Kiaⁿ bó͘ tāi-tiōng-hu
|
驚某大丈夫 |
| Iûⁿ Chín-jū |
楊振裕 |
|
Lōa táng--ê chin kiaⁿ bó͘, tī chhù--ni̍h hō͘ in bó͘ ah kah lo̍h-té lo̍h-té. I siūⁿ kóng khó-lêng chhōa kòe bó͘ ê cha-po͘-lâng lóng kap I kāng-khoán kiaⁿ bó͘.
|
賴董--ê真驚某，tī厝--ni̍h hō͘ in某壓kah lo̍h-té lo̍h-té。伊想講可能娶過某ê查甫人攏kap伊kāng款驚某。 |
|
Ū 1-kang chá-khí, I chi̍p-ha̍p kong-si lāi-bīn 20 gōa ê chhōa kòe bó͘ ê oân-kang, kā in kóng: “ Chit-má góa beh tiâu-cha--chi̍t-ê, nā sī kiaⁿ bó͘ ê lâng khiā tiàm góa ê tò-chhiú-pêng; m̄ kiaⁿ bó͘--ê khiā tiàm góa ê chiàⁿ-chhiú-pêng! ”
|
有1工早起，伊集合公司內面20外個娶過某ê員工，kā in講：「Chit-má 我beh 調查--chi̍t-ê,nā是驚某ê人khiā tiàm我ê倒手旁；m̄驚某--ê khiā tiàm我ê正手旁！」 |
|
Kiò sī keng-lí leh khí-siáu--leh, hoài oân-kang ta̍k-ê lí khòaⁿ góa, góa khòaⁿ lí, kòe 1-chām-á, bô I ê hoat-tō͘, chí-hó ta̍uh-ta̍uh-á sóa-tín-tāng. Sóa hó-sè--a, tōa-to-sò͘ ê oân-kang lóng khiā tī tò-chhiú-pêng. Kî-koài--ê sī, kéng-jiân ū 1-ê khiā tī I ê chiàⁿ-chhiú-pêng. Koh khah kî-koài--ê sī, ū 2-ê lâng lāu sîn chāi-chāi, lóng khiā tī goân-ūi.
|
叫是經理leh 起siáu--leh,hoài員工ta̍k-ê你看我，我看你，過1-chām-á,無伊ê法度，只好ta̍uh-ta̍uh-á sóa-tín-tāng。Sóa好勢--a,大多數ê員工攏khiā tī倒手旁。奇怪--ê是，竟然有1個khiā tī伊ê正手旁。閣khah奇怪--ê是，有2個人老神在在，攏khiā tī原位。 |
|
Lōa táng--ê kháu-khì bōe siáⁿ sóng ê khoán, tō mn̄g in 2-ê kóng:“Lín ná lóng bô tín-tāng? ”
|
賴董--ê口氣bōe siáⁿ爽ê款，tō問in 2個講：「Lín ná攏無tín-動？」 |
|
Thâu 1-ê oân-kang ìn kóng: “Goán bó͘ ū kau-tài, kong-si lāi-té nā-sī leh hun phài-hē ê sî-chūn, tō ài pó-chhî tiong-li̍p, góa m̄-chiah ē khiā tī tiong-ng. ”
|
頭1個員工應講：「阮某有交代，公司內底nā是leh分派系ê時陣，tō愛保持中立，我m̄-chiah會khiā tī中央。」 |
|
Tē-jī ê oân-kang ìn kóng: “ Goán bó͘ kóng, nā-sī ū siáⁿ-mi̍h tāi-chì ài seng kā pò-kò, góa iáu-bōe khì khà tiān-ōe--leh! ”
|
第2 ê員工應講：「阮某講，nā是有siáⁿ-mi̍h代誌愛先kā報告，我iáu-bōe 去khà電話--leh!」 |
|
Chèng-lâng thiaⁿ liáu lóng it-ti̍t tìm-thâu, o-ló in 2-ê chin-chiàⁿ sī kiaⁿ-bó͘ ê tāi-tiōng-hu, Lōa táng--ê bīn oa̍t ǹg khiā tī chiàⁿ-chhiú-pêng hit-ê oân-kang, mn̄g I kóng:
|
眾人聽了攏一直tìm頭，o-ló in 2個真正是驚某ê大丈夫。賴董--ê面oa̍t向khiā tī正手旁hit個員工，問伊講： |
|
“A̍h lí hiah hó-táⁿ, chin-chhiàⁿ lóng m̄ kiaⁿ bó͘? ”
|
「A̍h你hiah好膽，真正攏m̄驚某？」 |
|
“ Bô--lah, goán bó͘ kóng, lâng chē ê só͘-chāi m̄-thang khì--lah! ”
|
「無--lah,阮某講，人濟ê所在m̄-thang去--lah!」 |
