Pa Lí M̄-thang Khí-siáu
|
爸，你 m̄-thang起痟--咱攏是罪人 |
|---|---|
| Lí Khîn-hōaⁿ | 李勤岸 |
|
--1999-nî Hū-chhin-cheh goán cha-bó͘-kiáⁿ Ka-gî sàng góa ê lé-mi̍h
|
--1999年父親節阮查某子嘉宜送我 ê 禮物 |
|
Pa, lí m̄-thang khí-siáu Sui-jiân lâng lóng kóng lí í-keng khí-siáu Sì-cha̍p gōa hòe chiah teh tha̍k phok-sū Kóng ûi-tio̍h be chò sán-pô Ûi Tâi-oân chiap-seⁿ chi̍t ê Ū bó-gí bûn-hòa ê âng-eⁿ-á |
爸，你 m̄-thang起痟 雖然人攏講你已經起痟 四十外歲才 teh 讀博士 講為著 beh 做產婆 為台灣接生一個 有母語文化 ê 紅嬰仔 |
|
Kui-ê 90 nî-tāi lóng chìm tī Ta-sò ê gí-giân-só͘ Tha̍k kah piàn-chò chi̍t chiah thâng Kiò-chò Y2K |
歸個90年代攏浸 tī 乾燥 ê 語言所 讀 kah 變做一隻蟲 叫做 Y2K |
|
Pa, lí m̄-thang khí-siáu Chhian-bān, lí m̄-thang chin-chiàⁿ khí-siáu Sui-jiân góa mā kám-kak lí í-keng khí-siáu |
爸，你 m̄-thang起痟 千萬，你 m̄-thang真正起痟 雖然我mā感覺你已經起痟 |
|
Lí kóng lí sī Siōng-tè ê kiáⁿ Koh kóng lí sī chi̍t tiâu ko-sok-kong-lō͘ Nā àn lí ê sin-khu sái--kòe-khì Chin kín tio̍h ē kàu thian-tông |
你講你是上帝 ê子 你講你是一條高速公路 若按你 ê 身軀駛過去 真緊著會到天堂 |
|
Lí lâi sè-kan sī beh chhì-thàm hia-ê ké-hó-lâng In hó-gia̍h ná soaⁿ, chhùi kóng thiàⁿ-sim ná hái Khiok pàng lí iáu-bē hō͘ lâng tèng si̍p-jī-kè Seng gō-sí Hō͘ lí oân-choân bô ki-hōe kiù-sio̍k jîn-lūi |
你來世間是beh 試探hia ê假好人 In好額若山，嘴講疼心若海 卻放你iáu-bē hō͘ 人釘十字架 先餓死 Hō͘ 你完全無機會救贖人類 |
|
Pa, Lí chhian-bān m̄-thang khí-siáu Iâ-so͘ sui-jiân kóng kòe hó-gia̍h-lâng ji̍p thian-tông Pí lo̍k-tô chhng chiam-sòaⁿ khah oh Sui-jiân lí gîn-hâng chûn-khoán ê soa-pó Chhiâⁿ hō͘ chi̍t éng chi̍t éng ê siàu-toaⁿ Im im--tó Tān-sī lí bêng-bêng m̄-sī Siōng-tè ê kiáⁿ Góa bêng-bêng m̄-sī Siōng-tè ê sun |
爸，你千萬 m̄-thang起痟 耶穌雖然講過好額人入天堂 比駱駝穿針線 khah oh 雖然你銀行存款ê 沙堡 Chhiâⁿ hō͘ 一湧一 湧ê數單 淹淹倒 但是你明明 m̄ 是上帝 ê子 我明明 m̄ 是上帝 ê 孫 |
|
Pa, chhian-bān lí m̄-thang khí-siáu M̄-thang, chhian-bān m̄-thang Góa kā lí lám ân-ân Góa chiok ài lí Lí nā khí-siáu Góa bōe khui-hoe ê hoe-— Ē piàn tē-lûi Ē má-siōng khui-hoe Po̍k-chà |
爸，千萬你 m̄-thang起痟 M̄-thang，千萬 m̄-thang 我 kā 你攬 ân-ân 我足愛你 你若起痟 我未開花 ê 花蕾 會變地雷 會馬上開花 爆炸 |
