È ê Tī-liâu
|
翳ê治療--母語ê心靈雞湯 |
|---|---|
| Lí Khîn-hōaⁿ | 李勤岸 |
|
Siuⁿ-kòe kng-bêng Ē seⁿ-chhut si̍t-á Poe hiòng o͘-àm Chit-ê tō-lí bô chhim Chū sè-hàn bô lâng kā lán thiah-bêng |
Siuⁿ過光明 會生出翼仔 飛向烏暗 這個道理無深 自細漢無人kā咱拆明 |
|
Lán kan-na chai-iaⁿ Ji̍t-thâu sī thiⁿ ê ba̍k-chiu I kā lán khòaⁿ Lán chiah ē-tàng khòaⁿ-tio̍h se-kai M̄-chai i ê gán-kong Sī seⁿ si̍t-á ê goân-sò͘ |
咱kan-taⁿ知影 日頭是天ê目珠 伊kā咱看 咱才會當看著世界 M̄知伊ê眼光 是生翼仔ê元素 |
|
I khòaⁿ chhiū-bo̍k Chhiū-bo̍k seⁿ-chhut chi̍t hio̍h chi̍t hio̍h Chheⁿ-chhùi ê si̍t-á Siuⁿ kā khòaⁿ, si̍t-á lóng ē siūⁿ beh poe Kui-châng chhiū-á khiā tī hia hiòng thiⁿ Siūⁿ beh poe |
伊看樹木 樹木生出一葉一葉 青翠ê翼仔 Siuⁿ kā看，翼仔攏會beh飛 歸欉樹仔企tī hia 向天 Siūⁿ beh飛 |
|
Siūⁿ-kàu siong-sim ê chhiu-thiⁿ Sit-bōng ê si̍t-á Lak kah móa sì-kè Thiⁿ ê ba̍k-chiu kap lán ê ba̍k-chiu tùi-chiàu Lán ê ba̍k-chiu mā siūⁿ beh poe hiòng thiⁿ |
Siūⁿ-kàu 傷心ê秋天 失望ê翼仔 La̍k kah滿四界 天ê目珠kap 咱ê目珠對照 咱ê目珠mā siūⁿ beh 飛向天 |
|
Ùi pe̍h-jîn ê só͘-chāi Khai-sí seⁿ-chhut chi̍t hio̍h si̍t-á Nn̄g ê pe̍h-jîn nn̄g hio̍h si̍t-á Bān-bān poe hiòng o͘-jîn Kā o͘-sek ê ba̍k-chiu cha̍h--leh Chhin-chhiūⁿ tōa chiah phêng thián-khui si̍t Chài lán ji̍p-khì o͘-àm |
Ùi白仁ê所在 開始生出一葉翼仔 2個白仁2個翼仔 慢慢飛向烏仁 Kā烏色ê日頭cha̍h--leh 親像大隻鵬展開翼 載咱入去烏暗 |
|
Tī o͘-àm tiong poe-hêng M̄-thang kap thiⁿ ê ba̍k-chiu sio-chiàu M̄-thang hō͘ thiⁿ ê ba̍k-chiu khi̍p--khì M̄-thang siuⁿ-kòe kng-bêng |
Tī烏暗中飛行 M̄-thang kap天ê目珠相照 M̄-thang hō͘天ê目珠吸--去 M̄-thang siuⁿ過光明 |
|
Kā o͘-jîn ba̍k-kiàⁿ kòa--khì-lâi Hō͘ lán ê ba̍k-chiu sió-khóa chhiu-chhìn Hō͘ si̍t-á ê seng-tióng kek-sò͘ bô kàu Hō͘ i nn̄g ki si̍t-á bē pêng-hêng Hō͘ i khôe si̍t-á |
Kā烏仁目鏡掛--起來 Hō͘咱ê目珠小可chhiu-chhìn Hō͘ 翼仔ê生長激素無夠 Hō͘伊兩支翼仔bē 平衡 Hō͘伊khôe 翼仔 |
|
Nā mài poe hiòng thiⁿ ê ba̍k-chiu Lán ē-tàng pó-chhî kng-bêng Tō-lí bô chhim Taⁿ, góa í-keng kā lí thiah-bêng |
若mài飛向天ê目珠 咱會當保持光明 道理無深 今，我已經kā你拆明 |
