嶼，出力慇懃教示這海嶼 ê 人；25年久tiàm chia 若親像1日久，今伊ê 年歲濟是老成 ê老大人。」Tī 6月20日甘牧師所差3個青瞑囡仔已經落船去日本；就是屬府城入教 ê陳春、蔡溪、郭主恩。咱有時著數念in，求上帝hō͘ in 進步，別日做主 ê 大路用。 |
|
(Tâi-lâm-hú Kàu-hōe-pò, tē 149 koàn, 1897 nî 8 ge̍h)
|
(台南府城教會報第149卷，1897年8月) |
