Am--leh tō hut
|
掩--leh tō hut |
| Iûⁿ Chín-jū |
楊振裕 |
|
A-kiat-á kap lâng khì chham-ka hu̍t-sī ê oa̍h-tāng. Tī lāi-té ta̍k-ke lóng sī chia̍h-sò͘-ê, bô-lâng leh chia̍h-chho.
|
阿吉仔kap人去參加佛寺ê活動。Tī內底逐家攏是食素--ê,無人leh食臊。 |
|
M̄-bat hiah kú bô kha̍p-tio̍h iû-chho, 5,6 ji̍t lo̍h-lâi, A-kiat-á kiông beh tòng bōe-tiâu, beh-àm-á ê sî tō thau-cháu lo̍h-soaⁿ, khì piah 1-óaⁿ gû-bah-mî. Chia̍h-pá chhùi-khó͘ chhit-chhit-leh, koh tùi hu̍t-sī kiâⁿ-tńg-lâi.
|
M̄-bat hiah久無kha̍p著油臊，5,6日落--來，阿吉仔強beh擋bōe-tiâu,beh暗仔ê時tō偷走落山，去piah一碗牛肉麵。食飽嘴口拭拭--leh,koh tùi佛寺行--轉-來。 |
|
Ka-chài! Lóng bô-khì hông hoat-ka̍k.
|
佳哉！攏無去hông發覺。 |
|
Kiâⁿ ji̍p hu̍t-sī, hn̄g-hn̄g ū 1-ê su-hū khòaⁿ-tio̍h, tō siang-chhiú ha̍p-chióng, kā kóng: “O-mí -tô-hu̍t, O-mí ～tô-hu̍t!”
|
行入佛寺，遠遠有一個師父看--著，tō雙手合掌，kā講：「阿彌陀佛，阿彌～陀佛！」 |
|
A-kiat-á chhoah-1-tiô, siūⁿ kóng:Chit-ê su-hū chiah lī-hāi, góa thau-cháu khì chia̍h-chho, I iā chai-iáⁿ? Bô, ná ē kā góa kóng “Am--leh tō hut“?
|
阿吉仔chhoah一tiô,想講：這個師父chiah厲害，我偷走去食臊，伊iā知影？無，ná會kā我講“am--leh tō hut”？ |
|
A-kiat-á chiâⁿ pháiⁿ-sè, bīn lóng âng-khí-lâi, tō kín kā su-hū ha̍p-chióng hôe-lé.
|
阿吉仔chiâⁿ 歹勢，面攏紅--起-來，tō緊kā師父合掌回禮。 |
|
Su-hū kā A-kiat-á khòaⁿ--chi̍t-ē, ta̍uh-ta̍uh-á kóng:”Siān-chāi, siān-chāi!”
|
師父kā阿吉仔看--一-下，ta̍uh-ta̍uh-á講：「善哉，善哉！」 |
|
A-kiat-á sim-koaⁿ lāi lú kiaⁿ-hiâⁿ-lo͘, siūⁿ kóng: Chit-ê su-hū tiāⁿ-io̍h sī oa̍h-hut chài-sè, ah bô góa thau cháu-khì chia̍h-chho iā bô hông hoat-hiān, I ná ē sū-sian lóng chai, koh kā góa kóng “sian-chai, sian-chai”!
|
阿吉仔心肝內愈驚hiâⁿ--lo͘,想講：這個師父tiāⁿ-tio̍h是活佛再世，ah無我偷走去食臊iā無hông發現，伊ná會事先攏知，kohkā我講“sian-chai,sian-chai”！ |
