Thu̍t-piàn_SARS gō͘ chi gō͘
|
突變－SARS五之五--母語ê心靈雞湯 |
|---|---|
| Lí Khîn-hōaⁿ | 李勤岸 |
|
Ū chi̍t-tōaⁿ sî-kan bô tńg-khì Tâi-oân Chòe-kīn hoat-hiān Tâi-oân-lâng Sió-khóa chham ka-kī bô siáⁿ sio-siâng Te̍k-piat sī bīn-hêng Te̍k-piat sī kóng-ōe ê hêng Sió-khóa chham ka-kī bô sio-siâng |
有一段時間無轉去台灣 最近發現台灣人 小可參家己無啥相siâng 特別是面形 特別是講話ê形 小可參家己無啥相siâng |
|
Tâi-oân piàn-hòa lú lâi lú kín Tâi-oân-lâng ê chìn-hòa Sī-m̄-sī mā lú lâi lú kín Tiān-sī sin-bûn tiong ê Tâi-oân-lâng Chhùi-hêng chham í-chêng chin bô siâng |
台灣變化愈來愈緊 台灣人ê進化 是m̄是mā愈來愈緊？ 但是新聞中ê台灣人 嘴形參以前真無siâng |
|
Ū-ê thu̍t--chhut-lâi Ū tiám-á sêng “thâng lâu ia” Ū-ê ke chi̍t-iân po̍h-po̍h tah-bīn Chhin-chhiūⁿ Ji̍t-pún ê jím-chiá Ū-ê chi̍t-sûn chi̍t-sûn ê hoâiⁿ-sûn Ná-chhiūⁿ chhiú-su̍t tiong ê gōa-kho i-seng Ū-ê chin hoe chin súi Ū-ê koh ū kok-chióng chhái-sek Chiok kiaⁿ góa ē lú lâi lú bô-sêng Tâi-oân-lâng |
有ê突--出來 有點仔sêng【唐老鴨】 有ê加一緣薄薄tah面 親像日本ê忍者 有ê一sûn一sûn ê橫sûn 若像手術中ê外科醫生 有ê真hoe真súi 有ê koh 有各種彩色 足驚我會愈來愈無sêng台灣人 |
|
Kín khì khòaⁿ i-seng Mn̄g i-seng ū sím-mi̍h hong-hoat Hō͘ góa mā ē-tàng chìn-hòa Chhin-chhiūⁿ tī Tâi-oân ê Tâi-oân-lâng |
緊去看醫生 問醫生有甚mi̍h方法 Hō͘我mā會當進化 親像tī台灣ê台灣人 |
|
I-seng kóng he sī chi̍t-khoán thu̍t-piàn Siū Tiong-kok pēⁿ-to̍k ji̍p-chhim ê kiat-kó Tâi-oân-lâng chí-iàu Tâi-oân-sim iáu tī-teh Èng-kai ū hoat-tō͘ khì-tû Tiong-kok pēⁿ-to̍k Chin-kín hoe-ho̍k gôa-pún ê Tâi-oân-lâng Tâi-oân-lâng pún-lâi ê bīn-hêng Tâi-oân-lâng pún-lâi ê chhùi-hêng Tâi-oân-lâng pún-lâi ê cheng-sîn |
醫生講he是一款突變 受中國病毒入侵ê結果 台灣人只要台灣心iáu有tī-leh 應該有法度去除中國病毒 真緊恢復原本ê台灣人 台灣人本來ê面形 台灣人本來ê嘴形 台灣人本來ê精神 |
|
Put-kò, góa mā sī chin kiaⁿ Kiaⁿ góa bô sêng Tâi-oân-lâng Kàu-sî Tâi-oân-lâng ē bô beh jīn-tông góa Kóng góa í-keng m̄-sī Tâi-oân-lâng |
不過，我mā是真驚 驚我無sêng台灣人 到時台灣人會無beh認同我 講我已經m̄是台灣人 |
|
Góa chiū kóaⁿ-kín khì bé kúi-á táⁿ Kok-hêng kok-chōng ê chhùi-am Ta̍k-kang tī kiàⁿ thâu-chêng liān-si̍p kòa Kòa hō͘ ū chi̍t-tiám-á sêng “thâng lâu ia” Ū chi̍t-tiám-á sêng Ji̍t-pún jím-chiá Ū chi̍t-tiám-á sêng gōa-kho i-seng Ū chi̍t-tiám-á hoe Ū chi̍t-tiám-á sek-chhái |
我就趕緊去買幾個打 各形各狀ê嘴am 逐工tī鏡頭前練習掛 掛hō͘有一點仔sêng【唐老鴨】 有一點仔sêng日本忍者 有一點仔sêng外科醫生 有一點仔hoe 有一點仔彩色 |
|
Koh jīn-chin liān-si̍p kóng-ōe Kóng hit-khoán Tâi-oân-khiuⁿ ê “Thâi-oan kô͘-î” Beh hō͘ ka-kī lú lâi lú sêng Tâi-oân-lâng |
Koh認真練習講話 講hit款台灣腔ê 【台灣國語】 Beh hō͘家己愈來愈sêng 台灣人 |
