Seng lim Ke-thng_sū
|
先lim雞湯－序--母語ê心靈雞湯 |
|---|---|
| Lí Khîn-hōaⁿ | 李勤岸 |
|
Sàn-chiah ê ngó͘-lêng nî-tāi
|
散chia̍h ê 五○年代 |
|
Tâi-oân ê chng-kha Lî chhân bô jōa hn̄g ê chi̍t-keng thô͘-kak-chhù Chi̍t ê kok-sió ê gín-á N̂g-sng tah-meh Tī lāu-pē ka-kī khioh pang-á tèng--khí-lâi Hián-jiâng siuⁿ-kòe kē ê chheh-toh-á téng Tī hun-n̂g ê teng-kng ē-kha Tha̍k-chheh |
台灣ê庄腳 離田無偌遠ê一間土角厝 一個國小ê 囡仔 黃酸 tah-meh Tī 老父家己拾枋仔釘起來 顯然siuⁿ過低ê書桌仔頂 Tī昏黃ê燈光下腳 讀冊 |
|
“Lâi! hioh chi̍t-ē khùn leh Seng lim chi̍t óaⁿ ke-thng! Chiah koh khì tha̍k!” A-bó m̄-chai sím-mi̍h sî-chūn Ti̍h hó chi̍t óaⁿ ke-thng Phâng lâi hō͘ chit-ê êng-ióng put-liông ê gín-á Kú-kú-á sió chia̍h chi̍t-ē-á pó͘ |
「來！歇一下睏leh， 先lim一碗雞湯！ Chiah koh 去讀！」 阿母m̄知甚mi̍h時陣 滴好一碗雞湯 捧來hō͘這個營養不良ê囡仔 久久仔小食一下仔補 |
|
Lim kòe A-bó ti̍h ê ke-thng Chit-è sán pi-pa ê gín-á Āu-lâi chheh tha̍k kàu phok-sū Lim kòe A-bó ti̍h ê ke-thng Chit-ê sàn phí-phí ê gín-á Āu-lâi chheh kà kàu Harvard |
Lim過阿母滴ê雞湯 這個sán pi-pa ê囡仔 後--來冊讀到博士 Lim阿母滴ê雞湯 這個散phí-phí ê囡仔 後來冊教到Harvard |
|
Hó-gia̍h ê nn̄g-chheng nî-tāi Niú-khio̍k ê Tiong-kok-ōe kàu-io̍k chi hā Sim-lêng sàn-hiong ê Tâi-oân gín-á ah Lâi! seng hioh chi̍t-ē-á khùn leh Seng lim chi̍t óaⁿ A-bó ê ōe ti̍h--chhut-lâi ê ke-thng Sió chia̍h chi̍t-ē-á pó͘ leh Chiah koh phah-piàⁿ |
好額ê 2000年代 扭曲ê中國話教育之下 心靈散hiong ê台灣囡仔ah 來！先歇一下仔睏leh 先lim一碗阿母ê話滴出來ê雞湯 小食一下仔補leh Chiah koh 繼續扑拚 |
|
Lâi! seng lim chi̍t óaⁿ sim-leng ê ke-thng Lim kòe A-bó ê ōe ti̍h--chhut-lâi ê ke-thng Tâi-oân beh cheng-sîn pá-chiok kiâⁿ hiòng sè-kài Lâi! seng lim chi̍t óaⁿ sim-leng ê ke-thng Lim kòe A-bó ê ōe ti̍h--chhut-lâi ê ke-thng Tâi-oân-lâng beh tī sè-kài chhut-thâu-thiⁿ! |
來！先lim一碗心靈ê雞湯 Lim過阿母ê話滴出來ê雞湯 台灣beh精神飽足行向世界 來！先lim一碗心靈ê雞湯 Lim過阿母ê話滴出來ê雞湯 台灣人beh tī世界出頭天！ |
