Papa
|
Papa |
| Tēⁿ Gio̍k-hōng |
鄭玉鳳 |
|
Ū chi̍t-kang, kok-hāu-á pàng-o̍h tńg-kàu chhù, chu-pau khǹg--leh, tō khì chhân-piⁿ ê chhài-hn̂g khòaⁿ a-pà giâ tî-thâu teh ku̍t chhài-kó͘.
|
有1工, 國校á放學tńg到厝, 書包khǹg--leh, 就去田邊ê菜園看a-pà giâ鋤頭teh ku̍t菜kó͘. |
|
Soaⁿ-piⁿ ji̍t-thâu tng beh lo̍h-soaⁿ, thin-sek ta̍uh-ta̍uh-á àm--lo̍h-lâi, chhân--ni̍h ê chhek-chiáu-á tōa-tīn tōa-tīn poe-khì hioh tī tek-phō lāi, góa kap a-pà tī chhài-hn̂g thóaⁿ-chháu, péng-thô͘......ná chò ná khai-káng. A-pà hiông-hiông kā góa khó chi̍t-ê būn-tê: “A-me-á, tek-á ùi toeh lâi--ê?” Góa siūⁿ-siūⁿ--leh, ìn kóng: “Thiⁿ-tē seⁿ-sêng--ê-lah!” Che sī a-kong kà--ê, siáⁿ-mi̍h tāi-chì nā chhōe bô tap-àn, tō-si “thin-tē seⁿ-sêng--ê”.
|
山邊日頭tng beh落山, 天色ta̍uh-ta̍uh-á暗--落-來, 田--ni̍h ê雀鳥á大tīn大tīn飛去hioh tī竹phō內, góa kap a-pà tī菜園thóaⁿ草, péng塗......ná做ná開講. A-pà hiông-hiông kā góa考1-ê問題:「A妹á, 竹á ùi toeh來--ê?」Góa想想--leh, 應講:「天地生成--ê-lah!」Che是a公教--ê, siáⁿ-mi̍h tāi-chì若chhōe無答案, 就是「天地生成--ê」. |
|
A-pà hàiⁿ-thâu, kā góa kà-sī chi̍t-khùn, chiah kóng: “Sī ùi Tek-kok lâi--ê-lah, ‘tek’ tō-sī Tek-kok ê ‘tek’, lí tha̍k-chu lóng bô tha̍k thiat-té!” Thiaⁿ-liáu, góa chiok khim-phòe a-pà--ê, a-pà sui-bóng m̄-bat jī, m̄-koh ha̍k-būn ū-kàu hó--ê. Sūn a-pà ê ōe-bóe, góa mā liáu-kái ‘bí’ án-chóaⁿ kiò-chò ‘bí’ ---- sì ùi Bí-kok lâi--ê a. A-pà thiaⁿ kah chin móa-ì, o-ló kóng góa chèng-keng sī in kiáⁿ.
|
A-pà hàiⁿ頭, kā góa教示1-khùn, chiah講:「是ùi德國來--ê-lah, “竹”就是德國ê “德”, lí讀書lóng無讀徹底!」 聽了, góa chiok欽佩a-pà--ê, a-pà雖bóng m̄-bat字, m̄-koh學問有夠好--ê. 順a-pà ê話尾, góa mā了解“米”是án-chóaⁿ叫做“米”----是ùi米國來--ê a. A-pà聽kah真滿意, o-ló講góa正經是in kiáⁿ. |
|
Chin chē nî liáu-āu, koh siūⁿ-tio̍h a-pà ê『腦筋急轉彎』, góa koh ē chhiò kah oai-io--khì, góa the siūⁿ, ka-tī ē kui-kang “siūⁿ-khang siūⁿ-phāng” “pìⁿ-kúi pìⁿ-koài”, hoān-sè sī chéng-tio̍h goán a-pà!
|
真chē年了後, koh想tio̍h a-pà ê『腦筋急轉彎』, góa koh會笑kah歪腰--去, góa teh想, ka-tī會kui工「想孔想縫」「pìⁿ鬼pìⁿ怪」, hoān-sè是chéng-tio̍h goán a-pà! |
|
(TGB Thong-sìn tē 43 kî, 2003 nî 4 goe̍h)
|
(TGB通訊第43期，2003年4月) |
