Kiàn-chèng 228 Chhiú khan Chhiú Tâi-oân ti̍h-beh chhut-thâu-thiⁿ
|
見證「228手牽手」台灣ti̍h-beh出頭天 |
| Siau Lah-ji̍h |
蕭Lah-ji̍h |
|
Cha-hng ē[e]-po͘ tiám-pòaⁿ, gún 1 ke-kháu-á 3 tāi 6 lâng, tú-hó chē 1 tâi kiō-chhia, kiáⁿ-sài sái-chhia, góa hip-siòng, ban cha-bó͘-kiáⁿ lio̍k-iáⁿ, khan-chhiú kap tōa-cha-bó͘-kiáⁿ hū-chek chhōa sun.
|
昨昏e晡點半，阮一家口仔三代6人，tú好坐一台轎車。子婿駛車，我hip相，屘查某子錄影，牽手kap大查某子負責chhōa孫。 |
|
Gún ùi Chhân-bóe kong-lō͘-hoe-hn̂g lâm-pêng só͘-chāi khai-sí hip-siòng lio̍k-iáⁿ, 1 lō͘ kau-thong pêng-sūn, beh khan-chhiú pó-hō͘ Tâi-oân ê hiong-chhin, í-keng khai-sí jia̍t-chêng chhut-tōng, góa phâng siòng-ki, iân-lō͘ hip, iân-lō͘ kap hiong-chhin hoah-hiu “Tâi-oân Chhut-thâu-thiⁿ! Tâi-oân Chhut-thâu-thiⁿ! ’’, góa nā bô hip-siòng ê sî-chūn, tio̍h kā in pí tōa-pû-ong ê chhiú-sè, tōa-pō͘-hūn ê lâng lóng-ū hôe-èng, ū-ê tòe góa hoah “Tâi-oân chhut-thâu-thiⁿ”, ū-ê hoah “A-píⁿ--á tòng-soán”, ū-ê kā góa kám-siā, tn̄g-tio̍h chheⁿ-âng-teng ê sî, chiah ū ki-hōe kap ta̍k-ê khai-káng 1-kóa-á kó͘-lē chàn-siaⁿ ê ōe.
|
阮ùi田尾公路花園南爿所在開始hip相錄影，一路交通平順，beh「牽手保護台灣」ê鄉親，已經開始熱情出動。我phóng相機，沿路hip，沿路kap鄉親喝咻：「台灣出頭天！台灣出頭天！」。我若無hip相ê時陣，著kā in比tōa-pû-ong ê手勢，大部份ê人攏有回應。有--ê tòe我喝「台灣出頭天」，有--ê喝「阿扁--仔當選」，有--ê kā我感謝。Tn̄g著青紅燈ê時，才有機會kap逐個開講一寡仔鼓勵讚聲ê話。 |
|
Kau-thong chōng-hóng chin pêng-sūn, pēng bô that-chhia, in-ūi iân-lō͘ beh hip-siòng kap lio̍k-iáⁿ, tō kiò kiáⁿ-sài sái khah bān--leh. chhia í-keng sái lâi kàu Pó-táu, chiàⁿ-chhiú-pêng lō͘-piⁿ lâng chin-chē, ta̍k-ê lóng chhiò-bi-bi, ū-ê ná-chhiūⁿ siuⁿ-kòe hoaⁿ-hí tòng-bē-tiâu ê khoán, í-keng leh chhiú khan chhiú, ū-ê tī-hia leh chông-lâi chông-khì, tāi-khài sī hū-chek ê chí-hui; lāu-hòe-á kap gín-á mā tòe lâng leh hoaⁿ-hí kiâⁿ-sóa, in ta̍k-ê bīn-iông chhiò-chhiò, hō͘-siōng chiàu-kò͘, hō͘-siōng chim-chiok lō͘--ni̍h ǹg-lâm kiâⁿ ê tōa-sè tâi chhia-pang, chit-ê sî-chūn sī ē[e]-po͘ 1 tiám 45 hun.
|
交通狀況真平順，並無塞車。因為沿路beh hip相kap錄影，tō叫子婿駛較慢--leh。車已經駛來到寶斗 ，正手爿路邊人真濟，逐個攏笑bi-bi。有--ê若像siuⁿ過歡喜擋bē-tiâu ê款，已經leh手牽手；有--ê tī-hia leh chông來chông去，大概是負責ê指揮；老歲仔kap囡仔mā tòe人leh歡喜行徙。In逐個面容笑笑，互相照顧，互相斟酌路--ni̍h向南行ê大細台車班。這個時陣是e晡1點45分。 |
|
Keng-kòe Pó-táu, óa-kīn Khe-chiu--á, lâng jú-lâi-jú-chē, ū-ê só͘-chāi í-keng pâi-tūi pâi hó-sè, ū-ê só͘-chāi iáu làng-khiah, bô lâng khiā, chí-hui hū-chek ê lâng chiâⁿ piàⁿ-sì leh chhiâu-chhe̍k, tōa cha-bó͘-kiáⁿ sió-khóa kín-tiuⁿ, in bú--a ioh kóng: “Khó-lêng sī chhut ji̍t-thâu ê koan-hē.....lí kā khòaⁿ, thâu-chêng hia, m̄-sī chiok-chē lâng bi̍h tī chhiū-á-kha, sî-kan iáu-bōe kàu, bián kín-tiuⁿ.
|
經過寶斗，倚近溪洲--a,人愈來愈濟，有ê所在已經排隊排好勢，有ê所在iáu làng隙，無人企，指揮負責ê人誠拚勢leh chhiâu-chhe̍k。大查某子小可緊張，in母--a臆講：「可能是出日頭ê關係...你kā看，頭前hia,m̄是足濟人bi̍h tī樹仔腳，時間iáu未到，免緊張。」 |
|
Tâi-oân-lâng si̍t-chāi chin khó-ài, chin jia̍t-chêng, khòaⁿ gún chit-tâi chhia, ū-lâng leh hip-siòng lio̍k-iáⁿ, ta̍k-ê lóng leh kā gún ia̍t-chhiú, iô in chhiú--ni̍h ê kî-á, tn̄g-tio̍h âng-teng chhia koh thêng-khùn ê ki-hōe, ū-lâng jīn chhut-lâi góa sī siáng, tō tōa-siaⁿ kiò “Siau lāu-su’’, goân-lâi sī gún Chhân-tiong-lâng hun-phòe tī-chia. Ū-lâng kā góa pí tōa-pù-ong, chàn-siaⁿ “Tâi-oân-lâng ka-iû”, “Tâi-oân-lâng chhut-thâu-thiⁿ”, ū-lâng khòaⁿ-tio̍h chit-khoán jia̍t-lia̍t ê hō͘-tōng tùi-ōe kap e-e-tīn-tīn ê kûn-chiòng, in án-ni kóng “Án-ni tō-tio̍h--á! Án-ni tō-tio̍h--á!” Chit-kù ōe,góa chin liáu-kái, ta̍k-ê lâng lóng tùi Tâi-oân chhiong-móa hi-bāng, tùi 320 ê soán-kí chhiong-móa sìn-sim, pó-siú ê Chiong-hòa tē-khu, ū chit-khoán kûn-chiòng kap jia̍t-chêng, chin-chiàⁿ hō͘-lâng sìn-sim cha̍p-chiok tō-tio̍h.
|
台灣人實在真可愛，真熱情。看阮這台車，有人leh hip相錄影，逐個攏leh kā阮ia̍t手，搖in手--ni̍h ê旗仔，tn̄g著紅燈車koh停睏ê機會，有人認出來我是siáng,tō大聲叫「蕭老師」。原來是阮田中人分配tī-chia。有人kā我比tōa-pû-ong，讚聲「台灣人加油」、「台灣人出頭天」。有人看著這款熱烈ê互動對話kap e-e-tīn-tīn ê群眾，in án-ni講：「Án-ni tō著--仔！Án-ni tō著--仔！」這句話，我真了解，逐個人攏對台灣充滿希望，對320 ê選舉充滿信心。保守ê彰化地區，有這款群眾kap熱情，真正hō͘人信心十足tō著。 |
|
Si̍p-jī-lō͘ î-chhî kau-thong ê kéng-chhat, pún-chiâⁿ sī siōng bô-êng koh kín-tiuⁿ ê kak-sek, m̄-koh chit-chūn ê chêng-hêng, ná-chhiūⁿ bô hiah-ni kín-tiuⁿ hō͘ in ap-le̍k ê khoán, tōa-to-sò͘ ê só͘-chāi, lóng khòaⁿ-tio̍h in chin chīn-chek khiā tī hia leh chí-hui, tàn--sī pēng bô hō͘ in kín-tiuⁿ kah chông-lâi chông-khì, in-ūi kûn-chiòng sûi-bóng that-that-tīⁿ, khòaⁿ--khí-lâi gô͘-khî-kā-ka̍p, lâng-siaⁿ hán-hoah, m̄-koh chiâⁿ siú kui-kí, mā chin sè-jī chhia-pang ê kàu-ūi, chai-iáⁿ m̄-thang tòng tio̍h lâng ê lō͘-thâu. Ta̍k-ê chai-iáⁿ, chhut-lâi chhiú khan chhiú ê ì-gī, m̄-sī beh lâi khòaⁿ lāu-jia̍t--ê, mā m̄-sī beh lâi chū-la̍t-kiù-chè, beh lâi kap lâng khòng-cheng--ê, in lóng chai-iáⁿ che sī beh kā Tiong-kok kóng “No’’, Gún beh ài Tâi-oân, Tâi-oân beh chhut-thâu-thiⁿ,Tâi-oân sī Gún-ê, Gún ka-kī ū chú-thé ū chú-chhâi, pa̍t-lâng nā kā Gún kan-sia̍p, Gún beh tōa-siaⁿ kóng-ōe: “'Tâi-oân sī Gún-ê, gōa-lâng bē-sái-chit ke-kóng-ōe", “Tâi-oân! Yes! Tiong-kok! No !”
|
十字路維持交通ê警察，本成是上無閒koh緊張ê角色，m̄-koh這陣ê情形，若像無hiah-ni̍h緊張hō͘ in壓力ê款。大多數ê所在，攏看著in真盡責企tī hia leh指揮，但是並無hō͘ in緊張kah chông來chông去。因為群眾雖罔塞塞tīⁿ，看--起來gô͘-khî-kā-ka̍p,人聲喊喝，m̄-koh誠守規矩，mā真細膩車班ê到位，知影m̄-thang擋著人ê路頭。逐個知影，出來手牽手ê意義，m̄是beh來看鬧熱--ê,mā m̄是beh來自力救濟，beh來kap人抗爭--ê。In攏知影che是beh kā中國講「No」，阮beh愛台灣，台灣beh出頭天，台灣是阮--ê。阮家己有主體有主裁，別人若kā阮干涉，阮beh大聲講話：「台灣是阮--ê,外人bē使chit加講話」、「台灣，YES！中國，No!」 |
|
Sî-kan chiap-kīn 2 tiám 10 hun, góa kiò kiáⁿ-sài mài koh kè-sio̍k, in-ūi gún beh kap Chhân-tiong ê hiong-chhin chhiú khan chhiú, mā beh kā in lo̍k-iáⁿ hip-siòng chò kiàn-chèng. Sî-kan 1 hun 1 bió chiap-kīn, chí-hui-koaⁿ khai-sí ī-ián, chē tiàm í-á hioh-khùn ê lāu-tōa-lâng mā kha-chhng-phé giâ-phû, tōa-lâng gín-á lóng leh pâi tūi-hêng, ban cha-bó͘-kiáⁿ khiā-tī lō͘-tiong an-choân-tó it-ti̍t leh lo̍k-iáⁿ, góa kau-tāi i m̄-thang thêng-khùn, kè-sio̍k lo̍k, tio̍h kā hiong-chhin ài tâi-oân ê hiān-hóng kì-lo̍k hō͘ chiâu-chn̂g, thang chò le̍k-sú ê kiàn-chèng, góa mā 1 bīn kap lâng khai-káng kó͘-lē kiam hip-siòng, khòaⁿ-tio̍h kiàⁿ-thâu, ta̍k-ê lóng chin hoaⁿ-hí, ū-ê chhùi-á gi-gi, ū-ê tōa-siaⁿ hoah “Thoân-kiat ài piàⁿ-sì, Tâi-oân it-tēng chhut-thâu-thiⁿ....”
|
時間接近2點10分，我叫子婿mài koh繼續，因為阮beh kap田中ê鄉親手牽手，mā beh kā in錄影hip相做見證。時間1分1秒接近，指揮官開始預演，坐tiàm椅仔歇睏ê老大人mā kha-chhng-phé giâ浮，大人囡仔攏leh排隊形。屘查某子企tī路中安全島一直leh錄影，我交代伊m̄-thang停睏，繼續錄，著kā鄉親愛台灣ê現況紀錄hō͘ chiâu-chn̂g,thang做歷史ê見證。我mā 一面kap人開講鼓勵兼hip相。看著鏡頭，逐個攏真歡喜，有--ê嘴仔gi-gi,有--ê大聲喝「團結ài拚勢，台灣一定出頭天...」 |
|
Tâi-it-sòaⁿ kong-lō͘-téng ê chhia-lióng kāng-khoán lâi-lâi khì-khì, m̄-nā chiūⁿ-pak thong-sūn, lo̍h-lâm kāng-khoán bô that-chhia, chí-sī múi tâi chhia lóng sái khah-bān, chhia lāi ê lâng koh ē kap lō͘-piⁿ ê lâng pí chhiú-sè, hoah hiu, chhi̍h8 lat-pah, khòaⁿ tī ba̍k-chiu-lāi, góa í-keng liáu-kái, m̄-nā lō͘-piⁿ ê hiong-chhin chhiú khan chhiú, liân kòe-lō͘ chhia-lāi ê lâng-kheh lóng í-keng sim liân sim, liâm-liâm chò 1-hóe.
|
台一線公路頂ê車輛共款來來去去，m̄若上北通順，落南共款無塞車。只是每台車攏駛較慢，車內ê人koh會kap路邊ê人比手勢，喝咻，chhi̍h8喇叭，看tī目珠內，我已經了解，m̄若路邊ê鄉親手牽手，連過路車內ê人客攏已經心連心，黏黏做一伙。 |
|
Ta̍k-ê lóng í-keng chhiú khan chhiú, khai-sí tī-beh chhiàng-siaⁿ, o͘h! M̄-nā chhiú khan chhiú niā-niā, eng-kai sī chhiú-tê-á khan chhiú-tê-á, chhiú-kó͘-thâu kheh chhiú-kó͘-thâu, in-ūi ta̍k-ê lóng bô-ài pâi āu-piah, m̄-chiah kheh-kheh chò 1-hóe.
|
逐個攏已經手牽手，開始tī-beh chhiàng聲。O͘h！M̄若手牽手nia-niâ,應該是手蹄仔牽手蹄仔，手股頭kheh手股頭，因為逐個攏無愛排後壁，m̄-chiah kheh-kheh做一伙。 |
|
Sî-kan thêng-tī 2 tiám 28 hun, “Hoán hui-tôaⁿ! Ài hô-pêng! Cho̍k-kûn tōa thoân-kiat! Chhiú khan Chhiú pó-hō͘ Tâi-oân! Siong-sìn tâi-oân! Siong-sìn thó͘-tē! Siong-sìn kong-tâu!” 1-piàn koh 1-piàn, lâng-siaⁿ lat-pah siaⁿ chiâu-hióng, ū-lâng khai-sí kek-tōng, chhiú giâ koân-koân bē-kì-tit pàng-lo̍h, ū-lâng hoaⁿ-hí kah chhùi-chhiò ba̍k-chhiò, m̄-nā hoah kah chiok sóng-khoài, sim-lāi mā kám-kak chiok an-ùi, in-ūi lâng-sò͘ pí in só͘ liāu-sióng--ê koh khah-chē.
|
時間停tī 2點28分，「反飛彈！愛和平！族群大團結！手牽手保護台灣！相信台灣！相信土地！相信公投！」一遍koh一遍，人聲喇叭聲齊響，有人開始激動，手giâ懸懸bē記得放--落；有人歡喜kah嘴笑目笑，m̄若喝kah足爽快，心內mā感覺足安慰，因為人數比所料想--ê koh較濟。 |
|
Che sī 1 ê hoaⁿ-hí chhiong-móa ài kap ǹg-bāng ê ji̍t-chí, Thiⁿ-khì chheng-hô, ū chhut ji̍t-thâu kám-kak sim-lāi sio-lo̍h sio-lo̍h. Ta̍k-ê chhiú khan chhiú, Tâi-oân beh chhut-thâu-thiⁿ. Kiàn-chèng sìn-bu̍t: siòng-phìⁿ 100 tiuⁿ, lo̍k-iáⁿ 50 hun-cheng.
|
Che是一個歡喜充滿愛kap向望ê日子。天氣清和，有出日頭，感覺心內燒--lo̍h燒--lo̍h。逐個手牽手，台灣beh出頭天。見證信物：相片100張，錄影50分鐘。 |
