Khòaⁿ lí ē sí--bōe
|
看你會死--未？ |
| Iûⁿ Chín-jū |
楊振裕 |
|
Chhàu-sái-goân--a hit ki chhùi chin to̍k, in kui chng ê lâng lóng chin thó-ià--i. I piān nā khui-chhùi kóng-ōe, ōe lāi-té lóng ē kâⁿ 1-2 kù pháiⁿ-thiaⁿ ê ōe-bó, hō͘ lâng thiaⁿ liáu kám-kak chiok ngāi-gio̍h, chiok bōe-sóng--ê。
|
臭屎元--a hit支嘴真毒，In規庄ê人攏真討厭--伊。伊便若開嘴講話，話內底攏會kâⁿ 1～2句歹聽ê話母，hō͘人聽了感覺足ngāi-gio̍h,足bōe爽快--ê。 |
|
Ū 1-kang i tī chhù--ni̍h leh phàu-tê ê sî-chūn, keh-piah 1-ê gín-á hiông-hiông tùi gōa-kháu cháu--ji̍p-lâi, bô sè-jī soah kā kòng-phòa 1-tè au-á. I chin siū-khì, tō mē kóng:“Lí chit-ê kâu-sí-gín-á sī bô seⁿ ba̍k-chiu--hioh? Chiah-ni̍h súi ê au-á kā góa lòng-lòng phòa, khòaⁿ lí ē sí--bōe ?” Hit-ê gín-á hō͘ mē kah chiâⁿ m̄ kam-goān.
|
有1工伊tī厝--ni̍h leh泡茶ê時陣，隔壁1個囝仔雄雄對外口走--入-來，無sè-jī soah kā摃破1塊甌仔，伊真受氣，tō罵講：「你chit-ê猴死囝仔是無生目睭--hioh? Chiah-ni̍h súi ê甌仔kā我lòng-lòng破，看你會死--未？」hit-ê囝仔hō͘罵kah chiâⁿ m̄甘願。 |
|
Chiàⁿ-goe̍h chhe i chia̍h chhun-chiú pháiⁿ pak-tó͘, tō khì chhōe i-seng beh the̍h io̍h-á. I-seng mn̄g i tó-ūi leh kan-khó͘?
|
正月初伊食春酒食歹腹肚，tō去chhōe醫生beh the̍h藥仔。醫生問伊叨位leh艱苦？ |
|
"I-seng--a, a̍h góa to it-ti̍t làu-sái làu bōe thêng--lah, khòaⁿ lí ē sí--bōe?“
|
「醫生--a,a̍h我to一直漏屎漏bōe停--lah, 看你會死--未？」 |
|
Hit-ê I-seng thiaⁿ 1-ē khì kah bīn-á chheⁿ-sún-sún.
|
Hit-ê醫生聽1-ē氣kah面仔青筍筍。 |
|
Goân-siau hit-kang thàu-chá, i chi̍t chhut-mn̂g tō khì tú-tio̍h tòa tī Chiàⁿ-hoan-chhù, choan-bûn leh kâng chhoân “Lāu kè-chng” ê tiàm-thâu-ke, i kiâⁿ óa--khì, khui-chhùi kā mn̄g kóng:“Lín tiàm--ni̍h chit-chiām-á seng-lí hó--bô?”
|
元宵hit工透早，伊chi̍t出門tō去tú-tio̍h tòa-tī正番厝，專門leh kâng chhoân「老嫁粧」ê店頭家，伊行óa去，開嘴kā問講：「恁店--ni̍h這chām仔生理好--bò?」 |
|
Hit-ê keng-siau “Hok-siū-pâi âng-bîn-chhn̂g” ê tiàm-thâu-ke chai-iáⁿ chhàu-sái-goân--a kiàn kóng lóng bô hó-ōe, i kóng ê ōe nā ē thiaⁿ--tit, káu-sái mā ē chia̍h--tit, kiaⁿ kóng khah-thêng-á ē khì hō͘ kóng pháiⁿ-ōe “phah-chhek-soe”, tō kóaⁿ-kín tùi-chhùi kā i ìn kóng : “Iáu-siū--o͘ ! Chòe-kīn seng-lí chiâⁿ-bái--leh ! Khòaⁿ lí ē sí--bōe ? ”
|
Hit-ê經銷「福壽牌紅眠床」ê店頭家知影臭屎元--a kiàn講攏無好話，伊講ê話nā會聽--得，狗屎mā會食--得，驚講khah-thêng-á會去hō͘講歹話「phah-chhek-soe」，tō趕緊對嘴kā伊應講：「夭壽--o͘ !最近生理chiâⁿ-bái--neh!看你會死--未？」 |
