Kòa-soaⁿ ke-sià
|
卦山雞舍？ |
| Iûⁿ Chín-jū |
楊振裕 |
|
Pat-kòa-soaⁿ téng ê Chiong-hòa-ko̍k-tiong kéng-sek chiâⁿ-súi, ha̍k-hāu āu-piah ê soaⁿ-phiâⁿ ū kúi keng á kū sok-sià chá tō bô-lâng tòa-a, khǹg leh pha-hng.
|
八卦山頂ê彰化國中景色chiâⁿ súi,學校後壁ê山phiâⁿ有幾間仔舊宿舍早tō無人tòa--a,khǹg leh 拋荒。 |
|
Gūi hāu-tiúⁿ sī ū sim ê lâng, tō lī-iōng chèng-hú “Kong-kiōng ho̍k-bū khòng-tāi chiū-gia̍p kè-ōe ” lāi-bīn phài lâi ha̍k-hāu hia̍p-chō͘ chéng-lí hāu-hn̂g ê jîn-le̍k, hun-hú in kā cha̍p-chháu koah-koah--leh, sì-kè chheng-chheng piàⁿ-piàⁿ--leh, piah chhat-chhat--leh, chhù-téng koh têng-chài hoan-siu, phah-sǹg beh chiong hit-ê só͘-chāi chéng-lí sù-sī, āu-pái thang chò ha̍k-seng-á iá-gōa-oa̍h-tāng kap seng-oa̍h-kàu-io̍k ê iâⁿ-khu.
|
魏校長是有心ê人，tō利用政府「公共服務擴大就業計畫」內面派來學校協助整理校園ê人力，吩咐in kā雜草割割--leh,四界清清piàⁿ-piàⁿ--leh,壁漆漆--leh,厝頂koh重再翻修，拍算beh將hit個所在整理sù-sī,後擺thang做學生仔野外活動kap生活教育ê營區。 |
|
Ū 1-kang, im-ga̍k-pan ê Ong hōe-tiúⁿ lâi ha̍k-hāu, hāu-tiúⁿ tō chhōa I khì chham-koan tú-chiah chéng-lí hó-sè ê iâⁿ-khu, hn̄g-hn̄g khòaⁿ-tio̍h pâng-sià ê mn̂g-bâi ū kòa 1-tè pâi-á , Ong hoe-tiúⁿ chhiò-chhiò kā hāu-tiúⁿ kóng: “Hāu-tiúⁿ--a, lí sī chia̍h-pá siuⁿ êng--hioh? Tī chia khí “Ke-sià”, kám sī beh chhī ke? ”
|
有1工，音樂班ê汪會長來學校，校長tō chhōa伊去參觀tú- chiah整理好勢ê營區，遠遠看著房舍ê門楣有掛1塊牌仔，汪會長笑笑kā校長講：「校長--a,你是食飽siuⁿ閒--hioh? tī chia起“雞舍” ，敢是beh飼雞？」 |
|
Gūi hāu-tiúⁿ thiaⁿ chi̍t-ē soah chhiò--chhut-lâi, tō chhiáⁿ Ong hōe-tiúⁿ ba̍k-kiàⁿ kòa hō͘ hó, koh kiâⁿ khah óa--leh, khòaⁿ khah siông-sè--leh!
|
魏校長聽一下soah笑--出-來，tō請汪會長目鏡掛hō͘好，koh行khah óa--leh,看khah詳細--leh! |
|
Goân-lâi hit tè pâi-á siá--ê sī: Kòa-soaⁿ ngá-sià.
|
原來hit塊牌仔寫ê是：卦山雅舍。 |
