Ke-chhia
|
街車--母語ê心靈雞湯 |
|---|---|
| Lí Khîn-hōaⁿ | 李勤岸 |
|
Ùi Kiàm-kiô ê khong-tiong khòaⁿ--lo̍h-lâi Goán ná-chhiūⁿ ka-lé ang-á Téng-koân khan nn̄g tiâu sòaⁿ Bān-bān-á giú kòe-lâi giú kòe-khì Tī sok-tō͘ chin kín ê to͘-chhī Chài sim-chêng khin-sang ê lâng-kheh |
Ùi 劍橋 ê上空看落來 阮那像傀儡尪仔 頂懸牽兩條線 慢慢仔giú 過來giú 過去 Tī 速度真緊ê 都市 載心情輕鬆ê 人客 |
|
Ùi tē-bīn khòaⁿ--kòe-khì Goán sī āu-piah ū nn̄g ki tn̂g-kha ê lāu ti-tu Goán tī Kiàm-kiô chhī-tiong-sim bīn-téng Khan móa ti-tu-si Goán thun-thò͘ kam-goān lo̍h-bāng ê hiān-tāi-lâng |
Ùi 地面看過去 阮是後壁有兩支長腳ê老蜘蛛 阮tī劍橋市中心面頂 牽滿蜘蛛絲 阮吞吐甘願落網ê 現代人 |
|
Jī-cha̍p-it sè-kí ê to͘-chhi-lâng Ta̍k-ji̍t tńg-khì cha̍p-káu sè-kí Hō͘ lāu ti-tu chài-lâi chài-khì Sî-khong sio-tha̍h ê ke-chhī |
二十一世紀ê 都市人 逐日轉去十九世紀 Hō͘老蜘蛛載來載去 時空相疊ê 街市 |
|
Ū hiông-hiông kông-kông ê kè-thêng-chhia Ū hiān-tāi-hòa sin-tiám-tiám ê kong-chhia Ū chhàng tī tho͘-kha sin-chhiú mé-lia̍h ê tē-hā-thi̍h Iû-goân pó-liû khah séng lêng-goân Kó͘-chá ēng tiān-sòaⁿ teh sái ê ke-chhia Kā Kiàm-kiô pó-liû chi̍t-sut-á Sin-sū hong-tō͘ |
有雄雄狂狂歹死死ê 計程車 有現代化新tiám-tiám ê 公車 有藏tī塗腳身手mé-lia̍h ê 地下鐵 猶原保留khah 省能源 古早用電線teh 駛ê 街車 Kā 劍橋保留一屑仔 紳士風度 |
|
Sui-jiân sî-khong ē chhò-loān Ti-tu-si ū-sî ē sio-phoa̍h Lí nā bô teh kóaⁿ Tán su-ki lo̍h-lâi ēng tek-ko pòe hō͘ khui Chiah koh chài lí ji̍p-lâi jī-cha̍p-it sè-kí Sin-iáⁿ sio-kheh ê to͘-chhī. |
雖然時空會錯亂 蜘蛛絲有時會相phoa̍h 你若無teh 趕 等司機落來用竹篙póe hō͘ 開 才koh 載你入來二十一世紀 身影相kheh ê 都市 |
