Sió Ông-chú_05
|
小王子_05 |
|---|---|
| Chng Hūi-phêng | 莊惠平 |
|
Chapter 13
|
第13章 |
|
Tē 4 lia̍p chhiⁿ sī tòa 1 ê khì-gia̍p-ka. Chit ê lâng chiok bô-êng, tì-sú kah Sió-ông-chú kàu-ūi ê sî, i liān thâu to bô taⁿ--khí-lâi khòaⁿ.
|
第4粒星是tòa一個企業家。這個人足無閒，致使kah小王子到位ê時，伊連頭都無taⁿ--起來看。 |
|
Sió-ông-chú tùi i kóng, “Lí hó! Lí ê hun hoa--khì-a.”
|
小王子對伊講：「你好！你ê薰hoa--去--a。」 |
|
“3 ka 2 sī 5, 5 ka 7, 12, 12 ka 3, 15. Lí hó. 15 ka 7, 22. 22 ka 6, 28. Góa bô sî-kan tiám-hóe. 26 ka 5, 31. O͘h! Án-ne chóng-kiōng 5 ek khòng 162 bān 2731.”
|
「3加2是5，5加7 12，12加3 15。你好。15加7 22，22加6 28。我無時間點火。26加5 31。O͘h！Án-ne 總共5億khòng 162萬2731。」 |
|
“5 ek khòng siáⁿ?”
|
「5億khòng啥？」 |
|
“Hâⁿ? Lí iáu tī chia? 5 ek khòng 1 pah bān ... góa mā kì bōe--khí-lâi... góa ê khang-khòe siuⁿ chē--a! Góa sī kóng chèng-keng--ê, góa, phò-tāu tùi góa lâi kóng m̄ sī khoài-lo̍k! 2 ka 5 sī 7...”
|
「Hâⁿ？你iáu tī chia？5億khòng 1百萬......我mā記bōe--起來......我ê工課siuⁿ濟--a！我是講正經--ê,我，phò-tāu對我來講m̄是快樂！2加5是7......」 |
|
“5 ek khòng jōa-chē?” Sió-ông-chú koh mn̄g kóng. I nā mn̄g tō mn̄g kah ū 1 ki pèⁿ. Khì-gia̍p-ka thâu taⁿ--khí-lâi kóng,
|
「5億khòng偌濟？」小王子koh問講。伊若問就問kah有一 枝柄。企業家頭taⁿ--起來講： |
|
“Góa tòa tī chia, 54 nî lâi, taⁿ bat tú-kòe 3 pái ê kiáu-jiáu, thâu 1 pài sī: 22 nî chêng, hō͘ 1 chiah m̄-chai tùi toeh la̍k--lo̍h-lâi ê gô-á iau-pá chhá, sì-kè gô-gô-kiò, hō͘ góa sǹg-siàu sǹg m̄-tio̍h 4 ê só͘-chāi. Tē 2 pài sī tī 11 nî chêng, hō͘ hong-sip-chèng kiáu-jiáu, góa khiàm ūn-tōng, koh bô sî-kan sàn-pō͘. Góa sī kóng chèng-keng--ê. Ah-nā tē 3 pài tō-sī chín, góa tú-á kóng 5 ek khòng 100 bān......”
|
「我tòa tī chia，54年來，taⁿ bat tú過 3 擺 ê攪擾，頭一擺是22年前，hō͘一隻m̄知tùi toeh落--落來ê鵝仔枵飽吵，四界gô-gô叫，hō͘我算數算m̄著4個所在。第2擺是tī 11年前，hō͘風濕症攪擾，我欠運動，koh無時間散步。我是講正經--ê。Ah若第3 擺就是chín,我tú-á講5億khòng 100 萬......」 |
|
“5 ek khòng jōa-chē?”
|
「5億khòng偌濟？」 |
|
Chit ê khì-gia̍p-ka hut-jiân-kan liáu-kái tio̍h bô-khó-lêng ū-êng khì ìn i ê būn-tê. M̄-chiah kóng,
|
這個企業家忽然間了解著無可能有閒去應伊ê問題。M̄-chiah 講： |
|
“Pah-bān chiah ê sió mi̍h-kiāⁿ, ū-tang-sî ē tī thiⁿ-téng khòaⁿ--tio̍h.”
|
「百萬chiah-ê小物件，有tang時會tī天頂看--著。」 |
|
“Hô͘-sîn?”
|
「蝴蠅？」 |
|
“M̄-sī, sī sè-chiah sè-chiah, ē hoat-kng ê mi̍h-kiāⁿ!”
|
「M̄是，是細隻細隻，會發光ê物件！」 |
|
“Phang?”
|
「蜂？」 |
|
“M̄-sī. Hiah-ê kim-kim ê sè-hāng mi̍h, ē hō͘ pān-tōaⁿ-lâng chò bāng. Tān-sī góa sī chò tōa-tāi-chì- -ê, Góa! Góa bô sî-kan chò-bāng.”
|
「M̄是。Hiah-ê金金ê細項物，會hō͘貧憚人做夢。但是我是做大代誌--ê,我！我無時間做夢。」 |
|
“Ah! Lí sī kóng thiⁿ-chhiⁿ?”
|
「Ah！你是講天星？」 |
|
“Bô-m̄-tio̍h, tō sī thiⁿ-chhiⁿ.”
|
「無m̄著，就是天星。」 |
|
“Lí the̍h 5 ek ê thiⁿ-chhiⁿ chò nî?”
|
「你提5億ê天星做年？」 |
|
“3 ek khòng 162 bān 2731. Góa sī kóng chèng-keng, m̄-sī teh kóng-chhiò.”
|
「5億khòng 162萬2731。我是講正經，m̄是teh講笑。」 |
|
“Lí the̍h chiah-ê thiⁿ-chhiⁿ chò siáⁿ?”
|
「你提chiah-ê天星做啥？」 |
|
“Góa the̍h chiah-ê thiⁿ-chhiⁿ chò siáⁿ?”
|
「我提chiah-ê天星做啥？」 |
|
“Bô-m̄-tio̍h.”
|
「無m̄著。」 |
|
“Bô-siáⁿ. In sī góa ê.”
|
「無啥。In是我ê。」 |
|
“Thiⁿ-chhiⁿ sī lí ê ?”
|
「天星是你ê?」 |
|
“Hèⁿ.”
|
「Hèⁿ。」 |
|
“Tān-sī góa ū khòaⁿ-kòe 1 ê kok-ông, i...... ”
|
「但是我有看過一個國王，伊......」 |
|
“Kok-ông bô só͘-iú-koân, in thóng-tī niâ. Che sī bô siáⁿ kāng. ”
|
「國王無所有權，in統治niâ。Che是無siáⁿ kāng。」 |
|
“Lí ū hiah-ê thiⁿ-chhiⁿ ū siáⁿ lō͘-iōng? ”
|
「你有hiah-ê天星有啥路用？」 |
|
“Hō͘ góa piàn hó-gia̍h--a! ”
|
「Hō͘我變好額--a！」 |
|
“Piàn hó-gia̍h tùi lí ū siáⁿ lō͘-iōng? ”
|
「變好額對你有啥路用？」 |
|
“Nā ū lâng chhōe tio̍h pa̍t-lia̍p ê thiⁿ-chhiⁿ, ē-tàng kā bé--khí-lâi. ”
|
「若有人chhōe著別粒ê天星，會當kā買--起來。」 |
|
Sió-ông-chú tùi ka-tī kóng, “Chit ê lí-lūn ū kóa sêng chiú-kúi. ”
|
小王子對家己講：「這個理論有寡sêng酒鬼。」 |
|
Chóng--sī, i iáu-ū khah-chē ê būn-tê, chiah koh mn̄g kóng, “1 ê lâng án-chóaⁿ ū khó-lêng chiàm hiah-ê thiⁿ-chhiⁿ? ”
|
總--是，伊iáu有較濟ê問題，chiah koh問講： 「一個人án-chóaⁿ有可能佔hiah-ê天星？」 |
|
Khì-gia̍p-ka chin tio̍h-kip tō ìn-kóng“In sī siáng ê ?”
|
企業家真著急就應講：「In是siáng ê?」 |
|
“Góa m̄-chai. Bô lâng ê. ”
|
「我m̄知。無人 ê。」 |
|
“Nā-án-ne khòaⁿ--lâi, in sī góa ê, in-ūi góa seng siūⁿ--tio̍h. ”
|
「若án-ne看--來，in是我ê,因為我先想--著。」 |
|
“Án-ne kám sī lí ê? ”
|
「Án-ne kám是你ê?」 |
|
“Tong-jiân--lah. Lí nā hoat-hiān 1 lia̍p soān-chio̍h, ah-koh bô lâng ê, án-ne i tō sī lí ê. Lí nā hoat-hiān 1 lia̍p tó, ah-koh bô lâng ê, án-ni i tō-sī lí ê. Lí nā seng ū 1 ê í-chêng bô lâng ū ê su-sióng, lí nā khì sin-chhéng choan-lī, án-ne i tō sī lí ê. Ah-nā kóng góa ū ê thiⁿ-chhiⁿ, sī in-ūi chá-chêng bô lâng bat siūⁿ-kòe khì chiàm--in.”
|
「當然--lah。你若發現一粒鑽石，ah-koh無人ê,án-ne 伊就是你ê。你若發現一粒島，ah-koh無人 ê,án-ni伊就是你ê。你若先有一個以前無人有ê思想，你若去申請專利，án-ne伊就是你ê。Ah若講我有ê天星，是因為早前無人bat想過去佔--in。」 |
|
Sió-ông-chú kóng, “Bô-m̄-tio̍h, he sī sū-si̍t, ah-bô lí the̍h in chhòng siáⁿ? ”
|
小王子講：「無m̄著，he是事實，ah無你提in創啥？」 |
|
Khì-gia̍p-ka kóng, “Góa kā in koán-lí. Góa kā in sǹg koh sǹg, che sī bô kán-tan, m̄-koh góa sī chò tōa-tāi-chì ê lâng! ”
|
企業家講：「我kā in管理。我kā in算koh算，che是無簡單，m̄-koh我是做大代誌ê人！」 |
|
Sió-ông-chú iáu-koh bô boán-ì.
|
小王子 iáu-koh 無滿意。 |
|
Sió-ông-chú kóng, “Góa nā ū 1 tiâu niû-á-si chò ê ām-kin, ē-tàng kā i ûi tī ām-kún, tòa leh cháu. Nā sī ū 1 lúi hoe, góa ē-tàng bán- -lo̍h-lâi, chah leh cháu. M̄-koh lí bô-hoat-tō͘ bán lí ê thiⁿ -chhiⁿ--a! ”
|
小王子講：「我若有一條niû-á絲做ê ām巾，會當kā伊圍tī ām-kún,帶leh走。若是有一蕊花，我會當挽--落來，chah leh走。M̄-koh你無法度挽你ê天星--a！」 |
|
“Ah-bô, góa ē-tàng kā in khǹg tī gîn-hāng lāi-té.”
|
「Ah無，我會當kā in囥tī銀行內底。」 |
|
“He sī siáⁿ ì-sù? ”
|
「He是啥意思？」 |
|
“Ì-sù sī kóng góa kā thiⁿ-chhiⁿ ê sò͘-bo̍k siá tòa 1 tiuⁿ chóa, koh kā chit tiuⁿ chóa só tiàm thoah-á lāi-té. ”
|
「意思是講我kā天星ê數目寫tòa一張紙，koh kā這張紙鎖tiàm thoah-á內底。」 |
|
“Án-ne tō oân- -a? ”
|
「Án-ne就完--a？」 |
|
“Án-ne tō ū kàu- -a! ”
|
「Án-ne 就有夠--a！」 |
|
Sió-ông-chú siūⁿ kóng, “Che chin hó sńg, koh chin ū si-ì, bōe siuⁿ giâm-siok.”
|
小王子想講：「Che真好sńg,koh真有詩意，bōe siuⁿ嚴肅。 |
|
Sió-ông-chú tùi giâm-siok ê tāi-chì ê khòaⁿ-hoat kap tōa-lâng sī chha chin chē.
|
小王子對嚴肅ê代誌ê看法kap大人是差真濟。 |
|
I koh tùi hit ê khì-gia̍p-ka kóng, “Góa ū 1 lúi hoe, ta̍k kang iōng chúi kā ak. Góa mā ū 3 lia̍p hóe-soaⁿ, ta̍k lé-pài lóng kā in piàⁿ-sàu kah chin chheng-khì. (góa ū piàⁿ-sàu 1 lia̍p sí ê hóe-soaⁿ, bô lâng chai kóng i ē koh po̍k-chà bōe?) Che tùi góa ê hóe-soaⁿ ū lō͘-iōng, mā tùi góa ê hoe ū lō͘-iōng. Ah lí tùi hia ê thiⁿ-chhiⁿ ā bô lō͘-iōng- -a......”
|
伊koh對hit個企業家講：「我有一蕊花，逐工用水kā ak。我mā有3粒火山，逐禮拜攏kā in拚掃kah真清氣。(我有拚掃一粒死ê火山，無人知講伊會koh爆炸bōe?) Che對我ê火山有路用，mā對我ê花有路用。Ah你對hia ê天星ā無路用--ai8…」 |
|
Khì-gia̍p-ka, chhùi-á khui-khui, bô châi-tiāu ìn. Chū-án-ni Sió-ông-chú tō cháu--a.
|
企業家，嘴仔開開，無才調應。自án-ni 小王子就走--a。 |
|
“Hiah-ê tōa-lâng chin-chiàⁿ lóng hiah kî-koài.” 1 lō͘ siōng ti̍t-ti̍t tùi ka-tī kóng .
|
「Hiah-ê大人真正攏hiah奇怪。」一路上直直對家己講。 |
|
Chapter 14
|
第14章 |
|
Tē 5 lia̍p thiⁿ-chhiⁿ chin kî-koài. I sī só͘-ū hêng- chhiⁿ lāi-té siōng sè-lia̍p--ê. Hia tú-á-hó ū kàu só͘-chāi khǹg 1 pha lō͘-teng kap 1 ê tiám-teng ê lâng. Sió-ông-chú siūⁿ bōe-hiáu kóng, thiⁿ-téng bó͘ 1 ê só͘-chāi, tī 1 lia̍p bô chhù koh bô khiā-ke ê thiⁿ-chhiⁿ téng-bīn, 1 pha lō͘-teng kap 1 ê tiám-teng ê lâng ū siáⁿ lō͘-iōng. Sui-bóng sī án-ni, i mā sī tùi ka-tī kóng,
|
第5粒天星真奇怪。伊是所有行星內底上細粒--ê。Hia tú-á好有夠所在囥一pha路燈kap一個點燈ê人。小王子想bōe曉講，天頂某一個所在，tī一粒無厝koh無企家ê天星頂面，一pha路燈kap一個點燈ê人有啥路用。雖罔是án-ni，伊mā是對家己講： |
|
“Chit ê lâng khó-lêng sī chin hàm, m̄-koh bōe pí hit ê kok-ông, hit ê hi-hoa--ê, hit ê khì-gia̍p-ka, hit ê chiú-kúi khah hàm. Siōng bô i ê khang-khòe ū ì-gī. I nā tiám lō͘-teng hō͘ to̍h ê sî-chūn, tō ná-chhiūⁿ hō͘ 1 lia̍p chhiⁿ iah-sī 1 lúi hoe oa̍h--khí-lâi. I kā lō͘-teng chhi̍h8-hoa ê sî, tō sī hō͘ hit lúi hoe iah-sī hō͘ hit lia̍p chhiⁿ lo̍h-bîn. He sī chin hó ê thâu-lō͘. Che chin-chiàⁿ ū lō͘-iōng, in-ūi i sī súi--ê.”
|
「這個人可能是真hàm,m̄-koh bōe比hit個國王、hit個虛華--ê、hit個企業家、hit個酒鬼較hàm。上無伊ê工課有意義。伊若點路燈hō͘著ê時陣，就若像hō͘一粒星抑是一蕊花活--起來。伊kā路燈chhi̍h8-hoa ê時，就是hō͘ hit蕊花抑是hō͘ hit粒星落眠。He是真好ê頭路。Che真正有路用，因為伊是súi--ê。」 |
|
Sió-ông-chú peh chiūⁿ hit lia̍p thiⁿ-chhiⁿ ê sî, kiong-kiong-kèng-kèng hiòng hit ê tiám teng-hóe ê lâng piáu-sī kèng-ì, koh kóng, “Gâu-chá! Lí tú-á sī án-chóaⁿ kā lō͘-teng iōng hō͘ hoa?”
|
小王子peh上hit粒天星ê時，恭恭敬敬向hit個點燈火ê人表示敬意，koh講：「Gâu早！你tú-á是án-chóaⁿ kā路燈用hō͘ hoa？」 |
|
Tiám-teng ê lâng ìn kóng, “Che sī sìn-hō. Gâu-chá!”
|
點燈ê人應講：「Che是信號。Gâu早！」 |
|
“Sìn-hō sī siáⁿ?”
|
「信號是啥？」 |
|
“Tō-sī ìm-hoa góa ê lō͘-teng. Àm-an!”
|
「就是ìm-hoa我ê路燈。暗安！」 |
|
I koh kā teng tiám to̍h.
|
伊koh kā燈點著。 |
|
“Sī án-chóaⁿ koh kā teng tiám to̍h?”
|
「是án-chóaⁿ koh kā燈點著？」 |
|
Tiám-teng ê lâng ìn-kóng, “Che sī sìn-hō.”
|
點燈ê人應講：「Che是信號。」 |
|
Sió-ông-chú kóng, “Góa bô liáu kái.”
|
小王子講：「我無了解。」 |
|
Tiám-teng ê lâng kóng, “Bô siáⁿ hó liáu-kái--ê. Sìn-hō tō sī sìn-hō. Gâu-chá!”
|
點燈ê人講：「無啥好了解--ê。信號就是信號。Gâu早！」 |
|
I kā teng ìm-sit.
|
伊kā燈ìm-sit。 |
|
Koh iōng 1 tiâu ū kek-chōa ê âng-sek chhiú-kin-á chhit hia̍h-thâu, kóng,
|
Koh用一條有格chōa ê紅色手巾仔chhit額頭，講： |
|
“Góa tī chia chò--ê sī 1 hāng chin bô-êng ê khang-khòe. Chit ê khang-khòe chá-chêng khah ū chêng-lí. Chái-khí tiám teng-hóe, àm-sî kā ìm-hoa. Ji̍t- -sî chhun ê sî-kan, ē-tàng hioh-khùn , àm-sî làng-phāng tō ē-sái khùn ......”
|
「我tī chia做--ê是一項真無閒ê工課。這個工課早前較有情理。早起點燈火，暗時kā ìm-hoa。日--時chhun ê時間，會當歇睏，暗時làng-phāng就會使睏......」 |
|
“Nā án-ne chit kúi nî lâi, sìn-hō ū piàn--bô?”
|
「若án-ne這幾年來，信號有變--無？」 |
|
Tiám-teng ê lâng kóng, “Sìn-hō bô piàn, būn-tê tō chhut tī chia! Thiⁿ-chhiⁿ 1 nî pí 1 nî tńg khah kín, ah sìn-hō bô piàn!”
|
點燈ê人講：「信號無變，問題就出tī chia！天星一年比一年轉較緊，ah信號無變！」 |
|
Sió-ông-chú kóng, “Nā án-ne.....”
|
小王子講：「若án-ne......」 |
|
“Án-ne, chím-á i 1 hun-cheng tńg 1 piàn, ah góa liān 1 bió tō bô thang hioh-khùn. Góa ta̍k hun-cheng tiám 1 pái koh ìm-hoa 1 pái!”
|
「Án-ne，chím仔伊一分鐘轉一遍，ah我連一秒都無thang歇睏。我逐分鐘點一擺 koh ìm-hoa一擺！」 |
|
“Che tō chin kî-koài--a! Lí ê 1 kang tō sī 1 hun-cheng!”
|
「Che就真奇怪--a！你ê一工就是一分鐘！」 |
|
“1-tiám-á to bô kî-koài.” tiám-teng ê lâng kóng, “Goán kóng 1 kò-goe̍h--a.”
|
「一點仔就無奇怪。」點燈ê人講：「咱講一個月--a。」 |
|
“1 kò-goe̍h?”
|
「一個月？」 |
|
“Bô-chhò (kui-châng hó-hó), 30 hun-cheng, 30 kang. Gâu-chá!”
|
「無錯(歸欉好好)，30分鐘，30工。Gâu早！」 |
|
I koh khì tiám i ê lō͘-teng.
|
伊koh去點伊ê路燈。 |
|
Sió-ông-chú chim-chiok kā khòaⁿ, khòaⁿ i tùi sìn-hō ê khang-khòe hiah chīn-tiōng, tùi i kám-kak ū hó-kám. Siūⁿ tio̍h khah-chá sóa í-á cháu-chhōe ji̍t-lo̍h ê tāi-chì. I chin siūⁿ beh pang-chō͘ i ê pêng-iú. M̄-chiah Sió-ông-chú kóng,
|
小王子斟酌kā看，看伊對信號ê工課hiah盡忠，對伊感覺有好感。想著較早徙椅仔走chhōe日落ê代誌。伊真想beh幫助伊ê朋友。M̄-chiah小王子講： |
|
“Lí kám chai-iáⁿ .....Góa ū 1 ê phiat-pō͘ ē-tàng hō͘ lí beh hioh-khùn tō hioh-khún ......”
|
「你kám知影......我有一個phiat步會當hō͘你beh歇睏就歇睏......」 |
|
Tiám-teng ê lâng kóng, “Góa ti̍t-ti̍t siūⁿ beh hioh-khùn.”
|
點燈ê人講：「我直直想beh歇睏。」 |
|
In-ūi 1 ê lâng, ē-tàng chīn-chek, koh ē-tàng khah êng.
|
因為一個人，會當盡責，koh會當較閒。 |
|
Sió-ông-chú kè-sio̍k kái-soeh kóng,
|
小王子繼續解說講： |
|
“Lí ê thiⁿ-chhiⁿ sī chiah sè-lia̍p, lí kan-taⁿ kiâⁿ 3 pō͘ tō cháu 1 liàn. Lí nā ûn-ûn-á kiâⁿ, ji̍t-thâu tō lóng bōe lo̍h-soaⁿ. Lí nā beh hioh-khùn ê sî tō khì sàn-pō͘, ji̍t--sî tō chhiūⁿ lí ǹg-bāng--ê, ke chin kú-tn̂g.”
|
「你ê天星是chiah細粒，你kan-taⁿ行3步就走一liàn。你若ûn-ûn-á行，日頭就攏bōe落山。你若beh歇睏ê時就去散步，日--時就像你向望--ê,加真久長。」 |
|
Tiám-teng ê lâng kóng, “Che tùi góa, ā bô ke jōa-chē ê lī-piān. Góa 1-sì-lâng siōng kah-ì ê tāi-chì tō sī khùn.”
|
點燈--ê講：「Che對我，ā無加外濟ê利便。我一世人上kah意ê代誌就是睏。」 |
|
Sió-ông-chú kóng, “Án-ne tō bô-hoat-tō͘--a.”
|
小王子講：「Án-ne就無法度--a。」 |
|
“Sī bô-hoat-tō͘. Gâu-chá!” Tiám-teng ê lâng kóng.
|
「是無法度。Gâu早！」點燈ê人講： |
|
I koh ìm-hoa i ê lō͘-teng.
|
伊koh ìm-hoa伊ê路燈。 |
|
Sió-ông-chú kè-sio̍k kóaⁿ-lō͘ ê sî, tùi ka-tī kóng, chit ê lâng ē hō͘ só͘-ū kî-thaⁿ ê lâng (tō-sī kok-ông, hi-hoâme, chiú-kúi, khì-gia̍p-ka) khòaⁿ bô-khí, tān-sī góa kám-kak bô-hàm ê lâng taⁿ i niâ. Che khó-lêng sī in-ūi i iáu siūⁿ-tio̍h ka-tī í-gōa ê tāi-chì.
|
小王子繼續趕路ê時，對家己講，這個人會hō͘所有其他ê人 (就是國王、虛花--ê、酒鬼、企業家)看無起，但是我感覺無hàm ê人 taⁿ伊niâ。Che可能是因為伊iáu想著家己以外ê代誌。 |
|
Sió-ông-chú thó͘ tōa-khùi kám-kak chin khó-sioh, koh tùi ka-tī kóng, “Kan-taⁿ chit ê lâng ē-tàng kap i chò pêng-iú niâ. M̄-koh i ê thiⁿ-chhiⁿ si̍t-chāi siuⁿ sè--a, bô só͘-chāi thang tòa 2 ê lâng.”
|
小王子吐大氣感覺真可惜，koh對家己講：「Kan-taⁿ這個人會當kap伊做朋友niâ。M̄-koh伊ê天星實在siuⁿ細--a，無所在thang tòa 2個人。」 |
|
Sió-ông-chú m̄-káⁿ thán-pe̍k kóng--chhut-lâi, koh-khah khó-sioh--ê sī lī-khui 1 kang ū 1444 pài ji̍t-lo̍h ê thiⁿ-chhiⁿ!
|
小王子m̄-káⁿ坦白講--出來，koh-khah可惜--ê是離開一工有1444 擺日頭落山ê天星！ |
|
Chapter 15
|
第15章 |
|
Tē 6 lia̍p hêng-seng ū tú-á hit lia̍p ê 10 pōe tōa. Téng-bīn tòa 1 ê Lāu-lâng, it-ti̍t teh pian-siá chin kāu ê chheh.
|
第6粒行星有tú-á hit粒 ê 10倍大。頂面tòa一個老人，一直 teh編寫真厚ê冊。 |
|
I khòaⁿ tio̍h Sió-ông-chú ê sî, hoah kóng, “Oah! Hia lâi 1 ê thàm-hiám-ka(explorer)!”
|
伊看著小王子ê時，喝講：「Oah！Hia來一個探險家(explorer)！」 |
|
Sió-ông-chú chē tiàm toh-á téng hioh 1-ē-á chhoán. I kiâⁿ hiah chē só͘ -chāi koh kiâⁿ hiah hn̄g.
|
小王子坐tiàm桌仔頂歇一下仔喘。伊行hiah濟所在koh行hiah遠。 |
|
Lāu-lâng mn̄g kóng, “Lí tòa toeh?”
|
老人問講：「你tòa toeh？」 |
|
Sió-ông-chú mn̄g-kóng, “Chit pún chiah kāu sī siáⁿ chheh? Lí tī chia leh chhòng siáⁿ?”
|
小王子問講：「這本chiah厚是啥冊？你tī chia leh創啥？」 |
|
Lāu-lâng ìn-kóng, “Góa sī tē-lí ha̍k-ka.”
|
老人應講：「我是地理學家。」 |
|
“Tē-lí ha̍k-ka sī siáⁿ?”
|
「地理學家是啥？」 |
|
“Sī 1 ê chai-iáⁿ toeh ū hái, ū hô, ū siâⁿ-chhī, ū soaⁿ-meh kap soa-bô͘ ê kho-ha̍k-ka.”
|
「是一個知影toeh有海、有河、有城市、有山脈kap沙漠ê科學家。」 |
|
Sió-ông-chú kóng, “He chin chhù-bī, che ē-tàng kóng sī 1 hāng chiàⁿ-káng ê thâu-lō͘!”Koh kā chit-ê tē-lí ha̍k-ka ê thiⁿ-chhiⁿ khòaⁿ 1 liàn. Chit lia̍p sī i khòaⁿ--kòe siōng chòng-koan, siōng ui-giâm--ê.
|
小王子講：「He真趣味，che會當講是一項正港ê頭路！」Koh kā這個地理學家ê天星看一liàn。這粒是伊看--過上壯觀、上威嚴--ê。 |
|
Sió-ông-chú kóng, “Lí ê chhiⁿ chin súi, kám ū hái?”
|
小王子講：「你ê星真súi,kám有海？」 |
|
Lāu-lâng kóng, “Góa nah chai.”
|
老人講：「我哪知。」 |
|
Sió-ông-chú chin sit-bōng, kóng, “Ah! Ū soaⁿ--bô?”
|
小王子真失望，講：「Ah！有山--無？」 |
|
Lāu-lâng kóng, “Góa nah chai.”
|
老人講：「我哪知。」 |
|
“Ah ū siâⁿ-chhī, hô, soa-bô͘ --bô?”
|
「Ah有城市、河、沙漠--無？」 |
|
Lāu-lâng kóng, “Góa mā lóng m̄ chai.”
|
老人講：「我mā攏m̄知。」 |
|
“Ah m̄-koh lí sī tē-lí ha̍k-ka--neh!”
|
「Ah m̄-koh你是地理學家--neh！」 |
|
Lāu-lâng kóng, “Bô-m̄-tio̍h, m̄-koh góa m̄-sī mō͘ -hiám choan-ka, tī gún ê chhiⁿ téng-bīn bô pòaⁿê mō͘ -hiám choan-ka. Tē-lí ha̍k-ka ê khang-khòe m̄-sī khì sǹg siâⁿ-chhī, hô, soaⁿ, hái-oan, hái kap soa-bô͘. Tē-lí ha̍k-ka thài tiōng-iàu--leh, m̄-chiah bô-hoat-tō͘ khì sàn-pō͘. Lī bōe khui kha, m̄-koh i tī hia chi̍h-chiap thàm-hiám choan-ka, mn̄g in, kin-kù in ê hôe-ek kì--lo̍h-lâi. In hôe-ek nā khah chhù-bī--ê, tē-lí ha̍k-ka tō khì tiāu-cha hit ê thàm-hiám choan-ka ê tō-tek phín-hēng.”
|
老人講：「無m̄著，m̄-koh 我m̄是冒險專家，tī阮ê星頂面無半個冒險專家。地理學家ê工課m̄是去算城市、河、山、海灣、海kap沙漠。地理學家thài重要--leh，m̄-chiah無法度去散步。離bōe開腳，m̄-koh伊tī hia chi̍h-chiap探險專家，問in，根據in ê回憶記--落來。In回憶若較趣味--ê,地理學家就去調查hit個探險專家ê道德品行。」 |
|
Sió-ông-chú kóng, “Sī án-chóaⁿ ài án-ne?”
|
小王子講：「是án-chóaⁿ ài án-ne？」 |
|
“Khah-sú thàm-hiám choan-ka nā kóng pe̍h-chha̍t, ē kā tē-lí chheh tòa lâi chai-eh. Chiú lim siuⁿ chē ê thàm-hiám choan-ka mā sī kāng-khoán.”
|
「假使探險專家若講白賊，會kā地理冊帶來災厄。酒lim siuⁿ濟ê探險專家mā是共款。」 |
|
Sió-ông-chú mn̄g-kóng, “Sī án-chóaⁿ ē án-ne?”
|
小王子問講：「是án-chóaⁿ會án-ne？」 |
|
“In-ūi lim-chiú ê lâng ē kā 1 hāng mi̍h-kiāⁿ khòaⁿ chò 2 hāng, án-ne tē-lí ha̍k-ka ē kā pún-lâi 1 lia̍p soaⁿ, siá chò 2 lia̍p soaⁿ.”
|
「因為lim酒ê人會kā一項物件看做兩項，án-ne地理學家會kā本來一粒山，寫做兩粒山。」 |
|
Sió-ông-chú kóng, “Góa bat 1 ê lâng, khó-lêng sī 1 ê bái ê thàm-hiám choan-ka.”
|
小王子講：「我bat一個人，可能是一個bái ê探險專家。」 |
|
“Che ū khó-lêng. Nā thàm-hiám choan-ka phín-hēng chèng-bêng bô-būn-tê liáu, chiah koh mn̄g i ê hoat-hiān.”
|
「Che有可能。若探險專家品行證明無問題了，chiah koh問伊ê發現。」 |
|
“Kám tio̍h cháu khì khòaⁿ?”
|
「Kám著走去看？」 |
|
“M̄-bián, án-ne siuⁿ mâ-hoân, iau-kiû thàm-hiám choan-ka the̍h-chhut chèng-kù. Chhiūⁿ kóng i hoat-hiān 1 lia̍p soaⁿ, tō ài i tòa kóa tōa-lia̍p ê chio̍h-thâu.”
|
「M̄免，án-ne siuⁿ麻煩，要求探險專家提出證據。像講伊發現一粒山，就ài伊帶寡大粒ê石頭。」 |
|
Tē-lí ha̍k-ka tu̍t-jiân kám-kak chin kám-tōng kóng,
|
地理學家突然感覺真感動講： |
|
“Ah lí, lí kám bô tòa chin hn̄g? Lí sī thàm-hiám choan-ka, Chhiáⁿ lí kā góa kóng lín thiⁿ-chhiⁿ ê tāi-chì.”
|
「Ah你，你kám無tòa真遠？你是探險專家，請你kā我講 lín天星ê代誌。」 |
|
Hit ê lāu-lâng m̄-chiah hian-khui i ê notebo͘k, khai-sí siah iân-pit. I seng kā thàm-hiám choan-ka só͘ kóng--ê iōng iân-pit siá--lo̍h-lâi, tán kàu thàm-hiám choan-ka the̍h chhut chèng-kù liáu, chiah iōng ba̍k-chúi kì--lo̍h-lâi.
|
Hit個老人m̄-chiah掀開伊ê notebo͘k，開始削鉛筆。伊先kā探險專家所講--ê用鉛筆寫--落來，等到探險專家提出證據了，chiah用墨水記--落來。 |
|
Lāu-lâng chin ǹg-bāng, tō kóng,“Hó--bô?”
|
老人真向望，就講：「好--無？」 |
|
Sió-ông-chú kóng“O͘h! Góa tòa ê só͘-chāi bô siáⁿ chhù-bī, i chin sè, téng-bīn ū 3 lia̍p hóe-soaⁿ, 2 lia̍p sī oa̍h--ê, 1 lia̍p sī sí--ê, m̄-koh bô lâng chai i ē koh po̍k-chà ah-bōe?”
|
小王子講：「O͘h！我tòa ê所在無啥趣味，伊真細，頂面有三粒火山，兩粒是活--ê,一粒是死--ê,m̄-koh無人知伊會koh爆炸ah-bōe?」 |
|
Lāu-lâng kóng, “Bô lâng chai”
|
老人講：「無人知？」 |
|
“Góa mā ū 1 lúi hoe.”
|
「我mā有一蕊花。」 |
|
Lāu-lâng kóng,“Goán bô teh siá hoe.”
|
老人講：「阮無teh寫花。」 |
|
“Sī án-chóaⁿ--bô? Hoe tī gún hia sī siōng súi--ê!”
|
「是án-chóaⁿ--無？花tī阮hia是上súi--ê!」 |
|
Lāu-lâng kóng, “In-ūi hoe taⁿ oa̍h 1-ba̍k-ni̍h-á niâ.”
|
老人講：「因為花taⁿ活一目ni̍h-á niâ。」 |
|
“Oa̍h 1-ba̍k-ni̍h-á ê ì-sù sī siáⁿ?”
|
「活一目ni̍h-á ê意思是啥？」 |
|
Lāu-lâng kóng, “Tē-lí chheh sī só͘-ū ê chheh tiong-kan siōng pó-kùi--ê. Chiah-ê chheh lóng bōe kòe-sî. 1 lia̍p soaⁿ chin chió ē piàn i ê ūi, hái mā chin chió ta--khì. Goán siá--ê sī éng-oán ê mi̍h-kiāⁿ.”
|
老人講：「地理冊是所有ê冊中間上寶貴--ê。Chiah-ê冊攏bōe過時。一粒山真少會變伊ê位，海mā真少礁--去。阮寫--ê是永遠ê物件。」 |
|
“M̄-koh hóe-soaⁿ sí--khì, ū khó-lêng koh oa̍h-- khí-lâi.”
|
「M̄-koh火山死--去，有可能koh活--起來。」 |
|
Sió-ông-chú chhap-chhùi kóng, “Oa̍h 1-ba̍k-ni̍h-á sī siáⁿ?”
|
小王子插嘴講：「活一目ni̍h-á是啥？」 |
|
Tē-lí ha̍k-ka kóng, “M̄-koán hóe-soaⁿ sī oa̍h--ê, ia̍h sī sí--ê, tùi goán lâi kóng lóng sī kāng-khoán. Goán koan-sim--ê sī soaⁿ, soaⁿ sī bōe-piàn--ê.”
|
地理學家講：「M̄管火山是活--ê,抑是死--ê,對阮來講攏是共款。阮關心--ê是山，山是bōe變--ê。」 |
|
“M̄-koh siáⁿ sī ‘Oa̍h 1-ba̍k-ni̍h-á’?” Sió-ông-chú koh mn̄g, i chit sì-lâng, nā hō͘ i mn̄g--tio̍h--ê, tō mn̄g kah ū 1 ki pèⁿ.
|
「M̄-koh啥是『活一目ni̍h-á』？」小王子koh問，伊這世人，若hō͘伊問--著--ê,就問kah有一枝柄。 |
|
“I ê ì-sù sī ‘I sûi-sî ū sí- -khì ê gûi-hiám’. ”
|
「伊ê意思是『伊隨時有死--去ê危險。』」 |
|
“Góa ê hoe ū sûi-sî sí--khì ê gûi-hiám?”
|
「我ê花有隨時死--去ê危險？」 |
|
“Bô-m̄-tio̍h!”
|
「無m̄著！」 |
|
“Góa ê hoe sī ‘Oa̍h 1-ba̍k-ni̍h-á.’ ” Sió-ông-chú ka-tī kóng ka-tī ìn, “I kan-taⁿ ū 4 ki chū-ūi ê chhì teh té-khòng chit ê sè-kài, góa soah kā i lâu tiàm chhù--ni̍h pàng ko͘-chiáu.”
|
「我ê花是『活一目ni̍h-á。』」小王子家己講家己應：「伊kan-taⁿ有4枝自?ê刺teh抵抗這個世界，我煞kā伊留tiàm厝--ni̍h放孤鳥。」 |
|
Sió-ông-chú thâu-pái kám-kak hiō-hóe, m̄-koh i koh the̍h khí ióng-khì.
|
小王子頭擺感覺後悔，m̄-koh伊koh提起勇氣。 |
|
Sió-ông-chú mn̄g kóng, “Lí kiàn-gī góa khì toeh pài-hóng khah hó?”
|
小王子問講：「你建議我去toeh拜訪較好？」 |
|
Tē-lí ha̍k-ka kóng, “Tē-kiû, i ū chin hó ê miâ-siaⁿ.”
|
地理學家講：「地球，伊有真好ê名聲。」 |
|
M̄-chiah Sió-ông-chú tō cháu--a, sim-lāi soah su-su-liām-liām i ê hoe.
|
M̄-chiah小王子就走--a，心內煞思思念念伊ê花。 |
