Sai-kong sak chhio̍h chīn bóe-pō͘--a
|
司公sak蓆，盡尾步—a |
| Iûⁿ Chín-jū |
楊振裕 |
|
2004 nî Chóng-thóng tāi-soán chhun bô kúi-kang--a, nâ-le̍k lióng-kun kang-hu chīn tián, phah-piàⁿ leh chō-sè, giú phiò. 3 goe̍h 13 hit-kang sī "Chhiau-kip ê pài-la̍k", le̍k-kun tī Ko-hiông chi̍p-ha̍p 50~60 bān lâng tōa-siaⁿ hoah-chhut:"Tâi-oân beh chhut-thâu, ta̍k-ke ài kong-tâu!" siaⁿ-sè chhiâng-chhiâng-kún, nâ-kun su-lâng-m̄-su-tīn, mā tī kok-tē tōa tōng-oân.
|
2004年總統大選chhun無幾工--a, 藍綠兩軍攏工夫盡展，拍拚leh造勢、giú票。3月13 hit工是「超級ê拜六」，綠軍tī高雄集合50～60萬人大聲喝出：「臺灣beh出頭，逐家愛公投！」聲勢chhiâⁿ- chhiâⁿ-kún,藍軍輸人m̄輸陣，mā tī各地大動員。 |
|
Khó-lêng sī chêng-sè chiâⁿ hûi-hiám ê khoán, nâ-kun hù-sòe in ang-á-bó͘ tī Tâi-tiong hiông-hiông ke̍k-tōng 1-ē, soah siang-kha kūi lo̍h-tē, chò-chhut chim thô͘-kha ê tōng-chok, 6~7 hun-cheng í-āu, tī Tâi-pak leh chō-sè ê chú-sòe tōng-chok koh khah tōa, tòe tī hù-sòe ê kha-chhng āu, mā khan in bó͘ ê chhiú, siang-siang phak-lo̍h thô͘-kha, ngó͘-thé-tâu-tē, oan-ná chò-chhut chim thô͘-kha ê tōng-chok.
|
可能是情勢chiâⁿ危險ê款，藍軍副帥in翁仔某tī台中雄雄激動1-ē,soah雙腳跪落地，做出chim土腳ê動作，6～7分鐘以後，tī台北leh造勢ê主帥動作koh khah大，tòe tī副帥 ê kha-chhng後，mā牽in某ê手，雙雙phak落土腳，五體投地，oan-ná做出chim土腳--ê動作。 |
|
Hit-kang ê tiān-sī chiat-bo̍k chin chhù-bī, kui-po͘ kui-àm it-ti̍t tiông-ho̍k pò͘-chhut nâ-kun chiàⁿ-hù-sòe kūi-phak--lo̍h thô͘-kha ê ōe-bīn, jî-chhiáⁿ mā it-ti̍t phah-chhut kāng-khoán ê jī-bō͘:"Nâ-kun chiáⁿ-hù-sòe kūi-phak leh chim thô͘-kha, chin-sim ài Tâi-oân, kap Tâi-oân-lâng poa̍h kám-chêng ! "
|
Hit工ê電視節目真趣味，規晡規暗一直重複播出藍軍正副帥kūi-phak--落土腳ê畫面，而且mā一直拍出仝款ê字幕：「藍軍正副帥kūi-phak leh chim土腳，真心愛台灣，kap台灣人poa̍h感情！」 |
|
Tī Pe̍h-mo͘--ê ê tê-bí-tiàm, ū kúi-ê-á lâng-kheh ná khòaⁿ tiān-sī ná leh phàu-tê phoh-tāu.
|
Tī白毛--ê ê茶米店，有幾個á人客ná看電視ná leh泡茶phoh-tāu。 |
|
"Nâ-kun koh leh poaⁿ-hì--á, chit-chhut khòaⁿ chiok-chē--lo͘ !" Háu-ke-tân--ê thâu-seng kóng-chhut i ê sim-siaⁿ.
|
「藍軍koh leh搬戲--à,這齣看足濟--lo͘!」哮雞陳--ê頭先講出伊ê心聲。 |
|
A pin-á-sian mā tòe leh kóng:"He hù--ê seng kūi, chiàⁿ--ê chiah tòe leh phak, hù--ê sī chhiúⁿ beh chò chiàⁿ--ê-lah!"
|
阿彬仔先mā tòe leh講：「He副--ê先跪，正--ê chiah tòe leh phak, 副--ê是搶beh做正--ê-lah!」 |
|
Cha̍p-liām-so͘--ê 1 khui-chhùi tō kàn-kiāu, i kóng:"Hù--ê kūi--lo̍h-khì, chiàⁿ--ê phak--lo̍h-khì, nā-sī ū 1-kang A-kiōng--a phah--lâi ê sî, Tâi-oân m̄-tio̍h oan-ná tòe leh kūi--lo̍h-khì ah-sī phak--lo̍h-khì, tài-soe m̄-chiah án-ne ! "
|
雜念蘇--e 1開嘴tō kàn-kiāu,伊講：「副--ê跪--落-去，正--ê phak--落-去，若是有1工阿共--a拍來--ê時，台灣m̄-tio̍h oan-ná tòe leh跪落去ah-sī phak--落-去, tài-soe m̄-chiah按呢！」 |
|
"Sī--a, che sī siōng-bái ê khiàn-sńg--lah ! " Hàu-ke-tân--ê tōa-siaⁿ hoah--chhut-lâi.
|
「是--a, che是上bái ê khiàn-sńg--lah!」哮雞陳--ē大聲hoah出來。 |
|
Pe̍h-mo͘--ê "He-ku bōe jím tit sàu", kā chhiú--ni̍h hit au tê chò 1-chhùi lim oân, khiā--khí-lâi, iōng chin giâm-siok ê kháu-khì kóng : "Chit kio̍k tēng-kio̍k--a-lah, nâ-kun khì-sò͘ kàu-chia, bián ī--a-lah!"
|
白毛--ê「He-ku bōe忍tit嗽」，kā手--ni̍h hit au茶做1嘴lim完，khiā--起-來，用真嚴肅ê口氣講：「這局定局--a-lah, 藍軍氣數到chia,免ī--a-lah!」 |
|
"Án-chóaⁿ kóng--leh?" A-pin-á-sian kín kā mn̄g siông-sè.
|
「按怎講--leh?」阿彬仔先緊kā問詳細。 |
|
"Lí bô-thiaⁿ lâng kóng, sai-kong sak chhio̍h - chīn-bóe-pō͘--a-hioh ? "
|
「你無聽人講，司公sak蓆 ─ 盡尾步--a-hioh?」 |
|
ps: Sai-kong sak-chhio̍h chit-ê sû, sī kóng sai-kong leh chò hoat-sū khu-siâ ê sî , só͘-ū ê pō͘-sò͘ lóng ēng-liáu-liáu, pìⁿ bô pō͘--lo͘, chòe-āu chí-hó chiong hoat-soh ùi chháu-chhio̍h kā sak--lo̍h-khi, piáu-sī beh kiat-sok--ah !
|
ps: 司公sak蓆這個詞，是講司公leh做法事驅邪ê時，所有ê步數lóng 用了了，變無步--lo͘,最後只好將法索 ùi 草蓆kā sak--落去，表示beh結束--ah! |
