Phōng-kó ê Chu-bī
|
蘋果 ê 滋味--咱攏是罪人 |
|---|---|
| Lí Khîn-hōaⁿ | 李勤岸 |
|
Che lóng-sī Hā-oa jiá ê hō-toan Nā bô, góa mā iáu-koh tòa tī thian-tông Bē lâi tòa tī Hawaii |
這攏是夏娃惹 ê 禍端 若無，我 mā iáu-koh tòa tī 天堂 Bē 來 tòa tī Hawaii |
|
Lâng lóng kóng góa tòa tī thian-tông Him-siān ê gán-sîn Lia̍h góa kim-kim siòng Siūⁿ kóng góa pha̍k kah o͘-o͘ Bekini it-tēng khòaⁿ chiok chē |
人攏講我 tòa tī 天堂 欣羨 ê 眼神 掠我金金相 想講我曝 kah 烏烏 Bekini 一定看足濟 |
|
Lâng lóng kóng góa tòa tī thian-tông Sin chhēng jia̍t-chêng aloha Chi̍t nî thàu-tang té-khò͘-cháng-á Chhun-hong sù-kùi bî-bî-á chhoe Ún-tàng ta̍k-sî to teh tō͘ bi̍t-goa̍t |
人攏講我 tòa tī 天堂 身穿熱情 aloha 一年透冬短褲cháng仔 春風四季微微仔吹 穩當時都 teh度蜜月 |
|
Lâng lóng kóng góa tòa tī thian-tông Tó tiàm iâ-chí-chhiū kha Sûi-chāi nâ-sek ê hong siàm--kòe-lâi Sûi-chāi pe̍h-sek hái-éng ê siaⁿ-im siàn--kòe-khì Tó tiàm soa-than Hō͘ ji̍t-thâu pha̍k o͘-jîn ba̍k-kiàⁿ Hō͘ ba̍k-kiàⁿ lāi-té ba̍k-chiu sì-kè koan-kong |
人攏講我 tòa tī 天堂 倒 tiàm 椰子樹腳 隨在藍色 ê 風搧過來 隨在白色海湧 ê 聲音搧過去 倒 tiàm 沙灘 Hō͘ 日頭曝烏仁目鏡 Hō͘ 目鏡內底目珠四界觀光 |
|
Lóng-sī Hā-oa ê chú-ì Nā bô, góa mā bē khì chia̍h hit lia̍p phōng-kó Kóng chia̍h liáu ē piàn-chò phok-su Kiat-ko kéⁿ tiàm nâ-âu-cheng-á Thun sī thun bē lo̍h--khì Thò͘ sī thò͘ bē chhut--lâi |
攏是夏娃 ê 主意 若無，我 mā bē去食hit粒蘋果 講食了會變做博士 結果kéⁿ tiàm 嚨喉鐘仔 吞是吞bē落去 吐是吐bē出來 |
|
Lâng lóng kóng góa tòa tī thian-tông Thian-tông ê chu-bī Khòaⁿ koan-kong-kheh tó tī iâ-chí-chhiū kha ê góa Khòaⁿ lâng tó tī Waekeki hoan-gêng koan-kong ê góa Siōng-kài liáu-kái |
人攏講我是 tòa tī 天堂 天堂 ê 滋味 看觀光客倒 tī 椰子樹腳 ê 我 看人倒 tī Waekeki 歡迎觀光 ê 我 上kài了解 |
|
Khòaⁿ lâng ū-êng thang sńg hái-éng Khòaⁿ lâng ū êng-á-chîⁿ thang iā teh poe Ah! Thian-tông ê chu-bī Nâ-âu-cheng-á hit lia̍p phōng-kó Phōng-kó ê chu-bī |
看人有閒thang sńg 海湧 看人有閒仔錢thang iā teh 飛 Ah！天堂 ê 滋味 嚨喉鐘仔hit粒蘋果 蘋果 ê 滋味 |
