Sió Ông-chú_08
|
小王子_08 |
|---|---|
| Chng Hūi-phêng | 莊惠平 |
|
Chapter 22
|
第22章 |
|
“Gâu-chá!” Sió-ông-chú kóng.
|
「Gâu早！」小王子講。 |
|
“Gâu-chá!” hun-tō-pôaⁿ ê koán-lí-goân kóng.
|
「Gâu早！」分道盤ê管理員講。 |
|
“Lí tī chia chhòng siáⁿ?” Sió-ông-chú mn̄g kóng.
|
「你tī chia創啥？」小王子問講。 |
|
Hūn-tō-pôaⁿ ê koán-lí-goân kóng, “Góa teh hun-piat lâng-kheh, kui-siuⁿ-kui-siuⁿ, chhian-chhian-bān-bān ê lú-kheh. Góa kā in ê hóe-chhia, liam-mi sàng tùi chiàⁿ-pêng, liam-mi sàng khì tò-pêng.”
|
分道盤ê管理員講：「我teh分別人客，歸廂歸廂，千千萬萬個旅客。我kā in ê火車，liâm-mi送tùi正爿，liâm-mi送去倒爿。」 |
|
Tú-hó ū 1 tâi teng-hóe tiám kah kng-kng-kng ê khoài-chhia, khòng-khòng khòng-khòng sái--kòe-lâi chhiūⁿ tân-lûi kāng-khoán, kā koán-lí-sek iô kah khong-khong-kiò.
|
Tú好有一台燈火點kah光光光ê快車，khòng-khòng khòng-khòng駛--過來像tân雷共款，kā管理室搖kah khong-khong叫。 |
|
Sió-ông-chú kóng, “In hiah chhòng-pōng, sī teh chhōe siáⁿ?”
|
小王子講：「In hiah匆pōng,是teh chhōe啥？」 |
|
Koán-lí-goân kóng, “Liān hóe-chhia ê su-ki, ka-tī mā m̄-chai.”
|
管理員講：「連火車ê司機家己mā m̄知。」 |
|
Koh 1 tâi khoài-chhia tùi bô-kāng hong-hiòng, khòng-khòng khòng-khòng sái--kòe-lâi.
|
Koh一台快車tùi無共方向，khòng-khòng khòng-khòng駛--過來。 |
|
Sió-ông-chú mn̄g-kóng, “In chiah kín tō tò-tńg--lâi?”
|
小王子問講：「In chiah緊就倒轉--來？」 |
|
“In sī bô kāng tâi.” Koán-lí-goân kóng. “Sī bô kāng hong-hiòng ê 1 tâi khoài-chhia.”
|
「In是無共台。」管理員講。「是無共方向ê一台快車。」 |
|
“In tùi ka-tī ê só͘-chāi kám bô móa-ì?”
|
「In對家己ê所在kám無滿意？」 |
|
Koán-lí-goân ìn-kóng, “Chiông-lâi m̄-bat ū lâng, tùi ka-tī ê só͘-chāi móa-ì.”
|
管理員應講：「從來m̄-bat有人對家己ê所在滿意。」 |
|
Khòng-khòng khòng-khòng, tē 3 tâi teng-hóe kng-kng-kng ê khoài-chhia koh sái--lâi-a.
|
Khòng-khòng khòng-khòng,第三台燈火光光光ê快車koh駛--來--a。 |
|
Sió-ông-chú mn̄g kóng, “In sī teh giok toeh 1 tâi chhia ê lú-kheh?”
|
小王子問講：「In是teh jiok toeh一台車ê旅客？」 |
|
Koán-lí-goân kóng, “In bô teh giok. In tī lāi-té khùn, tī hia hah-hì; taⁿ chhun gín-á iōng phīⁿ-á tu tī po-lê-thang téng-bin.”
|
管理員講：「In無teh jiok。In tī內底睏，tī hia hah-hì;今chhun囡仔用鼻仔tu tī玻璃窗頂面。」 |
|
Sió-ông-chú kóng, “Taⁿ gín-á chai-iáⁿ in teh chhōe siáⁿ. In kā sî-kan khai tī pò͘-tiâu thīⁿ--ê ê pò͘-ang-á téng-thâu, pò͘-ang-á piàn kah chin tiōng-iàu, nā ū lâng kā in ê pò͘-ang-á the̍h- -khì, in tō ē khàu--chhut-lâi .......”
|
小王子講：「今囡仔知影in teh chhōe啥。In kā時間開tī布條thīⁿ--ê布尪仔頂頭，布尪仔變kah真重要，若有人kā in ê布尪仔提--去，in就會哭--出來......。」 |
|
“In chiâⁿ hēng-hok.” koán-lí-goân kóng.
|
「In誠幸福。」管理員講。 |
|
Chapter 23
|
第23章 |
|
“Gâu-chá!” Sió-ông-chú kóng.
|
「Gâu早！」小王子講。 |
|
“Gâu-chá!” Seng-lí-lâng ìn-kóng.
|
「Gâu早！」生理人應講。 |
|
Chit-ê sī bē chí chhùi-ta te̍k-hāu-io̍h ê seng-lí-lâng. Thun 1 lia̍p tō ū-hoat-tō͘ tòng 1 lé-pài bián lim-chúi.
|
這個是賣止嘴礁特效藥ê生理人。吞一粒就有法度擋一禮拜免lim水。 |
|
Sió-ông-chú mn̄g-kóng, “Lí sī án-chóaⁿ beh bē chit chióng mi̍h-kiāⁿ?”
|
小王子問講：「你是án-chóaⁿ beh賣這種物件？」 |
|
Seng-lí-lâng kóng, “In ē-tàng séng chin chē sî-kan. Choan-ka thóng-kè kòe, 1 ê lâng 1 lé-pài ē-tàng séng 53 hun-cheng.”
|
生理人講：「In會當省真濟時間。專家統計--過，一個人一禮拜會當省53分鐘。」 |
|
“Lâng kā chit 53 hun-cheng the̍h khì chhòng siáⁿ?”
|
「人kā這53分鐘提去創啥？」 |
|
“Lâng hoaⁿ-hí chò siáⁿ tō chò siáⁿ......”
|
「人歡喜做啥就做啥......」 |
|
Sió-ông-chú tùi ka-tī kóng, “Góa--leh? Góa nā ū 53 hun-cheng liōng-siōng sî-kan, beh ûn-ûn-á kiâⁿ tùi 1 khut chôaⁿ-chúi hia khì......”
|
小王子對家己講：「我--leh？我若有53分鐘liōng-siōng時間，beh 勻勻仔行tùi一khut泉水hia去......」 |
|
Chapter 24
|
第24章 |
|
Góa ê hui-lêng-ki tī soa-bô͘ pháiⁿ--khì, kàu chín sī tē 8 tang, Góa ná thiaⁿ i kóng seng-lí-lâng ê kò͘-sū, ná lim góa chah-lâi--ê ê siōng-bóe 1 ti̍h chúi.
|
我ê飛行機tī沙漠pháiⁿ--去，到chín是第8工，我那聽伊講生理人ê故事，那lim我chah來--ê ê上尾一滴水。 |
|
Góa tùi Sió-ông-chú kóng, “Ah! Lí ê hôe-ek chin súi, m̄-koh góa, góa ê hui-lêng-ki iáu-bōe siu-lí hó, ah góa liân 1 ti̍h chúi to bô, góa nā ē-tàng bān-bān-á kiâⁿ khì chôaⁿ-chúi hia, góa mā chin hēng-hok!”
|
我對小王子講：「Ah！你ê回憶真súi,m̄-koh我，我ê飛行機iáu-bōe修理好，ah我連一滴水都無，我若會當慢慢仔行去泉水hia，我mā真幸福！」 |
|
“I kā góa kóng, “Góa ê pêng-iú hô͘-lî......”
|
伊kā我講：「我ê朋友狐狸.....」 |
|
“Góa ê sió pêng-iú, che kap hô͘-lî bô koan-hē--lah!”
|
「我ê小朋友，che kap狐狸無關係--lah！」 |
|
“Sī án-chóaⁿ bô koan-hē?”
|
「是án-chóaⁿ無關係？」 |
|
“In-ūi góa chhùi-ta kah ti̍h-beh khiau--khì-a.”
|
「因為我嘴礁kah ti̍h-beh khiau--去--a。」 |
|
I thiaⁿ bô góa kóng ê ì-sù, koh ìn-kóng, “Ū 1-ê-á pêng-iú mā-sī bōe-bái, tio̍h-sǹg kóng 1 ê lâng ti̍h-beh sí ê sî. Góa--ò͘, góa kap hô͘-lî chò-pêng-iú kám kak chin boán-ì.......”
|
伊聽無我講ê意思，koh應講：「有一個仔朋友mā是bōe-bái,就算講一個人ti̍h-beh死ê時。我--ò͘,我kap狐狸做朋友感覺真滿意.......。」 |
|
Góa sim-lāi teh siūⁿ, i lóng bô siūⁿ tio̍h gûi-hiám, chá-chêng tō bōe iau, bōe chhùi-ta, i taⁿ 1-sut-á ji̍t-thâu kng tō ū kàu--a .......
|
我心內teh想，伊攏無想著危險，早前都bōe枵、bōe嘴礁，伊taⁿ一屑仔日頭光就有夠--a.......。 |
|
I ti̍t-ti̍t kā góa khòaⁿ koh kóng tio̍h góa só͘ siūⁿ--ê, “Góa mā chhùi-ta......Lán lâi-khì chhōe chéⁿ-chúi......”
|
伊直直kā我看koh講著我所想--ê: 「我mā嘴礁 i8… 咱來去chhōe井水......」 |
|
Góa tián chhut chin thiám ê khoán-sek! Tī soa-bâng-bâng(沙茫茫) ê soa-bô͘- -ni̍h, chhìn-chhái beh chhōe 1 kháu chéⁿ, he tō chin hàm. M̄-koh gún mā sī khí-kiâⁿ--lah.
|
我展出真thiám ê款式！Tī 沙茫茫ê沙漠--ni̍h，chhìn-chhái beh chhōe一口井，he就真hàm。M̄-koh阮mā是起行--lah。 |
|
Gún hm̍h-hm̍h kiâⁿ kúi--a tiám-cheng liáu, ji̍t-thâu lo̍h-soaⁿ--a, thiⁿ-chhiⁿ khái-sí siám-si̍h. Góa chhùi-ta ê koan-hē, soah ū liô-á hoat-sio, hiah-ê thiⁿ-chhiⁿ tō ná tī bāng-tiōng khòaⁿ--tio̍h kāng-khoán.
|
阮hm̍h-hm̍h行幾--仔點鐘了，日頭落山--a，天星開始siám-si̍h。我嘴礁ê關係，煞有略仔發燒，hiah-ê天星就若tī夢中看--著共款。 |
|
Sió-ông-chú ê ōe tī góa kì-tî lāi teh tńg-se̍h.......
|
小王子ê話tī我記持內teh tńg-se̍h.......。 |
|
“Lí mā chhùi-ta--? Lí?” góa mn̄g i.
|
「你mā嘴礁--？你？」我問伊。 |
|
Tān-sī i bô ìn góa ê būn-tê. I taⁿ kán-tan kā góa kóng, “ Chúi khó-lêng tùi sim-lêng sī ū pang-chān--ê.”
|
但是伊無應我ê問題。伊taⁿ簡單kā我講： 「水可能對心靈是有幫贊--ê。」 |
|
Sui-bóng góa bōe liáu-kái i ìn ê ōe, góa mā bô koh kóng siáⁿ......Góa chai-iáⁿ bô èng-kai mn̄g--i, i thiám--a.
|
雖罔我bōe了解伊應ê話，我mā無koh講啥 i8… 我知影無應該問--伊，伊thiám--a。 |
|
I chē- -lo̍h-lâi, chē tiàm góa ê piⁿ-á. Tiām 1-ē-á kú liáu, i chiah kóng, “Hiah-ê chhiⁿ chin súi, in-ūi ū 1 lúi hoe chhàng tī hia, lán khòaⁿ bōe tio̍h......”
|
伊坐--落來，坐tiàm我ê邊--仔。恬一下仔久了，伊chiah講：「Hiah-ê星真súi,因為有一蕊花chhàng tī hia，咱看bōe著......」 |
|
Góa ìn-kóng, “Tong-jiân--a.” Tī goe̍h-kng mî góa tiām-tiām tiàu-oán khòaⁿ lóng sī kui phiàn ê soa-lûn.
|
我應講：「當然--a。」Tī月光暝我恬恬tiàu-oán看攏是歸片ê沙崙。 |
|
I koh kóng, “Soa-bô͘ chin súi.”
|
伊koh講：「沙漠真súi。」 |
|
He sī sū-si̍t. Góa chū-chá lóng chin kah-ì soa-bô͘. 1 ê lâng chē tī soa-lûn téng-bīn, khòaⁿ bô siáⁿ; m̄-koh tī bān-bu̍t tiām-chēng ê sî, soah ū kóa mi̍h-kiāⁿ teh siám-si̍h ......
|
He是事實。我自早攏真合意沙漠。一個人坐tī沙崙頂面，看無啥；m̄-koh tī萬物恬靜ê時，煞有寡物件teh siám-si̍h.......。 |
|
Sió-ông-chú kóng, “Hō͘ soa-bô͘ bí-lē- -ê sī, tī bó͘ só͘-chāi bi̍h 1 kháu chéⁿ .....”
|
小王子講：「Hō͘沙漠美麗--ê是，tī某所在bi̍h一口井.......。」 |
|
Hiông-hiông góa liáu-kái tio̍h chit-ê soa-bô͘ lāi-té sîn-pì ê siám-si̍h. Góa chò gín-á ê sî, tòa kòe 1 keng kó͘-chhù, mā thoân-soat kóng lāi-té ū pó tâi tī hia. Tong-jiân--lah, chū khah-chá tō bô lâng chai-iáⁿ beh án-chóaⁿ khì chhoe hit ê pó, khó-lêng mā bô lâng khì chhōe. Thoân-soat soah hō͘ kui keng chhù chhiong-boán tio̍h sîn-pì. Gún tau ê pì-bi̍t só͘-chāi chhàng 1 ê pì-bi̍t ......
|
Hiông-hiông我了解著這個沙漠內底神祕 ê siám-si̍h。我做 囡仔ê時，tòa過一間古厝，mā傳說講內底有寶tâi tī hia。當然--lah，自較早就無人知影beh án-chóaⁿ去chhōe hit個寶，可能mā無人去chhōe。傳說煞hō͘歸間厝充滿著神祕。阮兜ê秘密所在藏一個祕密 i8…。 |
|
Góa kā Sió-ông-chú kóng, “Hèⁿ, m̄-koán sī chhù, thiⁿ-chhiⁿ iah sī soa-bô͘, hō͘ in bí-lē--ê tō sī hiah-ê khòaⁿ bōe tio̍h ê mi̍h-kiāⁿ!”
|
我kā小王子講：「Hèⁿ，m̄管是厝、天星iah是沙漠，hō͘ in 美麗--ê就是hiah-ê看bōe著ê物件！」 |
|
I kóng, “Góa chin hoaⁿ-hí, lí tông-ì góa hit chiah hô͘-lî kóng ê ōe.”
|
伊講：「我真歡喜，你同意我hit隻狐狸講ê話。」 |
|
Sió-ông-chú khùn--khì-a, góa kā i phō--leh, koh kè-siok kóaⁿ-lō͘. Góa chin kám-tōng, ná phō tio̍h 1 hāng chin chhè ê pó-pòe, kám-kak tē-kiû téng-bīn hoān-sè bô pa̍t hāng mi̍h pí i khah chhè. Tī ū goe̍h-kng ê àm-mî, góa chim-chiok khòaⁿ i pe̍h-sí-sat ê hia̍h-thâu, bui-bui ê ba̍k-chiu, hit chhop hō͘ hong chhoe kah chhiūⁿ hái-éng ê thâu-chang, góa teh siūⁿ, “Góa só͘ khòaⁿ--ê chí-sī gōa-khak niâ, Siōng tiōng-iàu ê mi̍h-kiāⁿ sī khòaⁿ bōe tio̍h--ê......”
|
小王子睏--去--a，我kā伊抱--leh，koh繼續趕路。我真感動，若抱著一項真chhè ê寶貝，感覺地球頂面hoān-sè無別項物比伊較chhè。Tī有月光ê暗暝，我斟酌看伊pe̍h-sí-sat ê hia̍h頭、bui-bui ê 目珠、hit chhop hō͘風吹kah像海湧ê 頭鬃，我teh想：「我所看--ê只是外殼niâ,上重要ê物件是看bōe著--ê.......。」 |
|
Tng-tang i liô-á khui-khui ê chhùi-tûn teh bâ-bui-chhiò ê sî, góa sim-lāi koh teh siūⁿ kóng, “Chit ê khùn- -khì ê Sió-ông-chú hō͘ góa chiah kám-tōng--ê sī i tùi 1 lúi hoe ê khian-sêng, i teh khùn ê sî, liân hit lúi mûi-kùi-hoe ê hêng-iáⁿ chhiūⁿ la̍h-chek kāng-khoán teh kā chiò....... Ah góa soah kám-kak i koh khah nńg-chiáⁿ. Lán èng-kai iōng-sim pó-hō͘; nā-bô 1 chūn bî-bî-á hong tō ē kā i chhoe sit......”
|
Tng-tang伊略仔開開ê嘴唇teh ba-bún笑ê時，我心內koh teh想講：「這個睏--去ê小王子hō͘我chiah感動--ê是伊對一 蕊花ê虔誠，伊teh睏ê時，連hit蕊玫瑰花ê形影都像蠟燭共款teh kā照 i8…。Ah我煞感覺伊koh較軟chiáⁿ。咱應該用心保護；若無一陣微微仔風督會kā伊吹熄......。」 |
|
Tō án-ne kè-sio̍k kiâⁿ, tī thiⁿ phah-phú-kng ê sî, góa hoat-hiān tio̍h 1 kháu chéⁿ.
|
就án-ne繼續行，tī天phah-phú光ê時，我發現著一口井。 |
