Bó-gí tōa-pó͘-oân
|
母語大補丸 |
| Koeh Bûn-kheng |
郭文卿 |
|
A: Lâi, lâi, lâi, khòaⁿ, khòaⁿ, khòaⁿ, kín-lâi kín-khòaⁿ, bān-lâi kiám khòaⁿ chi̍t-pòaⁿ, ū bé to-siā, bô bé kám-siā, ū kah-ì--ê hoah siaⁿ, bô kah-ì--ê piⁿ-á khiā. Kin-á-ji̍t lâi kàu kùi pó-tē, seng-lâi siāu-kài goán sió-bē, i miâ kiò Î-kun, seng súi kó͘-chui ū lâng-iân, chhin-chhiat tāi-hong bô lâng hiâm, kin-nî 20 hòe, iah bô siūⁿ beh chhut-kè, sió-bē--ah, kín-lâi kā lán ê hiong-chhin mn̄g-an, say Hello !
|
A:來來來！看看看！緊來緊看，慢來減看一半。有買多謝，無買感謝。有合意--ê喝聲，無合意--ê邊仔企。今仔日來到貴寶地，先來紹介阮小妹，伊名叫怡君，生súi古錐有人緣，親切大方無人嫌，今年20歲，iáu無想beh出嫁。小妹--ah，緊來kā咱ê鄉親問安，say Hello! |
|
B: Tāi-ke hó, góa sī Î-kun, chit-ê só͘-chāi hó kì koh hó chhōe, lâng-kheh móa-móa chiah-n̍i̍h chē, ǹg-bāng tōa-ko, tōa-ché, sió-tī, sió-bē, mài hiâm góa pháiⁿ sèng-tē, tāi-ke í-á giâ lâi chē, lán chò-tīn lâi tâm-thiⁿ koh soat-tē.
|
B：大家好，我是怡君，這個所在好記koh好chhōe,人客滿滿chiah-n̍i̍h濟，向望大哥、大姐、小弟、小妹，mài嫌我歹性地，大家椅仔giâ來坐，咱做陣來談天koh說地。 |
|
A: Kóng liáu ū kàu hó ū kàu chán, chiok-hok tāi-ke ū châi-sán, goán lâi chia m̄-sī beh phah kûn-thâu bē kô͘-io̍h, mā m̄-sī beh lâi thui-siau “Bân-niô”, koh khah m̄-sī beh kiò ta̍k-ke thǹg “khò͘” cháu chi̍t-ē! Kóng kàu chia, ta̍k-ke it-tēng kám-kak chin kî-koài chit-ê lâng sîn-keng tōa sè tiâu, sio-to͘h sio-to͘h tòng bōe-tiâu, phah sí-kiat koh o͘-pe̍h chhiâu. M̄-sī, m̄-sī, lín lóng kā góa gō͘-hōe lah! He sī kin-á-ji̍t chhut-mn̂g ê sî-chūn, goán sai-hū ū kau-thāi, i bat lâi kùi pó-tē, kóng lán chia ê pêng-iú sī kài khó-ài. Si̍t-chāi ū kàu khiáu, m̄-tiāⁿ ōe hiáu iōng tiān-náu siá Chhun-liân, mā ōe iōng chhit-jī-á liām sì-kù-liân, koh ōe thiàu “ún-lúi-chhau”, liān “î-chia” kiam bē “mái tang-lâu”, si̍t-chāi ū kàu gâu, kiò goán chin-sim kah lín poah kám-chêng, nā bô, chia̍h khui chāi gán-chêng. Î-kun, lí lâi kā hiong-chhin soat-bêng chi̍t--ê, sī án-cháiⁿ ōe chia̍h khui chāi gán-chêng neh ! ?
|
A:講了有夠好有夠chán,祝福大家有財產。阮來chia m̄是beh扑拳頭賣糊藥，mā m̄是beh來推銷【蠻牛】 ，koh較m̄是beh叫逐家褪「褲」走--一下！講到chia,逐家一定感覺真奇怪這個人神經大細條，sio-to͘h sio-to͘h擋bōe-tiâu,扑死結koh烏白chhiâu。M̄是，m̄是，lín攏kā我誤會--lah！He是今仔日出門ê時陣，阮師父有交待，伊bat來貴寶地，講咱chia ê朋友是kài可愛。實在有夠巧，m̄-tiāⁿ會曉用電腦寫春聯，mā會用七字仔念四句聯，koh會跳【韻律操】，練【瑜珈】兼賣【麥當勞】，實在有夠gâu. 叫阮真心kah lín poah感情，若無，食虧在眼前。怡君，你來kā鄉親說明--一下，是án-cháiⁿ會食虧在眼前neh！？ |
|
B: Sī-ti̍h! Lâng kóng m̄-bat hòe chhiáⁿ lâng khòaⁿ, m̄-bat lâng sí chi̍t pòaⁿ, giâ-thâu chhìn-chhái khòaⁿ, mā chai chia ê lâng bōe sí chòaⁿ, hong-súi hó, óa soaⁿ-phiâⁿ, bōe tōa kôaⁿ, āu-tāi kiáⁿ-sun it-tēng hó seⁿ thòaⁿ.
|
B：是--ti̍h！人講m̄-bat貨請人看，m̄-bat人死一半。Giâ頭chhìn-chhái看，mā知chia ê人bōe死chòaⁿ。風水好，倚山坪，bōe大寒，後代子孫一定好生湠。 |
|
A: Lâng kóng, ‘thiaⁿ bó͘ chhùi tōa hù-kùi’, nā thiaⁿ goán sió-bē ê chhùi, pó-chèng hō͘ lí hó chhoán-khùi. Goán sai-hū ū kau-thāi chi̍t-ê būn-tê, kiò goán lâi chhéng-kàu lín ta̍k-ke, sûi-jiân góa sī chi̍t-ê han-bān pn̄g-tháng koh siáu siūⁿ beh chò chóng-thóng ê kò͘-ì lâng, m̄-kú sai-hū kau-thāi ê būn-tê, mā m̄ káⁿ lâi pàng bōe--kì-tit. Kóng kui-po͘ kóng kah chhùi-kak choân pho, kóng kah o͘-jîn tńg pe̍h-jîn, chhèng-chí khòaⁿ chò sī thô͘-tāu-jîn, tàu-té goán sai-hū sī kau-thāi sím-mi̍h būn-tê neh? Nā kóng tio̍h chit-ê būn-tê, chin-chiàⁿ sī ū kè-ta̍t, koh m̄-bián lín chhut-la̍t, chí-iàu hó-hó kì, tùi lín ê bī-lâi choa̍t-tùi sī chi̍t-chióng hok-khì. (B: Hok-khì lah!)
|
A:人講，聽某嘴大富貴，若聽阮小妹ê嘴，保證hō͘你好喘氣。阮師父有交待一個問題，叫阮來請教lín逐家。雖然我是一個han-bān飯桶koh痟想beh做總統ê古意人，m̄-kú師父交待ê問題，mā m̄ 敢來放bōe--記-tit。講歸晡講kah嘴角全波，講kah烏仁轉白仁，銃子看做是塗豆仁，到底阮師父是交待甚mi̍h問題neh？若講著這個問題，真正是有價值，koh m̄免lín出力，只要好好記，對lín ê未來絕對是一種福氣。（B：福氣lah！） |
|
Goán sai-hū kóng, Kok-ūi pêng-iú ah! lín kóng Tâi-gí káⁿ ē thong? bōe thong bô iàu-kín, lâi chia̍h chit-koàn “Bó-gí tōa-pó͘-oân”, choa̍t-tùi koh khah ài lán Tâi-oân. Chit-koàn chheⁿ-mê--ê chia̍h--lo̍h-khì, má-siōng “Kng--khì” (B: “Kng--khì” ) páiⁿ-kha--ê chia̍h--lo̍h-khì, má-siōng “Kiâⁿ--khì” (B: “Kiâⁿ--khì”) , ún-ku--ê chia̍h--lo̍h-khì, má-siōng “Ti̍t--khì” (B: “Ti̍t--khì”) , chia̍h liáu hō͘ lí cheng-khì-sîn cha̍p-chiok, o̍h Tâi-gí ū khùi-la̍t ōe pá-chiok, bô chia̍h m̄ chai, sûi chia̍h sûi chai, chia̍h kú choa̍t-tùi bōe pi-ai, bián hoân-ló ōe piàn chò gōng tōa tai. Î-kun, lí lâi kā hiong-chhin soat-bêng chi̍t--ê, sī án-cháiⁿ bōe piàn chò gōng tōa tai neh?
|
阮師父講：各位朋友--ah！Lín講台語káⁿ會通？Bōe通無要緊，來食這罐「母語大補丸」，絕對koh較愛咱台灣。這罐青瞑--ê食--落-去，馬上「扛--去」（B：「扛--去」）；跛腳--ê食--落-去，馬上「行--去」（B：「行--去」）；隱痀--ê食--落-去，馬上「直--去」（B：「直--去」）。食了hō͘你精氣神十足，學台語有氣力會飽足，無食m̄知，隨食隨知，食久絕對bōe悲哀，免煩惱會變做憨大呆。怡君，你來kā鄉親說明--一下，是án-cháiⁿ bōe變做憨大呆neh？ |
|
B: Sī-ti̍h! lâng kóng chheng-chúi bô lâu ōe seⁿ thai, io̍h-hng chia̍h kú ōe chhut-sai, thâu-khak chheng-chhéⁿ hun tang sai, thàn chîⁿ chiū bōe o͘-pe̍h khai, pa̍t-lâng chiū bōe kā lí tòng chò gōng tōa tai lah!
|
B：是--ti̍h！人講清水無流會生苔，藥方食久會出師，頭殼清醒分東西，趁錢就bōe烏白開，別人就bōe kā你當做憨大呆--lah！ |
|
A: Kóng liáu ū kàu hó, lâng kóng chia̍h chúi kài m̄ hó, kóng tio̍h hun hóe tio̍h to̍h, kóng tio̍h kiáu lâng tio̍h khì, kóng tio̍h pin-N̂g lâng tio̍h phùi. Lán nā kóng Tâi-gí,Tē-it hó (B:Tē-it hó) a-má koai-sun kóng-ōe bô hoân-ló, thong lâng lóng o-ló. (B:Tē-jī hó) , Tâi-oân sī pó-tó, bó-gí bōe sài tó. (B:Tē-saⁿ hó ) , thâu-khak ōe chheng-chhó, chò-koaⁿ m̄ kiaⁿ khó. (B:Tē-sì hó) , kiâⁿ lō͘ bōe poa̍t tó, khiàm chîⁿ lâng bōe thó. (B:Tē-gō͘ hó) , sin-kè chhin-chhiūⁿ pó, chia̍h thâu-lō͘ sin-súi ōe khah hó. jīn-chin phah-piàⁿ, hō͘ lán ê pē-bú ōe chhin-chhiūⁿ bi̍t kiáu thn̂g, éng-oán kú-kú tn̂g-tn̂g, nā bô, bó-gí nā sit-siaⁿ, lán tio̍h chún-pī lâi siu-kiaⁿ. Î-kun, lí lâi kóng chi̍t--ê, án-cháiⁿ chiah ōe bián siu-kiaⁿ neh!
|
A:講了有夠好，人講食酒kài m̄好；講著薰火著著；講著kiáu人著去；講著檳榔人著phùi。咱若講台語，第一好（B：第一好）阿媽乖孫講話無煩惱，通人攏o-ló。第二好（B：第二好），台灣是寶島，母語bōe使倒。第三好（B：第三好），頭殼會清楚，做官m̄驚考。第四好（B：第四好），行路bōe跋倒，欠錢人bōe討。第五好（B：第五好），身價親像寶，食頭路薪水會較好。認真扑拚，hō͘咱ê父母會親像蜜攪糖，永遠久久長長；若無，母語若失聲，咱著準備來收驚。怡君，你來講--一下，án-cháiⁿ 才會免收驚neh！ |
|
B: Sī-ti̍h! Lâng kóng lâng nā ōng, mô͘-sîn-á m̄-káⁿ lâi choh-lōng, lí ê jîn-seng chiū bōe gōng-gōng-gōng, bó-gí ê tē-ki nā phah hō͘ chāi, chiū m̄-kiaⁿ thóng-phài mûi-thé pàng jiō piàn chúi-chai, iat hong chò hong-thai.
|
B：是--ti̍h！人講人若旺，魔神仔m̄敢來作弄，你ê人生就bōe憨憨憨；母語ê地基若扑hō͘在，就m̄驚統派媒體放尿變水災，iat風做風颱。 |
|
A: Chin-chiàⁿ ū-iáⁿ neh! Ū kóa lâng hó-lō͘ m̄-kiâⁿ kiâⁿ oan-niá, hó-kiáⁿ m̄-chò chò pháiⁿ-kiáⁿ, sim-thâu lia̍h hō͘ tiāⁿ, m̄-kiaⁿ Giâm-ông lâi thó-miā. It poan kóng kàu chia, lóng ài chi̍t kóa phok-á siaⁿ, kó͘-lē góa kóng chiah kú koh bōe chhùi-ta, lín m̄-thang khòaⁿ chit-koàn sè kā koàn-á, ná chhin-chhiūⁿ bô sím-mi̍h, lâng goán chit-koàn chin-chiàⁿ sī téng-káng ū miâ-siaⁿ, ē-káng chia̍h bōe kiaⁿ, ti-miâ-tō͘ thàng Tang-kiaⁿ, bat hòe ê lâng lóng mā gia̍h kui siuⁿ, kia̍h tńg-khì, phòe kún-chúi, chiàu saⁿ-tǹg thui, ài ōe kì-tit, chia̍h pá saⁿ-lia̍p, m̄ sī chia̍h pah saⁿ lia̍p ô͘.
|
A:真正有影--neh！有寡人好路m̄行行彎嶺，好子m̄做做歹子，心頭掠hō͘定，m̄驚閻王來討命。一般講到chia,攏ài一寡phok仔聲，鼓勵我講chiah久koh bōe嘴礁。Lín m̄-thang看這罐細kā罐仔，那親像無甚mi̍h。人阮這罐真正是頂港有名聲，下港食bōe驚，知名度thàng東京。Bat貨ê人攏mā kia̍h歸箱，kia̍h轉去，配滾水，照三頓thui,ài會記得，食飽三粒，m̄是食百三粒ô͘。 |
|
B: Nā chia̍h bô kàu, phòe Koai-koai kap thô͘-tāu, hāu-kó mā sī it-lia̍p-it, choa̍t-tùi pó-chèng hó phín-chit.
|
B：若食無夠，配乖乖kap塗豆，效果mā是一粒一，絕對保證好品質。 |
|
A: Lí nā hiâm bô bī, iā thèng hó tūn hî tūn bah, tūn hún-chiáu khǹg pan-kah, chāi lí kéng, chāi lí ka, án-cháiⁿ phòe lóng hó chia̍h, ta̍k-ke bé tńg khì chhì-chia̍h, sī seng hō͘ lín chhì kiâm-chiáⁿ, m̄-sī beh chhī bó͘-kiáⁿ. Nā bô-iáⁿ, góa ê taⁿ-á hō͘ lín thiah, góa khiā tiàm chia hō͘ lín phah, choa̍t-tùi bô cháu-siám, kóng chia kú, chit-koàn tàu-té ài gōa chē, káⁿ tio̍h ài chi̍t-chheng (B: chi̍t-chheng?) m̄-bián, káⁿ tio̍h ài gō͘-pah (B:gō͘-pah? ) m̄-bián, chi̍t-koàn sǹg lín jī-á-gō͘ (B:jī-á-gō͘), N̄g-koàn sì-pah-gō͘ (B:sì-pah-gō͘) , bé kui siuⁿ phah gō͘ chiat, chi̍t-siuⁿ jī sì koàn, sêng-pún kè N̄g-chheng gō͘ bōe hō͘ lín (B:N̄g-chheng gō͘) , bé ū tio̍h sio̍k ū tio̍h, bé bô tio̍h sàng pó͘-io̍h. Î-kun, lí lâi kóng chi̍t--ê, beh án-cháiⁿ lâi chiàu-kò͘ sin-thé neh?
|
A:你若嫌無味，也thèng好燉魚燉肉，燉粉鳥囥斑鳩，在你揀，在你加，án-cháiⁿ配攏好食。逐家買轉去試食，是先hō͘ lín試鹹汫，m̄是beh飼某子。若無影，我ê擔仔hō͘ lín拆，我企tiàm chia hō͘ lín扑，絕對無走閃。講chiah久，這罐到底ài外濟，káⁿ著ài一千（B：一千）？M̄免，káⁿ著ài五百（B：五百）？M̄免，一罐算lín二仔五（B：二仔五），兩罐四百五（B：四百五），買歸箱扑五折，一箱二四罐，成本價兩千五賣hō͘ lín(B：兩千五），買有著俗有著，買無著送補藥。怡君，你來講--一下，beh án-cháiⁿ來照顧身體neh？ |
|
B: Kóng tio̍h beh chia̍h pó͘, m̄-thang tòng chò beh chia̍h khó͘, lâng kóng chia̍h pá kiâⁿ pah pō͘, khah iâⁿ khui io̍h-pò͘, pó͘-io̍h m̄-thang o͘-pe̍h chia̍h, chia̍h kú ōe piàn khit-chia̍h. chí-iàu sin-thé kò͘ hō͘ hó, chiū bián chia̍h Ài-hok-hó, seng-oa̍h chiàu khí kang, chiū bián iōng “oe-ô-kang”.
|
B：講著beh食補，m̄-thang當做beh食苦。人講食飽行百步，較贏開藥舖；補藥m̄-thang烏白食，食久會變乞食。只要身體顧hō͘好，就免食愛福好；生活照起工，就免用【威而剛】。 |
|
A: Bô-chhò, kui-châng hó-hó, lâng nā mài chia̍h tāng-kiâm, chiū bô lâng ōe khì-hiâm. Lâng kóng ū sio-hiuⁿ ū pó-pì, ū chia̍h io̍h ū kiâⁿ-khì, lán chit-chūn chhōe kúi ê lâng-kheh lâi chò kiàn-chèng. Thâu chi̍t-ê sī Tâi-oân-chi-hū Lí Teng-hui, chia̍h to̍h lán ê tōa-pó͘-oân, chin-chiàⁿ ū sī-hui, châi-ko pat-táu choân hoat-hui, chám-tn̄g gōa-lâi chèng-koân sim hoe khui, ūi-tio̍h Tâi-oân chiàⁿ-miâ it-ti̍t tui, chè-tēng hiàn-hoat sì-kè chhui, tùi-hù Tiong-kok m̄ chia̍h khui, chia̍h ná lāu ná kó͘-chui.
|
A:無錯！歸欉好好。人若mài食重鹹，就無人會棄嫌。人講有燒香有保庇，有食藥有行氣。咱這陣chhōe幾個人客來做見證。頭一個是台灣之父李登輝，食著咱ê大補丸，真正有是非，才高八斗全發揮，斬斷外來政權心花開，為著台灣正名一直追，制定憲法四界催，對付中國m̄食虧，食那老那古錐。 |
|
B: Kóng tio̍h a-hui-peh-á , thâu-mo͘ chhùi-chhiu pe̍h, chò lâng chò sū chheng-chheng pe̍h-pe̍h, bô-miâ bô-lī bōe oàn-chhoeh, chhiú kia̍h báng-su̍t-á sàu chèng-kheh, kha chhēng thi̍h-ê that àu-kheh, chám iau tû mô͘ siám chai-eh, Tâi-oân nā sī bô kok-keh, ba̍k-chiu m̄-goān kheh.
|
B：講著阿輝伯仔，頭毛嘴鬚白，做人做事清清白白，無名無利bōe怨chhoeh，手kia̍h蚊su̍t仔掃政客，腳穿鐵鞋踢懊客，斬妖除魔閃災厄，台灣若是無國格，目珠m̄願kheh。 |
|
A: Koh lâi kóng góa hit N̄g ê hó pêng-iú, tōa-thâu liân-á kap sòng-phàn--ê pêng-siông sî chia̍h bô-kàu, soán-kí o͘-pe̍h tàu, ta̍k-kang tiàm hiah chú, thiú, în, báu, ba̍k-sat ka-cháu, ji̍t--sî pha liàn-táu, mê--sî má-má háu, kóng lâi cha̍p-jī kim-kong-tóng mā bô té cháu, chheⁿ-mê--ê koh siuⁿ khoa-kháu, sàng chò-tui, pháiⁿ siaⁿ sàu, tó pún-sò koh m̄-goān sàu, ah! sēng-ti kia̍h chàu, sēng-kiáⁿ put-hàu, bô sí iā o͘-àu. Lâng nā bô chiàu thian-lí, thiⁿ chiū bô chiàu kah-chí, chū chok-gia̍t put khó oa̍h, chin-chiàⁿ sī saⁿ hó ke chi̍t hó, sí, hó lah!
|
A:Koh來講我hit兩個好朋友，大頭連仔kap宋盼--ê平常時食無夠，選舉烏白鬥，逐工tiàm hiah子、丑、寅、卯，目蝨蟉蚤，日--時拋liàn斗，暝--時má-má哮。講--來十二金光黨mā無底走，青瞑--ê koh siuⁿ誇口，送做堆，歹聲嗽，倒糞圾 koh m̄願掃。Ah！寵豬kia̍h灶，寵子不孝，無死也烏áu。人若無照天理，天就無照甲子；自作孽不可活，真正是三好加一好……死，好--lah！ |
|
B: Kóng kah chit N̄g-ê, chhiúⁿ tōa-ūi ài sio chiⁿ, chia̍h sio chia̍h léng chhá chhù-piⁿ, tōa-siaⁿ sè-siaⁿ gâu sio phiⁿ, siáu siūⁿ chi̍t-ji̍t chhut-thâu-thiⁿ, bô-gî o͘-ûn tà thiⁿ-chhiⁿ, ah! lóng sī chit N̄g-ê, Tâi-oân beh hô-hâi tio̍h ài têng-thâu-siⁿ.
|
B：講kah這兩個，搶大位愛相爭，食燒食冷吵厝邊，大聲細聲gâu相偏，數想一日出頭天，無疑烏雲罩天星。Ah！攏是這兩個，台灣beh和諧著ài重頭生。 |
|
A: Tâi-oân nā têng-thâu-siⁿ, sè-kài tio̍h chhiⁿ-chhiⁿ-chhiⁿ, kóng tio̍h Chhòa Sái-goân, ba̍k-chiu kheh-kheh kóng pe̍h-chha̍t, m̄-tiāⁿ m̄-chia̍h lán ê tōa-pó͘-oân, koh káⁿ sim-koaⁿ lia̍h tháⁿ-hoâiⁿ, khòaⁿ soe lán Tâi-oân. óng-hùi i sī chiàⁿ-káng ê han-chî kiáⁿ, chia̍h Tâi-oân bí lim Tâi-oân chúi tōa-hàn--ê, ūi-tio̍h lī-ek, sím-mi̍h kong-pêng chèng-gī khǹg chi̍t-piⁿ, kui sin-khu sí liáu-liáu, kan-taⁿ chhun chi̍t-ki chhùi, kóng tio̍h siáu-ōe káu hun chùi, thiaⁿ tio̍h hong-siaⁿ o͘-pe̍h phùi, oai-lí chi̍t-tui tiāⁿ lāu-khùi, sí ah ngē chhùi-poe, kah-ì kap choân-bîn lâi chò-tùi. Khòaⁿ tio̍h i chiū siūⁿ khí o͘-pe̍h lông-kun ê hêng-iáⁿ, chin-chiàⁿ sī pàng-phùi kiam chhòa-sái, ha-hì lâi ba̍k-sái, ok-lâng chhut-sì lâi chò-pháiⁿ.
|
A:台灣若重頭生，世界著青青青。講著蔡屎元，目珠kheh-kheh講白賊，m̄-tiāⁿ m̄食咱ê大補丸，koh 敢心肝掠坦橫，看衰咱台灣。枉費伊是正港ê蕃薯子，食台灣米、lim台灣水大漢--ê。為著利益，甚mi̍h公平正義囥一邊，歸身軀死了了，kan-taⁿ chhun一支嘴。講著瘋話九分醉，聽著風聲烏白呸，歪理一堆定漏氣，死鴨硬嘴poe,合意kap全民來作對。看著伊就想起烏白郎君ê形影，真正是放屁兼chhòa屎，哈肺流目屎，惡人出世來做歹。 |
|
B: Kok-lâng chō-gia̍p kok-lâng taⁿ, thé-keh bái koh m̄ chhēng saⁿ, chò-ok chò-pháiⁿ kiam chhòa-sái, sim-koaⁿ lông-to̍k hāi āu-tāi, hôe-thâu sī hōaⁿ kín hóe-kái, A-mi̍h tô-hu̍t chhì khòaⁿ māi.
|
B：各人造業各人擔，體格bái koh m̄穿衫，作惡做歹兼chhòa屎，心肝狼毒害後代，回頭是岸緊悔改，阿彌陀佛試看māi。 |
|
A: M̄-thang chhùi teh liām-keng, chhiú teh bong-ni, hóe-kái ài ū sêng-sim neh! Sòa--lo̍h-lâi Tâi-oân-chi-chú Tân Chúi-píⁿ, i chit-thiap pó͘-io̍h sûi-sî chah tī sin-khu-piⁿ, chia̍h khó͘ tòng-chò chia̍h pó͘, chhin-chhiūⁿ teh chia̍h kiâm-sng-tiⁿ, bô-mê bô-ji̍t pó͘ kàu saⁿ-kiⁿ, bo̍h-koài chit-má chhut-thâu-thiⁿ. siong-sìn Tâi-oân kian-chhî kái-kek, té-tòng gōa-kháu bô-chêng ê kong-kek, tòng chhèng-chí chò kong-tek, chhèng siong liáu āu, sûi chia̍h lán ê tōa-pó͘-oân, liâm-piⁿ thong hoeh-lō͘ pâi to̍k-khì, chiah ōe pêng-an bô tāi-chì. Lâng kóng bô-oan bô-oat, kiáⁿ-sun bōe chhut-thoat, liân chhèng-chí tú tio̍h chin-miā thian-chú, mā ài tńg-oat, khó͘ kiàn Tâi-oân bô sím-mi̍h tāi-chì bōe kái-koat. Ū lán tōa-pó͘-oân ê chi-oân, a-píⁿ-á chiah káⁿ tōa-siaⁿ hoah chhut Tiong-kok Tâi-oân, bô kāng chèng-koân, mā in-ūi lán tōa-pó͘-oân ê phi̍h-kok, chiah ióng-káⁿ kóng chhut Tâi-oân Tiong-kok, chi̍t-pêng chi̍t-kok.
|
A:M̄-thang嘴teh唸經，手teh摸乳，悔改ài有誠心neh！續--落-來台灣之子陳水扁，伊這帖補藥隨時chah tī身軀邊，食苦當做食補，親像teh食鹹酸甜，無暝無日補到三更，莫怪chit-má出頭天。相信台灣堅持改革，抵擋外口無情ê攻擊，擋銃子做功德，銃傷了後，隨食咱ê大補丸，liâm-piⁿ通血路排毒氣，才會平安無代誌。人講無彎無越，子孫bōe出脫，連銃子tú著真命天主，mā ài轉越，可見台灣無甚mi̍h代誌bōe解決。有咱大補丸ê支援，阿扁仔才敢大聲喝出「中國台灣，無共政權」。Mā因為咱大補丸ê phi̍h-kok，才勇敢講出「台灣中國，一爿一國」。 |
|
B: Hó-ka-chài, thiⁿ-kong thiàⁿ gōng-lâng, pó-pì Tâi-oân chhut chin-chú, Tân--ka chhut hàu-chú, hō͘ lán hiáng-siū chū-iû kap bîn-chú, hō͘ i kè-siok chē-tīn chóng-thóng-hú, Tâi-oân bān-sòe kú-kú-kú.
|
B：好佳哉，天公疼憨人，保庇台灣出真主，陳--家出孝子，hō͘咱享受自由kap民主，hō͘伊繼續坐tīn總統府，台灣萬歲久久久。 |
|
A: Si̍t-chāi bô m̄-tio̍h, chāi-iá piàⁿ-miā teh liân-ha̍p, khó-sioh thian-tē bōe phòe-ha̍p, sî iah, ūn iah, miā iah, hui ngó͘ chi put-lêng iah, thiⁿ-kong ū ba̍k-chiu m̄-kiaⁿ tō͘-kún-á kè hô͘-liu. Lâng kóng chia̍h tio̍h io̍h, chheⁿ-chháu chi̍t-hio̍h, chia̍h m̄-tio̍h io̍h, jîn-sim chi̍t chio̍h. Lán chit-koàn tōa-pó͘-oân, pó͘ kut-chhóe kò͘ sin-thé, sūn-sòa kò͘ ke-hóe, chu-ióng ba̍k-chiu bōe ha-chhiù, kha-chhiú ióng-kiāⁿ m̄-kiaⁿ chhèng, chheng-koaⁿ lūn-âu bōe giám-thâu, phôe-hu iù-Ńg lâng iân-tâu, kiān-ūi pó͘ sim kò͘ pak-tn̂g, chhùi-chi̍h8 kam-tiⁿ bián chia̍h thn̂g, hō͘ lín khang-khòe ū-la̍t piàⁿ chá-chhī, chhù-lāi tōa-sè hó io-chhī, lāu-lâng chia̍h liáu oa̍h pah-jī, gín-á chia̍h liáu bōe lâu-phīⁿ, siáu-liân--ê chia̍h liáu bōe phòa-pīⁿ, pó-chèng chia̍h liáu bōe hā-siau bōe hâu-siâu, chin-chiàⁿ sī chia̍h ōe tio̍h, khah iâⁿ káu-táu ōaⁿ chi̍t-chio̍h.
|
A:實在無m̄著，在野拚命teh聯合，可惜天地bōe配合。時也，運也，命也，非吾之不能也，天公有目珠m̄驚肚蚓仔假鰗鰡。人講「食著藥，青草一葉，食m̄著藥，人參一石。」咱這罐大補丸，補骨髓顧身體，順續顧家伙；滋養目珠bōe哈chhiù,腳手勇健m̄驚銃，清肝潤喉bōe giám頭，皮膚幼軟人緣投，健胃補心顧腹腸，嘴舌甘甜免食糖。Hō͘ lín工課有力拚早市，厝內大細好io飼，老人食了活百二，囡仔食了bōe流鼻，少年--ê食了bōe破病；保證食了bōe下消bōe hâu-siâu,真正是食會著，較贏九斗換一石。 |
|
B: Sím-mi̍h! Káu-hūn-á chhut soān-chio̍h, góa taⁿ Tāi-kah chhut chháu-chhioh neh? Chhin-ài ê sī-tōa, lán nā sin-khó͘ pīⁿ-thiàⁿ m̄-thang khioh, tú-tio̍h lāu-lâng gín-á ài thiàⁿ-sioh, bô chîⁿ lâi chhōe góa chioh, bián taⁿ-pó bián lī-sek.
|
B：甚mi̍h！九份仔出鏇石，我taⁿ大甲出草蓆neh？親愛ê序大，咱若辛苦病痛m̄-thang拾，tú著老人囡仔ài疼惜，無錢來chhōe我借，免擔保免利息。 |
|
A: Nah ū chiah-n̍i̍h hó-khang, m̄-bián saⁿ-kang, lán tau tio̍h-ài thiah mn̂g-thang. Bô iàu-kín, kin-á-ji̍t beh lâi kap kok-ūi pêng-iú saⁿ-kau-pôe, bé móa 500 kho͘ sàng lí nn̄g-lia̍p ke-kui-á, tńg-khì phiàn gín-á-pó͘; chhiau-kòe 1000 kho͘, koh sàng lí chin-chu, poa̍h-liān, the̍h tńg-khì sàng súi-bó͘. Lí chi̍t-ê lâng bé, goán kui-ke kā lín kò͘ kah hó-sè liu-liu. M̄-koán lí sī m̄-sī hó-gia̍h-sàn, hiān-bé hiān-thàn, bô bé ē oàn-thàn. Kín lâi ô͘! Kín lâi bé siōng kài chán siōng kài hó ê bú-gí tōa-pó͘-oân, hō͘ lí kò͘ kin-goân, soán-tiâu li̍p-hoat úi-oân, kiáⁿ-sun it-ti̍t thoân, lâng-lâng tio̍h chōng-goân; chia̍h kiān-khong koh bōe tiòng-hong, keng-êng sū-gia̍p bān-sū-thong, pó-chèng tōa sêng-kong. （B: Keng-êng sū-gia̍p bān-sū-thong, pó-chèng tōa sêng-kong.）
|
A:哪有chiah-n̍i̍h好空，m̄免三工，咱兜著ài拆門窗。無要緊，今仔日beh來kap各位朋友相交陪，買滿500箍送你兩粒雞kui仔，轉去騙囡仔脯；超過1000箍，koh送你珍珠、poah鍊，提轉去送súi某。你一個人買，阮歸家kā lín顧kah好勢溜溜。M̄管你是m̄是好額散，現買現趁，無買會怨嘆。緊來ô͘!緊來買上kài chán上kài 好ê母語大補丸，hō͘你顧根源，選著立法委員，子孫一直傳，人人中狀元；食健康koh bōe中風，經營事業萬事通，保證大成功。（B：經營事業萬事通，保證大成功。） |
|
B: Chòe-āu chi̍t-tiám ài kā hiong-chhin sī-tōa the̍h-chhéⁿ--ê, chiū sī chò-lâng ài ti-chiok, chhin-chiâⁿ pêng-iú tiāⁿ chiap-chhiok, seng-oa̍h m̄-bián siū giâm-siok, sam-put gō͘-sî phah môa-chhiok, jîn-seng hái-hái kài sim-sek, nā-bô, chia̍h kàu lāu khok-khok, thâu-khak ōe sio-tò͘ sio-tò͘. Tiàm chia mā chiok-hok ta̍k-ke pêng-an khoài-lo̍k tōa hù-kùi, thiⁿ-kong chiàu sù-kùi, a-píⁿ-á hō͘ lán bān-gō͘ chò só͘-hùi, goán éng-oán bōe hoán-tùi, koh ōe kā i o-ló o-ló neh! To-siā ló͘-la̍t, A-lí-a-tok !
|
B：最後一點ài kā鄉親序大提醒--ê,就是做人ài知足，親情朋友定接觸，生活m̄免siuⁿ嚴肅，三不五時扑麻雀，人生海海kài心適。若無，食到老khok-khok，頭殼會sio-tò͘ sio-tò͘。Tiàm chia mā祝福逐家平安快樂大富貴，天公照四季。阿扁仔hō͘咱萬五做所費，阮永遠bōe反對，koh會kā伊o-ló o-ló neh！多謝勞力，A-lí-a-tok！ |
