Kut-khì ê Chhiū-ńg
|
骨氣ê樹ńg--咱攏是罪人 |
|---|---|
| Lí Khîn-hōaⁿ | 李勤岸 |
|
－－kì-liām Tân Bûn-sêng
|
--紀念陳文成 |
|
Tó tī Tân Bûn-sêng in ha̍k-hāu ê chhiu-á kha Chhiū-ńg hō͘ góa sió-khóa siám-pī Chhit-goe̍h-thiⁿ ê iām-joa̍h Sió-khóa-á hioh chi̍t-ē-á khùn Siau-tû lí-tô͘ ê phî-lô |
倒tī陳文成in學校ê樹仔腳 樹蔭hō͘ 我小可閃避 七月天ê炎熱 小可仔歇一下仔睏 消除旅途ê疲勞 |
|
Tī Kǹg-thi̍h-siâⁿ Pitchberg ê chhī-tiong-sim Bô-siáⁿ hiáⁿ-ba̍k ê chi̍t-ê hāu-hn̂g Sī chin chhut-miâ ê tiān-náu kho-ha̍k tiōng-tìn Chhin-chhiūⁿ bô-siáⁿ hiáⁿ-ba̍k ê seⁿ-chò Bô chù-tiōng chhēng-chhah ê Tân Bûn-sêng Sī kok-chè siōng chin kia̍t-chhut ê ha̍k-chiá Sī chin kian-chhî lí-sióng ê chi̍t-ê Tâi-oân thi̍h-hàn |
Tī鋼鐵城匹茲堡ê市中心 無啥顯目ê一個校園 是真出名ê電腦科學重鎮 親像無啥顯目ê生做 無注重穿插ê陳文成 是國際上真傑出ê學者 是真堅持理想ê一個台灣鐵漢 |
|
81 nî,lí tńg-khì Tâi-oân thàm-chhin hit chi̍t-pái In kiò lí khì Kèng-chóng lim ka-pi Lim liáu chin chhiah-ia̍h Koh chio lí tńg-lâi lí ê bó-hāu sàn-pō͘ Chio lí peh--khí-li̍h tô͘-su-koán Siòng chi̍t-ê khah ū bûn-hòa khì-chit ê kak-lo̍h Hō͘ lí chū-chū-jiân-jiân siak--lo̍h-khì |
八一年，你轉去台灣探親hit一擺 In叫你去警總lim咖啡 Lim了真刺ia̍h Koh招你轉來你ê母校散步 招你peh 起li̍h圖書館 相一個較有文化氣質ê角落 Hō͘你自自然然摔落去 |
|
In kóng bô kā lí bô͘-sat In chí-sī hō͘ lí tó leh sió hioh-khùn--chi̍t-ē Siau-tû lí jîn-seng lí-tô͘ ê phî-lô |
In講無kā 你謀殺 In只是hō͘你倒leh小歇睏一下 消除你人生旅途ê疲勞 |
|
Khak-si̍t, lí pēng bô sí Góa tó tiàm lí tó-kòe ê chhiū-ńg n̍i̍h Sió hioh chi̍t-ē-á khùn Chiū sûi peh--khí-lâi Lí chiū sûi koh tòe góa peh--khí-lâi Chi̍t châng ū kut-khì ê Tâi-to̍k tōa-chhiū |
確實，你並無死 我倒tiàm你倒過 ê 樹ńg n̍i̍h 小歇一下仔睏 就隨koh peh--起來 你就隨koh tòe 我peh--起來 一欉有骨氣ê台獨大樹 |
