Kha-siàu
|
Kha-siàu--咱攏是罪人 |
|---|---|
| Lí Khîn-hōaⁿ | 李勤岸 |
|
Chit keng chhù, khí hiah-n̍i̍h kú Khí bē hó-sè Chit chiah chûn, sái hiah-n̍i̍h kú Sái bē chhut-phâng Goân-lâi kha-siàu ū bûn-tê! |
這間厝，起hiah-n̍i̍h久 起bē好勢 這隻船，駛hiah-n̍i̍h 久 駛bē出帆 原來腳數有問題！ |
|
Chiàu-kóng lâng ê sò͘-bo̍k kap kha ê sò͘-bo̍k Pí-lē èng-kai sī it pí jī Kiat-kó m̄ sī Ū ê saⁿ kha Ū ê sì kha Kha ê sò͘-bo̍k kap jîn-sò͘ ê pí-lē loān--khì Kha-pō͘ soah loān khì |
照講人ê 數目kap腳 ê 數目 比例應該是一比二 結果m̄是 有 ê 三腳 有 ê 四腳 腳 ê 數目kap人數 ê比例亂去 腳步煞亂去 |
|
Kha-pō͘ loān--khì beh án-chóaⁿ khí-chhù? Kha-pō͘ loān--khì beh án-chóaⁿ sái-chûn? Chiàu-kóng tòa tiàm chia cha̍i̍h kú Sì-kha èng-kai chìn-hòa chò nn̄g-kha |
腳步亂去beh án-chóaⁿ起厝？ 腳步亂去beh án-chóaⁿ駛船？ 照講tòa tiàm chia chiah 久 四腳應該進化做二腳 |
|
Bô phah-sǹg Nn̄g-kha--ê khòaⁿ lâng sì-kha kiâⁿ-lō͘ khah ū hong Soah seⁿ-chhut chi̍t ki bóe-á Bóe-á iô á iô Soah piàn-chò chi̍t ki kha |
無扑算 二腳--ê看人四腳行路khah有風 煞生出一支尾仔 尾仔搖仔搖 煞變做一支腳 |
|
Oah! hiah chē lâng ū saⁿ ki kha Siaⁿ-mi̍h sî-chūn ke chhut-lâi ê hit ki kha Beh kak-chhéⁿ Beh siu kha beh siu bóe Siaⁿ-mi̍h sî-chūn ke chhut-lâi ê hit nn̄g ki kha Beh chìn-hòa beh jīn-tông Beh khiā--khí-lâi Tī chit tè thó͘-tē |
Oah！Hiah 濟人有三支腳 啥mi̍h時陣加出來ê hit支腳 Beh 覺醒 Beh 收腳beh 收尾 啥mi̍h時陣加出來 ê hit二支腳 Beh 進化beh認同 Beh企起來 Tī 這塊土地 |
|
Siáⁿ-mi̍h sî-chūn Kha ê sò͘-bo̍k kap lâng ê sò͘-bo̍k Pí-lē tio̍h Siáⁿ-mi̍h sî-chūn Lâng-lâng lóng sī kha-siàu |
啥mi̍h時陣 腳 ê 數目kap人ê 數目 比例著 啥mi̍h時陣 人人攏是kha-siàu |
|
Hit-ê sî-chūn Chit-keng chhù ē khí--khí-lâi Hit-ê sî-chūn Chit-chiah chûn ē-tàng Sì-kè khì |
Hit個時陣 這間厝會起起來 Hit個時陣 這隻船會當 四界去 |
