Thian-lō͘ Le̍k-thêng_01
|
天路歷程_01 |
| Bûn Iok-hān |
文約翰 |
|
Tē-it-pún
|
第一本 |
|
Ē-mn̄g Kó͘-lōng-sū Chūi-keng-tông ìn.
|
廈門鼓浪嶼萃經堂印 |
|
1897
|
1897 |
|
Bûn Iok-hān chiū-sī chòe chit-pún chheh ê lâng. Sī Tāi-eng kok lâng, chhut-sì 1628 nî, sí 1688 nî.
|
文約翰就是做這本冊ê人。是大英國人，出世1628年，死1688年。 |
|
Góa kiâⁿ chit sè-kan ê khòng-iá, tú-tio̍h chi̍t-só͘-chāi ū hia̍t, góa tī hit só͘-chāi tó-teh khùn, khùn chiū bāng-kìⁿ chi̍t-ê bāng: Bāng-kìⁿ chi̍t-lâng, saⁿ put-chí phòa-nōa, khiā tī chi̍t-só͘-chāi, bīn bô ǹg i ê chhù, khòaⁿ pa̍t ūi, chhiú the̍h chheh, keng-thâu-téng ū tāng-tàⁿ. Koh khòaⁿ i hian chheh teh khòaⁿ, kiaⁿ kàu ngia̍uh-ngia̍uh-chhoah, lâu ba̍k-sái, tòng-bōe-tiâu, chiū chhut tōa ai-chhám ê siaⁿ kóng, Góa tio̍h cháiⁿ-iūⁿ chòe? I ê chêng-hêng chhin-chhiūⁿ án-ni; āu-lâi chiū tò-khì, bián-kióng bô lâu ba̍k-sái, gia̍uh-ngia̍uh-chhoah, hō͘ bó͘-kiáⁿ khòaⁿ-kìⁿ i ê iu-khò͘, chóng-sī in-ūi m̄-ài i ê iu-khó͘ chiām-chiām khah tāng, kàu lō͘-bé bōe-ōe chēng-chēng. Só-í ēng hit-ê sū kā i ê bó͘ kiáⁿ kóng, Háiⁿ! hiân-chhe--ah, ài-chú--ah, lín sī góa chì-chhin, taⁿ in-ūi tāng-tàⁿ teh--góa tit-beh bia̍t-bô; ia̍h tek-khak chai lán chit-ê siâⁿ tit-beh hō͘ thiⁿ-hé sio--khì; tú-tio̍h che châu-bia̍t ê sî, góa, kap hiân-chhe ài-chú, beh lóng-chóng siū chhiⁿ-chhám bia̍t-bô; nā m̄-sī tāi-seng chhē chi̍t-tiâu oa̍h lō͘, beh àn-cháiⁿ-iūⁿ siám-pī i? nā-sī bē chai ū chit-ê lō͘ á-bô.
|
我行這世間ê曠野，tú著 1所在有穴，我tī hit所在倒teh 睏，睏就夢見1個夢：夢見1人，衫不止破爛，企tī 1所在，面無向伊ê厝，看別位，手the̍h冊，肩頭頂有重擔。Koh看伊掀冊teh看，驚到ngia̍uh-ngia̍uh-chhoah，流目屎，擋bōe-tiâu,就出大哀慘ê聲，講：「我著怎樣做？」伊ê情形親像án-ni；後來就倒--去，勉強無流目屎ngia̍uh-ngia̍uh-chhoah，hō͘某子看見伊ê憂苦；總是因為m̄-ài伊ê憂苦漸漸較重，到路尾bōe會靜靜。所以用hit個事情kā伊ê 某子講：「Háiⁿ！賢妻--ah！愛子--ah！Lín是我至親，今因為重擔teh--我，我tit-beh滅無。亦的確知咱這個城，tit-beh hō͘天火燒去。Tú著che剿滅ê時，我kap 賢妻愛子，beh攏總受悽慘滅無；若m̄是代先chhē這條活路，beh án怎樣閃避伊？但是未知有這個路抑無。」 |
|
I ê bó͘ kiáⁿ chit-ê thiaⁿ-kìⁿ chit-ê ōe, put-chí kiaⁿ-kiâⁿ, che m̄-sī sìn i ê ōe sī chin--e, sī phah-sǹg i teh hoat-kông tiāⁿ-tiāⁿ; só͘-í ji̍t beh àm, ǹg-bāng i nā khùn, sim kiám-chhái ōe tiāⁿ-tio̍h; chiū kóaⁿ-kín hû i khì khùn. Chóng-sī i thong-mî chhin-chhiūⁿ ji̍t--sî, sim-koaⁿ si̍t-chāi bô pêng-an; khùn bōe chiâⁿ bîn, kui mî ná thó͘-khùi, ná lâu ba̍k-sái; kàu thiⁿ-kng, ke-lāi ê lâng lâi mn̄g an; i ìn kóng, Jú kú jú m̄ an; koh ēng tāi-seng kóng ê ōe têng-thâu kóng. I ke-lāi ê lâng hut-lio̍k i ê ōe, m̄ thiaⁿ--i, phah-sǹg nā ēng put-chêng khoán-thāi--i, kiám-chhái thang tû-khì i ê pīⁿ, só-í ū-sî ki-chhì chhiò--i. ū-sî chek-pī mē--i, ū-sî lóng bô chiàu-kò͘--i. Hit-ê lâng chiū ji̍p-khì ka-kī ê pâng, chi̍t-ê siong-pi kā-kī ê chhám, chi̍t-ē lîn-bín i ke-lāi ê lâng, thòe in kî-tó. Koh ū-sî toaⁿ-sin kiâⁿ tī chhân--ni̍h ê tiong-kan, hut-jiân khòaⁿ chheh, hut-jiân kî-tó, keng-kè kúi-nā ji̍t lóng sī án-ni.
|
伊ê某子一下聽見這個話，不止驚惶，che m̄是信伊ê話是真--ê,是扑算伊ê心肝發狂tiāⁿ-tiāⁿ。所以日beh暗，向望伊若睏，心肝kiám-chhái會定著；就趕緊扶伊去睏。總是伊通暝親像日--時，心肝實在無平安；睏bōe成眠，終暝nā吐氣、流目屎。到天光，家內ê人來問安，伊應講：「愈久愈m̄安！」Koh用代先講ê話重頭講。伊家內ê人忽略伊ê話，m̄聽--伊，扑算若用put情款待--伊，kiám-chhái thang除去伊ê病。所以有時譏刺笑--伊，有時責備罵--伊，有時攏無照顧--伊。Hit個人就是入去家己ê房，1個傷悲家己ê慘，一下憐憫伊家內ê人，替in祈禱。Koh有時單身行tī田--n̍i̍h ê中間，忽然看冊，忽然祈禱，經過幾若日攏是án-ni。 |
|
Ū chi̍t-sî, góa khòaⁿ-kìⁿ i tú-á kiâⁿ tī chhân--ni̍h, iû-goân khòaⁿ chheh, sim-koaⁿ put-chí iu-būn ai-chhám, khòaⁿ chheh ê sî chhin-chhiūⁿ tāi-seng chhut siaⁿ tōa kiò kóng, Góa tio̍h cháiⁿ-iūⁿ chòe, chiah ōe tit-tio̍h kiù? Koh khòaⁿ chia, khòaⁿ hia, chhin-chhiūⁿ tit-beh cháu chi̍t-poaⁿ-iūⁿ, nā-sī iáu-kú teh khiā. Góa khòaⁿ hit-ê chhêng-hêng sī in-ūi m̄-chai tio̍h tùi tah-lo̍h chi̍t-tiâu lō͘ thang khì. Hit-sî góa chiū khòaⁿ-kìⁿ chi̍t-lâng, miâ kiò Thoân-tō, chiū-kūn mn̄g, kóng, Lí siáⁿ-sū ai-ai kiò? hit-ê lâng ìn kóng, Chun-kà--ah, góa khòaⁿ chhiú-tiong ê chheh, chai góa tek-khak sí, sí liáu-āu tek-khak siū sím-phòaⁿ: án-ni ka-ki mn̄g góa ê sim-koaⁿ: sí, góa m̄ goān; sím-phòaⁿ, góa ia̍h oh-tit tng.
|
有1時，我看見伊tú仔行tī田--n̍i̍h,猶原看冊，心肝不止憂悶哀慘。看冊ê時，親像代先出聲大叫講：「我著怎樣做，才會得著救？」Koh看chia、看hia，親像tit-beh走一般樣，但是iáu-kú teh企。我看hit個情形是因為m̄知tùi tah落1條ê路thang去。Hit時我就看見1人，名叫傳道，就近問，講：「你啥事哀哀叫？」Hit個人應講：「尊駕--ah，我看手中ê冊，知我的確死，死了後的確受審判！Án-in家己問我ê心肝：死，我m̄願；審判，我亦oh得tng。」 |
|
Thoân-tō chiū kā i kóng, Sè-kan chōe-chōe kan-khó͘, lí siáⁿ-sū m̄ goān sí? hit-ê lâng ìn kóng, Góa kiaⁿ-liáu keng-thâu-téng ê tàⁿ teh góa pí bōng khah kē, chiū-sī hām-lo̍h góa tī tē-ge̍k. Chun-kà--ah, góa ji̍p kaⁿ-lô siông-chhiáⁿ oh-tit tng, hô-hōng tú-tio̍h sím-phòaⁿ, thoa kàu sí-tōe; góa siūⁿ chit-ê sū-chêng chiū ai-ai kiò.
|
傳道就kā伊講：「世間濟濟艱苦，你啥事m̄願死？」Hit個人應講：「我驚了肩頭頂ê擔teh我比墓較低，就是陷落我tī地獄。尊駕--ah！我入監牢尚且oh得tng，何況tú著審判，拖到死地；我想這個事情，就有哀哀叫。」 |
|
Thoân-tō kóng, Lí ê chêng-hêng nā án-ni-siⁿ, siáⁿ-sū iáu-kú khiā tī chia, m̄ khì? Ìn kóng, In-ūi m̄-chai eng-kai tùi tah-lo̍h khì. Thoân-tō chiū hō͘ i chi̍t-kńg phê, lāi-bīn siá kóng, Tit-beh kàu ê siū-khì, eng-kai cháu siám-pī.
|
傳道講：「你 ê情形若án-ni-siⁿ，啥事iau-kú企ti chia，m̄去？」應講：「因為m̄知應該tùi tah落去。」傳道就hō͘ 伊一捲皮，內面寫講：「Tit-beh到ê受氣，應該走閃避。」 |
|
Hit-ê lâng khòaⁿ chit chat, chiū ba̍k-chiu chù-sîn khòaⁿ Thoân-tō kóng, Góa eng-kai cháu siám-pī, khì tah-lo̍h? Thoân-tō ēng chńg-thâu-á kí kóng, Ti̍t-ti̍t khì khòng-iá gōa, hit-ê oe̍h-mn̂g, lí khòaⁿ-kìⁿ á bô? Ìn kóng, Bô. Koh kóng, hit-ê kng-kng, lí khòaⁿ-kìⁿ á bô? Ìn kóng, Ū--ah, lî-a khòaⁿ-kìⁿ. Thoân-tō chiū kóng, hit-ê kng, lí eng-kai ba̍k-chiu chù-sîn ti̍t-ti̍t khì chiū-kūn--i, chiah ōe khòaⁿ-kìⁿ hit-ê oe̍h-mn̂g; lí nā phah mn̂g, tek-khak ū lâng beh kā lí kóng só͘ tio̍h kiâⁿ--ê. Chiàⁿ chhin-chhiuⁿ si ū kóng,
|
Hit 個人看這節，就目珠注神看傳道，講：「我應該走閃避去tah落？」傳道用指頭仔指講：「直直去曠野外，hit個隘門，你看見抑無？」應講：「無。」Koh講：「Hit個光光，你看見抑無？」應講：「有--ah！厘仔看見。」傳道就講：「看hit個光，你應該目珠注神直直去就近伊，才會看見hit個隘門；你若扑門，的確有人beh kā你講所著行--ê。」正親像詩有講： |
|
Chhíⁿ-gō͘ chai chōe tio̍h tîm-lûn,
|
醒悟知罪著沈淪， |
|
Kiaⁿ-liáu bô thang kiù lêng-hûn;
|
驚了無thang救靈魂； |
|
Kai-chài Thoân-tō lâi chí-bê ng,
|
Kai-chài傳道來指明， |
|
Ū thang bián-sí, tit éng-seng.
|
有thang免死，得永生。 |
|
Góa bāng-kìⁿ hit-ê lâng sûi-sî cháu, lī-khui in tau bē hn̄g, i ê bó͘-kiáⁿ khòaⁿ-kìⁿ, chiū âu--i tò-lâi. Hit-ê lâng ēng N̄g chhiú ng hī-khang ti̍t-ti̍t cháu, tōa siaⁿ kiò kóng, Oa̍h! Oa̍h! éng-oán oa̍h! Lóng bô oa̍t-kè-lâi khòaⁿ, chheng-chheng ǹg pîⁿ-iûⁿ ê tiong-ng, án-ni cháu.
|
我夢見hit 個人隨時走，離開in兜未遠，伊ê某子看--見就喉--伊倒--來。Hit個人用兩手掩耳空直直走；大聲叫講：「活！活！永遠活！」攏無越過來看，清清向平洋ê中央án-ni走 |
|
Hit-sî chhù-piⁿ ia̍h chhut-lâi khòaⁿ, khòaⁿ-kìⁿ i kín-kín cháu, ū-ê ki-chhì khòaⁿ-khin--i, ū-ê siū-khì hoah--i, ia̍h ū-ê kiò i tio̍h tò--lâi. Tiong-kan ū N̄g lâng koat-toàn beh ji̍p, bián-kióng i tò lâi. In ê miâ sī Kò͘-chip , Īⁿ-chhian . Hit-sî hit-lâng ū cháu hiah hn̄g, N̄g lâng iáu-kú teh jip--i, bē lōa-kú jip--tio̍h. Hit lâng chiū kóng, Chhù-piⁿ--ah, lín beh siáⁿ-sū? Nn̄g lâng ìn kóng, Goán lâi khǹg lí kap goán saⁿ-kap tò-khì, hit-ê lâng ìn kóng, Che chhian-bān m̄-thang, lín khiā tī Chiong-bông siâⁿ góa ia̍h chhut-sì tī hià, chai hit-ê siâⁿ tit-beh bia̍t-bô. Lín nā tn̂g-tn̂g khiā tī hit só͘-chāi, sī tek-khak tūi-lo̍h pí bōng khah kē, chiū-sī ji̍p tē-ge̍k jiû-n̂g hé sio ê só͘-chāi. Hó ê chhù-piⁿ--ah, eng-kai thiaⁿ góa, kap góa saⁿ-kap khì.
|
Hit時厝邊亦出來看，看見伊緊緊走，有ê譏刺看輕--伊，有ê受氣喝--伊，亦有ê叫著伊倒--來。中間有兩人決斷beh jip，勉強伊倒--來。In ê名是固執 、易遷 。Hit時hit人走有hiah遠。兩人iáu-kú teh jip--伊，未偌久jip著。Hit人就講：「厝邊--ah，lín來beh啥事？」兩人應講：「阮來勸你kap 阮相kap 倒--去。」Hit人應講：「Che千萬m̄-thang，lín企tī 將亡城 ，我亦出世ti hia，今知hit個城tit-beh滅無。Lín若長長企tī hit所在，是的確墮落比墓較低，就是入地獄硫磺火燒ê所在。好ê厝邊--ah，應該聽我，kap 我相kap 去。」 |
|
Kó͘-chip ìn kóng, Háiⁿ! Che án-cháiⁿ-iūⁿ kóng, kám sī ài goán pàng-sak lóng-chóng ê pêng-iú, lóng-chóng ê khoài-lo̍k, kap lí khì mah?
|
固執應講：「Háiⁿ！Che án怎樣講，kám是ài阮放sak攏總ê朋友、攏總ê快樂，kap 你去--mah？」 |
|
Hit lâng, miâ chiū-sī Ki-tok-tô͘, ìn kóng, Tio̍h; in-ūi che lóng-chóng ê mi̍h, pí góa só͘ kiû ê hok-khì, bān-hūn m̄ ta̍h-tio̍h chi̍t-hūn. Lí nā kap góa khì, tùi khí-thâu kàu lō͘-bé bô pàng-sak, chiū góa só͘ tit-tio̍h--ê, lí iā tit-tio̍h, in-ūi góa só͘ khì ê só͘-chāi, ta̍k-hāng kàu-gia̍h koh ū chhun, m̄ ta̍h--tio̍h saⁿ-kap khì, chhì-khòaⁿ góa ê ōe.
|
Hit人，名就是基督徒，應講：「著。因為che攏總ê物，比我所求ê福氣，萬份m̄-ta̍h著一份。你若kap 我去，tùi起頭到路尾無放sak，就我所得著--ê,你也得著。因為我所去ê所在，逐項夠額koh有chhun，m̄-ta̍h--著相kap 去，試看我ê話。」 |
|
Kò͘-chip ìn kóng, Lí í-keng kam-goān pàng-sak sè-kan só͘ ū ê, iáu beh kiû sim8-mi̍h mi̍h?
|
固執應講：「你已經甘願放sak世間所有--ê,iáu beh求甚mi̍h物？」 |
|
Ki-tok-tô͘ ìn kóng, Goán kiû bōe pāi-hoāi, bōe lâ-sâm, bōe hòe-bô ê ke-gia̍p, ún-tàng ū, sī tī thiⁿ--ni̍h; kìⁿ-nā khûn-khûn kiû ê lâng, tiāⁿ-tio̍h ê sî kàu, chiū hō͘--i. Chit-ê chheh ū kì-chài án-ni, lín nā khòaⁿ--i, chiū ōe chai bêng.
|
基督徒應講：「阮求bōe敗壞，bōe lâ-sâm,bōe廢無ê家業。穩當有，收tī天--n̍i̍h。見若勤勤求ê人，定著ê時--到，就hō͘ 伊。這個冊有記載án-ni，lín若看--伊，就會知明。」 |
|
Kò͘-chip kóng, Hé! Chūi-á beh khòaⁿ? Lí kam-goān kap goán tò-khì, á bô? Ìn--i kóng, Góa toàn-toàn m̄ tò--khì, in-ūi chhiú í-keng hōaⁿ hit-ê lôe, m̄-thang oa̍t-thâu khòaⁿ.
|
固執講：「Hé!誰仔 beh看？你甘願kap 阮倒去抑無？」應--伊，講：「我斷斷m̄ 倒--去，因為手已經hōaⁿ hit個犁，m̄-thang越頭看。」 |
|
Kò͘-chip chiū kā Īⁿ-chhian kóng, Nā-sī án-ni, lán tio̍h tò-khì, chhut-chāi i khì; che chit-hō kông ê lâng, chi̍t-ē khí gōng-siūⁿ, chiū ka-kī phah-sńg pí chhit-ê gâu-lâng khah ū tì-sek. Īⁿ-chhian kóng, Bo̍h-tit mē--i, chit-ê Ki-tok-tô͘ só kóng--ê, nā-sī chin, chiū i ê só͘ kiû, pí lán ê só͘ kiû, tek-khah ū khak hó; i sī góa ê chhù-piⁿ, góa ì-ài kap i khì.
|
固執就kā易遷講：「若是án-ni，咱著倒去，出在伊去；che這號狂ê人，一下起憨想，就家己扑算比7個 gâu 人較有智識。」易遷講：「莫得罵--伊，這個基督徒所講--ê若是真，就伊ê所求，比咱ê所求，的確有較好；伊是我ê厝邊，我意愛kap 伊去。」 |
|
Kò͘-chip kóng, Háiⁿ! I kông, lí ia̍h kông. Lí eng-kai tè góa tò--khì, chūi-á chai, chit-hō sim-koaⁿ hoat-kông ê lâng, beh chhōa lí tah-lo̍h khì? Lí eng-kai tò--khì, bo̍h-tit ka-kī gōng.
|
固執講：「Háiⁿ！伊狂你亦狂。你應該tè我倒--去。誰仔知，這號心肝發狂ê人 beh chhōa你tah落去？你應該倒--去，莫得家己憨。」 |
|
Ki-tok-tô͘ chiū kóng, M̄-thang án-ni, lí kap lí ê pêng-iú, ia̍h eng-kai saⁿ-kap khì, góa tú-á só͘ kóng, si̍t-chāi ū chit-hō sū-chêng, che í-gōa, iáu ū chōe-chōe ê êng-kng: nā m̄ sìn góa, chhiáⁿ khòaⁿ chit-ê chheh, tiong-ng só͘ kì-chài lóng sī chin, in-ūi chòe chit-ê chheh, chiū-sī lâu i ê hui̍h chòe kan-chèng.
|
基督徒就講：「M̄-thang án-ni，你kap 你ê朋友，亦應該相kap 去，我tú仔所講實在有這號事情。Che以外，iáu有濟濟榮光。若m̄信我，請看這個冊，中間所記載攏是真，因為做這個冊，就是流伊ê血做干證。」 |
|
Īⁿ-chhian kā Kò͘-chip kóng, Hó ê chhù-piⁿ--ah! Góa ê sim-koaⁿ chha-put-to koat-toàn, beh phōaⁿ chit-ê hó-lâng saⁿ-kap khì, put-lūn tú-tio̍h hó-pháiⁿ, góa iā kam-goān. Chiū tùi Ki-tok-tô͘ kóng, Hó ê tâng-phōaⁿ--ah, khì hoaⁿ-hí ê só͘-chāi, lí bat lō͘ mah?
|
易遷kā固執講：「好ê厝邊--ah！我ê心肝差不多決斷，beh伴這個好人相kap 去，不論tú著好歹，我也甘願。」就對基督徒講：「好ê同伴--ah！去歡喜ê所在，你bat 路--mah？」 |
|
Ki-tok-tô͘ ìn kóng, Ū chi̍t-lâng, miâ Thoân-tō, kí hō͘ góa khòaⁿ kóng, chêng-bīn ū chi̍t-ê oe̍h-mn̂g, tio̍h kóaⁿ-kín chiū-kūn--i, nā kàu hia, tek-khak ū lâng chí-tiám lán hit-ê lō͘ tùi tah-lo̍h khì. Īⁿ-chhian kóng, Hó ê chhù-piⁿ--ah, nā án-ni, lán tio̍h khì. Nn̄g lâng chiū saⁿ-kap khì.
|
基督徒應講：「有1人，名傳道，指hō͘我看講，前面有1個隘門，著趕緊就近--伊，若到hia，的確有人指點咱hit個路tùi tah落去。」易遷講：「好ê厝邊--ah，若án-ni，咱著去。」兩人就相kap 去。 |
|
Kò͘-chip kóng, Góa tek-khak beh tò-khì goán tau, chit-hō bóng-tóng ê lâng, góa tek-khak m̄ kap i chòe phōaⁿ.
|
固執講：「我的確beh 倒去阮兜，這號莽懂ê人，我的確m̄ kap 伊做伴。」 |
|
Hit-sî góa khòaⁿ-kìⁿ Kò-chip í-keng tò-khì, Ki-tok-tô͘ kap Īⁿ-chhian chiām-chiām kiâⁿ kè pîⁿ-iûⁿ ê tiong-kan, Ki-tok-tô͘ chiū kā Īⁿ-chhian kóng, Lí thàn góa ê ōe, goān kap góa khì, góa sim-koaⁿ put-chí hoaⁿ-hí. Hit-ê kò͘-chip nā ōe chhin-chhiūⁿ góa chhíⁿ-gō͘, chai hit-ê iáu-bē ōe khòaⁿ-kìⁿ kap put-chí thang kiaⁿ ê sū-chêng, tek-khak bô án-ni sûi-piān pàng-sak lán.
|
Hit時我看見固執已經倒--去，基督徒kap 易遷漸漸行過平洋ê中間，基督徒就kā易遷講：「你趁我ê話，願kap 我去，我心肝不止歡喜。Hit個固執若會親像我醒悟，知hit個iáu未會看見kap 不止thang驚ê事情，的確無án-ni隨便放sak咱。」 |
|
Īⁿ-chhian kóng, Taⁿ lí góa tī chia, beh khì ê só͘-chāi sī cháiⁿ-iūⁿ? Koh cháiⁿ-iūⁿ ōe tit-tio̍h? Chhiáⁿ siông-sè kā góa kóng.
|
易遷講：「今你我tī chia，beh去ê所在是怎樣？Koh，怎樣會得著？請詳細kā我講。」 |
|
Ki-tok-tô͘ ìn kóng, Góa lio̍h-á ōe siūⁿ, bē ōe kóng; nā-sī lí ài beh chai, góa chiū chiong chit-ê chheh tha̍k hō͘ lí thiaⁿ.
|
基督徒應講：「我略仔會想，未會講！若是你…i beh知，我就將這個冊讀hō͘你聽。」 |
|
Īⁿ-chhian kóng, Chit-ê chheh só͘ kóng--ê, lí phah-sńg tek-khak lóng sī chin mah?
|
易遷講：「這個冊所講，你扑算的確攏是真--mah？」 |
|
Ki-tok-tô͘ ìn kóng, Tek-khak sī chin, in-ūi tù chit-ê chheh, i sī chīn-si̍t bô pe̍h-chha̍t.
|
基督徒應講：「的確是真，因為做這個冊，伊是真實無白賊。」 |
|
Īⁿ-chhian kóng, Chit-ê ōe sī hó; nā-sī só͘ kì-chāi ê sū-chêng sī cháiⁿ-iuⁿ?
|
易遷講：「這個話是好。但是所記載ê事情是怎樣？」 |
|
Ki-tok-tô͘ ìn kóng, Ū chi̍t-ê éng-oán tī-teh ê kok, koh ū éng-oán oa̍h beh siúⁿ-sù lán, hō͘ lán ōe-tit-thang tn̂g-tn̂g khiā tī hia.
|
基督徒應講：「有1個永遠tī--teh ê國，koh有永遠活beh賞賜咱，hō͘ 咱會tit-thang長長企tī-hia。」 |
|
Īⁿ-chhian kóng, Chit-ê ōe sī hó, iáu--ê, sī án-cháiⁿ-iūⁿ?
|
易遷講：「這個話是好。Iáu--ê，是án怎樣？」 |
|
Ki-tok-tô͘ ìn kóng, Ū êng-kng ê bián-liû, kap kng-kng ê saⁿ beh siúⁿ-sù lán, hō͘ lán ê seng-khu chhàn-lān chhin-chhiūⁿ thiⁿ--ni̍h ê ji̍t.
|
基督徒應講：「有榮光ê冕旒，kap 光光ê衫beh賞賜咱，hō͘ 咱ê身軀燦爛親像天--n̍i̍h ê日。」 |
|
Īⁿ-chhian kóng, Nā-sī án-ni sī put-chí hó; iáu--ê sī cháiⁿ-iūⁿ?
|
易遷講：「若是án-ni是不止好。Iáu--ê是怎樣？」 |
|
Ki-tok-tô͘ ìn kóng, Hit só͘-chāi lóng bô thî-khàu hoân-ló, in-ūi hit só͘-chāi ê Chú beh chhit lán ê ba̍k-sái.
|
基督徒應講：「Hit所在攏無啼哭煩惱，因為hit所在ê主beh拭咱ê目屎。」 |
|
Īⁿ-chhian kóng, Lán nā-sī khiā tī hia, kap chī-chūi-á chòe phōaⁿ?
|
易遷講：「咱若是企tī hia，kap 是誰仔做伴？」 |
|
Ki-tok-tô͘ ìn kóng, Kap thiⁿ-sài saⁿ-kap tiàm, in ê kng toa̍t lâng ê ba̍k-chiu, koh tāi-seng lán khì hia ū chheng-chheng bān-bān lâng, lí khì ia̍h ōe kìⁿ--tio̍h in; in bô saⁿ-hāi, lóng saⁿ-thiàⁿ, tāi-ke sī sèng, pài-kìⁿ Siōng-tè, hō͘ Siōng-tè hoaⁿ-hí, án-ni éng-oán khiā tī Chú ê bīn-chhêng. Pau-hâm lâi kóng, nā kàu hit só͘-chāi, tek-khak khòaⁿ-kìⁿ hiah-ê lāu-tōa, chhēng pe̍h ê saⁿ, tì kim ê bián-liû; ia̍h khòaⁿ-kìⁿ hiah-ê chāi-sek-lú, ta̍k-ê chhiú the̍h kim ê khîm. Koh ū lâng in-ūi thiàⁿ Chú, thàn i ê bēng-lēng, án-ni hō͘ sè-kan lâng hām-hāi, kiám-chhái tú-tio̍h koah kàu chhùi-chhùi, á-sī hō͘ hé sio, á-sī hiat hō͘ iá-siù chia̍h, á-sī thiām lo̍h hái, hiah-ê lâng taⁿ í-keng ióng-ióng, chhēng éng-oán-oa̍h ê saⁿ, lán kàu hia tek-khak ōe tit-thang kìⁿ-tio̍h in.
|
基督徒應講：「Kap 天使相kap tiàm,in ê光奪人ê目珠，koh代先咱去hia，有千千萬萬人，你去亦會見著in；in無相害，攏相疼，大家是聖，拜見上帝，hō͘上帝歡喜，án-ni永遠企tī主ê面前。包含來講，若到hit所在，的確看見hiah-ê老大，穿白ê衫，戴金ê冕旒。亦看見hiah-ê在室女，逐個手the̍h金ê琴。Koh有人因為疼主，趁伊ê命令，án-ni hō͘ 世間人陷害，kiám-chhái tú著割到碎碎，抑是hō͘火燒，抑是hiat hō͘野獸食，抑是填落海，hiah-ê人今已經勇勇，穿永遠活ê衫，咱到hia的確會tit-thang見著in。」 |
|
Īⁿ-chhian kóng, Taⁿ khòaⁿ-kìⁿ lí ê ōe, chin-chiàⁿ ōe toa̍t lâng ê sim-koaⁿ; nā-sī chit-ê hok-khì ū-iáⁿ, ōe tit-tio̍h á-bô? Koh tio̍h cháiⁿ-iūⁿ kiâⁿ, chiah ōe tit-tio̍h?
|
易遷講：「今看見你ê話，真正會奪人ê 心肝。若是這個福氣有影，會得著抑無？Koh，著怎樣行，才會得著？」 |
|
Ki-tok-tô͘ ìn kóng, Lí taⁿ só͘ mn̄g, hit só͘-chāi ê Chú ū bat kì-chài tī chit-ê chheh, hit-ê tāi-lio̍k sī kóng, chit-ê hok-khì lán nā sêng-si̍t ài, Chú chiū hoaⁿ-hí pe̍h-pe̍h hō͘ lán.
|
基督徒應講：「你今所問，hit所在ê主有bat 記載tī這個冊，hit個大略講，這個福氣咱若誠實愛，主就歡喜白白hō͘咱。」 |
|
Īⁿ-chhian kóng, Án-ni chin hó; góa thiaⁿ-kìⁿ che put-chí hoaⁿ-hí; hó ê tâng-phōaⁿ--ah, taⁿ tio̍h kóaⁿ-kin kiâⁿ.
|
易遷講：「Án-ni真好；我聽見che不止歡喜；好ê同伴--ah，今著趕緊行。」 |
|
Ki-tok-tô͘ ìn kóng, Góa ài kín-kín kiâⁿ, nā-sī keng-thâu ū chit-ê tāng-tàⁿ, sô͘-í hō͘ kha bōe thàn sim.
|
基督徒應講：「我愛緊緊行，但是肩頭有這個重擔，所以hō͘腳bōe趁心。」 |
|
Hit-sî góa bāng-kìⁿ pîⁿ-iûⁿ ê tiong-kan ū chi̍t-ê thô͘-khut, chiū-sī miâ Iu-ut ê thô͘-khut. Nn̄g lâng ōe kóng liáu, tú-á kūn hit-ê só͘-chāi, in-ūi kiâⁿ bô sòe-jī, hut-jiân poa̍h-lo̍h hit-ê thô͘-khut, chi̍t-sî loān-loān nòa, thô͘-bê kô͘ chi̍t seng-khu. Ki-tok-tô͘ in-ūi keng-thâu-téng ê tàⁿ sī tāng, ná nòa ná chhim.
|
Hit時我夢見平洋ê中間有1個塗窟，就是名憂鬱ê塗窟。兩人話講了，tú仔近hit 個所在，因為行無細膩，忽然跋落hit 個塗窟，一時亂亂nòa,塗糜糊到歸身軀。基督徒因為肩頭頂ê擔是重，那nòa那深。 |
|
Īⁿ-chhian kā Ki-tok-tô͘ kóng, Taⁿ lí sī cháiⁿ-iūⁿ? Ìn kóng, Góa chin-chiàⁿ m̄-chai.
|
易遷kā基督徒講：「今你是怎樣？」應講：「我真正m̄知。」 |
|
Īⁿ-chhian siū-khì, tōa him Ki-tok-tô͘ kóng, Hǹg! Káⁿ-sī lí kā góa kóng ê hok-khì mah? Lán tú-á chiūⁿ lō͘ chiū tú-tio̍h che, hô-hòng tùi chia khì kàu lō͘-bé! Góa nā ōe thoat-chhut chia, sui ū hó ê só͘-chāi, lí thang ka-kī khì. I chiū oa̍t-thâu ǹg in chhù hit-bīn, ēng la̍t kùn N̄g-saⁿ ē, hut-jiân peh khí-lâi thô͘ -khut hōaⁿ, chiū tò-khì. Ki-tok-tô͘ bô koh khòaⁿ-kìⁿ--i.
|
易遷受氣，大him基督徒講：「Hǹg!Káⁿ是你kā我講ê福氣--mah？咱tú仔 上路就tú著che，何況tùi chia去到路尾！我若會活出chia，雖有好ê所在，你thang家己去。」伊就越頭向in厝hit面，用力kùn兩、三下，忽然peh起來塗窟岸，就倒--去。基督徒無koh看見伊。 |
|
Hit-sî Ki-tok-tô͘ tī Iu-ut thô͘-khut ê tiong-ng ka-kī hoan-lâi hoan-khì, it-hoat chhut-la̍t lī i ê chhù, ǹg hit-ê oe̍h-mn̂g, sim-koaⁿ chin-chiàⁿ ài án-ni, in-ūi tàⁿ tāng chiah bae8 thoat-lī.Hit-sî góa koh bāng-kìⁿ chi̍t-lâng, miâ Un-chō͘, chiū-kūn--i kóng, Lí beh thái ōe tī chia?
|
Hit時基督徒tī憂鬱塗窟ê中央家己翻來翻去，一發出力離伊ê厝，向hit個隘門，心肝真正愛án-ni，因為擔重才bōe脫離。Hit時我koh夢見1人，名恩助，就近--伊講：「你beh thái會tī chia？」 |
|
Ki-tok-tô͘ ìn kóng, Ū chi̍t-lâng, miâ Thoân-tō, chí-tiám góa eng-kai tùi chia khì hit-ê oe̍h-mn̂g, chiah thang siám-pī beh kàu ê siū-khì; góa tú-á beh khì, chiū poa̍h-lo̍h tī chia.
|
基督徒應講：「有1人，名傳道，指點我應該tùi chia去hit 個隘門，才thang閃避beh到ê受氣，我tú仔beh去，就跋落ti chia。」 |
|
Un-chō͘ kóng, Lí siáⁿ-sū bô khòaⁿ-kìⁿ thô͘-tiong ū chio̍h-teng, chiah ta̍h i lâi kiâⁿ.
|
恩助講：「你啥事無看見塗中有石丁，才踏伊來行。」 |
|
Ki-tok-tô͘ ìn kóng, Góa put-chí kiaⁿ-hiâⁿ, chiū tùi chit tiâu lō͘ kóaⁿ-kín cháu, chiah poa̍h-lo̍h tī chia.
|
基督徒應講：「我不止驚惶，就tùi這條路趕緊走，才跋落ti chia。」 |
|
Un-chō͘ kóng, Lí chhun chhiú; i ê chhiú chiū chhun, liâm-piⁿ pui̍h8 i chhut, hō͘ i khiā tī si̍t-tōe, bēng-lēng i chiūⁿ lō͘ koh khí.
|
恩助講：「你伸手。」伊ê手就伸，liâm-piⁿ拔伊出，hō͘伊企tī實地，命令伊上路koh去。 |
|
Hit-sî góa chiū-kūn Un-chō͘, mn̄g i kóng, Tùi Chiong-bông siâⁿ khì hit-ê oe̍h-mn̂g, tio̍h tùi chia keng-kè, siáⁿ-sū m̄ siu-pîⁿ chit só͘-chāi, hō͘ kè-lō͘ lâng an-ún khì?
|
Hit時我就近恩助，問伊講：「Tùi將亡城去hit 個隘門，著tùi chia經過，啥事m̄修平這所在，hō͘過路人安穩去？」 |
|
Un-chō͘ kóng, Che sī chhim thô͘-khut ê só͘-chāi, si̍t-chāi oh--tit siu pîⁿ, chiū-sī lâng chhíⁿ-gō͘ i ê chōe, hiah-ê só͘ hoat-chhut che-tái ú-òe it-chīn lâu-lo̍h tī chia, só͘-í miâ kiò Iu-ut ê thô͘-khut, in-ūi ū chōe ê lâng chai i tit-beh bia̍t-bô ê chêng-hêng, sim-koaⁿ chōe-chōe iu-būn, kiaⁿ-hiâⁿ, ut-chut, lóng-chóng kiat-liat chū-chi̍p tī chia, só͘-í chit-ê tōe chiâⁿ chòe nōa-tōe: nā-sī tōe nōa, m̄-sī Chú ê ì-sù, in-ūi Chú chòe kang ê lâng bat thàn in ê kàm-tok ê kà-sī, chiah ū tio̍h-bôa tī chia, í-keng chi̍t-chheng poeh pah gōa nî, kiám-chhái ōe siu pîⁿ. Bat ê lâng kóng, nā beh siu pîⁿ chit só͘-chāi, m̄ ta̍h-tio̍h ēng hok-im ê kà-sī; koh góa chai hit-ê kà-sī chōe-chōe tiâu, siông-siông tùi sì-kòe taⁿ lâi thūn tī chia; hit-ê só͘ thūn--ê chiū-sī lóng-chóng kóe iu-ut ê kà-sī, kè-kiōng ū kúi-nā bān tàⁿ, chiū kóng i ū chheng-bān tàⁿ ia̍h thang; nā-sī chit tē-á tōe, iû-goân sī thô͘-khut ê só͘-chāi. Án-ni Chú lóng-chóng chòe kang ê lâng, sui-bóng chīn ka-kī só͘ ōe--ê lâi chòe, kàu bé ia̍h tek-khak miâ i chòe Iu-ut ê thô͘-khut. Sui-jiân án-ni, hit-ê thô͘-khut ê tiong-ng, chiàu Chú ê bēng-lēng, ū chio̍h pho͘--teh, an-ún koh kian-kò, nā-sī lo̍h-hō͘ ê sî, hit-ê lâ-sâm thô͘ sì-kòe lâu--lâi, kàu hō͘ chio̍h bōe thang khòaⁿ-kìⁿ, siông-siông in-ūi thâu-khak hîn, gōng-chhò ta̍h-lio̍h hit-ê piⁿ-á--n̍i̍h, koh, sui ū chio̍h-thâu, iā bak-tio̍h lâ-sâm. Lâng nā ji̍p oe̍h-mn̂g, hit-pêng chiū-sī si̍t-tōe.
|
恩助講：「Che是深塗窟ê所在，實在oh得修平，就是人醒悟伊ê罪，hiah-ê所發出che-tái、污穢一盡流落tī chia，所以名講憂鬱ê塗窟，因為有罪ê人知伊tit-beh滅無ê情形，心肝濟濟憂悶、驚惶，鬱卒，攏總結列聚集tī chia，所以這個地成做爛地。但是地爛m̄ 是主ê意思，因為主做工ê人bat 趁in ê監督所教示，才有著磨tī chia，已經1,800外年，kiám-chhái會修平。Bat ê人講，若beh修平這所在，m̄-ta̍h--著用福音ê教示；koh我知hit 個教示濟濟條，常常tùi四界擔來thūn tī chia。Hit個所thūn--ê就是攏總解憂鬱ê教示，計共有幾若萬擔，就講伊有千萬擔亦thang。但是這tè仔地猶原是塗窟ê所在。Án-ni主攏總做工ê人，雖罔盡家己所會--ê來做，到尾亦的確名伊做憂鬱ê塗窟。雖然án-ni，hit個塗窟ê中央，照主ê命令，有石舖--teh，安穩koh堅固。但是落雨ê時，hit個lâ-sâm塗四界流--來，到hō͘石bōe thang看見，kiám-chhái會看見，常常因為頭殼暈，憨錯踏著hit個邊仔--n̍i̍h,koh，雖有石頭，也沐著lâ-sâm。人若入隘門，hit爿就是實地。」 |
|
Hit-sî góa bāng-kìⁿ Īⁿ-chhian tò-khì kàu in chhù, chhù-piⁿ lâi kìⁿ--i. Ū ê khòaⁿ-kìⁿ i tò--lâi, kóng i sī tì-sek; ū ê in-ūi i kam-goān siū gûi-hiám tè Ki-tok-tô͘ khì, chhiò i gû-gōng; iā ū ê kā i kóng, Lí í-keng chhì-khòaⁿ hit-ê lō͘, si̍t-chāi m̄-thang in-ūi sió-khóa ê iân-kò͘ lâi pàng-sak--i. Chiū chhiò i sió-táⁿ; só͘-í Īⁿ-chhian kiàn-siàu, hit-sî chē tī in tiong-kan, lóng m̄-káⁿ kia̍h-thâu, tiap-á-kú i ê bīn chiàu-goân, chèng-lâng hoán-lìn-tńg, chhiò-mē Ki-tok-tô͘, kóng i ka-chiah-āu ōe.
|
Hit時我夢見易遷倒去到in厝，厝邊來見--伊，有ê看見伊倒--來，講伊是智識；有ê因為伊甘願受危險tè基督徒去，笑伊講伊是愚憨；也有ê kā伊講：「你已經試看hit個路，實在m̄-thang因為小可ê緣故án-ni放sak--伊。」就笑伊是小膽。所以易遷見笑，hit時坐tī 中央m̄ 敢舉頭，tiap仔久伊ê面照原，眾人反lìn轉笑罵基督徒，講伊ka-chiah後話。 |
|
Hit-sî Ki-tok-tô͘ toaⁿ-sin bô kio̍k teh kiâⁿ, hn̄g-hn̄g khòaⁿ-kìⁿ chi̍t-lâng, keng-kè chhân--ni̍h lâi, tú-á sio tú-tio̍h. Hit-ê lâng miâ Sè-tì, khiā-khí tī Sio̍k-chêng ê siâⁿ; hit-ê siâⁿ put-chí tōa, kūn Ki-tok-kô͘ só͘ chhut siâⁿ. Hit-ê lâng lio̍h-á chai Ki-tok-tô͘ ê sū-chêng, in-ūi i cháu lī Chiong-bông siâⁿ, hit-sî, lâng tōa pò-iông i ê tāi-chì, m̄-nā tī Ki-tok-tô͘ pún só͘-chāi tiā-tiāⁿ, chiū pa̍t só͘-chāi ia̍h ū kóng. Só-í Sè-tì khòaⁿ-kìⁿ ū thó͘-khùi teh kiâⁿ ê lâng, hêng-chōng put-chí lô-khó͘, phah-sǹg tek-khak sī Ki-tok-tô͘, chiah mn̄g i kóng, Lí ê hêng-chōng kàu chiah lô-khó͘, sī beh to̍h-lo̍h khì?
|
Hit時基督徒單身無kio̍k teh行，遠遠看見1人，經過田--ni̍h來，tú仔相tú著。Hit個人名世智，企起tī俗情ê城；hit個城不止大，近基督徒所出ê城。Hit個人略仔知基督徒ê事情，因為伊走離將亡城，hit時人大播揚伊ê代誌，m̄-nā 基督徒本所在tiāⁿ-tiāⁿ，就別所在亦有講。所以世智看見有吐氣teh行ê人，形狀不止勞苦，扑算的確是基督徒，才問伊講：「你ê形狀到chiah勞苦，是beh to̍h落去？」 |
|
Ki-tok-tô͘ ìn kóng, Si̍t-chāi lô-khó͘! Bē ū lâng pí góa khah lô-khó͘. Lí mn̄g góa beh to̍h-khì, góa kín-mé kā Sian-siⁿ lí kóng, sī beh khì hit-ê oe̍h-mn̂g, góa thiaⁿ-kìⁿ nā kàu hit só͘-chāi, tek-khak ū lâng chí-tiám góa, cháiⁿ-iūⁿ tit-thang thǹg chit-ê tāng-tàⁿ.
|
基督徒應講：「實在勞苦！Bē有人比我較勞苦，你問我beh to̍h去，我緊猛kā先生你講，是beh去hit個隘門，我聽見若到hit所在，的確有人指點我怎樣得thang褪這個重擔。」 |
|
Sè-tì mn̄g kóng, Lí ū bó͘-kiáⁿ á-bô?
|
世智問講：「你有某子抑無？」 |
|
Ki-tok-tô͘ ìn kóng, Ū--ah, chheng-chheng in-ūi che tāng-tàⁿ teh--góa, sui ū bó͘-kiáⁿ, bōe kò͘-tit chhin-chhiūⁿ tai-seng kap in hoaⁿ-hí, ū ná-bô--ni̍h.
|
基督徒應講：「有--ah，清清因為這重擔teh--我，雖有某子，bōe顧tit親像代先kap in歡喜，有若無--n̍i̍h。」 |
|
Sè-tì kóng, Góa nā khǹg lí, lí beh thiaⁿ á m̄?
|
世智講：「我若勸你，你beh 聽抑m̄?」 |
|
Ki-tok-tô͘ ìn kóng, Lí nā ēng hó--ê khǹg góa, góa chiū thiaⁿ li, in-ūi hó ê só͘ khǹg, tú-á sī góa só͘ khiàm-ēng.
|
基督徒應講：「你若用好--ê勸我，我就聽你，因為好ê所勸，tú仔是我所欠用。」 |
|
Sè-tì kóng, Góa taⁿ khǹg lí chit-ê tàⁿ tio̍h kóaⁿ-kín ka-kī pàng hiat-ha̍k, nā bô, sim-koaⁿ kàu lō͘-bé bô pêng-an, koh Siōng-tè só͘ siúⁿ lí lóng-chóng ê hok-khì, ia̍h bōe-tit-thang hióng-siū.
|
世智講：「我今勸你這個擔著趕緊家己放hiat-ka̍k,若無，心肝到路尾無平安，koh上帝所賞賜你攏總ê福氣，亦bōe得thang享受。」 |
|
Ki-tok-tô͘ kóng, Góa ê só͘ kiû chiū-sī ài pàng-khì chit-ê tāng-tàⁿ, chóng-sī góa ka-kī bōe pàng-khì, góa ê pún só͘-chāi ia̍h bô lâng ōe thòe thòe góa pàng--i; só͘-í góa taⁿ kiâⁿ chit-ê lō͘, sī ài pàng chit-ê tāng-tàⁿ tiā-tiāⁿ.
|
基督徒講：「我ê所求就是ài放去這個重擔，總是我家己bōe放去，我ê本所在亦無人會替我放--伊；所以我今行這個路，是ài放這個重擔tiāⁿ-tiāⁿ。」 |
|
Sè-tì kóng, Chūi-á bēng-lēng lí kiâⁿ chit tiâu lō͘, tit-thang pàng chit-ê tàⁿ?
|
世智講：「誰仔命令你行這條路，得thang放這個擔？」 |
|
Ki-tok-tô͘ kóng, Ū chi̍t-ê lâng, chiàu góa khòaⁿ, tek-khak sī chun-kùi ê lâng, miâ kiò Thoân-tō.
|
基督徒講：「有1人，照我看，的確是尊貴ê人，名叫傳道。」 |
|
Sè-tì kóng, Háiⁿ, i khǹg lí kiâⁿ chit tiâu lō͘--lah! Sè-kan lâng só͘ kiâⁿ ê lō͘ bē ū khah gûi-hiám lo-so chit tiâu lō͘, lí nā m̄ thiaⁿ góa, āu-lâi tek-khak ka-kī chai; góa khòaⁿ lí ū tú-tio̍h--lah, in-ūi lí seng-khu ū Iu-ut ê thô͘, che put-kò sī kiâⁿ chit-ê lō͘ ê lâng khí-thâu tú-tio̍h ê kan-khó͘ tiā-tiāⁿ. Góa pí lí khah chōe hè, lí tio̍h thiaⁿ góa khǹg, lí kiâⁿ chit-ê lō͘, sè-bīn tek-khak ū hùi-khì, ià-lái, iau-gō, thǹg-pak-theh, gûi-hiám, to-siong, ok-siù, o͘-àm, sí-sit, lóng-chóng ê chāi-ē, bô chi̍t-hāng m̄ kàu; tek-khak ū che ê sū-chêng, in-ūi chōe-chōe lâng ū chòe kan-chèng, lí kám thang thiaⁿ pông-pian lâng ê ōe, ái-ni sûi-piān ka-kī pàng-sak?
|
世智講：「Háiⁿ，伊勸你行這條路--lah！世間人所行ê路，bē有較危險、囉唆這條路。你若m̄聽我，後--來的確家己知。我看你有tú著--lah，因為你身軀有憂鬱ê塗，che不過行這個路ê人起頭tú著ê艱苦tiāⁿ-tiāⁿ。我比你較濟歲，你著聽我勸，你行這個路，勢面的確有費氣、厭lái、枵餓、褪腹裼、危險、刀傷、惡獸、烏暗、死失，攏總ê災禍，無 1項m̄到。的確有che ê事情，因為濟濟人有做干證，你kám thang聽旁邊人ê話，án-ni隨便家己放sak？」 |
|
Ki-tok-tô͘ kóng, Chun-kà--ah, góa siūⁿ, chí keng-thâu-téng ê tàⁿ, pí lí só͘ kóng lóng-chóng ê sū-chêng, koh khah ū thang kiaⁿ-hiâⁿ. Góa phah-sǹg nā ōe pàng chit-ê tàⁿ, lō͘ ê tiong-kan sui ū che ê kan-khó͘, ia̍h lóng m̄-sái khòa-ì.
|
基督徒講：「尊駕--ah，我想，chí 肩頭頂ê擔，比你所講攏總ê事情，koh較有thang驚惶。我扑算若會放這個擔，路ê中間雖有che ê艱苦，攏m̄-sái 掛意。」 |
|
Sè-tì kóng, Lí khí-thâu án-cháiⁿ-iūⁿ chai ū chit-ê tāng-tàⁿ?
|
世智講：「你起頭án怎樣知有這個重擔？」 |
|
Ìn kóng, Góa tha̍k chhiú-tiong chit ê chheh, liâm-piⁿ chai ū chit-ê tàⁿ.
|
應講：「我讀手中這個冊，liâm-piⁿ知有這個擔。」 |
