Chiú-iú liān-sian
|
酒友煉仙 |
| Iûⁿ Chín-jū |
楊振裕 |
|
1 kûn chiú-iú êng-êng tī tê-bí-tiàm bóng liān-sian. Chiah kóng bô kúi kù, tō koh kóng tùi sio-chiú--khì--a.
|
一群酒友閒閒tī茶米店罔煉仙。才講無幾句，tokoh7講tùi燒酒去--a。 |
|
Khui kim-á-tiàm ê A-hông seng khí-thâu, I kóng: “Góa m̄-káⁿ kóng ka-ki gōa-gâu lim sio-chiú, m̄-koh góa chiú-phín hó, ē hiáu kàm-tēng sio-chiú ê nî-hūn kap kip-sò͘, chai-iáⁿ án-chóaⁿ lim chhut sio-chiú siōng chán ê khì-bī, bo̍k-koái lâng-lâng lóng kiò góa sī “Lim chiú chìn-pō͘-tóng ê chú-sek!” ”
|
開金仔店ê阿鴻先起頭，伊講：「我m̄敢講家己gōa-gâu lim燒酒，m̄-koh我酒品好，會曉鑑定燒酒ê年份kap級數，知影按怎lim出燒酒上讚ê氣味，莫怪人人攏叫我是「lim酒進步黨”ê黨主席！」」 |
|
Tōa-kho͘ Tân--ê khòaⁿ A-hông tī hia leh phù, pháiⁿ-sè kā thuh chhàu, kan-taⁿ chhiò-chhiò kā èng kóng: “Lí o͘-pe̍h kâng bô͘-hóng tóng-miâ, ē khì hông khòng-gī--o͘!”
|
大箍陳--ê看阿鴻tī hia leh屁，歹勢kā thuh臭，干單笑笑kā應講：「你烏白kâng模仿黨名，會去hông抗議--o͘!」 |
|
Chē tī tiān-ōe piⁿ ê niau-á-bîn kóng-ōe--lo͘, I kóng: “Chiú sī ū lêng-sèng ê chúi, lán sī ū lêng-sèng ê lâng, sio-chiú nā 無lim, bān-hāng khang-khòe lóng chò bōe lo̍h sim! Sió-tán--leh, lán chiah choh-hóe lâi-khì kan--2-poe-a!”
|
坐tī電話邊ê貓仔民講話--lo͘,伊講：「酒是有靈性ê水，咱是有靈性ê人，燒酒nā無lim, 萬項khang-khòe攏做bōe lo̍h心！小等--leh,咱才作伙來去乾--2-杯-a!」 |
|
Tê-bí-tiàm ê thâu-ke Pe̍h-mo͘--ê sûi tō chiap lo̍h-khì kóng: “Lâng leh kóng chiú sī bê-hûn-chúi, góa khòaⁿ lim chiú sī kài m̄ hó!” (Chù 1)
|
茶米店ê頭家白毛--ê 隨tō接落去講：「人leh講酒是迷魂水，我看lim酒是kài m̄好！」（註1） |
|
Ông-iâ So͘--ê siaⁿ-thâu siōng pá, I tōa siaⁿ hoah kóng: “Chit-ê ì-kiàn góa chàn-sêng! Sio-chiú iā m̄-sī siáⁿ-mi̍h hó mi̍h, kóng--khí-lâi tō iàn-khì, góa khòaⁿ í-āu nā bô, lán tō mài lim--lah! ”（chù 2）
|
王爺蘇--ê聲頭上飽，伊大聲喝講：「這個意見我贊成！燒酒iā m̄是啥物好物，講--起-來 tō iàn氣，我看以後若無，咱tō mài lim--lah!」（註2） |
|
Tōa-kho͘ Tân--ê tòe So͘--ê ê ōe-bóe kóng: “Sī án-ni--lah, sio-chiú chit hang mi̍h-kiaⁿ, lim chē ē siong koaⁿ, lim chió ē siong sim, ah nā ū êng ê sî sio-khóa-á si̍p--1-poe-á, èng-kai sǹg sī tú-tú-á hó! ”
|
大箍陳--ê tòe蘇--ê ê話尾講：「是按呢--lah,燒酒這項物件，lim濟會傷肝，lim少會傷心，ah若有閑ê時小可仔si̍p --1-2-杯-a,應該算是抵抵仔好！」 |
|
Pùn-sò Ông--ê thiaⁿ kah chiâⁿ sim-sek, sòa-lo̍h-khì èng-kóng: “Kóng-tio̍h lim siú, góa sī chiàⁿ-káng lóng bô-pō͘! ” (chù 3)
|
糞埽王--ê聽kah誠心適，續落去應講：「講著lim燒酒，我是正港攏無步！」（註3）。 |
|
Niau-á Bîn tē-jī-pái hoat-giân, I kóng: “Góa bô siú-táⁿ, m̄-sī chiu-kok eng-hiông, góa lim chiú ē kiaⁿ!”（Chù 4）
|
貓仔民第2 pái發言，伊講：「我無酒膽，m̄是酒國英雄，我lim酒會驚！」（註4） |
|
Iáu sī “Chiú-tóng ê chú-se̍k” A-hông khah ū ha̍k-būn, I khiā khí-lâi chò kiat-lūn, soan-pò kóng: “Chāi-chō lóng sī ū khì-chit ê chiú-sian, m̄-sī chiú-kúi; sio-chiú, lán lóng sī khòaⁿ lâng lim--ê-lah!”(chù 5)
|
猶是「酒黨ê主席」阿鴻khah有學問，伊khiā起來做結論，宣布講：「在座攏是有氣質ê酒仙，m̄是酒鬼；燒酒，咱攏是看人lim--e-lah!」（註5） |
|
(Chù 1) I ê ì-sù sī: sio-chiú m̄-thang kái, kái-tiāu chiâⁿ m̄-hó.
|
（註1）伊ê意思是：燒酒m̄-thang改，改掉誠m̄好。 |
|
(Chù 2) Ì-sù sī: nā-sī bô chhoân, tō bô chiú thang lim; nā-sī ū, tong-jiân mā beh lim.
|
（註2）意思是：若是無chhoân,tō無酒thang lim; 若是有，當然mā beh lim。 |
|
(Chù 3) I kóng ê chit kù ōe chin-chiàⁿ sī kui-châng hó-hó----bô chhò! Sio-chiú tò ji̍p chhùi, nâ-âu sio chioh-kòe, lóng bián pō͘--lah!
|
（註3）伊講ê這句話真正是歸欉好好──無錯！燒酒倒入嘴，嚨喉相借過，攏免哺--lah! |
|
(Chù 4) Niau-á-bîn “m̄-sī tang-chiat tō leh so îⁿ”--a, khòaⁿ tio̍h sio-chiú ná ē-sái bô lim? I ê ì-sù sī lim siuⁿ chió ē kiaⁿ, lán m̄-thang khì hō͘ phiàn--khì!
|
（註4）貓仔民「m̄是冬節tō leh so圓」--a,看著燒酒ná會使無lim?伊ê意思是lim siuⁿ少會驚，咱m̄-thang去hō͘騙去！ |
|
(Chù 5) M̄-sī khiā piⁿ--á khòaⁿ lâng lim, ka-tī lóng m̄ lim--o͘, chhiáⁿ ta̍k-ê m̄-thang gō͘-hōe; i ê ì-sù sī: piān-nā khoàn tio̍h mà-chì--ê, chhōe ū sio-chiú phōaⁿ, tio̍h beh lim--lah!
|
（註5）M̄是khiā邊仔看人lim, 家己攏m̄ lim--o͘, 請逐家m̄-thang誤會；伊ê意思是：便若看著mà-chì--ê,chhōe有燒酒伴，tio̍h beh lim--lah! |
