M̄-bián khui-chhùi tō kiò Kong--lah
|
毋免開嘴tō叫公--lah! |
| Iûⁿ Chín-jū |
楊振裕 |
|
Kong-iá-tióng sī kó͘-chá 1-ê chin chhut-miâ ê lâng, I ē-hiáu thiaⁿ kok-chióng chiáu-á só͘ kóng ê ōe. I ê kò͘-sū tī Tâi-oân bîn-kan lâu-thoân chin khoah, chiâⁿ chē lâng gín-á sî-tāi lóng bat thiaⁿ kòe.
|
公冶長是古早1個真出名ê人，伊會曉聽各種鳥仔所講ê話。伊ê故事tī台灣民間流傳真?，chiâⁿ濟人囝仔時代攏bat聽過。 |
|
“Kong-iá-tióng, Kong-iá-tióng, lâm-soaⁿ-hó͘ kā iông, lí tit bah, góa tit tiông ! ”
|
「公冶長，公冶長，南山虎咬羊（iông)，你得肉，我得腸（tiông)！」 |
|
Choái ōe sī chiáu-á kóng hō͘ Kong-iá-tióng sian-seⁿ thiaⁿ--ê, liām--khí-lâi tàu-kù koh ah-ūn, kám-kak chiâⁿ sim-sek, ta̍k-ke thiaⁿ liáu lóng ē tòe leh liām, m̄-koh liām--leh ;aīm--leh, liām chi̍t-ē kú, chhin-chhiūⁿ leh liām chheh-koa, “Kong-iá-tióng”soah piàn-chò “Kong-á-tióng”, im lóng cháu-cheng-khì--a !
|
Choái話是鳥仔講hō͘公冶長先生聽--ê,念--起--來鬥句koh押韻，感覺chiâⁿ心適，逐家聽了攏會tòe leh念，m̄-koh念--leh念--leh, 念一下久，親像leh念冊歌，「公冶長」soah變做「公仔長」，音攏走精去--à! |
|
Chng-bóe tòa 1-ê sàn-chhiah lâng, I ê miâ tú-hó hō chò “Tióng--a”, 30 gōa hòe--a, iáu koh bô-bó͘ bô-kâu, leh kâng chò tn̂g-kang, chng--ni̍h ê lâng khòaⁿ bô ba̍k-tē. 1 kûn gia̍t-siâu gín-á kiàn-pái nā khòaⁿ-tio̍h I, lóng ē kā thí-chhiò, koh bô-tōa bô-sè o͘-pe̍h hiu kóng: “Kong-á-tióng, Kong-á-tióng, bô bah ia̍h bô tiông ! ” “Kong-á-tióng, Kong-á-tióng, bô bah ia̍h bô tiông ! ”
|
庄尾tòa 1個散赤人，伊ê名tú好號做「長--a」，30外歲--a,猶koh無某無猴，leh kâng做長工，庄--ni̍h ê人攏看伊無目地。1群gia̍t-siâu囝仔kiàn擺nā看tio̍h伊，攏會kā恥笑，koh無大無細烏白hiu講：「公仔長、公仔長，無肉ia̍h無腸！」「公仔長、公仔長，無肉ia̍h無腸！」 |
|
Tng àⁿ- àⁿ leh khioh pháiⁿ-tâng-koan-á ê “Tióng--a”, ûn-ûn-á khiā-khí-sin, I 1-tiám-á tō bô siū-khì, kan-na chhiò-chhiò ìn kóng : “Gín-á-lâng hiah-n̍i̍h kāu-lé-sò͘, āu-pái m̄-bián khui-chhùi tō kiò Kong--lah ! ”
|
當àⁿ- àⁿ leh拾歹銅管仔ê「長--a」，勻勻仔徛起身，伊1點仔tō無受氣，kan-na笑笑應講：「囝仔人hiah-n̍i̍h厚禮數，後擺毋免開嘴tō叫公---lah!」 |
