To̍k-gán Siōng-tè
|
獨眼上帝--咱攏是罪人 |
|---|---|
| Lí Khîn-hōaⁿ | 李勤岸 |
|
Siōng-tè sī to̍k-gán ê I m̄-bat tông-sî thí-khui nn̄g lúi ba̍k-chiu Khòaⁿ I ka-kī chhòng-chō ê chit-ê sè-kài |
上帝是獨眼 ê 伊 m̄-bat同時 thí開兩蕊目珠 看伊家己創造 ê 這個世界 |
|
Chá-sî, I thí-khui îⁿ-îⁿ âng-âng ê ba̍k-chiu E-tàu, I ê ba̍k-chiu chhiah iāⁿ-iāⁿ Hông-hun, I ê ba̍k-chiu bān-bān kheh--lo̍h-khì |
早起，伊 thí開圓圓紅紅 ê 目珠 E-晝，伊 ê目珠赤 iāⁿ-iāⁿ 黃昏，伊 ê 目珠慢慢 kheh 落去 |
|
Jiân-āu thí-khui lēng-gōa hit lúi Tò-tiàu ba̍k Ài-khùn ba̍k Chhiâ ba̍k Chún-kóng kui lúi ba̍k-chiu lóng khui-khui, mā-sī Bū-bū Put-jím-sim khòaⁿ chheng-chhó chit-ê sè-kài |
然後 thí開另外hit蕊 倒吊目 愛睏目 斜目 準講歸蕊目珠攏開開，mā是 霧霧 不忍心看清楚這個世界 |
|
Siōng-tè piàn-chiâⁿ to̍k-gán ê Sī in-ūi lóng ē ū chi̍t lúi ba̍k-chiu teh thiàⁿ Hit lúi chiok ū thiàⁿ-sim ê ba̍k-chiu Khòaⁿ jîn-lūi sio-thâi só͘ lâu ê hoeh Khòaⁿ kah siū-siong lúi-lúi Kiông-beh chheⁿ-mê khì Chí-hó chi̍t lúi khui, chi̍t lúi kheh Lûn-liû iúⁿ-siong |
上帝變成獨眼 ê 是因為攏會有一蕊目珠 teh 痛 Hit蕊足有疼心 ê 目珠 看人類相thâi所流 ê 血 看 kah 受傷累累 強 beh 青瞑去 只好一蕊開，一蕊kheh 輪流養傷 |
|
Múi-pái ba̍k-chiu se̍h kàu Tiong-tang Se̍h kàu Belkan pòaⁿ-tó Se̍h kàu In-Pa kau-kài Se̍h kàu Pak-Irland Se̍h kàu Tâi-oân hái-kiap Ji̍t--sî lóng chiok té In-ūi ba̍k-chiu chin kín siū-siong Chin kín kheh--khì Kè-sio̍k án-ne lo̍h-khì |
每擺目珠 se̍h 到中東 Se̍h 到Belkan半島 Se̍h 到印巴交界 Se̍h 到北Irland Se̍h 到台灣海峽 日時攏變足短 因為目珠真緊受傷 真緊 kheh 去 繼續án-ne落去 |
|
Chóng ū chi̍t kang Siōng-tè ē chheⁿ-mê Kui-ê sè-kài o͘-thiⁿ àm-tē |
總有一工 上帝會青瞑 歸個世界烏天暗地 |
