Chha tiau kap chhoah tiāu
|
『擦掉』kap "chhoah-tiāu" |
| Tân Phek-siū |
陳柏壽 |
|
Kó͘-chá í-lâi Tâi-oân kap Tiong-kok ê koan-hē put-koh chi̍t hāng: "khioh-sòe". Tâi-oân-lâng chi̍t-nî-thàng-thiⁿ chò-gû-chò-bé, kap chāi-tē-lâng khan-chhiú chò-chhân kiàn-li̍p ka-têng, chí-ū chi̍t-ê kià-bāng: Beh chhōe-tio̍h sin-thian-sin-tē, beh tī Tâi-oân seⁿ-kin.
|
古早以來台灣kap中國關係不過一項：『khioh稅』。台灣人一年thàng天做牛做馬，kap在地人牽手作田建立家庭，只有一個寄夢：Beh chhōe著新天新地，beh tī台灣生根。 |
|
Tiong-kok lâi ê gê-mn̂g-tāi-jîn chi̍t-nî chi̍t-pái lâi kàu ūi siu-cho͘, chiong Tâi-oân-lâng ê chîⁿ, bí, chiuⁿ-ló, sán-bu̍t lóng khoán-khoán--leh tō tńg-khì『tn̂g-soaⁿ』. Mê-nî chiah koh lâi.
|
中國來ê衙門大人一年一擺來到位收租，將台灣人ê錢、米、樟腦、產物攏款款--leh tō轉去『唐山』。明年才koh來。 |
|
Múi chi̍t-pái tùi Hú-siâⁿ chhut-sûn, kàu múi chi̍t-ê tōa-chng sió-chng, lóng chok-ui-chok-ok, ui-hong-lím-lím. Ū chi̍t-ji̍t, thiaⁿ kóng tn̂g-soaⁿ-á tāi-jîn beh ji̍p-chng lah, tōa-tōa-sè-sè lóng khì chng-thâu-á hia, khiā tī hia tán. Kóng sī hoan-gêng, si̍t-chāi m̄-sī, sī kiaⁿ tōa-koaⁿ siū-khì nā-tiāⁿ.
|
每一擺對府城出巡，到每一個大庄小庄，攏作威作惡，威風凜凜。有一日，聽講唐山仔大人beh入庄lah ，大大細細攏去庄頭á hia,khiā tī hia等。講是歡迎，實在m̄是，是驚大官受氣nā-tiāⁿ。 |
|
Hūiⁿ-hūiⁿ-hūiⁿ (hn̄g-hn̄g-hn̄g) tō khòaⁿ tio̍h lòng-kó͘-lāng-tīn teh lâi. Hú-iâ kap i ê jiàu-pê-á bô gōa kú tō chhut-hiān tī chng-thâu. Lâng-lâng lóng m̄-káⁿ chhoán-khùi, koai-koai-á kūi tī hia.
|
遠遠遠tō看著lòng鼓弄陣teh來。府爺kap伊ê抓扒仔無外久tō出現tī庄頭。人人攏m̄敢喘氣，乖乖á跪tī hia。 |
|
Chhàu-tú-khám, chng-thâu lō͘-piⁿ ê pe̍h-hoe-piah, m̄-chai sī tó ūi ê kâu-gín-á iōng lo̍k-kô͘-á-moâi iah-sī gû-sái kā i ōe kah o͘-mà-mà, lah-sap-nî-niau. Tōa-iâ khòaⁿ chi̍t-ē ū kàu siū-khì. Tō kiò jiàu-pê-á lâi: "Cho su soe hu teh?" Jiàu-pe-á tō tōa-siaⁿ hoah: "Lín chit chng sím-mi̍h lâng siōng hô͘--ê ?"
|
Chhàu-tú-khám,庄頭路邊ê白灰壁，m̄知是tó位ê猴gín-á用lok-kô͘-á-moâi 抑是牛屎kā伊畫烏mà-mà,lah-sap-nî-niau。大爺看一下有夠受氣。Tō叫抓扒仔來：「這是誰糊的?」 抓扒仔tō大聲hoah:「恁這庄甚物人上鬍--ê?」 |
|
Lâng-lâng lí khòaⁿ góa, góa khòaⁿ lí. Khòaⁿ-lâi khòaⁿ-khì, chòe-āu tāi-ke kong-jīm hit-ê a-káu-peh--á sī lán chit-chng siōng-hô͘ --ê. A-káu-peh--á kiaⁿ kah phī-phī-chùn, N̄g ki kha lóng chài bē-tiâu. Lâi kūi tī tn̂g-soaⁿ tōa-iâ bīn-chêng..
|
人人你看我，我看你。看來看去，最後大家公認hit 個阿狗伯--á是咱這庄上鬍ê 。阿狗伯--á 驚到phī-phī-chùn,兩枝腳攏chài-bē-tiâu。來跪tī唐山大爺面前… |
|
"Cho su pu su ni hu teh?" Jiàu-pê-á tō mn̄g A-káu-peh--á:「Lí sī-m̄-sī lín chit chng siāng hô͘ --ê ?」 Hó-sí-m̄-sí, A-káu-peh--á in lāu-bú chin-chiàⁿ kā seⁿ choh chit chng siōng hô͘ --ê, i koh m̄-káⁿ kóng pe̍h-chha̍t. Phī-phī-chùn kā tāi-jîn kóng: 「Tāi-jîn--a, sī--lah! Góa mā m̄-chai sī án-nóa goán a-bú kā góa seⁿ choh chiah hô͘, chhiáⁿ tāi-jîn chhian-sòe khai-un sià-chōe lah!」
|
「這是不是你『糊』的？」抓扒仔tō問阿狗伯--á:「你是m̄是恁這庄上『鬍ê』？」好死m̄死，阿狗伯--á in老毋真正kā生作這庄上鬍ê,伊koh m̄敢講白賊。Phī-phī-chùn kā大人講：「大人--a,是--lah!我mā m̄知是按怎阮阿母kā我生作chiah鬍，請大人千歲開恩赦罪--lah ！』 |
|
Tn̂g-soaⁿ-á tāi-jîn thiaⁿ chi̍t-ē chin siū-khì. Hoah chi̍t siaⁿ: "Chha-tiau ! "
|
唐山仔大人聽一下真受氣，喝一聲：『擦掉！』 |
|
Jiàu-pê-á sûi-sî tō tōa-siaⁿ hoah kóng: 「Chhoah tiāu !」
|
抓扒仔隨時tō大聲喝講：「chhoah tiāu ！」 |
|
Khó-liân ê A-káu-peh--á bô-tāi-bô-chì kin-á-ji̍t soah khì hō͘ lâng thoa khì chhoah kah kng-kng-kng.
|
可憐ê 阿狗伯--á 無代無誌今仔日soah去hō͘人拖去chhoah kah光光光。 |
