Liāu Hin-chiang Sian-siⁿ tan-sûn ê it-seng
|
廖興彰先生單純ê一生 |
| Liāu Li̍p-bûn |
廖立文 |
|
Liāu Hin-chiang Sian-siⁿ tī Lūn-pòe, Káng-bóe chhut-sì, tōa-hàn. Siàu-liân sî-tāi tō mi-chiⁿ boeh chok-khek; ùi Tâi-lâm Tiâng-êng Tiong-o̍h pit-gia̍p, sûi khì Ji̍t-pún, Tang-kiaⁿ o̍h im-ga̍k.
|
廖興彰先生tī崙背港尾出世大漢。少年時代tō mi-chiⁿ boeh作曲；ùi台南長榮中學畢業後，sûi去日本東京學音樂。 |
|
Tē-jī-chhù Sè-kài Tāi-chiàn kiat-sok chìn-chêng tńg lâi Tâi-oân, tī Hó͘-bóe Tiong-o̍h kà-chheh, it-ti̍t kàu thè-hiu. Thè-hiu-liáu, kà chi̍t-tōaⁿ sî-kan ê kǹg-khîm. Bóe..ni̍h ji̍t-chí chiah kòe liáu khah-chheng-iu, ū tām-po̍h-á hiáng-siū tio̍h ka-tī-ê siūⁿ beh kòe ê seng-oa̍h.
|
第二次世界大戰結束進前轉來台灣，tī虎尾中學教冊，一直到退休。退休了，教一段時間ê鋼琴，Bóe..ni̍h日子才過了較清幽，有淡薄仔享受著家己想boeh過ê生活。 |
|
Hin-chiang Sian-siⁿ chò-lâng tiām-tī, chi̍t-sì-lâng chin tan-sûn, kan-na chhù-bī im-ga̍k kah tha̍k-chheh. Bóe..á chit-kúi-tang, tiāⁿ-tiāⁿ khì thiaⁿ im-ga̍k-hōe. 2003-nî Cha̍p-goe̍h 24, Kang Bûn-iá kòe-sin 20-chiu-nî ha̍k-su̍t gián-thó-hōe kah kì-liām im-ga̍k-hōe, i mā siū iau-chhiáⁿ, khì kāng tàu-lāu-jia̍t.
|
興彰先生為人tiām-tī,一世人真單純，kan-na趣味音樂kah讀書。尾仔這幾冬，定定去聽音樂會。2003年10月24日，「江文也過身二十週年學術研討會kah紀念音樂會」，他mā受邀請，去kāng鬥鬧熱。 |
|
Cha̍p-it-goe̍h 20, Pài-sì-àm, i koh cháu khì Kok-ka Im-ga̍k-thiaⁿ. Im-ga̍k-hōe soah, bô-gî-gō͘ hō͘ chi̍t-tâi o͘-tó͘-bái cheng--tio̍h, ‘hó͘-fú-chhiang’ chhut-hoeh, tì-sú ‘to-chhông chhí-koan soai-chiê’, 10-kang-āu tī Tâi-tāi Pēⁿ-īⁿ kòe-sin.
|
11月20日拜四暗， oah他koh走去國家音樂廳。音樂會煞，bô-gî-gō͘ hō͘一台o͘-tó͘-bái cheng--tio̍h,【後腹腔出血】，致使【多重器官衰竭】，十天後tī台大醫院過身。 |
|
I lâu--lo̍h-lâi..ê, ū: chi̍t-koah-á ga̍k-khek kah bûn-jī ê chhiú-kó; kui-chhù-keng ê chheh kah chhiòⁿ-phìⁿ; iáu 1-kńg tī chheh-toh-á-téng ê, 10-tiôⁿ im-ga̍k-hōe ê phiò: (－－Cha̍p-it-goe̍h 21 chi̍t-tiôⁿ, 24 chi̍t-tiôⁿ, án-ne it-ti̍t pâi kah Cha̍p-jī-goe̍h 31.); tùi chhin-lâng nî-kú goe̍h-chhim ê thiàⁿ-thàng, khòaⁿ-kò͘, kah chhin-lâng tùi i ná lâi ná iù-jī ê siàu-liām, chham iáu thèng-hāu sī-sè lâi liáu-kái ê jîn-seng.
|
他留--落來有：chi̍t-k-á樂曲kah文字ê手稿；kui-chhù-keng ê冊kah唱片；iáu一卷tī書桌仔頂上ê十場音樂會ê票(─ 11月21一場、24日一場，án-ne一直排到12月31日；)對親人年久月深ê痛疼愛看顧kah親人對他那來那iù-jī ê思念，chham iáu聽候序細來了解ê人生。 |
|
(Tâi-bûn Bóng-pò tē 95 kî, 2004 nî 8 goe̍h)
|
(台文罔報第95 期，2004年8月) |
