Chū-sat ê Tī-liâu
|
自殺 ê 治療--母語ê心靈雞湯 |
|---|---|
| Lí Khîn-hōaⁿ | 李勤岸 |
|
Sèⁿ-miā m̄-sī chi̍t tiâu soh-á Sèⁿ-miā sī chi̍t tiâu chúi Kā soh-á koah-tn̄g Put-koh sī siak lo̍h-khì chúi-chhiâng ē-kha Sèⁿ-miā kè-sio̍k lâu |
性命 m̄ 是一條索仔 性命是一條水 Kā 索仔割斷 不過是摔落去水chhiâng下腳 性命繼續流 |
|
Chit-ê tō-lí bô chhim Chū sè-hàn bô lâng kā lán thiah-bêng Lán lóng siūⁿ-kóng sèⁿ-miā sī soh-á Kā lán chhui chiah ân Ûi-su siá chheng-chhó Ēng siong-sim ê to It-to lióng-toān |
這個道理無深 自細漢無人kā 咱拆明 咱攏想講性命是索仔 Kā 我摧chiah ân 遺書寫清楚 用傷心 ê 刀 一刀兩斷 |
|
Siáⁿ-chai ûi-su bô-chhái teh siá Mûi-thé ê ke̍k-pún chá chiū thè lán pian hó Lán put-koh sī chū-sat-tiâu ê Chi̍t ê sió éng Lán ê sim-sū, mā-sī Chúi-kòe-bô-hûn |
啥知遺書無采 teh 寫 媒體 ê 劇本早就替咱編好 咱不過是自殺潮 ê 一個小湧 咱 ê 心事，mā是 水過無痕 |
|
Lán lóng siūⁿ-kóng sèⁿ-miā sī chi̍t tiâu chiáng-hûn Tan-tan to̍k-to̍k La̍k tī ka-kī chhiú-sim Chí-iàu koat-sim beh hō͘ tn̄g I chiū tn̄g |
咱攏想講性命是一條掌痕 單單獨獨 La̍k tī 家己手心 只要決心beh hō͘ 斷 伊就斷 |
|
Siáⁿ-chai sèⁿ-miā m̄-sī chiáng-hûn M̄-sī tī chhiú-sim Sèⁿ-miā goân-lâi sī ma-ma ê ba̍k-sái Sèⁿ-miā goân-lâi sī pa-pa ê sim-koaⁿ-hoeh Sèⁿ-miā goân-lâi sī chhin-lâng ê tn̄g-liû-súi Lóng sī óng-jiân |
啥知性命 m̄ 是掌痕 M̄是 tī 手心 性命原來是媽媽 ê 目屎 性命原來是爸爸 ê 心肝血 性命原來是親人 ê 長流水 攏是枉然 |
|
Chhin-lâng ê ba̍k-sái lúi-chek ê chúi Hō͘ lán chhiat-khui ê sèⁿ-miā Sûi koh chiap--khí-lâi Lán put-koh siak--lo̍h-khì In ba̍k-sái ê chúi-chhiâng ē-kha Kè-sio̍k lâu |
親人ê 目屎累積 ê 水 Hō͘ 咱切開 ê 性命 隨koh 接起來 咱不過摔落去 In 目屎 ê 水chhiâng 下腳 繼續流 |
|
Sèⁿ-miā sī chhiat bē tn̄g ê chi̍t tiâu chúi M̄-sī ka-kī chhiú-sim ê chiáng-hûn M̄-sī chhiat ē tn̄g ê soh-á Soh-á nā sī pa̍k siuⁿ ân Lán ài o̍h àn-chóaⁿ khì tháu |
性命是切bē 斷 ê 一條水 M̄是家己手心 ê 掌痕 M̄ 是切會斷ê 索仔 索仔若是縛siuⁿ ân 咱ài學án-chóaⁿ去tháu |
|
M̄-sī chhiat hō͘ tn̄g chún-tú-soah In-ūi chhiat bē tn̄g Sèⁿ-miā hit-tiâu chúi Sèⁿ-miā m̄-sī chi̍t-tiâu soh-á Sèⁿ-miā sī chi̍t tiâu chúi |
M̄是切hō͘ 斷chún-tú煞 因為切bē 斷 性命hit條水 性命m̄ 是一條索仔 性命是一條水 |
|
Tō-lí bô chhim Taⁿ, góa í-keng kā lí thiah-bêng |
道理無深 今，我已經 kā 你拆明 |
