Āu-soaⁿ Sòe-goa̍t
|
後山歲月--咱攏是罪人 |
|---|---|
| Lí Khîn-hōaⁿ | 李勤岸 |
|
－－Tang-pō͘-lâng ê sim-siaⁿ
|
----東部人ê 心聲 |
|
Āu-soaⁿ ē liâm--lâng Ta̍h-tio̍h āu-soaⁿ ê thó͘-tē Ē khì hō͘ i liâm-liâm--leh |
後山會黏人 踏著後山 ê 土地 會去 hō͘ 伊黏黏leh |
|
Āu-soaⁿ tn̂g-tn̂g ê le̍k-sek chhiòng-kok Koân-koân ê chheng-sek san-me̍h Lóng-sī liâm-thô͘ liâm thi-thi Lóng-sī môa-chî liâm thi-thi Hāi lán kóng-ōe kô-kô tîⁿ |
後山長長 ê 綠色縱谷 高高ê青色山脈 攏是黏土黏thi-thi 攏是麻糬黏thi-thi 害咱講話kô-kô纏 |
|
Chi̍t kha tī chhù n̍i̍h Chāi-tē ê khoán-sit Chit kha seⁿ si̍t-á Hioh tī thêng-ki-pêⁿ Lóng-sī Hoa-liân-chî liâm thi-thi Hāi lín kóng-ōe chhùi chiah tiⁿ |
一腳tī 厝裡 在地ê 款式 一腳生翼仔 歇 tī 停機棚 攏是花蓮薯黏thi-thi 害lín講話嘴chiah 甜 |
|
Khong-khì chin chheng-khì In-ūi jîn-kháu sa-bi-sí Kéng-tì chiâⁿ ū kó͘-chá-bī Lāu-chhù khang lo-lo Lāu-lâng tang-hio̍h teh khîⁿ-ki |
空氣真清氣 因為人口 sa-bi-sí 景緻誠有古早味 老厝空lo-lo 老人冬葉 teh khîⁿ枝 |
|
Lóng-sī tāi-lí-chio̍h liâm thi-thi Hāi goán sim-chêng léng ki-ki Lóng-sī mûi-kùi-chio̍h liâm thi-thi Hāi goán ba̍k-chiu Li̍p-bū-khe kháu ōe san-súi Lóng-sī Tâi-oân-ge̍k liâm thi-thi Hāi goán Bo̍k-koe-khe piⁿ siūⁿ bē khui Kiông beh tòe chhoah-lâu chhut hái khì |
攏是大理石黏thi-thi 害阮心情冷ki-ki 攏是玫瑰石黏thi-thi 害阮目珠立霧溪口畫山水 攏是台灣玉黏thi-thi 害阮木瓜溪邊想bē開 強beh tòe chhoah流出海去 |
|
Āu-soaⁿ liâm thi-thi Hō͘-chúi chha̍p-chha̍p ti̍h Āu-soaⁿ chin hi-bî Āu-soaⁿ sin-pū-á Súi bóng súi, m̄-koh Bô lâng ti̍hN8 ah Bô, lâng, ti̍hN8 |
後山黏thi-thi 雨水chha̍p-chha̍p滴 後山真稀微 後山新婦仔 Súi罔súi,m̄-koh 無人ti̍hN8 ah 無，人，ti̍hN8 |
