Koan ló-iâ jiok bōe-tio̍h
|
關老爺jiok bōe著 |
| Iûⁿ Chín-jū |
楊振裕 |
|
Kiok-á chím-pô ê kim-sun put-hēng chhut chia-hō sí--khì, I tī Koan-tè-biō bīn-thâu-chêng khàu kah sí-sí hūn-hūn--khì, kiông-kiông ti̍h-beh siak-thâu.
|
菊仔嬸婆ê金孫不幸出車禍死去，伊tī關帝爺面頭前哭kah死死暈暈--去，強強ti̍h-beh siak頭。 |
|
“Koan ló-iâ--a, lâng kóng lí ū lêng ū siàⁿ, m̄-koh tē-chú khòaⁿ he lóng sī hau-siâu--ê-lah ! ” Chím-pô ba̍k-sái chha̍p-chha̍p ti̍h, ná khàu ná liām, sim-lāi chiok m̄ kam-goān--ê.
|
「關老爺--a,人講你有靈有聖，m̄-koh弟子看he攏是hau-siâu--ê-lah!」嬸婆目屎chha̍p-chha̍p滴，ná哭ná念，心內足m̄甘願--ê。 |
|
“Bô-chhái tē-chú góa hiah-n̍i̍h khiân-sêng, ho̍k-sāi lí 5,60 tang--a, lí mā chai-iáⁿ góa kan-taⁿ 1-ê kim-sun niā-niā, sī ùi sè-á-hàn ni-ni lia̍p-lia̍p, iōng ke-thng kap som-á kā kô͘--khí-lâi-ê, sī lâu leh āu-pái teh thoân hiuⁿ-hóe--ê, lí ná ē lóng bô-thang kā pó-pì 1-ē, hāi I khì lòng-lòng--sí-leh ? ” Chím-pô lú khàu lú siong-sim, 1-kó͘ ê oàn-khì ǹg-tio̍h tōa-tiān it-ti̍t chhiong--khì.
|
「無彩弟子我hiah-n̍i̍h虔誠，ho̍k-sāi你五、六十冬--a,你mā知影我kan-taⁿ 1個金孫niā-niā,是ùi細仔漢ni-ni lia̍p-lia̍p,用雞湯kap蔘仔kā kô͘--起-來-ê,是留leh後擺beh傳香火--ê,你ná會攏無thang kā保庇一下，害伊去lòng-lòng--死-leh?」嬸婆愈哭愈傷心，一股ê怨氣向tio̍h大殿一直沖--去。 |
|
Koan-tè-iâ tng leh khùn tiong-tàu, hō͘ hit-kó͘ ê oàn-khì kiaⁿ 1-ē chha 1-tiám-á tō tǹg-tōa chē, ba̍k-chiu jôe-jôe--leh, khut-cháiⁿ 1-sǹg, ô͘~, I bêng-pe̍h--lo͘ ! Chek-sî tō khai kim-kháu kóng :
|
關帝爺tng leh睏中晝，hō͘ hit股ê怨氣驚一下差一點仔tō tǹg-tōa坐，目睭jôe-jôe--leh,屈指一算，ô͘~，伊明白--lo͘!Chek時 tō開金口講： |
|
“Tōa-táⁿ gōng tē-chú, ia̍h káⁿ lâi chiah hô͘-giân loān-gí, oan-óng pún-sîn ! ”
|
「大膽gōng弟子，ia̍h敢來chia胡言亂語，冤枉本神！」 |
|
Kiok-á chím-pô kiaⁿ kah phī-phī-chhoah, thâu lóng m̄-káⁿ giâ--khí-lâi. Koan-tè-iâ chin bô hoaⁿ-hí ê khoán, koh sòa--lo̍h-khì kóng :
|
菊仔嬸婆驚kah phī-phī-chhoah,頭攏m̄敢giâ--起-來。關帝爺真無歡喜ê款，koh 續落去講： |
|
“Ta̍k-ke lóng chai-iáⁿ pún-sîn khiâ 1-chiah chhiah-thò͘-bé, ē-tàng ji̍t-cháu chhian-lí, iā-hêng 800, sǹg--sī put-chi-á kín--lo͘ ! Cha-hng lín hit-ê kim-sun sái 1-chiah bián-lù--ê tī ko-sok kong-lō͘ leh phe-chhia, góa tòe āu-piah tui-khì beh kā pó-hō͘, ná chai I lú phe lú kín, sî-sok phe kàu 130~140, góa jiok kah phīⁿ-phēⁿ-chhoán, sian jiok mā jiok bōe-tio̍h ! ”
|
「Ta̍k-ke攏知影本神騎一隻赤兔馬，會凍日走千里，夜行800，算是不止仔緊--lo͘!昨昏lin hit個金孫駛1隻bián-lù--ê tī高速公路leh phe-車，我tòe 後壁追去beh kā保護，ná知伊愈phe愈緊，時速phe到130~140，我jiok kah phīⁿ-phēⁿ-喘，sian jiok mā jiok bōe著！」 |
